Xalq qo'shiqlari - Литература - Рефераты

Xalq qo'shiqlari

Загружено в:

20.09.2019

Скачано:

0

Размер:

99.5 KB

Xalq qo'shiqlari Inson kayfiyati hayotidagi vaziyatlar ta’sirida o’zgarib turadi. Ob-havo, ona tabiatdagi fasl o’zgarishlari, oiladagi munosabatlar, do’stlarning totuvligi, hatto, notanish odamning bir og’iz so’zi sizning kayfiyatingizni ko’taradi yoki tushiradi. Xursand bo’lgan paytingizda sho’x qo’shiq aytgingiz, raqsga tushgingiz keladi. Noxush damlarda ko’proq jim turib xayol surishni ma’qul ko’rasiz. Bunday daqiqalarda mungli kuy ham sizga tasalli beradi, og’riingizni bir oz yengil qilganday bo’ladi. Ana shunday holat bizning qalbimizda lirik kechinmalarning paydo bo’lishi uchun zamin tayyorlaydi: qo’shiq yaratishga sabab bo’ladi . Haqiqiy she’r faqat chuqur ehtiroslar, favqulodda ro’y bergan va inson ruhiga ta’sir ko’rsatgan turmush lavhalari ta’sirida yaratiladi. Bu asarlar ichki kechinmalarga boy bo’ladi. Shuning uchun ular she’riy yoki nasriy shaklda yozilishidan qat’i nazar lirika namunasi deb ataladi. Shunday qilib, atrofda ro’y berayotgan voqea - hodisalarga nisbatan ichki his- tuyg’ular vositasida munosabat bildirgan asarlar lirika atamasi bilan yuritiladi. Bu so’z aslida, “lira”- Yunonistondagi qadimiy musiqa asbob nomidan olingan bo’lib, his-tuyg’u, ichki hayajon bilan bog’liqlik ramzi sifatida tushunilgan. Xalq og’zaki ijodidagi qo’shiqlar ham lirik asarlardir. Chunki ularda insonning ichki his- tuyg’ulari, kechinmalari aks etadi. Qo’shiq Mahmud Koshg’arining “Devonu lug’otit turk” (1074) asarida, “qo’shug’” shaklida uchraydi va she’r, qasida ( biron kimsa yoki narsaga atalgan she’r) ma’nosini anglatadi. Qadim zamonlarda “shlok”, “takshut”, “ir” (yir), “kuch” kabi atamalarning ham nazm, she’r, ya’ni ma’lum darajada qo’shiq janriga aloqasi bo’lgan. Qo’shiq haqida ma’lumot berilgan hamma adabiyotlarda “qo’shmoq” fe’lidan hosil bo’lgani aytiladi. Qo’shiq atamasining kelib chiqishi qanchayin sodda tuyulmasin, og’zaki ijodimizdagi bu janr juda murakkab ruhiy

kechinmalarni ifodalashga xizmat qiladi. Qo’shiqlarning janr xususiyatlari quyidagilardan iborat: 1.Unda inson kechinmalari, quvonch va iztiroblari, qalb so’zlari aks etadi. 2.Qo’shiq shaklan she’riy tarzda bo’ladi. O'zbek xalq qo’shiqlari asosan barmoq vaznida, ba’zan aruzda yaratiladi. 3.Ko’pincha xalq qo’shiqlari to’rt misradan iborat bo’lib, tugal ruhiy holatni ifodalash xususiyatiga ega bo’ladi. Shuningdek, bir necha bandlardan iborat biron mavzuga bag’ishlangan qo’shiqlar ham bo’lishi mumkin. Ayni choqda 6, 8 misrali namunalar ham uchraydi. Ular abab yoki aabb; vvgg; to’rt misralilar esa aaab; abab, aaaa; aabb va boshqacha ko’rinishda qofiyalanadi. 4.Qo’shiqning kuyi bo’ladi va ana shu kuy jo’rligida ijro etiladi. Qo’shiqlarimiz tarixiga bir nazar Xalq qo’shiqlari uzoq tarixga ega. Chunonchi turkiy xalqlar og’zaki ijodida, hatto, eramizdan avval ham qo’shiq janriga mansub asarlar borligi ma’lum. Nisbatan keyingi namunalari esa Mahmud Koshg’ariyning “Devon-u lug’otit turk” asaridan ham o’rin olgan. Mahmud Koshg’ariy yozib olgan qo’shiqlar asosan mehnat (ov qo’shiqlari), qahramonlik, mavsum-marosim va lirik asarlardan iborat. Masalan: Yigitlarning ishlatu, Yig’ach yamish irg’atu, Kulan, kiyik avlatu, Bazram qilib avnalim. Mazmuni: Yigitlarni ishlataylik, Daraxt(lar)dan meva(lar)ni qoqishtiraylik, Qulon, kiyik ovlaylik, (So’ng) bayram qilib quvnaylik. Bu qo’shiqda ajdodlarimizning mehnat jarayoniga bo’lgan munosabati aks etgan. Bir ko’rinishda qo’shiqchi ro’y berayotgan voqealarni bayon qilayotganga, daraxtlardagi mevalarni qoqib yig’ish, qulon, kiyikni ovlash harakatini tasvirlayotganga o’xshaydi. Ammo e’tibor bilan she’r matni mazmunini his qilsak,

unda ro’y berishi lozim hodisaga munosabat yetakchi ekanini sezamiz. Jumladan, qo’shiq matnida jamoa bo’lib mehnat qilishga, har bir ishni ko’tarinki, ruhda bajarishga, mehnat samarasidan bahramand bo’lishiga chaqiriq aniq bilinib turibdi. Shuning uchun ham to’rtlikni lirika namunasi sifatida baholashimz, mazmunan esa mehnat qo’shiqlari qatoriga qo’shishimiz mumkin. Keyingi to’rtlika murojaat qilaylik: Takra olib akuralim, Atgin tushib yukaralim, Arslanlayu kukaralim, Kuchi anin kavulsin. Mazmuni: (Dushman) atrofini o’rab, qamal qilamiz, Otdan tushib yuguramiz, Arslondek na’ra tortamiz, Uning kuchini quritamiz. To’rtlikda qadimgi turkiy xalqlar vakillarining dushman ustidan g’alaba qozonish rejasi aks etgan. Bizningcha, bor-yo’g’i shu to’rt misrada uchta harbiy usul ifodalangan. Birinchidan, dushman qo’shnini qamal holda tor-mor qilish, ikkinchidan, otdan tushib ovoz chiqarmay hujumni uyushtirish va, uchinchidan, raqibini ruhiyatiga ta’sir qilgan holda na’ra tortib talvasaga solish. Ammo bu rejim ham voqeaning oddiy bayoni tarzida emas, emotsional ko’tarinki- ruhiy vaziyatda ifodalangan. Shu bilan birga misralardagi mazmun endi oddiy kundalik mehnatini emas, jang sharoitini anglatmoqda. Endi quyidagi to’rtlikka e’tibor bering: Yoy qish bilan qarishti, Ardam yosin qurishti, Chirik tutub ko’rushti, O'qtag’ali o’trushur. Mazmuni:

