O’ta baland binolarni barpo etish - Архтектура - Рефераты

O’ta baland binolarni barpo etish

Загружено в:

21.05.2023

Скачано:

0

Размер:

887.5 KB

O’ta baland binolarni barpo etish Reja: 1. Umumiy qoidalar 2. Qo’llaniladigan montaj mexanizmlari 3. Binolarni montaj qilish usullari 4. Po’lat va aralash karkasli binolarni montaj qilish 5. Montaj davrida karkasning turg’unligini ta’minlash 6. Pardozlash ishlari

UMUMIY QOIDALAR O’ta baland binolar (17 qavatdan baland) ko’p holatlarda ixcham, rejada o’lchamlari katta bo’lmagan, ko’p seksiyali bo’ladi. Bu turdagi binolarni, bino yoniga o’rnatiladigan, yuradigan va o’zini-o’zi ko’taradigan minorali kranlardan foydalanib o’stirish usuli bilan barpo etiladi. O’ta baland binolarning konstruktiv asosi po’latli, temir betonli yoki bikirlik yadrosi yoki tekis diafragmali bog’lamalarga ega aralash karkas bo’ladi. Bino karkasi temirbetonli yoki metalli bo’lib, ammo betonlangan bo’lsa, keyingi yarusni montaji pastki yarusdagi ustunlar tutashuv joylari berkitilgandan va tutashuv joyidagi beton markadagi 70% mustaxkamlikka erishgandan keyingina mumkin. Ko’pchilik o’ta baland binolarda binoning tutashib turadigan qismlaridan gorizontal yuklarni qabul qiluvchi va butun binoni montaj va foydalanish jarayonida turg’unligini va fazoviy bikirligini ta’minlovchi bikirlik yadrosi bo’ladi. Ba’zi binolarda avval bikirlik yadrosi montaj qilinadi, misol uchun loyiha belgisigacha lift shaxtasi montaj qilinadi, so’ng binoning qolgan konstruktiv elementlari barpo etiladi (1-rasm). 1 -rasm. O’ta baland binolarning sxemalari:

a – po’latli bikirlik yadrosi bilan; b – temir betonli karkas bilan; 1 – bikirlik yadrosi; 2 – karkasni montaj qilingan qismi; 3 – karkasni montaj qilinadigan qismi. Ko’p holatda bikirlik yadrosi monolit konstruksiyada bajariladi, odatda bikirlik yadrosini betonlash karkas montajidan 1...2 yarus ilgarilab bajariladi. Karkasni, bino yadrosi bilan ishonchli birlashishi uchun, bikirlik yadrosida shtrablar, bo’shliqlar armatura sterjenlari bilan va karkas to’sinlarini payvand yoki boltli birikmalar yordamida mahkamlash uchun qoldirib ketilishi kerak. Bu sermehnatli, ammo monolit yadro karkasni o’rnatilgan qismidan birdaniga gorizontal yuklarni qabul qila olish kafolatini beradi. Konstruktiv o’ziga xosligi va texnologik shartlari bo’yicha bikirlik yadrosini betonlash karkas montajidan orqada qolishi mumkin. Bu orqada qolish ruxsat etiladi, qachonki montaj qilingan konstruksiyalar shu zaxoti payvandlansa va betonlansa, va shu bilan tutashgan joylardagi beton qorishmasini mustaxkamligini 70% erishishi ta’minlanadi. Montajni bikirlik yadrosini betonlashdan ilgarilab ketishi 8 qavatdan oshmasligi kerak, bunda asosiy shart karkas vaqtincha vertikal va qiya bog’lagichlar bilan maxkamlangan bo’lishi kerak. Odatda qavatlararo yopmalar yirik panelli elementlardan, ayrim hollarda yig’ma-monolit variantlarda bajarilishi mumkin. Qo’llaniladigan montaj mexanizmlari Tirkama kranlar ilgakini ko’tarish balandligi 100...150 m gacha bo’ladi. Kran minorasini bino karkasiga maxkamlovchi, uchburchak va kvadrat qattiq disklar har 15...25 m da o’rnatiladi. 150 m dan baland binolarda o’zini-o’zi ko’taradigan, barpo etilayotgan bino gabaritining tashqarisiga o’rnatiladigan kranlar qo’llaniladi. Bunday kranlar faqat vertikal bo’yicha joyinii o’zgartiradi, shuning uchun uning plandagi holati ularni xarakat radiusi va binoni konfiguratsiyasi bilan aniqlanadi. Odatda o’zinio’zi ko’taradigan kranlarni soni, qurilayotgan butun binoni ishchi zonalari bilan qamrab

