Шимолий Америка. Шаклланиш тарихи, релъефи ва фойдали казилмалари - География - Рефераты

Шимолий Америка. Шаклланиш тарихи, релъефи ва фойдали казилмалари

Загружено в:

20.09.2019

Скачано:

0

Размер:

62.5 KB

Ш имолий А мерика: шаклланиш тарихи, рельефи ва фойдали қазилмалари Р е ж а: 1. Шимолий Американинг шаклланиш тарихи. 2. Геологик тузилиши ва табиатининг таркиб топиш тарихи хусусиятлари. 3. Рельефи. 4.Фойдали қазилмалари.

Америка қитъаси икки материк - Шимолий ва Жанубий Америка материкларини ўз ичига олади. Теуантепек ва Панама бўйинлари орасида жойлашган Марказий Американи Шимолий Америка ёки Жанубий Америкага киритадилар. Бутия ярим оролидаги Мерчисон бурни Шимолий Американинг энг шимолий нуқтаси, Аляска ярим оролидаги Принц Уэльс бурни энг ғарбий нуқтаси. Лабрадор ярим оролидаги Чарлз бурни энг шарқий нуқтасидир. Панама бурнини материкнинг жанубий чегараси деб хисобласак, материкнинг майдони 20360 минг км 2 ни ташкил этади. Гренландия 2176 минг км 2 ни, Канада Арктика архипелаги 1300 минг км 2 ни, Вест - Индия ороллари 2400 минг км 2 ва бошқаларни Шимолий Америка таркибига киритадилар. Кембрийдан олдинги структуралар. Шимолий Американинг заминида қадимги структура - архей-протерозой ядроси - Канада қалқонини ўз ичига оладиган Шимолий Америка платформаси ётади. Канада қалқони литологик таркибига кўра, Скандинавия қалқонига ўхшаб кетади. Канада қалқони жинслари кучли метаморфозлашган; шунинг учун ҳам ҳамма жойда кристалл тузилишдадир. Бу жинслар гранит-гнейс комплекси деб аталиб, таркибида кўп микдорда минераллар учрайди. Бу минералларда кўплари саноатда муҳим аҳамиятга эга. Кембрийдан олдинги даврлардаги каби, қуйи палеозой геосинклиналлари материк ядросининг чеккаларида доира шаклида жойлашган. Жануб ва жануби-шарқда Аппалачи геосинклинал области, шимол ва шимоли-шарқда Гренландия геосинклинал области ва нихоят ғарбда Кордильера геосинклинал области бўлган. Тошкўмир даврининг ўрталарида герцин бурмаланиши авж олади. Бу сафар тоғ занжирлари платформани асосан жануб ва шарқдан ўраб олади, ва эхтимол Атлантика океани орқали Европага ҳам етиб келган. Тоғ занжирининг хозирги материк ташкарисидаги шарқий қисми ва Мексика қўлтиғидан шимолдаги анчагина худудни эгаллаб ётган жанубий тармоғи йўқ бўлиб кетган. Уларнинг бурмали структураларини сув босиб кетган ва уларда ёшроқ жинс қатламлари чўккан. Герцин бурмаланиши даврида Аппалачи тоғларининг каледон структуралари кўтарилган. Палеозой эраси давомида Шимолий Америка каледонит ва герцинит структуралар билан Европага, Кордильера геосинклинали областида табиий равишда