Yoz qish qarama-qarshi bo’lishdi, (Ularning har biri) maqtanish yoyini qurishti, Qo’shin tuzib(bir-birini) ta’qib qilishti, (Yoy) otish uchun (bir-biriga) yaqinlashdi. Yuqoridagi misolda mahmud Koshg’ariy har yili tabiatda bo’lib o’tadigan manzara haqidagi qo’shiq namunasini keltiradi. Yil fasllaridagi o’zgarishlar hozirgi paytlardagidek odamlarni loyqad qoldirmagan. Yoz o’z fazilatlarini, qish esa o’z ijobiy tomonlarini birma- bir sanab o’tishga tayyor. Agar yozning otgan o’qida aholining issiq kunlarda yayrashi, ekin ishlari bilan shug’ullanishi, rizq- ro’z jamlash faoliyatlari qayd etilsa, qish o’z navbatida o’zi hukmron bo’lgan davrda qirg’in- barot urushlarning to’xtashini ta’kidlab oq otadi. Har ikki faslning ijobiy va salbiy tomonlari tilga olinadi. Muhimi shundaki, “Devon-u lug’otit turk”da mavsumiy qo’shiqlar bilan bir qatorda marosim bilan bog’liq lirik parchalar o’rin olgan. Xususan, olim aza marosimida aytiladigan qo’shiqlardan namunalar keltiradi: Ulishib eran bo’rlayu, Yirtin yaqa urlayu, Siqrib uni yurlayu, Sig’tab ko’zi o’rtilur. Mazmuni: Mardlar yig’lab, bo’ridek uvlashdilar, Yoqalarini yirtib baqirishdilar, Faryod chekdilar, Qattiq yig’idan ko’zlari xiralashib, (go’yo) parda bosdi. Keltirilgan qo’shiqda Sug’d elining botir farzandi Alp Ertunga (Afrosiyob) o’limidan keyingi voqealar haqidagi his-tuyg’ular o’z ifodasini topgan. Agar bu jasur va mard o’g’lonning eramizdan avval yashab o’tgan Iskandar Makedonskiyga qarshi kurashib yurtini himoya qilganini nazarda tutsak, mazkur qo’shiqlarning tarixi taxminan ikki ming yildan ziyod ekani, ayni choqda marosim qo’shiqlari ham boshqa mazmundagi qo’shiqlar singari uzoq o’tmishga egaligi ma’lum

bo’ladi. Xalq marosimlari qatoridan to’ylar ham hamisha yetakchi o’rin egallagan edi. El-yurt bor ekan, jamoa bo’lib yashash bor ekan, to’y qilish odati ham bo’ladi. Xalq bu marosimni o’tkazishga katta tayyorgarlik ko’rgan. Chunki to’y har bir insonning hayotida juda muhim hisoblangan tarixiy lavhalardan, kelgusi umidlardan tashkil topadi. Tabiiyki, shuning uchun ham to’y marosimi o’yin- kulgilar, raqslar, teatrlashtirilgan sahnalardan iboratdir. Ularning asosini o’lan aytishlar, yor- yorlar tashkil etadi. Mumtoz adabiyotimiz vakillarining badiiy ijodiga nazar tashlasak, ba’zan o’sha asarlardan namunalar uchraganiga guvoh bo’lamiz. Masalan, Alisher Navoiy “Xamsa”ning beshinchi dostoni “Saddi Iskandariy” da Iskandarning uylanishi to’yida o’lan aytish va yor-yor kuylashi bilan tomoshalar ko’rsatilganini ta’kidlaydi: Mug’anniy tuzub chinga vaznidan chang, Navo chekki, hay—hay o’lang, jon o’lang! Desang senki: jon qardoshim yor-yor! Men aytayki, munglug’ boshim yor-yor! Albatta, biz o’tmishda o’lan aytishlar, yor-yorlar qaysi kuyda ijro etilganini, qay yo’sinda amalga oshirilganini bilmaymiz. Ammo Alisher Navoiy keltirgan shugina misolda hozirgi o’lanlar va yor-yorlar ham juda uzoq tarixga ega san’at namunalari ekanini tasavvur qilishimiz mumkin. Albatta, qadimgi xalq qo’shiqlarining ham eng go’zal namunalari ishq- muhabbat mavzusi aks etgan lirik qo’shiqlardan iborat. Chunki ularda yetakchi maqsad inson tabiatidagi abadiy fazilat hisoblanmish muhabbat tuyg’usini ifodalash bilan uyg’unlashgandir. Insoniyat tarixida ajdoddan keyin avlod dunyoga keladi. Zamonlar o’tadi. Hayot rivoj topadi. Ota o’rnida farzand turmish chambaragini aylantiradi. Ammo har bir avlod vakili muhabbat tuyg’usini o’zicha boshidan kechiradi. Bu tuyg’u inson ruhiyatiga ta’sir ko’rsatish jihatidan zamon o’zgarishi qoidalariga bo’ysunmaydi. Ehtimol, shuning uchun Mahmud Koshg’ariy bundan ming yil oldin yozib olgan ishqiy mavzudagi lirik qo’shiqni kuni kecha qaysidir tumanda yosh yigit kuylagandek tasavvur uyg’otadi: Bulnar meni ulas ko’z

Qara mengiz, qizil yuz, Andin tomar tukal tuz, Bulnap yana o’l qochar. Mazmuni: Bu mast ko’zli (sevgilim) Qora xoli va qizil yuzi bilan (meni asir qildi). Yonoqlaridan shirinlik tomib, meni asir qildi-yu, Lekin keyinidan (tutqich bermay), mendan qochib ketadi. Xalq qo’shiqlarining lirik turlari zamon o’tishi bilan boshqa mavzudagilardan kam o’zgarishlarga duch keladi. Alisher Navoiy “Saddi Iskandariy” dostonida keltirgan quyidagi parchaga e’tibor qiling: Mengizlar gul-gul, mijjalari xor, Qaboqlari keng-keng, og’izlari tor. Bizningcha, buyuk shoirimiz bu parchaning bevosita xalq og’zaki ijodiga mansub qo’shiqdan olgan yoki juda bo’lmaganda o’sha qo’shiqqa mos holda ijod qilgan. Shunday qilib, qadimgi qo’shiqlar mazmun jihatidan turli mavzularni o’zida aks ettiradi. Bu namunalar til jihatidan bugungi kundagilardan farq qilishiga qaramay, shaklan hozirgi qo’shiqlarga o’xshagdir. Ularning hammasi inson ichki kechinmalarini ifodalash xususiyati birlashtirib turadi. Chunki bu lirik asarlarda bevosita hayotda ro’y berayotgan hodisa emas, balki ana shu hodisaga his- tuyg’ular orqali munosabat bildirish yetakchidir. To’la ishonch bilan aytish mumkinki, o’zbek xalq qo’shiqlarining bugungi kunda el orasida ijro etilayotgan namunalari asosini qadimgi zamonlarda omma orasida yashagan qo’shiqlar tashkil etadi. Va nihoyat, qo’shiq xalqimizning quvonchi va tashvishili kunlarida, mehnat qilish jarayonida unga hamisha hamroh bo’lgan. Binobarin, xalq qo’shiqlarini millatimiz tarixining go’zal kuzatuvchilari deyishimiz mumkin. Qo’shiqlar tasnifi. Hozirgi paytda ham qo’shiqlar xalq hayotiga hamrohdir. Ularda mehnat, tarixiy voqealarga munosabat, mavsum-marosimdagi urf- odatlar, qolaversa, yosh