olinadigan qilib tanlanadi. Har bir kran turgan joyidan, yarus chegarasidagi (ikki, uch yoki to’rt qavat) konstruksiyalarni montaj qiladi, so’ng esa u yangi turar joyiga ko’tariladi. O’zini-o’zi ko’taradigan minorali kranlar universal bajarilgan yechimga ega bo’lib va bino karkasi yacheykalarni birini ichida xarakatlanadi. Kran joylashishini odatdagi yechimida minora pastki qismida xochsimon joylashgan tayanch to’sinlariga tayanadi. Bu to’sinlarning chetlarida buriladigan yoki qaytarma konsollari bor; kran shu balkalar orqali yechiladigan xomutlar yordamida bino karkasi rigellariga tayanadi. Kranni ko’tarish ehtiyoji bo’lganda, montaj qilingan karkas rigellari orasidan bemalol o’tishi uchun, konsollar olib qo’yiladi. Balandlik bo’yicha kran minorasini o’rab olgan fazoviy konstruksiya − maxsus oboyma- xalqa yordamida suriladi. Minorani tutashuv joylarining konstruksiyasi xalqani sirpanishiga, pastga va yuqoriga ko’chishiga imkon yaratadi. Xalqa o’zining tayanch to’sinlari orqali karkasning rigellariga tayanadi. Kranni balandligi bo’yicha o’rnini o’zgartirishda, avval xalqa ko’tariladi va montaj qilingan karkasning yuqori rigellariga o’rnatiladi, kran minorasini ko’taruvchi polispast maxkamlanadi va tortiladi. Tayanch to’sinlarini konsoli orqaga tashlanib, kran 2...4 qavatdan keyingi to’rar joyiga ko’tariladi, boshqatdan tayanch to’sinini konsollari ochilib kran karkas rigellariga tushiriladi, tayanch maydonini xomutlar bilan maxkamlanadi. Kranni ko’tarishda halqa yo’naltiruvchi va minorani vertikal holatda ushlab turuvchisi bo’lib xizmat qiladi. Polispast kranni og’irlik markazidan pastda joylashadi, bu o’z tavbatida kranni ko’tarish chog’ida uni og’ib ketishiga imkon bermaydi. Yerda yuradigan kranlar bilan balandligi 70 m gacha bo’lgan binolarni montaj qilish mumkin, imorat yoniga o’rnatilgan tirkama kranlar bilan 150 m gacha bo’lgan binolarni montaj qilish mumkin, o’zini-o’zi ko’taradigan kranlar uchun montaj qilinayotgan bino balandligi chegaralanmagan. Ko’p qavatli binolarning karkaslarini po’lat konstruksiyalarini montaj qilish uchun quyidagi turdagi kranlarni qo’llash mumkin (2-rasm):

• yerda ustidagi – minorali, gusenitsali (minora-strelali ko’rinishda yasalgan), temir izda yuradigan, pnevmog’ildirakli; ular kerakli og’irlikdagi yukni ko’taradigan va katta balandlikka uzata bera oladigan bo’lishi kerak; • o’zini-o’zi ko’taradigan bino konturi ichiga o’rnatilinadigan va montaj qilingan konstruksiyalarga tayanadigan minorali kran (3-rasm); • statsionar tirkama kranlar bino konturining tashqarisida yerga o’rnatiladi va kranni yig’ilishiga qarab o’stirib boriladi, tirgak- xalqalar bilan bino karkasiga maxkamlanadi; • kombinatsiyalashgan yuruvchi-tirkama kranlar, 50...55 m balandlikkacha foydalanilganda, erkin turadigan va kran izlarida yuradigan, 50...55 m dan baland bo’lganda statsionar tirkama kabi ishlovchi kranlar.

