Христианлик - Основы религиоведения - Рефераты

Христианлик

Загружено в:

20.09.2019

Скачано:

0

Размер:

83.5 KB

Христианлик Режа: 1. Христианликнинг келиб чикиш тарихи 2. Библия (Инжил) - христианликнинг муқаддас манбаи. Исо тўғрисидаги тасаввур ва ривоятлар

Христианликнинг келиб чикиш тарихи Жаҳон динларидан бири Христианлик бўлиб, бу диннинг номи Ииусис Христос, бола худо - пайғамбар номидан олинган. Дунёдаги барча христианлар Ииусис Христос (Исо)нинг умматлари ҳисобланадилар. Ҳозирги даврда христианлик энг кенг тарқалган дин бўлиб, Америка, Австралия, Европа, Осиё қитъаларида ва бошқа жойларда 2 миллиард христианлар мавжуд. Бу дин монотеистик ва жаҳон динидир. Христианлар дунёнинг 254 мамлакатида яшайдилар. Христианлик янги эранинг 1 асри ўрталарида Рим империясининг Шарқий вилоятлардаги Иудея (ҳозирги Исроил), кичик Осиё (ҳозирги Туркия) ва Фаластин ҳудудларида яшайдиган мазлум халқлар ва қуллар орасида иудаизмнинг фирқаси сифатида пайдо бўлиб, сўнгра ундан ажралиб чиқди ва янги динга айланди. Христианлик тарихи яхши тадқиқ этилган. Жумладан, Инжилда, Иоан Богословнинг «Ваҳийнома» асарида, Б.Спи-нозанинг «Илоҳиёт ва сиёсатга оид рисола»сида, Л.Фейербах-нинг «Христианликнинг моҳияти» асарида ва бошқа манбаларда христианликнинг келиб чикиш тарихи, унинг ақидавий таълимоти, маросимлари, аҳлоқий ва ҳуқуқий қарашлари, ривоятлар баён этилган. Христианлик 325 йилда Рим империясида расмий мафкура ва давлат дини деб расмий равишда эълон қилинган эди. Христианлик расман тан олинган даврдаги тарихий шарт-шароит қуйидагича эди: 1. Рим қулдорлик давлатининг қулларга ва босиб олинган мазлум халқларга нисбатан қаттиқ жабр-зулм қилишига қарши олиб борилган озодлик урушлари ва қўзғолонлар бирин-кетин мағлубиятга учраб, улардан шафқатсиз ўч олиниб жазолашлар оқибатида умумий руҳий-маънавий инқироз пайдо бўлган. Қуллар синфидан бўлган Спартак етакчилигида эрамиздан аввалги 73-71 йилларда Римдаги қўзғолон бостирилгач, 6 минг қул Римга олиб борадиган йўллар четига қурилган хочларга михлаб ташланган.

Шун-дан кейин қуллар билан мазлум халқлар тез орада самовий ҳалоскор - пайғамбар Исо келиб бизни озод қилади, сабр-тоқат қилиш, ибодат билан шуғулланиш керак, деб янги динга умид боғладилар. Ўша фожеа оқибатида умумий умидсизлик авж олган. Спартакнинг мағлубияти, - деган эди тарихчи Шарль Энтен, - Исонинг ғалабаси эди. 2. Қачонлардир шон-шуҳратга, куч-қудратга тўлиб-тошган Рим қулдорлик давлати эрамизнинг I-III асрларига келиб инқирозга юз тутди. Қулчилик ўрнига феодал тартиблар ўрнатила бошланди. Қулдорлар ва бошқа юқори табақалар орасида ижтимоий айниш кучайиб, маънавий бузилиш, айшуишратга берилиш ўсиб борди. 3. Рим давлати ҳудудларида яшаётган турли уруғлар, қабилалар, элат ва халқлар ўз худоларига, пайғамбарларига, урф-одатларига сиғинар эдилар. Ғоявий-мафкуравий бирлик бўлмаганлиги ҳам Рим қудорларига халқ устидан сиёсий ва ғоявий ҳукмронлик қилишни тобора қийинлаштирарди. Рим давлати учун ягона худо, ягона пайғамбар, ягона дин асосидаги мафкура зарур эди. Бу аҳвол шаклланиб келаётган христианлик жамоаларига эркинлик бериш, уларда клирларнинг раҳбарликни қўлга олиши, ана шу максадни ифодалайдиган ақидалар ишлаб чиқишга олиб келди. Худди ана шу учта тарихий сабабга кўра христианлик нисбатан тезроқ шаклланиб борди, у кўпчилик орасида кенг тарқалди, юқори ва қуйи катламдаги кишилар орасида эътиқод, иймонга айланди. Янги дин юқори табақа учун мазлумлар устидан ҳоким бўлиш йўлларини очиб берди, халқни эса тинчлантирди. Христианлик ўз-ўзидан пайдо бўлмаган. Унинг фалсафий-мистик назарий асосини яҳудий файласуфи, Александриялик Филоннинг фалсафий таълимоти, Рим стоикларидан Сенека-нинг фалсафаси ташкил қилади. Христианлик бевосита яҳудий миллий диннинг кўп хусусиятларини мерос қилиб олди. Унда қадимги Шарқ динларининг кўпдан-кўп унсурлари қайта ишланган ҳамда ўзлаштирилган.