yigit- qizlarning ishqiy kechinmalari o’z ifodasini topadi. Shu jihatdan xalq qo’shiqlarimizni quydagi turlarga bo’lib o’rganishimiz va tahlil qilishimiz mumkin: 1. Mehnat qo’shiqlari. 2. Mavsum-marosim qo’shiqlari. 3. Lirik (ishqiy) qo’shiqlar. 4. Tarixiy qo’shiqlar. Mehnat qo’shiqlari Boshqa xalqlarda bo’lgani kabi mehnat jarayonini o’zida ifodalashi bilan mashhur. Ma’lumki, o’zbek xalqi asarlaridan buyon dehqonchilik, chorvachilik, hunarmandchilik bilan shug’ullanib keladi. Mehnat esa o’ziga yarasha tashvishdan, iirodalilikni namoyish qilishdan, ba’zan insonning o’zini majbur qilishdan iborat bo’ladi. Ayniqsa, kun davomida doimiy ravishda bir xil zerikali harakat qilish odamni toliqtiradi, qilinayotgan ishni to’xtatmagan holda ovunish choralarini topishga majbur qiladi. Ana shunday damlarda eng samarali yechim qo’shiq aytishdan iborat bo’ladi. Tanob-tanob yerga don sochish yoki bug’doy o’rish, chelak-chelak sut sog’ish, metr- metr gilam to’qish faqat aytishga oson. Aslida bu ishlar dehqon, sut sog’uvchi, gilam to’quvchidan katta jismoniy kuch va malaka talab qiladi. Shuning uchun ajdodlarimiz har bir ishni qo’shiq bilan bajarish ham mehnatning samarali bo’lishini, ham qilinayotgan ishni zerikmasdan bajarish yo’lini o’ylab topganlar. Xalqimiz orasida yashab kelayotgan mehnat qo’shiqlari bajariladigan ish sohalariga qarab uch xil bo’ladi: 1. Dehqonchilik bilan bog’liq mehnat qo’shiqlari. 2. Chorvachilik bilan bog’liq mehnat qo’shiqlari. 3. Kasb-hunar bilan bog’liq mehnat qo’shiqlari. Ajdodlarimiz madaniyati merosi bo’lmish “Avesto”da shunday parcha bor: “Zardusht iloh Axura Mazdadan so’radi: -Ey, Axura Mazda! Zaminni hammadan ham baxtiyor qiluvchi zot kim? Axura-Mazda javob berdi: -Ey, Zardusht! Kimki uni yaxshilab haydasa va ziroatga tayyorlasa! Ey, Zardusht! Kimki g’alla eksa, u haqiqatani ekadi…”

Demak, ota-bobolarimiz yer yuzidagi eng qadim zamonlardan buyon dehqonchilik bilan shug’ullanib kelayotgan xalq ekan. Dehqonchilik bilan shug’ullanish esa ijtimoiy hayotning ma’lum pog’ona bosqichlari bosib o’tilgandan keyin paydo bo’ladi. Demak, bizning ajdodlarimiz o’sha paytlarda ham madaniyat o’chog’iga aylangan hududlarda yashaganlar va dehqonchilik bilan shug’ullanganlar. Ehtimol, shuning uchun ham Mahmud Koshg’ariyning “Devon-u lug’otit turk” asarlarida bog’dan mevalar terish haqidagi qo’shiqlar uchraydi. Xalq og’zaki ijodi asarlarning to’plash ekspeditsiyalarida dehqonchilik bilan bog’liq mehnat qo’shiqlaridan ko’plab yozib olishini bu tur qo’shiqlarning xalq hayoti bilan juda yaqin ekanini yana bir bor isbotlaydi. Shoxlari bor quloch-quloch Shoximga qo’nar qaldirg’och Yuray desam, voy, qornim och, Men qo’shga qanday yarayin. Ho’kizginam bo’yniginang ezildi, Ko’zginangdan yoshlar qator tizildi. Bo’yinturuq bilan omoch tortmasang, Sening bilan menga go’rlar qazildi. Dehqonchilik qo’shiqlarida yil-o’n ikki oy mobaynida boriladigan mehnat jarayoni bosqichma-bosqich o’z ifodasini topadi. Ularda yer haydash, dalaga yangi yil hosili uchun bug’doy sepish, unib chiqqan va boshoqlari yetilgan bug’doylarni o’rish, ularni yanchib donini ajratish kabi har bir jarayon, albatta, qo’shiq aytish faqat dehqonning bajarayotgan mehnati aks etgan, desak, xato bo’ladi. Chunki har bir qo’shiqda dehqon, albatta, o’zining ichki kechinmalarini, hayot tajribasidan olgan taassurotlarini, turmush tashvishlarini bayon etishiga urinadi. Qo’shiq aytuvchi kishi sahnada san’atkor emas, balki dalada ham oddiy ijrochi, ham tinglovchi sifatida namoyon bo’ladi. Aslini olganda uning qo’shiqlarini yer haydayotgan yoki bug’doy yanchayotgan ho’kizi eshitadi xolos. Dehqonga