2- rasm. O’ta baland binolarni barpo etish sxemalari: a – yuruvchi va o’zini –o’zi ko’taradigan kranlar bilan; b – tirkama kran bilan; v − o’zini-o’zi ko’taruvchi kran bilan; g − o’zini-o’zi ko’taruvchi ikki kran bilan; 1, 3, 7 – montaj kranlari; 2 – kran harakatini yo’li; 4 – kranning montaj bog’lamalari; 5 – bikirlik yadrosi; 6 – po’lat karkas; Ι ...VII ish bosqichlari. 3- rasm. O’ta baland binolarni montaj qilishdagi o’zini-o’zi ko’taruvchi kranlarning sxemasi: a – gorizontal tekislikda qisilgan UBK turidagi kranlar; b − vertikal tekislikda qisilgan SBK turidagi kranlar; 1 – pastki tayanch; 2 – gorizontal reaktsiyalarni qabul qiluvchi yuqori tayanch; 3 – kranni keyingi to’rar joyiga o’zini ko’taruvchi harakatlanuvchi oboyma-halqa.

Binolarni montaj qilish usullari Temirbeton karkasli binolarni montaj qilish Qurilish muddatini qisqartirish va ishlarni tezlashtirish uchun, bino qamrovlar va ishchi uchastkalarga bo’linadi. Binoni barpo etish bir yoki ikki qamrovli sistema bo’yicha amalga oshiriladi. Odatda qamrovlar harorat choki, bilan chegaralanadi, xar qaysi qamrov ikki uchastkaga bo’linadi. Agarda birinchi uchastkada montaj ishlari olib borilsa, ikkinchisida shu vaqtni o’zida avval montaj qilingan elementlarni tutashgan joylari oxirigacha payvandlanadi va betonlanadi va choklarga beton qorishmasi joylanadi. Qavat bo’ylab montajda, ishlar vertikal oqim usulida, yoki yaruslar ketma-ketligi bo’yicha usuli bilan butun yarusni balandligi bo’yicha tashkil etiladi. Odatda yaruslar balandligi bo’yicha 2 ... 4 qavatni tashkil etadi va binodagi konstruksiyalarni o’ziga xosligiga va qabul qilingan ustunlar balandligiga bog’liq. Ba’zida qirqilmagan birdaniga 6 qavatga mo’ljallangan ustunlar qo’llaniladi, bunda montaj yarusining balandligi 6 qavatni tashkil etadi. Bir qavatga mos qirqimli ustunlardan kam hollarda foydalaniladi, odatda, karkasda ramali temir beton elementlar bo’lganda qo’llaniladi. Konstruktiv yechimiga qarab –binolarning quyidagi turlari eng ko’p tarqalgan: • Yig’ma karkasli va o’zini-o’zi ko’taradigan devorlar bilan. Bunday binolarni karkasi ko’ndalang yo’nalishda bikir ramalardan tuziladi. Bo’ylama yo’nalishda ustunlar gorizontal kuchlarni devorga uzatuvchi bikir disk- yopma bilan bog’lanadi; • Yig’ma karkasli va osma panel bilan. Bunday yechimda, ramali konstruksiyalarni karkasi ikki yo’nalishda bajariladi, rama mavjud bo’lganda faqat bir tekislikda, boshqasida esa bog’lamalar o’rnatiladi; • Ramali konstruksiya to’sinsiz yopma bilan. Karkasni asosiy elementlariga ulanishlari xar 2 qavatdan keyin bo’lgan ustunlar, rigellar, qavatlararo yopmalar va devor panellari kiradi. Baland binolarni barpo etish, quyidagi bosqichlarga bo’linadi: • binoni yer osti qismini barpo etish;