Масалан, қадимги Ҳиндистон-нинг ҳиндуизм динидаги уч қиёфа билан намоён бўладиган худолар: Брахман, Вишну, Шива христианликдаги уч қиёфали ягона худо (ота худо, муқаддас руҳ, бола худо) шаклида тасаввур этилган. Христианлик ибодатларида шам ёқиш оташпарастлардаги оловга сиғиниш, авлодлар руҳи-арвоҳига жин чироқ ёқиш одати; тотемизм динидаги тотем ҳисобланган ҳайвонлар гўштини истеъмол қилиш ва у билан қон ва тана орқали янада яқинлашиш расм-русуми; фетишизмдаги айрим предмет ва нарсаларни илоҳийлаштириш эса христианликдаги бутпарастликда яққол намоён бўлади. Хусусан, файласуф олимлар Сенека билан филонларнинг фалсафий- аҳлоқий қарашларининг христианлик мафкурасини ишлаб чиқишга кўрсатган таъсирига алоҳида тўхталиб ўтиш керак. Сенека (эр.ав. 4 йилда туғилган ва янги эранинг 65 йилида вафот этган) ўз фалсафасида моддий бойликлар тўплаш, ноз-неъматларни истеъмол қилиш кабиларни бу дунёнинг беҳуда оворагарчиликлари деб эълон қилиб, улардан воз кечишни тарғиб килади. У бу талабни жонни қутқариб қолиш йўлидаги биринчи қадам деб билди. Дунё, Сенеканинг фикрича, инсониятни келаётган ҳалокатдан қутқариб қолишга қудрати бўлган илоҳий ҳокимга муҳтождир. Филон (эрамиздан аввалги 1 асрнинг охири, янги эранинг биринчи ярмида яшаган) грек-рим фалсафасини яҳудий дини билан қўшишга уриниб, худо билан одамлар ўртасида турувчи илоҳий воситачи борлиги ҳақидаги таълимотни ишлаб чиққан эди. Бу воситачи «Калони худо» бўлиб, у кишиларни тўғри йўлга солиб юбориш ва уларни ҳаммадан қудратли худо билан таништириш учун тангрининг ерга юборган фарзандидир. Христианлик евангелияларини (ҳадисларини, хушхабар-ларини) ёзган авлиёлар Сенека ва Филоннинг бу ғояларидан фойдаланганлар. XIX асрда Германияда яшаган диншунос олим Б.Бауэр умрининг охиригача мана шу масала билан шуғулланиб келди.