пайдо бўлиб турган тоғ занжирлари орқали эса Осиё ва Жанубий Америкага бир неча марта қўшилган. Арктика районларида ҳам тектоник жараёнлар анчагина кучли бўлган. Палеозой охирларида ҳам бу ерда бурмали структуралар вужудга келиб, Канада Арктика архипелагининг шимоли-ғарбий қисмларини ҳосил қилган. Мезозой эраси давомида Атлантика океани ботиғининг тез вужудга келиши муносабати билан Шимолий Америка аста-секин Европадан ажралади. Материкнинг шарқидан герцин бурмаланишининг давоми тариқасида ҳам рўй беради. Лекин бу пайтда баланд тоғ тизмалари вужудга келмайди. Мезозойда Кордильера геосинклинали жуда тез тараққий эта бошлайди. Юра даврида бурмали структуралар ҳосил бўлади. Бу структуралар хозир ҳам бор. Ана шу бурмаланиш жараёнида рўй берган хол тоғ тизмалари Аляскадан Мексикагача давом этади. Бу бурмаланиш Осиёдаги киммерий бурмаланиши билан бир вақтда рўй берган бўлиб, Шимолий Америкада "Невади" бурмаланиши деб аталади. Кайназой эрасида табиатнинг тараққий этиши. Маълумот кам бўлганидан, Шимолий Америка ландшафтларининг мезозой охирларигача қандай типда бўлгани тўғрисида бир нарса дейиш қийин. Бунинг устига қуруқлик хозиргига нисбатан бутунлай бошқа шаклда бўлган. Бирламчи ва учламчи даврларда Шимолий Американинг катта қисми учун хозирги даврдагига нисбатан хийла нам ва илиқ иқлим шароити характерли бўлган. Палеоген ва миоценда материкнинг катта қисмида нам субтропиклар ва тропиклардаги хозирги ўрмонларга ўхшаш доимий яшил ўрмонлар асосий ўрин тутган. Материкнинг шимолий қисмларини каштан, бук, ликвидамбар, ва лола дарахти ҳамда баъзи бир доимий яшил турлар тургай флораси деб аталган флора қоплаб ётган, Алясканинг тоғли областларида неогенда Альп, тундра ва тайга турларидан иборат ўсимлик қоплами таркиб топган. Илиқ ва нам иқлим шароити оқар сувларнинг кўпайишига ёрдам берган. Бу эса текис юзалар вужудга келишига сабаб бўлган. Бундай юзалар текисликларда, ясси тоғликларда, Аппалачи ва Кордильера тоғларида эса айрим жойларда хали ҳам бор. Платформанинг айрим қисмлари ҳам вертикал равишда харакатга келади. Бор даври охиридан Аппалачи тоғлари, шимоли-шарқий Лабродор Гренландия кўтарила бошалйди. Қуруқлиқнинг бир қисми, айниқса материкнинг шимоли чўка боради.

Девис буғози ва Канада-Арктика архипелаги буғозлари вужудга келади. Материкнинг жанубида герцин структураларида чўкиш руй беради. Бу ерни аста-секин Мексика қўлтиғи сувлари қоплай бошлайди. Канада-Арктика архипелагининг шимоли- ғарбида ҳам худди шундай жараён рўй беради. Неогенда хозирги Беринг бўғози атрофларида қуруқлик майдон қисқаради. Материк хозирги қиёфасини олади. Бироқ Америка плейстоцен охирларигача Осиёдан ажралмайди. Гляциологлар Лаврентия музлиги деб атаган шарқий музлик эса кўп нам олган ва Атлантика океанидан келадиган ҳаво массалари туфайли тезда кенгая борган. Хар иккала музлик энг кўп ўсган даврда бир бирлари билан қўшилиб, материкнинг шарқий сохилидан ғарбий соҳилигача чўзилган муз қалқонини ҳосил қилган. Р.Флинт хисоига кўра, Лаврентий музлиги энг кенгайганда 13135 минг км.кв. майдонни, Кордильера музлиги 2500 минг км.кв. майдонни қоплаган. Шундай қилиб, музлик босган худуднинг умумий майдони 15,6 млн.кв.км бўлган. Бу эса Европадаги музликлар майдонидан 2,5 марта катта эди. Шимолий Амириканинг муз қалқони 40° шимолий кенгликкача етиб борган. Европадаги каби, бу ерда ҳам бир неча марта музлик бўлган. Бу музликлар уларнинг ётқизиқлари қайси штатларда учраса, шу штат номи билан аталади, яъни Небраска, Канзас, Иллинойс ва Висконсин музликлари. Музлик чекингандан кейин ўсимлик қоплами асосан бореал флора турларидан таркиб топа бошлаган. Шу билан бирга игна баргли ўрмон флораси элементлари ва ғарбдан келган Арктика-Альп турлари энг кўп тарқалган. Айни вақтда Европадан ҳам баъзи бир ўсимликлар кириб келган. Тундра, тайга, даштлар, аралаш ва кенг баргли ўрмон ландшафтлари анчагина худудни эгаллаган. Жанубий қисмида ўзгариш у кадар катта бўлмаган ва бу ерда қуруқлик орқали қўшилиб турган марказий ва жанубий Америка ўсимликларига ўхшаш бўлган ўсимликларнинг қадимги элементлари яхшироқ сақланиб қолган. Музлик қоплами таъсирида материкнинг шимолий қисмида тупроқ бутунлай йўқ бўлиб кетган, шунинг учун бу ерда тупроқлар аслини олганда янгидан пайдо бўлган. Худуднинг каттагина қисмида ландшафтлар характерига кўра асосий тупроқ ҳосил қилиш жараёнлари тундра-глейли, подзолли ва чимли жараёнлар бўлган. Жанубий районда латеритлашиш жараёни давом этади. Хайвонот дунёси эволюцияси ўсимлик қоплами тарихига ўхшайди.