ho’kizdan boshqa tinglovchining keragi ham yo’q. Chunki u dilidagi his-tuyg’uni o’ziga o’zi aytadi va shu yo’l bilan qilayotgan ishini engillashtiradi, ko’ngliga taskin beradi. Bu qo’shiqlarda ho’kizni erkalash, unga biron kimsaga murojaat qilganidek munosabatda bo’lish, uning tilidan qo’shiq to’qib o’zining dardini ifodalash tuyg’usi yetakchilik qiladi. Ho’kiz: “Yuray desam, voy, qornim och”,- deganida, dehqon nomidan gapiradi. Aslida dehqonning qorni och emasmi?!. Shu o’rindayoq omoch tortayotgan ajdodimiz ho’kizni erkalashga tushadi. Uni “Ho’kizginam” deb siylaydi. O'z taqdirini ho’kizning qismati bilan teng ekanini: “Sening bilan menga go’rlar qazildi” kabi misralar vositasida ifodalaydi. quyidagi qo’shiqqa e’tibor bering: “Xo’p hayda-yo, xo’p hayda, Qalqon qulog’im, hayda, Temir tuyog’im, hayda, Ostingda bosgan donni Oyog’ing qilsan mayda”. Demak, bug’doyni “po’stidan judo qilayotgan ho’kiz” dehqon uchun eng qadrdon kishisidan ham azizroqdir. Shu sababli “qalqon qulog’im”, “temir tuyog’im” sifatlashlari yaratilgan. Hatto bir qo’shiqda: “Jilviragan qoshingni mayda-yo, mayda, Surmalayin jonivor, mayda-yo, mayda” deyiladi. Bu qadar e’zoz, bu qadar go’zal fikrlarning bayoni ho’kizga qaratilganiga ishonging ham kelmaydi. Ammo bu hayot haqiqati edi. Dehqon uchun ho’kiz hayot va mamot masalasi edi. (A. Qahhorning “O'g’ri” hikoyasini eslang). Shuning uchun ham yuzlab qo’shiqlarda, ayniqsa, “qo’sh” va “mayda” ho’shihlarida bobo dehqonlarimiz ho’kizning fazilatlarini maqtab kuylaganlar. O'rim qo’shig’ida esa tasvir markaziga o’roq chiqadi. Endi o’roqning olmosligi, o’tkirligi ta’riflanadi. O'roq shu qadar keskir-ki, bug’doyni o’rmasdan turish mumkin emas: O'rog’im olmos,

O'rimdan qolmas, Sira ham tolmas, O'rmasam bo’lmas. “Yorg’ichoq” qo’shiqlarida ham qo’shiqchi yorg’ichoqqa murojaat etadi. U bilan gaplashadi, hasratlashadi, dardini to’kadi. Natijada yorg’ichoq dehqonning his- tuyg’usini samimy ravishda bayon qilish vositasiga aylanadi: Yorg’ichoq yalpoqqina, Un qilar oppoqina, Yorg’ichoq xir-xir etar, Mushtdakkina xamir etar Yorg’ichog’im guldur-guldur, Bo’g’zim to’la oppoq undir, Boy bobomning xonadoni Ikkimizni yeydir-yeydir. Ma’lum bo’ladiki, yil fasli o’zgaradi, dehqonning muomala qiladigan narsasi (ho’kiz, o’roq, yorg’ichoq) o’zgardi, ammo qo’shiqning yaratilishidan nazarda tutilgan maqsad (og’ir mehnatni yengillatish, ichki his- tuyg’uni ifodalash) o’zgarmaydi. Har qanday vaziyatda ham xalq hayotining badiiy ifodasi sifatida qo’llanadi. Chorvachilik bilan bog’liq mehnat qo’shiqlari, asosan, sog’ish jarayoni aks etgan lirik parchalardan iboratdir. Ular sigir, echki, qo’y kabi hayvonlarni sog’ish paytida aytiladi. Dehqonchilik bilan bog’liq qo’shiqlar kabi sog’im qo’shiqlari ham tinimsiz bir xil harakat jarayonini nisbatan yengillashtirishga xizmat qilgan. Ikkinchi tomondan sog’ilayotgan sigir ham aytilayotgan qo’shiqqa bora-bora o’rgangan. Qo’shiqni eshitganida o’zini ancha tinch tutgan va ko’proq sut bergan. Shuning uchun “xo’sh-xo’sh” larda sog’uvchi kimsa sigirni erkalagan, unga shirin- shirin so’zlarni aytgan:

Ho’shim molim-govmishim, Emchaklaring sog’mishim, Oralab yeding o’tingni, Iylab bergin sutingni. Seni siylab boqayin, Ko’zmunchoqlar taqayin, Quralay ko’z govmishim, Tuyoqlari kumushim. Zotli molim xo’sh-xo’sh, Sutli molim xo’sh-xo’sh. E’tibor bersak, dehqonchilikda ho’kiz “temir tuyog’im” deb erkalangan edi. Endi sigir “quralay ko’z”, “tuyoqlari kumushim” deb atalayapti. Har qanday holatda inson bu erkalashlarni ho’kiz yoki sigir tushunib yetmasligini yaxshi biladi, ammo qo’shiq ijrosidagi tovush tovlanishining, ohangning hayvonlarga ijobiy ta’sir ko’rsatishiga ishonadi. Turey-turey qo’shiqlari qo’ylarni sog’ish paytida aytilgan. Qorako’lchilikda qimmatbaho teri olish uchun qo’zilar tug’ilganidan ko’p vaqt o’tmay so’yilgan. Sovliqlardan sut olish esa keyin ham davom etavergan. Ona qo’yni sog’ish bilan bolasidan ajralgan sovliqning qismati nisbatan engillashgan. Shuning uchun turey- tureylarda ona qo’yning qo’zisidan ajralganiga hamdardlik bildirilgan, unga achinish tuyg’usi ifodalangan: Bolalilar bosh bo’lar, turey-turey, Bolasizlar yosh bo’lar, turey-turey, Kelar yili tuqqaning, turey-turey, Qo’zingga yo’ldosh bo’lar, turey-turey. Boshqa xalq qo’shiqlari singari turey-tureylarda ham erkalash, qo’shiq ohangini qo’yga muloyim yetishiga harakat qilish aniq seziladi. Uning aqlli ekani, egasiga yordam berishga tayyorligi ta’kidlanadi. Hatto bog’da ochilgan gul bilan teng ko’riladi. Bu o’rinda qo’y sog’ishning xalq turmushi tarixida juda uzoq qadimgi zamonlarga borib taqalishini ham yodda tutish kerak. “Alpomish”

