Bosh miyaning tuzilishi - Анатомия - Рефераты

Bosh miyaning tuzilishi

Загружено в:

20.09.2019

Скачано:

0

Размер:

54.7939453125 KB

Bosh miyaning tuzilishi Reja: 1. Bosh miyaning tuzilishi, funksiyasi. 2. Uzunchoq miya 3. Varoliy ko‘prigi 4. O‘rta miya 5. Oraliq miya 6. Miyacha 7. Bosh miya yarim sharlari

Bosh miyaning tuzilishi, funksiyasi. Bosh miya tabiat yaratgan ajoyib mo‘jizadir. Odamning bosh miyasi uning aql - idroki, fikrlash qobiliyati, ongi kabi muhim ruhiy xususiyatlarining fiziologik asosi hisoblanadi. U tashqi va ichki muhit ta'sirini analiz - sintez qilib, ularga javob qaytaradi. Tananing barcha to‘qima va a'zolari faoliyatini bir - biriga bog‘lab boshqaradi, organizm bilan tashqi muhitning aloqasini ta'minlab, uni muhit sharoitiga moslashtiradi. Bosh miya kalla suyagining ichida joylashgan bo‘lib, massasi katta odamda 1020 - 1970 g gacha bo‘ladi. Shuni ta'kidlash kerakki, bosh miyaning massasi odamning aqlini, ish qobiliyatini belgilamaydi. Odamning aqliy faoliyati bosh miya yarim sharlarining po‘stloq qismida joylashgan nerv hujayralarining murakkab fiziologik, biokimyoviy va biofizik xususiyatlari bilan bog‘liq, Shuningdek, odam aqliy faoliyatining rivojlanishi uning yoshlikdagi tarbiyasi, bilim olishi, mashq qilishiga bog‘liq. Bosh miya ikki qismdan iborat: bosh miyaning stvol (ustun) qismi va bosh miya yarim sharlari. Bosh miyaning stvol qismiga uzunchoq miya, Varoliy ko‘prigi (miya ko‘prigi), o‘rta miya, oraliq miya hamda miyacha kiradi. Uzunchoq miya. Uzunchoq miya bosh miyaning eng pastki qismi bo‘lib, uning quyi qismi orqa miyaga, yuqori qismi esa miya ko‘prigiga tutashgan. Uning uzunligi 3 - 3,5 sm, massasi o‘rtacha 7 g bo‘ladi. Uzunchoq miyaning tashqi qismi oq rangda bo‘lib, unda nerv tolalari joylashgan, ichki qismi kulrang moddadan iborat bo‘lib, unda nerv hujayralari bo‘ladi. Uzunchoq miya reflektor va o‘tkazuvchanlik funksiyalarini bajaradi. Reflektor funksiyasi shundan iboratki, unda nafas olish, yurak ishini boshqarish hamda ko‘zni ochib - yumish, ko‘z yoshi, aksa urish, yo‘talish, me'da - ichakda shira ajralishi kabi funksiyalarni ta'minlaydigan reflekslarning markazlari joylashgan. Binobarin, uzunchoq miyaning shikastlanishi nafas olishning va yurak ishining to‘xtab qolishiga sabab bo‘ladi. Uzunchoq miyaning o‘tkazuvchanlik funksiyasi deganda orqa miyadan kelgan impulslarni qabul qilib, bosh miyaning yuqori qismlarida joylashgan nerv