Бунда Осиё билан қўшилиб туриш ҳам мухим роль уйнаган. Кайнозой давомида кўпгина хайвон турлари Осиёдан кириб келган. Энг қадимги турлар Кордильера ва Аппалачи тоғларининг сернам ва илиқ жойларида сақланиб қолган. Геологик тараққиёт жараёнида Шимолий Американинг йирик тектоник областлари: Канада қалқони ва плитасини ўз ичига олган Шимолий Америка платформаси, палеозой (каледон ва герцин) бурмали структуралари, эпигерцин платформалар, Кордильеранинг мезокайназой бурмали структуралари таркиб топган. Кордильеранинг энг ёш тизмалари ва водийларидан ташқари, ана шу структуралар билан бирга пайдо бўлган рельеф шакллари йўқ бўлиб кетган. Бундай шакллар ер пўстининг кейинги харакатлари, денудация жараёнлари ва чўкинди тўпланиши натижасида кучли ўзгарган. Шунга қарамасдан, бу областлардан хар бирининг тектоник негизининг ўзига хос хусусияти хозирги рельеф тараққиётининг ўзига хос йўлларини белгилаб берган. Шунинг учун тектоник областлар морфоструктура районларнинг энг йирик категориялари бўлиб, гипсометрик картада яққол кўриниб туради. Материкнинг шимоли-шарқидаги Канада қалқони Шимолий Американинг энг катта структура областидир. Бу ерда 7 млн.км.кв майдонда архей-протерозой кристалл жинслари ер юзасига чикиб ётади. Қалқон шаклан тоғларга ўхшайди: унинг марказий қисмлари чўккан, чеккалари эса айниқса шарқий чеккалари анча кўтарилиб қолган. Қалқоннинг материкдаги бутун қисми рельефда Лаврентий ясси тоғлигидан иборат. Ясси тоғлик ер юзасининг хусусиятлари, асосан, узоқ давом этган денудация ва тўртламчи давр музликлари билан боғлиқ. Ясси тоғликнинг катта қисмида музлик экзарацияси шакллари музлик-аккумуляция шаклларидан устун туради; ясси тоғнинг баландлиги 150-160 м. Ер юзаси ўр-қир, тўртламчи давр ётқизиқлари қалин эмас; ботқоқликлар ёки кўлли ботиқлар ва қуриб қолган кўллар ўрнида пайдо бўлган гилли текисликлар кўп учрайди. Қалқоннинг ороллар қисмидаги ясси тоғликлар жуда парчаланиб кетган Баффин Ерининг шарқий соҳилини, Девон оролини ва Элсмир оролининг бир қисмини ҳосил қилган қатор палахсалар Лабрадор тоғларининг давомидир. Баффин денгизининг чуқур ботиғи бу зонани Канада қалқонининг шарқий чеккасидан ажратиб туради. Гренландиянинг катта қисми Канада қалқонининг ана шу шарқий чеккасидадир.