dostonida Boysari Barchin qizini maktabdan chiqarib oladi. “Qizimga Ko’kqamish ko’lida qo’y sog’dirib, chorvadorlik ilmini o’rgatayin, qo’y sog’moqqa usta bo’lsin”,-deydi. Demak, ko’chmanchi qabilalarda qo’y sog’ish alohida ko’nikmani talab qilar ekan. Shuning uchun ham bu ish bilan shug’ullanadigan odamlar asrlar davomida sog’iladigan qo’ylar bilan qanday muomalada bo’lish sirlarini egallaganlar. Shirin so’zlar bilan qo’ylarning ko’ngliga yo’l topishga uringanlar: Esli molim-oqilim, turey-turey, Yelkamdagi kokilim, turey-turey, Shuncha molning ichida, turey-turey, Bog’da ochilgan gulim, turey-turey. Chorvachilikda churiya qo’shiqlarining ham o’ziga xos o’rni bor. Avvalo sog’iladigan sigirga, qo’yga, echkiga alohida-alohida qo’shiq yaratilishiga e’tibor beraylik. Xo’sh qo’shiqlari qo’y sog’ishda aytilmaganidek, turey-turey va churiya- churiyalar sigir sog’ishda aytilmagan. Tabiiyki, hayvon uchun qanday qo’shiq aytib sog’ish bari bir emasmi? - degan savol tug’iladi. Ha, hayvon uchun bunday emas. Gap shundaki, chorvador xalq har bir qo’y yoki echkiga o’ziga xos munosabatda bo’ladi. Ular hatto sigirning qaysi rangni yaxshi ko’rishini, qaysi qo’shiqni ijro etganlarida ko’proq sut berishini bilganlar: Og’ziginangda o’ting bor, churey-churey. Yelinginangda suting bor, churey-churey. Sersoqolim jonivor, churey-churey. Kerilib turgan buting bor, churey-churey. Churiyalardagi “Og’ziginang”, “yelinginang”, “sersoqolim” kabi so’zlarga e’tibor bering. Nega “og’zing” yoki “yelining” deb qo’yaqolinmagan. Avvalgi tur qo’shiqlardagi kabi bularda ham echkini erkalash, uning tabiatiga moslashish harakati seziladi: Shoxlaring bor bir minora, churiya-churiya. Minora qushlar qo’nara, churiya-churiya. Bolang olib iskasang-a, churiya-churiya. Kuygan yuraging qonar-a, churiya-churiya.

Xullas, chorvachilik bilan bog’liq qo’shiqlar xalqimizning qadimdan bu kasbni egallab kelganidan, chorvachilikning sir- sinoatlaridan xabardor ekanliklaridan dalolat beradi. Xalq har bir hayvonga xuddi odamdek muomalada bo’lgan. Uni erkalagan, maqtagan, ta’riflangan, sifatlangan. Eng muhimi, bu shirin so’zlarning hayvonlarga ijobiy ta’sir qilishiga ishongan. “Xo’sh”, “turey-turey”, “churiya-churiya” qo’shiqlarini chorvadorlar ichida yashagan shoirtabiat odamlar to’qishgan. Bu qo’shiqlarda so’z san’atining boshqa namunalarida bo’lganidek turli badiiy san’atlardan foydalanilgan. Xususan, “esli molim”, “qalam qoshing”, “zotli molim” kabi sifatlashlar; “qozon-qozon suting bor”, “aqllisan, donosan”, “shoxlaring bor bir minor” kabi mubolag’alar; “elkamdagi kokilim”, “bog’da ochilgan gulim” kabi istioralar; “qalam qoshing suzilsin”, “sutliligingni bildirgin” kabi jonlantirishlar qo’llangan. Qo’shiqlarning qofiyalanishiga ham alohida e’tibor berilgan. Bu tasvir vositalari qo’shiqlarning estetik qimmatini oshiradi, alohida joziba bag’ishlaydi. O'zbek xalqi qadimdan hunarmandchilik bilan shug’ullanib kelgan. O'zbekiston hududida ishlab chiqarilgan shohi- atlaslar, banoras to’nlar, amaliy san’at namunalari, to’qilgan gilamlar butun dunyoga mashhur bo’lgan. Qadimda o’z hunari bilan nom taratganlar ustalar o’z shogirdlaridan kasbiy ko’nikmalari qatori she’r o’qish, qo’shiq aytish, biron musiqa asbobida kuy chalishni ham talab qilganlar. Ularning fikricha har tomonlama yetuk bo’lmagan inson, ayniqsa, estetik zavqi yo’q kimsa bironta hunarni ham uquv bilan o’zlashtira olmas ekan. Shuning uchun xalqimiz orasida turli kasb bilan shug’ullanayotgan odam bor-ki, qo’shiq aytadi, askiya aytadi, musiqa chaladi. Bu fazilat unga o’zi ishlab chiqariyotgan narsaning go’zal ko’rinishiga ega bo’lishini ta’minlaydi. Qo’shiq bilan tayyorlanayotgan narsaga ustaning mehri quyiladi. O'zbek xalq mehnat qo’shiqlarining salmoqli qismini kashta tikish, bo’z to’qish, charx yigirish kabi faoliyat bilan qo’shib turli ohangda ijro etiladigan she’r namunalari egallaydi. Jumladan, ularning eng qadimgilaridan biri charx qo’shiqlari hisoblanadi. Bugungi kun tekstil sanoati paydo bo’lmasidan avval paxtaning chigiti qo’lda ajratib olinar va paxta momig’idan charxni aylantirish vositasida ip

yigirilardi. Ayollar kecha-kunduz ip yigirish bilan shug’ullanib, tayyor bo’lgan iplardan gazlamalar to’qishardi. Bu mehnat jismonan ortiqcha kuch talab etmasa ham, o’ta zerikarli va unumsiz edi. Mehnat azobini yengillashtirish uchun charx qo’shiqlari aytilgan: Charx yigirib, charx yigirib, Shul qo’lginam toladir, Agar shuni yigirmasam, Bolalar och qoladur. Har bir zerikarli va mashaqqatli mehnatning ham chegarasi bo’ladi. Ammo agar odam bevosita charxda ip yigirish orqali kun ko’rsa, unga bu azobli mashg’ulot chegarasizdek bo’lib tuyulgan. Ana shunday daqiqalarda odam o’ziga o’zi chorasiz, najotsiz bir shaxs bo’lib ko’ringan. Qo’shiqda bu holat shunday kuylangan: Charxginam, ey, charxginam, Yurakkinam olasan, Ayt-chi, sen bu yurtlardan, Qachongina yo’qolasan?! Xalq qo’shiqlari, asosan, she’riyatning barmoq vaznida to’qilgan. Barmoq vaznidagi she’rlarda misradagi bo’g’inlar soni asosiy she’riy o’lchov bo’lib qoladi. Masalan, birinchi to’rtliklardagi 1va 3 misralari 8 bo’g’indan, 2 va 4 misralari 7 bo’g’indan iborat. Ammo ba’zan aruz vaznida to’qilgan qo’shiqlar ham uchraydi. Aruz vaznidagi she’riy misrlarda cho’ziq (yopiq) hijo (bo’g’in)lar ma’lum tartibda oldinma keyin keladi. Quyidagi parchaga e’tibor bering: Charxginam sarparasi sakkiz tugun, Sakkiz oy ketgan og’am kelsin bugun. Bu misralar aruz vaznining ramali musaddasi mahzuf bahrida aytilgan. Ammo xalq qo’shiqlarida biz aruz vazni qoidalariga mukammal amal qilgan holda to’qilgan she’rlarni ko’p uchratmaymiz. Taxmin qilish mumkinki, odatda bunday misralar mumtoz she’riyat bilan shug’ullangan yoki mumtoz she’riyatdan xabardor farzandlar tomonidan yaratilgan bo’lishi mumkin. Xalq she’riyatining asosiy vazni