• bikirlik yadrosini betonlash; • yig’ma konstruksiyalarni montaj qilish yoki monolit karkasni barpo etish; • pardadevorlarni montaj qilish; • pardozlash ishlari. Karkas konstruksiyalarini montajiga konstruksiyalarni loyiha holatiga o’rnatish, ularni to’g’rilash, tutashuv birikmalarini payvandlash, korroziyaga qarshi ximoyalash, tutashuv joylari va choklarni bekitishlar kiradi. Yuqoridagi jarayonlar odatda o’zaro bog’langan ikki oqimda bajariladi. 1) Karkas elementlari o’rnatiladi, konstruksiyalar payvandlanadi va korroziyaga qarshi ximoyalanadi; 2) montaj tutashuv joylari, tugunlar monolitlanadi, tom yopma choklariga qorishma qo’yiladi va karkasni monolit uchastkalari betonlanadi. Bino karkasini montaj qilish ustunlarni o’rnatishdan boshlanadi. Montaj qilingan barcha konstruksiyalarni sifati ko’p miqdorda ustunlarni plandagi holati va balandligi bo’yicha aniq o’rnatilganligiga bog’liq, shuning uchun ularni to’g’ri o’rnatilganligiga katta e’tibor berish kerak. Birinchi yarusdagi ustunlar poydevor stakaniga o’rnatiladi, keyingi yaruslarda ustunlar vaqtincha konduktor bilan mahkamlanadi. Bir, ikki va to’rtta ustunga muljallangan konduktorlar qo’llaniladi. To’rt ustunga muljallangan guruhli konduktor qo’llanilganda ishda kamida bir vaqtni o’zida o’ch qushni yacheykalarni montaj qiladigan ikkita konduktor bo’lishi kerak. Rigel va yopmalarni o’rnatishda konduktordan so’ri sifatida foydalaniladi. Yacheykadagi barcha tutashuv joylaridagi payvand ishlari bajarilgandan so’ng konduktor boshqa turar joyiga ko’chiriladi. Konduktorlar qo’llanilganda har bir ustunni o’qlar bo’yicha to’g’rilash ustunlarni majburiy to’g’rilanishi va vaqtinchalik mahkamlanishini ta’minlovchi konduktorning vintli qurilmalari yordamida amalga oshiriladi. Bu ishlar shuningdek inventar tortqilar yoki oldin o’rnatilgan konstruksiyalarni ilmog’iga ilintiriladigan vintli muftaga ega bikir tirgaklar yordamida ham bajarilishi mumkin.

Ikkinchi oqimdagi ishlar bevosita aloxida montaj uchastkasi va qamrovning har bir yarusidagi konstruksiyalar o’rnatilib va to’g’rilanganidan so’ng amalga oshiriladi. Karkas elementlari karkasni tutashgan yacheykalarini yaratilishi va montaj qilingan konstruksiyalarni turg’unligini ta’minlovchi ketma-ketlikda o’rnatiladi. O’zini-o’zi ko’taruvchi kranlar yordamida oldin kranga yaqin bo’lgan yacheykalarni konstruksiyalari, keyin o’zoqdagilarniki o’rnatiladi. Temirbetonli karkaslarni bikirligi va turg’unligi nafaqat konstruksiyalarning mustahkamligi bilan, shuningdek ustunlarni tutashuv joylarini, karkas elementlarini barcha qolgan tutashuv joylarini mustahkamligi bilan ta’minlanadi. Keyingi qavat konstruksiyalarini montajiga kirishish oldingi qavat tutashuv joylari va tugunlarining payvandli birikmalari mahkamlamaguncha taqiqlanadi. Bikirlik diafragmasi tekis vertikal bo’lgan temirbetonli karkasning har bir yarusi (qavati) konstruksiyalarini montaji qo’yidagi ketma-ketlikda bajariladi: 1) ustunlar, bikirlik diafragmasi, rigellar; 2) tashqi devor panellari, qolgan ichki panellar va pardadevorlar; 3) zina maydonchalari va marshi, qavatlararo yopmalar. Devor panellari va to’siqlarni boshqa elementlarini montaji uchun tom kranlaridan foydalanish keng tarqalgan. Ularni bikirlik yadrosini balandligi 6 qavatgacha bo’lgan yuqori yaruslarini betonlashda, yuqoridagi qabul maydonchalariga beton, qorishma, mayda donali va sochiluvchan materiallarni, sanitar-texnik jihozlarni, duradgorlik mahsulotlari va boshqalarni uzatishda qo’llaniladi. Devor panellarini montaji karkas montaji bilan qo’shib va paralell olib boriladi, yoki ular karkas barpo etilgandan so’ng, butun bino balandligi bo’yicha osib o’rnatiladi. Ikkinchi holatda devor panellarini montaj qilish uchun tomga o’rnatilgan kran ishga solinishi mumkin. Temirbeton karkas elementlari shunday ketma-ketlikda o’rnatiladikim, unda karkasning berk yacheykalari bo’lishi ta’minlanishi kerak. Xamma yuk ko’taruvchi konstruksiyalarni va bog’lovchilarni, har bir yacheykadagi elementlar