markazlariga va ulardagi qo‘zg‘alish impulsini orqa miyaga o‘tkazishi tushuniladi. Uzunchoq miyaning shikastlanishi uning o‘tkazuvchanlik funksiyasini buzilishiga, ya'ni orqa va bosh miya o‘rtasidagi aloqaning uzilishiga olib keladi. Miya ko‘prigi. Miya ko‘prigi uzunchoq miyaning ustki qismida joylashib, yuqori tomondan o‘rta miya, yon tomondan miyacha bilan tutashib turadi. Miya ko‘prigining tashqi qismi kulrang moddadan iborat bo‘lib, nerv hujayralaridan tashkil topgan, ichki qismida oq modda bo‘lib, unda nerv tolalari joylashgan. Miya ko‘prigida uchlik, ko‘z soqqasini va yuz muskullarini harakatlantiruvchi nervlarning markazlari joylashgan. Bu nervlar orqali miya ko‘prigi reflektor funksiyasini bajaradi. Bundan tashqari, xuddi uzunchoq miyaga o‘xshab, miya ko‘prigi o‘tkazuvchanlik funksiyasini ham bajaradi, ya'ni u orqali orqa miya va uzunchoq miyadan nerv impulslari bosh miyaning yuqori qismidagi nerv markazlariga o‘tkaziladi. Bu markazlardagi qo‘zg‘alish impulslari miya ko‘prigi orqali uzunchoq va orqa miyaga o‘tkaziladi. O‘rta miya. O‘rta miya miya ko‘prigining yuqorisida joylashgan bo‘lib, unda to‘rt tepalik, miya oyoqchalari va miya qorinchalariiing suv yo‘li bo‘ladi. To‘rt tepalikning oldingi 2 tasida po‘stloq osti ko‘rish markazlari, orqa 2 ta tepalikda esa po‘stloq osti eshitish markazlari joylashgan. O‘rta miyadagi qoramtir moddadan tashkil topgan nerv markazi ovqatni chaynash va yutish reflekslarini, qo‘l barmoqlarining nozik harakatlarini boshqaradi. Undagi qizil tana muskullar tarangligani ta'minlaydi. O‘rta miyada ko‘z soqqasini harakatlantiruvchi va bloksimon nerv markazlari joylashgan. O‘rta miya shikastlansa yoki kasallansa, uning yuqorida ko‘rsatilgan funksiyalari buziladi. Buning natijasida odamning ko‘rish, eshitish, ko‘z soqqasini harakatlantirish qobiliyati yo‘qoladi. O‘rta miyadagi qizil tana shikastlansa, tana muskullarining tarangligi ortadi, uning harakatlari qiyinlashadi. Oraliq miya. Oraliq miya o‘rta miyaning yuqori qismida joylashgan bo‘lib, bosh miya yarim sharlari bilan qoplanib turadi. Oraliq miyaning tarkibiy qismlariga ko‘rish do‘mboqlari (talamus), do‘mboq osti soha (gipotalamus) kiradi, Ko‘rish

do‘mbog‘i tuxumsimon shakldagi bir juft kulrang modda, ya'ni nerv hujayralari to‘plamidan iborat. U po‘stloq osti sezgi markazi hisoblanadi. Odam tanasining sezgi a'zolari orqali qabul qilingan barcha tashqi va ichki ta'sir (ko‘rish, eshitish, ta'm bilish, hid bilish, taktil, og‘riq, issiq, sovuq va hokazolar) oldin ko‘rish do‘mbog‘i orqali qabul qilinib, bosh miya yarim sharlari po‘stlog‘idan sezgi markazlariga o‘tkaziladi. Do‘mboq osti soha (gipotalamus) ko‘rish do‘mog‘ining ostki sohasida joylashgan nerv hujayralari to‘plamidan iborat. Gipotalamusda vegetativ nerv tizimining markazi joylashgan bo‘lib, u orqali ichki a'zolar funksiyasi, moddalar almashinuvi, tana haroratining doimiyligi ta'minlanadi, och qolish va to‘yish, uyqu, hayajonlanish, kayfiyatning o‘zgarishi kabilar boshqariladi. Gipofiz bezi ham gipotalamus sohasida joylashgan. Gipotalamusning nerv hujayralaridan maxsus neyrogormonlar ajralib, ular gipofiz ishining boshqarilishiga ta'sir ko‘rsatadi. Yuqoridagidardan ko‘rinib turibdiki, oraliq miyaning tarkibiy qismi bo‘lgan talamus va gipotalamus odam hayotida muhim fiziologik jarayonlarning boshqarilishida ishtirok etadi. Bu nerv markazlari shikastlansa yoki kasallansa, tashqi va ichki ta'sirini sezish, ya'ni og‘riq, isssq, sovuqni sezish, ko‘rish, eshitish qobiliyati pasayadi. Moddalar almashinuvi buzilishi natijasida semirish yoki ozish, qandsiz diabet kasalligi va odamning kayfiyati buzilishi kabi noxush holatlar sodir bo‘ladi. Miyacha. Miyacha bosh miya yarim sharlari ensa bo‘lagining ostida joylashgan, massasi 150 g. Uning ikkita yarim sharlari va ular o‘rtasida chuvalchangsimon qismi bor. Miyacha tashqi tomondan kulrang modda bilan qoplangan bo‘lib, u kichik egat va pushtlarga bo‘lingan. Kulrang modda nerv hujayralari to‘plamidan tashkil topgan. Miyachaning ichki qismida oq modda joylashgan bo‘lib, u nerv tolalaridan iborat. Yuqoridagilardan ko‘rinib turibdiki, miyachaning tuzilishi va shakli bosh miya yarim sharlariga o‘xshash bo‘ladi. U uch juft: yuqorigi, o‘rta va pastki oyoqcha yordamida orqa miya; uzunchoq miya, miya ko‘prigi, o‘rta miya va bosh miya yarim sharlari bilan bog‘lanadi. Miyacha oyoqchalaridagi nerv tolalari orqali orqa miyadan muntazam ravishda impuls olib turadi.