barmoq deb belgilanishida bunday holatlarni ahamiyat jeihatidan ikkinchi darajali deb hisoblaymiz. O'rmak qo’shiqlari gilam to’qish paytida ijro etilgan. Ma’lumki, o’zbek gilamlari va sholchalari gul bezaklarining rang-barangligi, murakkab chizgilariga boy ekanligi, o’zining pishiq-puxta to’qilishi bilan shuhrat topgan edi. Deyarli hamma viloyatlarda ayollar to’qigan gilamlar ham turmushga uzatiladigan qizlarga sep, ham ro’zig’ordagi biron kamchilikni to’ldirish vositasi bo’lgan. Qo’shiq esa ana shunday murakkab jarayonni yengillatgan. Agar bir o’rinda bu hunarning azobi bayon etilsa, ikkinchi o’rinda to’g’ridan- to’g’ri his-tuyg’u o’z ifodasini topgan: O'rmagimga o’ray-yo, Men boshimga qaray-yo, O'rmakkinam o’ngin deb, Endi sendan so’ray-yo. Boshqa bir to’rtlikda esa ommaviy muammolar ham qo’shiqchi diqqat markazida turgan: O'rmagim yotibdi o’ralib, Men yuribman kerilib, Qaynonam qaramaydi, O'rmagimga o’yrilib. Bo’zchi kosiblari soatlab bir xil qo’l va oyoq harakatlari bilan shug’ullanganlar. Ular bu harakatlarga shu qadar o’rganib ketgan edilar-ki, bo’z to’qiydigan qurilma do’kon bo’lmasa ham qo’llari bevosita aynan o’sha shakllarni hosil qilaveradigan darajaga yetgandi. Shuning uchun bo’zchi qo’shiq aytganida yoki askiyaga qo’shilganida o’zini juda erkin tutgan. Natijada qo’shiq aytishdan bo’zchi estetik qoniqish hosil qilgan: Bo’z to’qiyman, qirog’ini o’xshatib, Mokki otaman qo’lginamni qaqshatib, Bozordagi shohilardan yaxshiroq Nafisdan o’xshagan bo’zim yaxshidir.

Yuqoridagi qo’shiqda bo’zchining o’z mehnatiga baho berishi ham ifodalangan, dnyishimiz mumkin. Ma’lumki, bo’z paxta ipidan to’qilgan. Bunday matoni odatda kambag’al, iqtisodiy jihatidan yaxshi ta’minlanmagan odamlar sotib olganlar. Bo’zning pishiq va ayni paytda mayin chiqishi bo’zchi mahoratiga bog’liq bo’lgan. Uzilgan ipni o’sha zahoti ulash, mokkini ustalik bilan otish mato to’qiydigan qurilma do’konni bir maromda ishlatish mahsulotning sifatli chiqishini ta’minlagan. Binobarin, bo’zchi ham ish faoliyatiga zehn bilan qarashga. Ham kayfiyatini yaxshi tutishga uringan. Ammo turmush tashvishlari unga har doim salbiy ta’sir qilgan. Quyidagi qo’shiqqa o’xshagan namunalar ana shunday damlarda aytilgan: Do’kon uyga kirsam, tanam qaqshaydi, Sovuqlarda o’lmay qolsam, yaxshiydi Qarish tillaga ketsa yaxshiydi Shunday mening bo’zim arzon ketarmi. Do’kon, ya’ni bo’z to’qiladigan qurilmali uyga kirishdanoq kun bo’yi qilinadigan mashaqqatli mehnat azobi bo’zchiga tinchilik bermagan. Qish kunlari esa qo’l-oyoqlarining ishlashi yanada qiyinlashgan. Bunday ko’ngilsiz vaziyat qo’shiqlarda aks etmasligi mumkin emasdi. Marg’ilon, Qo’qon shahridagi keksa bo’zchilar bilan bo’lgan suhbatimizda ular bo’z qo’shiqlarini doimiy ravishda xirgoyi qilmasliklarini ham qayd etganlar. Ish paytida ular “Galdir”, “Omonyor”, “Sumbula” kabi qo’shiqlarni, askiya payrovlarini aytishar ekan. Bu holat boshqa mehnat sohalari bilan shug’ullanuvchi odamlar uchun ham taalluqlidir. Xususan, gilam to’qiydiganlar faqat o’rmak, ip yigiruvchilar faqat charx qo’shiqlarini aytishgan ekan, degan tasavur hosil bo’lmasligi lozim. Ularning har biri o’ziga yoqqan qo’shiqni xirgoyi qilgan. Ammo bari bir tabiatan she’r to’qiy oladigan tug’ma shoir odamlar o’z kasblariga atab qo’shiq yaratganlar. Shunday qilib, mehnat qo’shiqlari haqida quyidagi xulosalarga kelishimiz mumkin:

Mehnat qo’shiqlari qaysi mavzuda yaratilganidan qat’i nazar lirik asarlar hisoblandi. Ularda qo’shiqchining hayotiy voqealarga bo’lgan munosabati his- tuyg’ulari orqali aks etadi. Xalqimizning mehnat qilishi, chorvachilik, dehqonchilik, kasb-hunar qo’shiqning yaratilishi ham shunchalik tarixiydir. Turli sohadagi faoliyat bilan shug’ullangan ajdodlarimiz mashaqqatli va zerikali mehnat jarayonining samarasini oshrish maqsadida maxsus o’z kasb- hunarlari bilan bog’liq qo’shiqlar kuylaganlar. Mehnat qo’shiqlarida turli hayvonlarni va ish qurollarini erkalash, ularga murojaat qilish, ularni jonlantirish xususiyati etakchilik qiladi. Mehnat qo’shiqlarining tili sodda, kuyi yengil, fikrni ifodalash usuli oddiy bo’lib, asosiy maqsad ish faoliyatini osonlashtirish, qo’shiq aytuvchi shaxs ruhiy holatini ko’tarishga qaratilgan bo’ladi. Mavsum-marosim qo’shiqlari xalq poeziyasining tarkibiy qismini tashkil etadi. Bu qo’shiqlar xalqimizning qadimy ommaviy bayramlari, oilaviy rasm- rusumlar bilan bog’liqdir. Mahmud Koshg’ariyning “Devon-u lug’otit turk” asarlaridan ma’lum bo’ladi-ki, mavsum va marosimlarga oid xalq qo’shiqlarining tarixi qadim o’tmish zamonlarga borib taqalar ekan. Shu paytlardan buyon mavsumlar almashdi, marosimlar muttasil o’tkaziladi. Bu marosimlarda qo’shiqlar aytiladi. Dunyoda birorta xalq yo’q-ki, turli munosabatlar bilan ommaviy bayramlarni nishonlamasin. Mavsumlar, diniy e’tiqodlar, tarixiy voqea-hodisalar, milliy udumlar xalq bayramlari mazmunini tashkil etadi. Binobarin, bayramlarning o’tkazilishiga qarab, ulardagi so’z bilan bog’liq lavhalar mundarijasiga qarab o’sha xalqning tarixi, milliy xususiyatlari haqida tasavvur hosil qilish mumkin. Chunki bunday xalq shodiyonalarida raqsga tushiladi, qo’shiqlar aytiladi, milliy liboslar kiyiladi, turli o’yinlar o’ynaladi, taomlar pishiriladi, tomoshalar uyushtiriladi. Olimlarning ma’lumot berishlaricha, mavsum-marosimga oid o’zbek xalq bayramlarining tarixi minglab yillar bilan o’lchanar ekan. Ularning ayrimlari yil fasllarining qulay yoki noqulay kelishi bilan ham bog’liq bo’lgan. Masalan, yil