to’g’rilangandan so’ng shu zaxoti maxkamlanishi kerak. Ustunlarni planda to’g’ri o’rnatilganligiga va ularni vertikalligini ta’minlashga aloxida ahamiyat berish kerak. Buning uchun ustunlar aloxida, guruxli konduktorlar va RSHI yordamida, tirgovichlar va egiluvchan tortqilar qo’llab o’rnatiladi. Ustunlararo plita–tirgaklar rigellardan keyin darrov o’rnatiladi, ular rigellarning tayanch qirralarida joylashgan va bikirlik devorini elementlaridagi qo’yma detallarga payvandlanadi. Oddiy plitalar qo’yma detallarga o’ch tugunda payvandlanishi shart. Har bir plitani payvandlanish sifati qushni plita o’rnatilganga qadar nazorat qilinishi kerak. Po’lat va aralash karkasli binolarni montaj qilish Karkas balandligi 200 m va undan baland, umumiy massasi esa − o’n ming tonnadan ko’p bo’lishi mumkin. O’ta baland binoni po’lat karkasi ustunlar va ikki yo’nalish bo’yicha bikir payvandlik tugunlari bilan rama sistemalariga birlashtirilgan, vertikal va gorizontal (shamol) yuklarini qabul qiluvchi rigellardan iborat. Temir ustunlar payvandlangan, iloji boricha standart prokat profillardan tayyorlanadi. Eng ko’p uchraydigan yuzalar – qo’shtavrli, kvadratli va xochli. Ustunning qisqa yon tomoni odatda frezalanadi. Po’lat ustunlarni tutashuv joylari frezalangan tomonlari bilan bajariladi. Ustunlarni tutashuv joylari boltlar bilan mahkamlangandan va to’g’rilangandan so’ng kontur bo’ylab payvandlanadi. Karkas ustunlarining tutashuv joylari xar qaysi ikki, uch yoki to’rt qavatdan keyin bir sathda va montaj birikmalari ishlarini bajarish qo’lay bo’lishi uchun yopma sathidan 80...120 sm balandlikda joylashtiriladi. Po’lat karkasni chidamliligini va olovga bardosh berishligini ta’minlash uchun u armaturalanadi va beton bilan qoplanadi, bu o’z navbatida betonni siqilishga ishlashi hisobiga metall sarfini kamaytiradi. Po’lat karkasning rigellari odatda yuza qirqimi qo’shtavrli, payvandlangan, kengaytirilgan pastki tokchaga ega bo’lib, unga qavatlar aro yopmalarning plitalari o’rnatiladi.