U odam tanasidagi barcha muskullarning tarangligini va harakatlarning tartibli bajarilishi, muvozanatda bo‘lishini ta'minlaydi. Agar miyacha shikastlansa yoki kasallansa, tana muskullari bo‘shashadi va odam tik turish, yurish, sakrash, yugurish kabi harakatlarni bajarishi qiyinlashib, mast odamga o‘xshab gandiraklab harakat qiladi. Po‘stloq osti nerv markazlari. Bosh miya yarim sharlari oq moddasining orasida, oraliq miyaning ustki qismida kulrang modda to‘plami bo‘lib, u ikki qismdan iborat: oqamtir yadro va targ‘il tana. Oqamtir yadro tana muskullari tarangligini va harakatini boshqaruvchi nerv markazi hisoblanadi. U o‘zidan pastda joylashgan oraliq va o‘rta miya funksiyalarini boshqaradi. Oqamtir yadro zararlansa, tana muskullarining tarangligi ortib, qo‘l-oyoqlarning harakati qiyinlashadi, yuz muskullarining tarangligi ortib, go‘yo yuzga niqob kiygandek bo‘ladi, ya'ni odamning har xil emotsional (xafa, xursand) holatlarini aniqlab bo‘lmaydi. Targ‘il tana oqamtir yadro ishini boshqaradi. Targ‘il tana kasallansa, oqimtir yadroning ishi kuchayib ketadi va tana muskullarining tarangligi pasayib, ixtiyorsiz harakatlar paydo bo‘ladi. Bu nerv tizimining revmatizm kasalligida sodir bo‘ladi. Bu kasallik xoreya deb atalib, u ko‘proq bolalarda uchraydi. Bunda bemorning qo‘l- oyog‘i vaqti-vaqti bilan o‘z-o‘zidan ixtiyorsiz silkinib qimirlaydi, ko‘zi ixtiyorsiz yumilib ochiladi. Ba'zida tilini ixtiyorsiz chiqaradi. Odam qo‘li qaltiragani uchuv xat yozishi buziladi. Ba'zi tushunmagan ota-onalar, hatto o‘qituvchilar ham bunday kasal bolaga tanbeh berishadi. Vaholanki, bu tartibsiz harakatlar uning ixtiyoriga bog‘liq emas. O‘z vaqtida shifokorga murojaat qilib davolansa, bemor tez orada tuzaladi. Bosh miya yarim sharlari. Bosh miya o‘ng va chap yarim shardan iborat bo‘lib, ular qadoqsimon tana yordamida bir-biri bilan tutashib turadi. Qadoqsimon tana nerv tolalaridan tashkil topgan bo‘lib, ular o‘ng va chap yarim sharlarining bir-biri bilan aloqasini ta'minlaydi. Bosh miya yarim sharlari ikki qavatdan iborat; 1) kulrang moddadan tashkil topgan tashqi po‘stloq qavat; 2) oq moddadan tashkil

topgan ichki qavat. Bosh miya yarim sharlari po‘stloq qavatining qalinligi 25 - 30 mm bo‘ladi. Po‘stloq tekis bo‘lmasdan pushta va egatlardan iborat. Miya po‘stlog‘ining bunday tuzilishi unda nihoyatda ko‘p miqdorda nerv hujayralari joylashuviga imkon beradi. Binobarin, miya po‘stlog‘ida 14 - 16 mlrd atrofida nerv hujayralari joylashgan. Qizig‘i shundaki, miya no‘stlog‘i pushtalarnning soni barcha odamda deyarli bir xil, lekin ularning tuzilishi bamisoli qo‘l kafti chiziqlari singari xilma-xil bo‘ladi. Agar miya po‘stlog‘ining pushta va egatlari yozib tekislansa, uning umumiy sathi 1468-1670 sm2 ni tashkil qiladi. Miya yarim sharlari peshona, chakka, tepa, ensa qismlarga bo‘linadi. Miya po‘stlog‘i mikroskopda tekshirilganda, undagi nerv hujayralari olti qavat bo‘lib joylashganligi aniqlangan: birinchi, ya'ni miya po‘stlog‘ining eng ustki qavati nerv hujayralarining kalta o‘simtalaridan tashkil topgan; ikkinchi qavatida donasimon nerv hujayralari joylashgan; uchinchi qavatida piramidasimon hujayralar bo‘ladi; to‘rtinchi qavat yulduzsimon tuzilgan nerv hujayralaridan iborat; beshinchi qavatni yirik piramidasimon hujayralar tashkil qiladi; eng pastki, ya'ni oltinchi qavatda duksimon nerv hujayralari joylashgan. Miya po‘stlog‘ining turli qismlarida joylashgan nerv hujayralarining funksiyasiga ko‘ra, po‘stloq sathi uchta zonaga bo‘linadi: sezish, harakat va assotsiativ zonalar. Sezish zonalarida joylashgan nerv hujayralari to‘plami odam tanasining barcha sezgi a'zolarining oliy markazi hisoblanadi. Bu markazlar teri, ko‘rish, eshitish, hid va ta'm bilish kabi sezgi a'zolarining retseptorlaridan impulslar qabul qiladi. Miya po‘stlog‘ining harakat zonalaridagi nerv hujayralari to‘plami muskullar, paylar, bo‘g‘imlar, suyaklarning retseptorlaridan impuls qabul qilib, odam tanasining barcha qismlari harakatini boshqaruvchi oliy nerv markazi vazifasini bajaradi. Assotsiativ zonalarning nerv hujayralari odam tanasining to‘qima va a'zolari bilan nerv yo‘llari orqali bog‘lanmagan, ular miya po‘stlog‘ining turli qismlaridagi nerv hujayralarini (nerv markazlarini) bir-biri bilan bog‘laydi. Bu zonalar sezgi va harakatlanish a'zolaridan kelgan ta'sirni analiz va sintez qilishda muhim rol o‘ynaydi. Bosh miya yarim sharlarining po‘stloq qismi odam oliy nerv faoliyatining