У ўз тадқиқотларига якун ясаб, қуйидаги хулосага келди: «Йил ҳисобимизнинг 40-йилида яшаган Искандариялик яҳудий Филон жуда ҳам қариб қолган чоғида Христианликнинг ҳақиқий отаси бўлди, римлик Стоик Сенека эса, христианликнинг амакиси бўлди». Стоиклар фалсафаси қадимги Грецияда эрамиздан аввалги IV асрдан янги эранинг IV асригача давом этган. Рим империяси даврида стоиклар фалсафаси диний фалсафага айланди. Стоиклар аҳлоқ масалаларига кўпроқ эътибор бериб, уни тақдирга ишониш руҳида талқин этдилар. Улар жоннинг танадан ташқарида яшашини, инсоннинг тақдирига тан беришини, зоҳидлик кабиларни ҳимоя қилиб чиқдилар. Стоиклар таълимоти христиан динининг аҳлоқини шаклланишига катта таъсир кўрсатади. Мана шу икки файласуф, яъни Сенека билан Филон таълимотлари асосида шаклланган дастлабки Христианлик ақидаларида одам туғма гуноҳкор эканлиги; ҳайвонларни қурбонлик қилиш йўли билан эмас, балки ўз қалбини худога қурбон қилиш йўли билан тавба қилиш; дунёвий роҳатларнинг ҳаммасига нафрат билан қараб, нафсни тийиш; у дунёдаги яхши турмушга умид қилиш; одам ўлдирмаслик, яқин кишиларига яхшилик қилиш ғоялари шаклланган эди. Христианликнинг халқ орасида тез тарқалишига Рим давлатининг қўл остида бўлган шарқ мазлум халқларининг диний руҳиятига мос бўлган қадимги Шарқ динларидан фойдаланганлик ҳам тасъир қилди. Масалан, Мисрнинг қадимги Худоси Озирис ўлиб-тирилиш рамзи бўлган деҳқончилик худоси эди. Шу сабабга кўра, Мисрда христианлик тарқалганда хочга тортилиб ўлган, сўнгра қайта тирилган Исо ҳақидаги ақидага Миср халқи тезгина ишонди. Ривоятга кўра, Озирис ўз акаси-ёвузлик худоси Сед билан бўлган урушда ҳалок бўлади. Озириснинг хотини Изида Озирисдан ҳомиладор бўлган ҳолда вафот қилади. Аммо нариги дунёда Изида қайта тирилиб ўғил туғади, унга Гор деб исм қўяди ва ўз ўғли билан яна бу дунёга қайтиб келади. Гор урушиб Седни енгади ва Озирисни тирилтиради. У бутун дунёда адолатнинг қозисига айланади.

Худди шунга ўхшаб Исо ҳам қайта тирилиб, осмонга чиқиб кетган ва у яна Ер юзига қайтиб келиб минг йиллик адолат ўрнатади, деган ақида христианлар орасида тарғиб қилинади. Зардўштийликдаги ёруғлик, яхшилик ва ҳаёт худоси Ахурамузданинг ёвузлик, зулмат ва ёмонлик худоси Ахримон устидан ғалаба қилиши; Эронликларнинг ёруғлик худоси Митранинг образи ҳам Рим ҳудудларида кенг тарқалган бўлиб, бу ғоя ҳатто дастлабки даврларда христианликнинг жиддий рақиби бўлган. Биби Марямнинг Исога ғойибдан ҳомиладор бўлиши ҳақидаги таълимоти ҳам шарқий динлар таъсирида пайдо бўлган. Масалан, Будда, Сурия подшоси Саргос, Миср худоси Гор ва бошқалар ғойибона ҳомила натижасида туғилганликлари ҳақидаги ривоятлар таъсирида Биби Марямда ғойибона ҳомила пайдо бўлиб кейин Ииусис Христос (Исо) туғилган, деган тасаввур вужудга келганлигига ҳеч шубҳа қилинмаса ҳам бўлади. Шундай қилиб, христианлик қурама дин бўлса ҳам, унда ўзига хос бўлган кўпгина хусусиятлар ҳам мавжуд. Янги белги ва хусусиятлар ўша даврдаги бошқа динлардан христианликни юқори туришига олиб келган. Христианликнинг ўзига хос хусусиятлари қуйидагилардир: Биринчидан, христианлик Рим империяси ҳудудларида мавжуд бўлган диний-этник тафовутларни бартараф қилган; Иккинчилан, христианлик диний расм-русумларни ва ҳокимлик пиллапояларини йўқ қилганлиги сабабли бу динни қуллар, озод қилинган собиқ қуллар, заминдор колонлар, шаҳар ва қишлоқ камбағаллари ёқтириб қолганлар. Улар худо ва дин олдида юқори табақалар билан тенг бўлганликларидан хурсанд эдилар; Учинчидан, христианлик дастлабки таълимотларида одамларнинг ирқий, миллий, жинсий, ижтимоий, табақавий томонлардан ҳуқуқий тенгсизлик асосида ажратиши қаттиқ танқид қилиниб, демократик руҳга эга бўлган, у «заҳматкаш-ларни» қутқаришга ваъда берганлиги учун, христиан руҳонийлари бу динни энг инсонпарвар дин, деб кенг тарғиб қиладилар. Одатда, Христиан дини Исо инқилоби бўлди, деб ташвиқот этилади.