Karkasning qavatlar ora yopmalari qo’yidagi ayrim qismlardan tuzilishi mumkin: • bosh (asosiy) va ikkinchi darajali (yordamchi) to’sinlardan (binoning karkasi po’latli bo’lganda) va ular ustiga o’rnatiladigan yig’ma plitalar yoki betonlangan monolit yopmalar; • faqat tokchasi kengaytirilgan bosh to’sinlardan (rigellardan)va ularga o’rnatiladigan yig’ma temirbeton yopmalardan; • faqat ustunlar o’qi bo’ylab o’rnatiladigan tirkaladigan temirbeton plitalardan, qo’shni oraliq plitalari qo’yma detallari bilan payvandlash uchun va rigellardan; • unifikatsiyalashgan, yengillashtirilgan, yoki po’lat yoki temirbetonli rigellarni yon o’yiqlariga bemalol o’rnatiladigan ko’p bo’shliqli qavatlararo yopmalardan, lekin ular qo’yma detallar yo’qligi uchun payvandlanmaydi. Bir qator binolarning karkasida butun balandlik bo’yicha to’rtta o’zaro perpendikulyar po’lat yoki temirbeton konstruksiyalardan vertikal bikir tekisliklardan iborat tutashgan berk shaxta quriladi. Bu shaxta binoga tushadigan barcha gorizontal yuklarni qabul qiladi va uning umumiy turg’unligini ta’minlaydi. Bunday shaxta bikirlik shaxtasi yoki bikirlik yadrosi deb ataladi. Karkasning barcha boshqa elementlari bu bikirlik yadrosiga mahkamlangan bo’lishi kerak, va har bir yopma umumiy bikir va o’zgarmas gorizontal tekislik yoki tekis bikir disk hosil qilishi kerak. Bu holatda bikirlik yadrosiga tutashgan bino karkasining barcha yuk ko’taruvchi elementlari faqat vertikal yuklarni qabul qilishga ishlaydi. Po’lat karkasli binolarni barpo etish aloxida va majmuali usullar bilan amalga oshirish mumkin. Aloxida usulda avval binoni butun balandligi bo’yicha po’lat karkas montaj qilinadi, so’ng umumqurilish ishlari boshlanadi. Bu usulni yaxshiligi ko’p montaj kranlari bilan bir vaqtni o’zida birnecha qamrovlarda montaj ishlarini olib borish imkoni yaratiladi, so’ng butun bino bo’yicha umumqurilish ishlari olib boriladi. Aloxida usul bilan montaj ishlari olib borilganda karkasni yuqori bikirligini ta’minlash talab qilinadi, bu esa o’z navbatida qo’shimcha metall sarfiga olib keladi. SHu sababli majmuali usulda bino karkasiga metall sarfi 30...40 % qisqaradi.

Majmuali usul bilan binoni barpo etishda bir vaqtni o’zida montaj, qurilish, maxsus va pardozlash ishlari olib boriladi. Metall konstruksiyalarni montaj qilish yuqori yaruslarda amalga oshiriladi (yuqoridagi ikki – to’rt qavatda): yarusning eng yuqorisida – montaj, sal pastroqda – to’g’rilash va yarusning pastki qismida – yakunlovchi payvandlash va montaj birikmalari parchinlanadi. Bir vaqtning o’zida, 2 – 3 qavat orqada qolib (keyingi yarusda) yig’ma temir beton yopmalarni montaji olib boriladi. Yana 4 – 5 qavat orqada qolib karkasni betonlash amalga oshiriladi va yopmalarni monolit uchastkalari betonlanadi. Vertikal bo’yicha yanada pastroqda oyna solingan romlar (panjaralar) o’rnatiladi, undan pastroqda suvash, undan ham pastroqda pardozlash va maxsus ishlar olib boriladi. SHunday qilib, binoni barpo etish ishlari bir vaqtni o’zida 8...10 qavatlarda olib boriladi. Yig’ma –monolit konstruktiv yechimlarda bir siklning o’zida monolit va yig’ma jarayonlar birgalikda olib boriladi, ularni bajarish ketma-ketligi binoning konstruktiv xususiyatlariga qarab o’rnatiladi. Montaj davrida karkasning turg’unligini ta’minlash Ko’p qavatli bino konstruksiyalarini montaji quyidagi qoidaga qatiiy rioya qilishni talab qiladi: pastdagi yarus konstruksiyalari to’g’rilanib va ishonchli maxkamlanmasdan turib navbatdagi yarus konstruksiyalarni o’rnatishga kirishish mumkin emas. Bu talab binoni barpo etish davrida mustahkamligi va turg’unligini ta’minlash uchun qaratilgan. Karkasni kran bilan 5 ... 6 qavat balandlikka yig’ish jarayonida, quyidagi talablar bajarilgan bo’lishi kerak: • karkaslarni montaj qilish jarayonida ularni turg’unligi IBL da tavsiya etilgan ketma-ketlikda tekshiriladi; • ora yopmalarni tutashgan joylaridagi beton qorishmasi mustaxkamlikni egallaguncha, ustunlar orasiga vaqtinchalik bog’lag’ichlar o’rnatiladi.