quruq kelib, yomg’ir yog’masa “Yomg’ir chaqirish” marosimi (“Sust xotin”); bug’doy sholi boshoqlari yetilgan paytda shamol ularni payhon qilsa, shamol to’xtatish (“Choy momo”); don mahsulotlarini shopirish paytida shamol bo’lmasa, shamol chaqirish (“Yo, Haydar”); yil sovuq kelsa, quyoshga topinish; umuman, omadsiz yilda qurbonlik keltirish marosimlari o’tkazilgan. Al Beruniyning “Qadimgi xalqlardan qolgan yodgorliklar” kitobida “Navro’z”, “Ramush og’am”, “Boboxvora” kabi o’ndan ortiq mavsum-marosim bayramlari xususida ma’lumot beriladi. Xalqimiz tarixiy va keyinchalik paydo bo’lgan bayramlardan hozirgi paytda quyidagilarni nishoonlayotganini qayd etish mumkin: 1. Mustaqillik bayrami-O'zbekiston Respublikasining mustaqil davlat deb e’lon qilinishi nishonlanadigan kun. 2. Mehrjon-quyosh ma’nosini anglatib, kun va tunning kuz faslidagi teng kelishida nishonlanadi. 3. Iyd ramazon- ro’za oyining tugallanish munosabati bilan nishonlanadigan bayram. 4. Iyd qurbon- iyd ramazondan 70 kun keyin qurbonlik keltirish marosimi. 5. Navro’z- yangi kun, ya’ni yangi yilning boshlanishi. Yuqoridagi qayd etilganlardan tashqari xalq qalbidan o’rin olgan sumalak, qulupnay, gilos, qovun sayillarida ham yurtdoshlarimiz guruh-guruh bo’lib ko’ngil ochish yig’inlarini o’tkazganlar va o’tkazmoqdalar. Umumxalq bayramlari bilan bir qatorda oilaviy marosimlar (to’ylar va aza) ham o’zbeklar maishiy hayotida muhim o’ringa ega. Oilaviy doirada o’tkaziladigan bu rasm- rusumlarning hammasidan qo’shiq jo’rligi yonma-yon turadi. Sobiq sovet tuzumi davrida xalq qadriyatlari qatori so’zning mo’jizaviy quvvatini inkor etish odati an’ana tusga kirgan edi. Ruhiy dunyoning murakkab sir- sinoatlari mutloq inkor etilar edi. Natijada xalqimizning asrlar bo’yi davom etib kelayotgan yomg’ir chaqirish, shamol to’xtatish, shamol chaqirish, qurbonlik qilish orqali mushkul vaziyatni yumshatish kabi mavsum va marosim amallariga nopisandlik munosabati paydo bo’lgandi. Ammo hamma gap shundaki, yuqorida

nomlari qayd etilgan marosimlarning urf- odatlar sifatida mukammal o’tkazilishi xalq hayotida ijobiy natijalar bergan. Shuning uchun ham xalqimiz mavsum va marosim odatlariga katta hurmat bilan qaragan va ularni muttasil ravishda o’tkazib kelgan. Yomg’ir chaqirish marosimi odatda bahor faslida o’tkazilgan. Olimlarning ta’kidlashicha bu marosimlar ayniqsa Surxondaryo va Qashqadaryo viloyatlari hududlarida ommaviy tus olgan. Ayrim ma’lumotlarga qaraganda, hatto yomg’ir chaqirish odatimiz qadimgi “Avesto”da madh etilgan, sharaflangan, osmon suvlari tangrisi Tishtriyaning xalq o’rtasidagi b o shqacha nomlanishidan iborat ekan. Dehqonchilik rivojlangan mahalliy joylarda yomg’irning o’z vaqtida bo’lishi juda muhim ahamiyatga egadir. Qurg’oqchilik dehqonchilik bilan shug’ullanadigan aholiga katta kulfat keltirgan. Shuning uchun odamlar sust xotin mavsumiy odatini topishgan. Qizig’i shundaki, bu joyda istiqomat qiladigan yurtdoshlarimiz sust xotin marosimi o’tkazilgandan so’ng haftalab yomg’ir yoqqani haqida o’nlab misollar keltirishadi. Shuning uchun ham xalq bunday marosimlarning o’tkazilishiga puxta tayyorgalik ko’rishgan, har bir amallarga rioya qilishni odat tusiga kiritishgan. Sust xotin qo’shig’i shunday boshlanadi: Sust xotin, suzma xotin, Ko’lankasi maydon xotin! Yomg’ir yog’dir ho’l bo’lsin, Yer-u jahon ko’l bo’lsin. Yuqoridagi misoldan ma’lum bo’ladiki, qo’shiqning bosh maqsadi yomg’ir yog’dirish homiysi bo’lgan Sust xotinga murojaat qilish orqali dehqonchilik uchun qulay sharoit yaratishdan iboratdir. Qo’shiq davomida yomg’ir yog’ishidan qurg’oqchilikning yo’q bo’lishi, kuzda yerga sepilgan bug’doylarning bosh tortishi, ya’ni boshoq chiqarishi kuylanadi. Bu qo’shiqda tabiat manzarasi bilan aloqador misralarni ko’plab uchratamiz. Ko’klamda odamlarning o’ynab- kulishi, shaftolilarning barg yozishi, atrof maysalar bilan bezanishi, ajoyib gullarning