Маълумки, жамият тарихида ҳамма ижтимоий даврларда ҳам кўпчилик кишилар камбағал, қашшоқ, маданиятда ва билимда анча орқада қоладилар ва аксинча, озчиликни ташкил этадиган бой-бадавлат, маданиятли ва билимли кишилар мавжуд бўлади. Христианлик гарчи «христиан маданияти»ни ривожлантирган бўлсада, у дунёвий мазмундаги антик маданиятга нисбатан салбий муносабатда бўлди, черковнинг мистик маданияти руҳида одамларга эстетик тарбия беради. Христианлик яширин жамоаларига юқори табақа вакиллари ҳам киргандан кейин улар бу жамоаларда раҳбарликни қўлга олдилар. Уларда клирлар, яъни епископ, поп, дъякон, прасвитер - руҳоний отахонлар таъсири кучайиб борди. Дастлабки даврларда Христиан жамоаларида, асосан, камбағал кишилар, хусусан, қуллар кўпчиликни ташкил этган. Клирлар раҳбарлигида ўрмонларда, ташландиқ вайроналарда, айрим хонадонларда яширин ўтказиладиган йиғилишларда ғойибдан самовий ҳалоскор пайғамбарнинг келаётгани тўғри-сида суҳбатлашганлар, муқаддас китобларни ўқиб муҳокама қилиб, изоҳлаш, эҳсоний овқатланиш маросимлари, яъни кечки пайтдаги биргаликда овқатланишлар ўтказиб келинган. Лекин у вақтларда мол-мулкни тўла умумлаштириш, жамоа бўлиб меҳнат қилиш тўғрисида гап бўлмаган. Христиан жамоалари ичида қаттиқ интизом ўрнатилган. Исонинг қайтиб келишини пассив равишда кутиш ва мўмин-қобил бўлиб юриш, бу дунёда адолат ўрнатилиши мумкин эмаслигига, у дунёда эса бахтга эришишга ишонч орта борган сари бу динга ҳукмрон табақалар ҳам ихлос қўйдилар. Бу ўзгаришлар христиан жамоаларини яширин ҳолатдан очиқ ҳолатга ўтиб фаолият кўрсатишга олиб келди. Император Константин 313 йили христианларнинг таъқиб қилишни бекор қилди ва 325 йили христианликни Рим империясининг давлат дини даражасига кўтарди. 325 йили Константин бошчилигида Никей шаҳрида христианларнинг 1-жаҳон йиғилиши бўлди. Йиғилиш христиан динининг қонун-қоидаларини ишлаб чиқди.