fiziologik asosi hisoblanadi. Odamning fikrlash, ong, o‘zlashtirish, eslab qolish, boshqalar bilan muomalasi, madaniyati, bilim olish, hunar o‘rganish, murakkab harakatlarni bajarishi miya po‘stlog‘ining faoliyatidir. Miya po‘stlog‘ining turli qismlarida har xil funksiyalarni boshqaruvchi nerv markazlari joylashgan. Chunonchi, po‘stloqning ensa qismida ko‘rish, chakka qismida eshitish, peshona qismining ostki ichkari sohasida hid bilish, tepa qismidagi oldingi markaziy pushtasida harakat, orqa markaziy pushtasida tana terisining sezgi markazlari joylashgan. Miya po‘stlog‘ining markazlaridagi nerv hujayralari bosh miyaning pastki qismlaridagi va orqa miyadagi nerv markazlari bilan maxsus nerv yo‘llari orqali bog‘langan. Bu nerv markazlari esa o‘z navbatida ishchi a'zolar (ko‘z, quloq, muskullar va hokazo) bilan nerv tolalari orqali bog‘langan, Shuni ta'kidlash kerakki, har bir a'zo ish faoliyatining muhimligiga qarab uning markazining miya po‘stlog‘ida egallagan o‘rni har xil bo‘ladi. Masalan, odamning kundalik hayotida uning qo‘l panjalari juda ko‘p vazifani bajaradi. Shuning uchun ularning harakatini boshqaruvchi nerv markazi miya po‘stlog‘ida, hatto ko‘krak, qorin, yelka qismlarining markaziga nisbatan ham kattaroq joyni egallaydi. Yarim sharlar po‘stlog‘idagi nerv hujayralarini orqa miya bilan tutashtiruvchi nerv yo‘llari bosh miyaning quyi qismida kesishadi. Buning natijasida chap yarim shardagi nerv markazlari odam tanasining o‘ng tomonidagi to‘qima va a'zolar, o‘ng yarim shardagi nerv markazlari esa tananing chap tomonidagi to‘qima va a'zolar ishini boshqaradi. Bosh miya sharlarining ichki (po‘stloq osti) qismi oq moddadan iborat bo‘lib, u miya po‘stlog‘idagi nerv hujayralarining o‘simtalaridan tashkil topgan. Ular miya po‘stlog‘ining turli qismlaridagi hujayralarni, ya'ni nerv markazlarini bir-biri bilan va bosh miyaning quyi qismidagi (miya stvolidagi) markazlar bilan bog‘laydi. Ma'lumki gapirish qobiliyati barcha tirik mavjudotlar ichida odamda rivojlangan. Gapirish markazi chap yarim shar po‘stlog‘ining chakka qismida joylashgan. Bu joydagi miya to‘qimasi zararlansa, odam gapirish qobiliyatini yo‘qotadi. O‘ng yarim shar po‘stlog‘ining chakka qismida gapga ohang, intonatsiya berish markazi joylashgan. Bu markaz zararlansa, chap yarim shardagi gapirish markazi

orqali odamning gapirish qobiliyati saqlanaveradi, lekin gapning ohangi, intonatsiyasi bo‘lmaydi, ya'ni gap qo‘pol bo‘ladi. Bunday odam oldin eshitgan musiqalarini unutib qo‘yadi, ya'ni musiqa ohangi farqini bir-biridan ajrata olmaydi. Shunday qilib, bosh miya yarim sharlarining po‘stloq qismida joylashgan oliy nerv markazlari odam tanasining barcha to‘qima va a'zolari ishini boshqaradi.

Похожие

Orqa miyaning tuzilishi

Bosh skeleti

Bosh skeletsizlar kenja tipi

Bosh, gavda va qo‘l-oyoqlar skeleti

Bosh, gavda va qo’l - oyoq muskullari