• vertikal bog’lagichlar, rigellarni ustunlar bilan ramali birikish tugunlari loyihaviy holatida mahkamlanadi; • binoning umumiy turg’unligini ta’minlovchi bikirli qavatlar ora yopmalarni qurish bajarilgan bo’lishi kerak; • karkasni aloxida elementlari va tugunlarini mustaxkamligi o’zini-o’zi ko’taradigan va karkasga tayanidigan tirkama (bino yoniga o’rnatilgan) kranlardan tushadigan yukka tekshiriladi. Binoning po’lat karkasini montajini yaruslar bo’yicha bajarish kerak – birinchi navbatda bikirlik yadrosini xamma elementlari montaj qilinadi va to’g’riligi sinchiklab tekshiriladi. Ustunlarni montaj qilishdagi vaqtincha maxkamlash konduktorlar yordamida yoki inventar tortqilar yordamida bajariladi. Ular doimiy loyihaviy bog’lamalar bilan mahkamlagunga qadar ustunlar turg’unligini ta’minlaydi. Agarda loyihada nazarda tutilgan bog’lamalar kam bo’lsa, karkasni turg’unligini ta’minlash uchun, vaqtinchalik bog’lamalar o’rnatiladi. Ustunlarni loyihaviy mahkamlash yacheyka elementlari – rigellar bilan bog’langan to’rtta ustunni montaji va to’g’rilanganidan so’ng birdaniga bajariladi. Navbatdagi yarusni montaj qilishga oldingi yarusni xamma elementlar loyiha bo’yicha maxkamlangandan so’ng kirishiladi, agarda zarur bo’lsa inshootni turg’unligini ta’minlash uchun vaqtinchalik bog’lamalar o’rnatiladi. Ko’p qavatli binolarni yig’ma temirbeton konstruksiyalardan montaj qilishda ishlarni bajarishdagi asosiy talab, faqat inshootning montaj qilingan qismini emas balki aloxida konstruktiv elementlarning mustaxkamligi va turg’unligini ta’minlanishdir. QMQ ning talablari yuk ko’taruvchi konstruksiyalarning tutashuv joylaridagi va tugunlardagi beton mustahkamligini loyihaviy mustahkamlikka erishishni kutish bino karkasini montaj davomiyligini uzaytirib yuborishi mumkin. Beton talab qilingan mustaxkamlikni egallashini poylamasdan, bu talablarni qisman bajarish va montaj ishlarini davom ettirish uchun quyidagilar zarur: • karkasning barcha elementlarida (ustunlar, rigellar, tom yopmalar) qo’yma detallar nazarda tutilgan bo’lishi kerak, konstruksiyalar loyiha holatiga o’rnatilgandan so’ng ularni payvandlanishi turg’unlikni ta’minlaydi va montaj