Худони уч шахснинг (ота худо, мукаддас руҳ, ўғил худо) бирликда ифодаланиши қабул қилинди. 381 йили христианларнинг Константинополда бўлиб ўтган 2-жаҳон йиғилишида чўқиниш ва қайта тирилиш ҳақидаги янги ақида қабул қилинди. Христианлик давлат дини бўлгач унга жуда кўп ҳуқуқ ва имтиёзлар берилди. Жумладан, барча шаҳар ва қишлоқларда руҳонийлар «руҳоний оталар» сифатида халққа христианлик хизматини ўтказиш, диний маросимларга раҳбарлик қилиш, диний таълим бериш, тарғибот қилиш, халқ устидан маънавий назорат ўрнатиш, черков мол-мулкини, тушган хайр- эҳсонларни тасарруф қилиш, ўз шахсий бойликларига эгалик қилиш ҳуқуқларига эга бўлдилар. Мамалакатда черков, монастир, костёл каби диний ташкилотлар учун ҳашаматли бинолар қурилди. Улар қўнғироқлар, ҳайкаллар, иконалар, бутлар, минбарлар, диний адабиётлар, биодат буюмлари, предметлари билан безатилди, мусиқа асбоблари, муножот қўшиқлар айтадиган хор жамоалари юзага келтирилди. Диний мактабларда, монастирларда кўплаб руҳоний роҳиблар ва роҳибалар бўлиб, уларда ер майдонлари, ҳунармандчилик, тўқимачилик цехлари вужудга келтирилди. Диний ташкилот-лар обрўси ортиб бориб турли лавозимлар (масалан Рим папаси, кардинал, патриарх, аббот, архиепископ, поп, епископ кабилар вужудга келди. Ҳатто ўрта асрларда католик диний ташкилотлари маҳаллий ҳокимларга бўсунмаслик даражасига етиб борди. Оила-никоҳ, ажралиш, судлов ишлари ҳам аста-секин диний ташкилотлар ихтиёрига ўтиб кетди. Масалан, Рим папаси Ғарбий Европадаги давлатларнинг ички ишларига католик черковлари воситасида аралашарди. Абботликлар эса Рим папасининг ана шу давлатлар ичидаги таянчи бўлиб қолди. Дин мустақил маънавий кучга айланиб, одамлар фикри ва руҳияти устидан ҳоким бўлиб қолди.

Библия (Инжил) - христианликнинг муқаддас манбаи. Исо тўғрисидаги тасаввур ва ривоятлар Библия (Инжил) мудаизм ва Христианлик динларининг умумий муқаддас манбаи ҳисобланади. Библиянинг эрамиздан аввалги даврларда яратилган қисми Таврот бўлиб, уни «Қадимий аҳд» дейилади. У яҳудий миллий динини асослаб берган эди. Библиянинг «Янги аҳд» деган қисми христианликни асослаб берган муқаддас манба ҳисобланади. «Янги аҳд» инжилномалар тўплами бўлиб, уларни Исонинг апостоллари (яқин ёрдамчилари) Матфей, Марк, Луко ва Иоанн, шунингдек, яна 21 та инжилномаларини бошқа авлиёлар ёзишган, деган маълумотлар сақланиб қолган. Ушбу инжил номалари асосида Иоанн Богословнинг «Ваҳийнома»си яратилган. Уни илмий ўрганилганда христианликка оид инжил номалари яҳудий диний адабиётига, черков қонун- қоидаларига тўғри келмайдиган Мусо, Ёнох, Ездра ва бошкаларнинг ваҳийномаларига бевосита ўхшашлиги исботланган. Бироқ христиан илоҳиётчилари «Янги аҳд»ни худо Исога юборган деб ҳисоблаб, Инжил номаларини христианликнинг турли оқимлари манфаат-мақсадларига мослаб турли даврларда турли муаллифлар томонидан ёзилганлигини инкор этадилар. Христианликнинг биринчи ёзма ёдгорлиги тахминан эрамизнинг 68- йили иккинчи ярми ва 69-йили биринчи ярмида ёзилган Апокалипсис (Иоанн Богословнинг «Ваҳийномаси) эди. Христианлик яҳудий динидан ажралиб, ундан тобора узоқ-лашиб, Рим империясидаги турли миллатлар орасида ёйила-верди. Бу жараён апостоллар (саҳобалар)нинг номаларида ўз ифодасини топган. Уларни апостоллардан Пётр, Иуда, Иоанн, Иаков ва Павел ёзган деб таҳмин қилинган. Инжилномалар текширилганда, улардан баъзилари ибодат дуолари тўплами бўлса, баъзилари эса христиан аҳлоқ- одобига бағишланганлиги аниқланган. Бу номалар I асрда ва II асрнинг 30- 40 йилла-рида пайдо бўлган.