Шимолий Америка платформаси плитасининг рельефи анча ясси. Плитанинг шимоли-ғарбий қисмлари қуйи палеозой чўкинди жинсларидан таркиб топган ва буғозлар ҳамда қўлтиқлар орқали қатор орол ва ярим оролларга бўлинган паст ва бир оз юксак зинасимон платолардан иборат. Марказий текисликлар қалинлиги тахминан 1000 м бўлган палеозой чўкинди жинслардан таркиб топган. Бу жинслар асосан, охактошлар, қумтошлар, кварцитлар, конгломерат ва гилли сланецлардир. Тошкўмир даврида пайдо бўлган жинслар айниқса катта майдонни эгаллайди. Қатламларнинг асосан моноклинал ётиши натижасида текисликларнинг чекка қисмларида кауэста зиналари ҳосил бўлган. Тоғ олди структуралари Аляскагача кўзга ташланади. Ана шу структуралар камбар Аляска платосини ҳосил қилади. 61° шимолий кенглик билан 69° шимолий кенглик орасида бу структуралар анча емирилган. Катта қисми кенг дарё водийлари билан банд, бу худуд Макензи пасттекислиги деб аталади. Уошито паст тоғларида ташқари, палеозой бурмали структуралари Гренландиянинг шимолида ва шимолий шарқида, Аппалачи, тоғлари атрофида кейинги даврларда яна кўтарилган. Элсмир оролидан Гренландиядаги Сорсби кўлтиғигача ва Ньюфаундленддан АҚШ нинг Алабама штатигача чўзилган икки тоғ занжири ана шу харакатлар натижасида пайдо бўлган. Каледонидларнинг шимолий минтақаси анча хилма-хилдир. Шимолий Гренландия ва Элсмир ороли тоғлари Каледонитларнигина эмас, балки юқори палеозойнинг хали кам ўрганилган структураларини ҳам ўз ичига олади. Бу структуралар баланд (3000 м гача бўлган) Альп шаклли тоғлардир. Аппалачи - мураккаб қадимги структурали ўртача баландликдаги тоғлардир. Бу тоғларнинг шимолий қисми деярли ҳамма жойда метоморфик жинслар билан қопланган бўлиб, асосан каледон ёшидаги геосинклинал структурага эга. Бу тоғлар мезозой ва кайнозой эраларда анча қадимги қзилмалар юзалари бўйлаб кўтарилган ва хозирги вақтда баландлиги 1000-2000 м бўлган кенг тектоник водийлар билан бўлинган айрим-айрим массивлардан иборат. Қоплама музлик туфайли массивлар гумбаз шаклида, водийлар эса тоғора шаклида бўлиб қолган. Қирғоқ буйи пасттеккисликлари рельефининг хусусиятлари худуднинг тезда эпирогеник чўкиши ва айни вақтда кўпдан - кўп дарёларнинг кучли геологик фаолияти билан боғлиқ. Бу дарёлар пасттекисликнинг ички қисмларини ювиб, унинг чеккасида кўп миқдорда оқизиқлар тўпламоқда. Геология тарихининг сўнгги

босқичлари давомида океаннинг қирғоқ чизиғи бир неча марта ўзгарган ва бу эса пасттекисликларда шельфнинг ер юзаси характерига кучли таъсир кўрсатган. Пасттекисликларнинг юзаси кўпдан-кўп дарё водийлари билан ўйилган. Бу дарё водийларининг этаклари эстуарий шаклидадир. Кўпгина водийлар шельфда сув ости каньонлари шаклида давом этади. Қирғоқ бўйи пасттекисликлар Атлантика бўйи пасттекислиги ва Мексика бўйи пасттекислигини ўз ичига олади. Мексика бўйи пасттекислиги Миссисипи дарёсининг кенг аллювиал пасттекислиги билан бўлинган икки қисмдан иборат.

Фойдаланишга тавсия этиладиган адабиётлар 1. Ермаков Ю.Г. и др. Физическая география материков и океанов. М: Высшая школа, 1988. 2. Рябчиков А.М. Физическая география материков и океанов. М: Высшая школа, 1988. 3. Физическая география мирового океана. М: Издательство Московского Университета, 1988. 4. Рябчиков А.М. Дунё қитъалари табиий географияси, Тошкент, 1968. 5. Власова Т.М. Физическая география материков и океанов. Том I - II , М: Просведение, 1976. 6. Власова Т.М. Материклар ва океанлар табиий географияси. I - II том.Тошкент, 1985. 7. Леонтьев О.К. Физическая география мирового океана. М: 1982. 8. Энциклопедицеский словарь географических терминов. М: 1968. 9. www.ziyonet.net

Похожие

Жанубий Америка. Шаклланиш тарихи. Релъефи ва фойдали казилмалари

Австралия шаклланиш тарихи релъефи ва фойдали казилмалари

АФРИКА. Шаклланиш тарихи. Релъефи ва фойдали казилмалари

Осиё - шаклланиш тарихи, рельфи, фойдали казилмалари

Европанинг шаклланиш тарихи. Рельефи. Фойдали казилмалари