birikmalari monolitlanganga qadar karkasni deformatsiyaga uchrash xavfini kamaytiradi; • tugun va ulangan joylardagi beton mustaxkamlikni egallaguncha turg’unlikni ta’minlash uchun ustunlar orasiga vaqtinchalik vertikal bog’lamalar yoki chetki oraliqdagi qavatlararo yopmalarga gorizontal bog’lamalar o’rnatiladi; • o’zini-o’zi ko’taradigan krandan tushadigan yukka u tayanadigan elementlarning va tugunlarning mustaxkamligi tekshiriladi. • montaj jarayonida karkasni turg’unligi IBL da qabul qilingan kranning yig’ishi va tutashuv joylari va tugunlarini monolitlanishi e’tiborga olgan holda tekshiriladi; • bikirlik yadrosini turg’unligini ta’minlash uchun, bikirlik shaxtasini monolit devorini karkasi va doimiy bog’lamalarni birga ishlashini ta’minlash kerak. Unifikatsiyalashgan ko’p qavatli va baland binolarning karkaslarida tirgovich plitalar bor bo’lib, ular ustunlar o’qlari bo’ylab o’rnatiladi, ulardagi qo’yma detallar ikki tutash oraliqdagi plitalarni uzaro birlashishiga imkon beradi. SHuning uchun har bir qavat qavatlararo yopmalar diskini ishga tushishini va karkasning montaj qilingan qismini turg’unligini ta’minlanishi uchun plitalarning rigelar va ustunlar bilan tutashuv tugunlari, hamda plitalar orasidagi choklar xar bir qavatni (yarusni) montaji tugagandan so’ng monolitlanishi kerak. Pardozlash ishlari Pardozlash ishlari karkasning montaji va umumqurilish ishlari bilan qo’shilib yoki butun bino bo’yicha montaj ishlari tugagandan so’ng olib borilishi mumkin. Ishlar qushilib bajarilganda ikkinchi qamrovni 6...10 qavatlarida montajchilar konstruksiyalarni montaj qilish ishlarini boshlaganlarida, birinchi qamrovni birinchi qavatida pardozlash ishlarini boshlaydilar. So’ng ular to montaj ishlari tugaguncha qamrovlar bilan almashadilar. Pardozlash ishlari pastdan yuqoriga qarab olib boriladi, chakka o’tishini oldini olish uchun, montaj qilingan tom yopmalarni birida gidroizolyatsiya o’rnatiladi. Agarda pardozlash ishlari, montaj

ishlari tugallangandan so’ng bajarilsa, unda pardozlash ishlari tepadan pastga qarab olib boriladi, bunda pardozchilarni ish fronti kengayadi, ishlash sharoiti yaxshilanadi. Liftlarni montaj qilish binoni barpo etish bilan birga parallel olib boriladi, ularni tugatish va liftni ishga tushirish bevosita montaj va tom ishlari tugagandan so’ng amalga oshirish maqsadga muvofiqdir.

Adabiyotlar : 1. Bozorboy е v N. Bino va inshootlarni barpo etish t е xnologiyasi. I- qism. o’quv qo’llanma Toshk е nt, 2000. 2. Bozorboy е v N., Sobirov M. Bino va inshootlarni barpo etish t е xnologiyasi. II-qism. o’quv qo’llanma Toshkеnt, 2000. 3. Технология возведения зданий и сооружений: Учеб. для строит, вузов/В.И. Теличенко, О.М. Терентьев, А.А. Лапидус— 2-е изд., перераб. и доп.— М.: Высш. шк., 2004. — 446 с; ил. 4. Технология строительного производства. Учебник, (С.С. Атаев, Н.Н. Данилов, Б.В.Прыкин и др.) М., Стройиздат, 1994. 5. Технология строительного производства (О.О.Литвинов и др.) Киев, Высшая школа. 1995. 6. Хамзин С. К., Карасев А. К. Технология строительного производства. Курсовое и дипломное проектирование. Учеб. пособие для строит, спец. вузов. — М.: ООО ≪ БАСТЕТ ≫ , 2006. - 216 с.: ил 7. Бозорбоев Н., Бозорбоев Ф. Бино ва иншоотларнинг ер остки қисмини барпо этиш технологияси. Ўқув қўлланма. Тошкент, 2003. 8. Швиденко В.И. Монтаж строительных конструкций. Уч. пос. М., Выс. школа, 1987. 9. Матвеев Е.П. Реконструкция жилых и гражданских зданий.— М.: ГУЛ ЦПП, 1999. 10. Справочник строителя. Бетонные и железобетонные работы. — М.: Стройиздат, 1987.

Похожие

G’isht devorli binolarni barpo etish

Yirik panelli binolarni barpo etish

Binolarni gorizontal ko’chiriladigan qoliplarda barpo etish

Binolarni vertikal ko’chiriladigan qoliplarda barpo etish

Ajratib− qayta o’rnatiladigan qoliplarda binolarni barpo etish