Мазкур номаларда христианлик яҳудий динидан фарқ қилиши, бу фарқ христианлик черкови ва бошқа ташкилотларнинг вазифалари хусусидаги фикрлардан ҳам сезилиб туради. Бу номаларда ғойибдан ҳомиладор бўлган Биби Марямдан туғилган ва хочга тортилиб қатл этилган одам қиёфасидаги худо Ииусис Христос тўғрисида маълумотлар бор. Исо Қуддус, кана, Кафарнаҳум, Байтлаҳм, Носира шаҳар-ларида ваъз айтган. Иордан (Ўрдун) дарёсида чўқинтирилган. Жалила (Генисарет) кўли бўйида ҳалойиққа панд- насиҳат қилганлиги тўғрисида Инжилда ёзилган. (Қаранг: Инжил. Туркия. Муқаддас китоб жамияти 1995 й 25-30 бетлар). Эрамизнинг II-III асрларида христианликнинг турли жамоаларида бир неча ўнлаб турли инжиллар мавжуд бўлган. Кейинги руҳонийлар Рим империясида христианлик ҳукмрон динга айланган босқич учун энг мақбул бўлганларини, ўз ижтимоий дастурларига тўғри келадиганларидан 4 тасини танлаб олганлар. Инжилларни танлаб олинганда Рим тарихи, ҳуқуқи, турмуши, географиясини, урф-одатларини яхши ҳисобга олинганлиги кейинчалик маълум бўлган. Шунинг учун инжиллар бир неча марта қайта ишланган. Рим давлати талабларига мослаштирилган. Черков пиллапоялари ташкил топгандан кейин Исо қатл қилиб ўлдирилган ва у қайта тирилиб осмонга чиқиб кетгандан кейин III аср бошларида «Янги аҳд» нинг сўнгги китоблари - Авлиё апостоллларнинг амаллари ёзилган. Унда апостолларнинг олий руҳонийлик амали бўлган епископлик ва бошқа руҳонийлик унвонларини бевосита Исонинг ўзи уларга инъом қилганлиги ҳақида кўп гапирилган. Шундай қилиб «Янги аҳд» эрамизнинг I-IV асрларида вужудга келтирилиб, христианликнинг муқаддас манбаи сифатида қабул қилинган. Ииусис Христос тўғрисидаги ривоятлар ундаги эътиқод, ишонч христианликдаги асосий таълимот дейиш мумкин. 1948 йилда Ўлик денгиз яқинидаги фаластин маркази Хирбет Қумран ғорларидан тасодифан топиб олинган ҳужжатларга асосан Исо тарихий шахслиги тўғрисида газеталарда шов-шувга сабаб бўлган мақолалар эълон қилинди.

«Қумрон қўлёзмала-ри» деб аталган бу ҳужжатлар христианлик тарихига қизиқиш-ни кучайтириши аниқ эди. Исо Исроил фарзандларига (қадимги яҳудийлар ўзларини шундай деб атаганлар) худо томонидан юборилган пайғамбар бўлиб, Илоҳий ҳалоскор мессия («машиах» деган қадимги яҳудийча сўздан олинган бўлиб, «Помазонник», яъни илоҳий ҳалоскор, худонинг вакили демакдир) тез орада келишини аллақачон башорат қилганлар. Айтишларича, у инсониятни барча гуноҳлардан халос этиш ва ўз жонини қурбон қилиб бошқаларнинг гуноҳини ювиши керак экан. У ёвузларни ва адолатсиз кишиларни жазолайди, одамларга янги қонунлар беради. Ер юзида розат-вароғат, адолат ўрнатади. Қудратли мессия севимли Исроил халқига бош бўлиб, уни ташқаридан келган римлик истилочилардан озод қилади, деб тасаввур этилган. Инжил ривоятларига кўра, яҳудиянинг Назарет вилоятидаги Вифлеем шаҳрида яшайдиган яҳудий Юсуф (Иосиф) фаришта Жаброил томонидан «муқаддас руҳ»дан унинг хотини Биби Марям бўлажак пайғамбар Исони туғиши ҳақида олдиндан огоҳлантирилган. Марям олдига муқаддас руҳ келади. Ундан Исо туғилади. Исони онаси Марям Вифлеем шаҳри яқинидаги ғорда туғади. Яҳудиянинг подшоси Исонинг туғилганидан хабардор бўлган. Ўша вақтдаги подшо Ирод Вифлеемда туғилган барча гўдакларни ўлдиришга фармон берган. Бироқ, худо томонидан юборилган фаришта Исони, онасини ва барча Юсуф оиласини Ироддан яшириб Мисрга яширин ҳолда ўтказиб юбориб қутқариб қолади. Шундан кейин Исони ҳеч ким кўрмайди ва фақат 30 ёшга киргандан кейингина Исо халққа кўриниш беради. Шундан бошлаб, Исо ўз тарғиботчилик фаолиятини бошлайди. У бир қанча содиқ шогирдларини-апостолларни ўз ёнига олиб, улар билан бирга янги динни тарғиб қилиш учун бутун мамлакат бўйлаб сафарга чиқади. Худди шу вақтда апостол Иоанн ҳалоскорнинг келганлиги тўғрисида хабар тарқатади. Исо ва унинг шогирдлари Иордан дарёси яқинида Иоанн билан учрашиб қоладилар.

Иоанн уларни Иоардан дарёси сувида ювинтириб, чўқинтиради. Иоанн Исони чўқинтираётган пайтда осмондан нидо келиб: «бу менинг севикли ўғлим, менинг илтифотим ана шунда», деган овоз эшитилган эмиш. Бу тўғрида апостол Матфей ёзган инжилнинг 3-сура, 17-оятида ёзилган. Исо ўз фаолиятида мўъжизалар кўрсатган: жумладан, у ўликни тирилтирган, кўрларни, майиб-мажруҳларни даволаган, жиннилардан инс- жинсларни ҳайдаб чиқарган, қутириб тўлқинланиб турган Тевериадия кўли тўлқинларини устидан чўкиб кетмасдан юриб келган. Исо ўз сафдошлари билан ҳамма жойда коҳинлар қўллаб-қувватлаб турган Исроил давлат дини иудаизмни қаттиқ танқид қилиб юрганлар. Рассомлар Исонинг елкасига қизил елкапўш-плашч ёпинган, яланг оёқ, сочлари ўсиб елкасига тушган ҳолда биринчи марта халққа кўриниш беришини, кўл устидан келаётганини, унинг онаси қўлида турган гўдаклигини, Мисрга от миниб қочиб кетаётган Марям ва боласининг расмларини ишлаганлар. Ҳайкалтарошлар эса Исонинг хочга михлаб ўлдирилаётган пайтдаги азобланиб турган ҳолатини ишлаганлар. Бу расм ва ҳайкаллар кўпгина черков ва монастирларда, китоб ва журналларда, иконаларда ифодаланган. Бу нарсалар фетишизмга айланиб, музейларда намойиш этилган. Исо дастлабки вақтларда иудаизм динининг инсон ҳаётини чулғаб олган кўп кўпдан-кўп (600 га яқин) чеклашларини ва амалларини қатъий равишда бажаришни худога кераги йўқ, улар ўрнига худога самимий ва астойдил эътиқод қилинса бас, деб тарғибот юргизган. Инжилда Исони беозорлик, кечирувчанлик, яқин кишиларни севиш, мўминлик тимсоли этиб тасвирланган. Инжилда тасвирланишича, худо ўғли камбағал деҳқон, дурадгор қиёфасида, ўз қабиладошларининг нафрат, таъқиб ва қувғинига учраган, бу қийинчиликларга чидаб, бардош берган, руҳоний ва коҳинлар ҳақоратига индамасдан кетаверган; ювош, қул либосида гавдаланиб, худога энг яхши аҳлоқий фазилатларга эга бўлган тимсол сифатида ёқиб қолган, барча христианларни ундан ўрнак олишга даъват қилинади.

Исо айтган асосий ғоялар: тез орада худонинг салтанати бошланади, у ҳамма одамларга эмас. Фақат Исонинг илоҳийлигига ишонадиган, уни худонинг ўғли эканлигини тан оладиган ва ҳамма нарсаларда унинг кўрсатмаларига амал қиладиган кишиларгагина насиб бўлади, деганлар. Худонинг адолатли жамиятида яшаш энг аввал машаққат чекканларга, мазлумларга ва «заҳматкашлар»га худонинг инъомидир. Исо тепаликда туриб: «Мўминлар масъуддирлар, чунки уларнинг жойи жаннатдадир. Йиғлаганлар масъуддирлар, чунки таскин топадилар. Ювош кишилар масъуддирлар, чунки улар ерни мерос оладилар», деб ваъзхонлик қилган. Бу Матфей Инжилнинг 5-сурасидаги 3-5 оятларида келтирилган. Исо ўзининг ўша вазъхонлигида яна маънавий ва моддий қашшоқликни, меҳнаткашларнинг итоаткор бўлишини, жан-натда роҳат-фароғатда яшашининг асосий шарти, деб эълон қилиб, улардан қуйидагиларни талаб қилган: душманларин-гизни севингиз, сизларни лаънатловчиларни дуо қилингиз, сизларга нафрат билан қаровчиларга хайр-эҳсон қилингиз, сизларни ранжитувчилар ва қувғин қилувчилар учун ибодат қилингиз. Бу ҳақда Матфей Инжилининг 5-сура, 41-оятида хабар берилган. Бу кўрсатмалар христианликнинг ижтимоий ва аҳлоқий таълимотларидир. Исо бойлар бу дунёда роҳат қилсалар ҳам, у дунёда қилмишларига жавоб берадилар, бойларнинг жаннатга тушишлари игнанинг тешигидан туяни ўтиши билан баравар, деб таълим берган. Бундан хайр-эҳсонли бой-бадавлат кишилар истиснодир. Исо ҳамма одамлар худо олдида тенг, деб эълон қилган, лекин у ҳокимлик ҳуқуқини худо берган бўлиб, Давлат ҳукмига, маҳаллий ҳокимлар амрига бўсуниш худо амрини бажаришдир, деган. Исо уч йил давомида тарғибот олиб борган. Лекин Яҳудия ҳокими Понтий Пилат Исони тутиб берган кишига 200 тилла пул беражагини эълон қилгач, Исонинг энг яқин апостоли Иуда сотқинлик қилиб, уни тутиб берган.

Понтий Пилат ва яҳудий руҳонийлари Қуддус шаҳрида Исони суд қилиб хочга михлаб ўлдиришга ҳукм қилганлар. Ҳукм Голгофа тоғида қийнаб ўлдириш орқали ижро этилган. Шу тариқа ўз жонини қурбон қилган Исо уч кундан кейин мўъжиза билан қайта тирилган, у яна 50 кун даъват-тарғибот олиб боргач, отаси худо олдига осмонга чиқиб кетган, у қиёмат куни қайтиб келади, деб тасаввур қилинади. Лекин Ииусис Христос (Исо) тарихий шахсми ёки афсонавий шахсми - бу муаммо ҳозиргача узил-кесил хал қилингани йўқ.

Фойдаланилган адабиётлар: 1. Абдуқаҳҳор Иброҳимов, Хайриддин Султонов. Ватан туйғуси. Нарзулла Жўраев . Тошкент. «Ўзбекистон» - 1996 й. 2. Қуръони Карим. Алоуддин Мансур таржимаси ва изоҳлари. Тошкент, «Чўлпон» нашриёти. 3. Муқаддас китоб. Инжил. Туркия муқаддас китоб жамияти. 1995 й. 4. Музаффар Хайруллаев. Даврон Шораҳмедов. Маданият ва мерос. Т., 1973 йил. 5. Ҳамиджон Ҳомидов. Зардўшт яратган дин ва маданият. Ёш куч. 7-8 сонлари. Т. , 1992 йил. 6. Искандар Жадид. Биз қандай ибодат қиламиз? Германия. 7. Абу Абдуллоҳ Муҳаммад ибн Исмоил Бухорий. Ҳадис 2. Алб жомиъ Ас- Саҳиҳ (Ишонарли тўплам). Қомуслар бош таҳририяти. Тошкент-1996 й

Похожие

Христианлик фирқалари

Христианликнинг ақидалари

Жахон динлари хакида тушунча

Христианликдаги йўналишлар

Монотеистик ва жаҳон динлари