ochilishi tasviri orqali ajdodlarimiz ona yurtga bo’lgan muhabbatini ifodalagan bo’lishlari ham ehtimoldan holi emas: Yomg’ir yog’di, ho’l bo’ldi! Yeru jahon ko’l bo’ldi! Shaftolilar barg yozdi, Sust xotin suzma xotin. Qashqadaryo va Surxondaryo viloyatlarida yashovchi mahalliy aholi “Sust xotin” marosimiga, asosan, ayollar tayyorgarlik ko’rishini va marosim ishtirokchilari ayollardan iborat bo’lishini alohida ta’kidlaydilar. Albatta, bu marosimga tayyorgarlik ko’rish va o’tkazishda mahalla ayollarning o’zaro yanada yaqinlashuvini, bir-birlari bilan iliq munosabatda bo’lishlarini ham e’tibordan soqit qilib bo’lmaydi. Mavsum- marosim qo’shiqlaridan “Choy momo” marosimida aytiladigan namunalar ham o’zlarining qadimiyligi bilan e’tiborga loyiqdir. “Choy momo” marosimi dehqon yetishtirgan hosilga zarar yetkazuvchi tinimsiz davom etayotgan qattiq shamolni to’xtatish vaqtida o’tkaziladi. Bu marosimni “Sust xotin” kabi O'zbekiston viloyatlarida keng tarqalgan deya olmaymiz. Olimlar choy momo marosimini Chimkent viloyatining Sayram tumanida ko’proq o’tkazilib turilishini ta’kidlaydilar. “Choy momo” marosimida, asosan, quyidagi qo’shiq ijro etiladi: Choy, choy, choy momo, Choy momosi o’libdi, O'g’li etim qolibdi, Bosa-bosa beringlar. Bosilib qolsin bu shamol. Uga-uga beringlar, Ugilib qolsin quv shamol, Oblo-hu, oblo-hu,… Shamol to’xtatish marosimi ham ajdodlarimizning qadim zamonlarda o’tkazgan odati hisoblanadi. Bu marosim haqida folklorchi olim B. Sarimsoqov faqat bitta qo’shiq saqlanganini ta’kidlaydi. Muhammad payg’ambarning kuyovi

Hazrat Aliga Haydar nomi bilan murojaat qilinadi va shamolni qo’yib yuborilishi so’raladi: Haydar, ota-onang o’libdir, Moli senga qolibdir. Bolang suvga oqibdir, Shamolingni qo’yvor. Xullas, “Yomg’ir chaqirish”, “Shamol chaqirish”, “Shamol to’xtatish” kabi mavsumiy qo’shiqlarning xalqimiz orasida hozirgi paytgacha yashab kelayotgani ham dehqonchilik kasbining o’zbeklarda ham qadimiyligini, ham xalqimizning ajdodlar yaratgan qadriyatlariga cheksiz hurmat bilan qarashini isbotlaydi. Ajdodlar merosiga ehtirom bilan munosabatda bo’lish esa xalqimiz umid bilan qarashimiz uchun ishonch hosil qiladi. O'zbek xalqning og’zaki ijodida oilaviy marosimlarning o’tkazilishi ham nazarda tutilgan. Ayniqsa, to’y marosimi to’ylardagi o’lan aytishlar, yor-yorlar, kelin salomlar poetik ijodimizning mumtoz namunalari bo’lib qolgan. Yor-yorlar matni bilan tanishar ekanmiz, ularda yosh oilaningkelajakda baxtli bo’lishi, oila qurayotgan yoshlarning bir-biriga sadoqatliligi xususida umidlar bildirilganligiga amin bo’lamiz. Yor-yorlarda yosh yigit va qizning yangi hayot bo’sag’asiga qadam qo’yayotgani alohida ta’kidlanadi. Hayot tajribasi oilaviy turmush totuvlikdan boshlansa, inoqlik yetakchi bo’lsa, keyingi hayot ham yomon o’tmasligini ko’rsatgan. Shuning uchun kuyov- kelinning inoq turmush boshlashi bu tur qo’shiqlarida qayta-qayta tilga olinadi: Shoyi ko’ylak yengiga Tut qoqaylik yor-yor, Kelin-kuyov ko’ngliga O't yoqaylik yor-yor. Xalq qo’shiqlarini yozib olish tajribasi shuni ko’rsatadi-ki, yor-yorlar xalq orasida boshqa mazmundagi qo’shiqlardan kengroq ommalashgandir. Ma’lumki, xalq og’zaki ijodidagi hamma janrlardan ko’ra qo’shiq o’zining tez yaratilishi bilan ajralib turadi. Bu fikr yor-yorlarga ham taalluqlidir. Bu o’rinda shuni ta’kidlash

joizki, shoirlik iste’dodiga ega bo’lgan yor-yor ijrochisi to’yning o’tkazilishi sharoitga qarab, yangi-yangi to’rtliklarni to’qib ketavergan. Natijada, aynan to’y o’tkazilayotgan paytdagi vaziyatlar ham qo’shiq matnida o’z ifodasini topgan: Qish kunida sovuq yeb, Horib keldik yor-yor, Achchiq-tirsiq kerakmas, Koyib keldik yor-yor. Ammo yor-yorlarning ayrim-ayrim namunalari qanday mazmunda bo’lishidan qat’i nazar oxir-pirovardida yosh oilaga baxt tilash an’ana bo’lgan. Taxta-taxta ko’prik Taxting bo’lsin yor-yor, Payg’ambarning qizidek Baxting bo’lsin yor-yor. To’g’ri, lirik janrga xos bo’lgan his-tuyg’ularni ifodalash jarayonida qo’shiq ijrochilari o’zlarning hayotidan o’rin olgan ayrim noxush holatlarni ham ifodalashdan tortinmaganlar. Bunday qo’shiq namunalarida qizning yoshi katta odamga turmushga chiqayotgan kabi lavhalar ham o’z aksini topgan: To’yda qizlar o’ynashib, Ko’ngli to’lsa, yor-yor, Yosh boshiga er qildi, Chol ham bo’lsa, yor-yor. Yoki quyidagi to’rtlikka e’tibor bering: Uzoqqa borgan qizning Rangi sariq yor-yor, Ko’zida oqqan yoshi Misli ariq, yor-yor. Ammo bevosita to’yning o’tkazilish sharoitini ko’z oldimizga keltirsak, chor-atrofda o’yin-kulgilarga e’tiborning kuchliligini narzda tutsak, yuqoridagi qo’shiqlarda aks ettirilgan qayg’u-alamlar to’y ishtirokchilariga u qadar katta ta’sir ko’rsatmasligi ham o’z-o’zidan ravshan bo’ladi. Marosim qo’shiqlaridan yor-

yorlari bir qator badiiy jihatdan mukammalligi bilan ajralib turadi. Xususan, bu qo’shiqlarida parallelizm tasvir san’atining namoyon bo’lishi ko’proq uchraydi. Parallelizm deganda, tasvirlanayotgan bir voqea-hodisani ikkinchi bir voqea- hodisaga qiyoslash nazarda tutiladi. Masalan. Tokchadagi qaychini Zang bosibdi yor-yor, Yangi tushgan kelinni G’am bosibdi yor-yor. Yoki: Tog’da toychoq kishnaydi, Ot bo’ldim deb, yor-yor, Uyda kelin yig’laydi, Yot bo’ldim deb, yor-yor. Yuqoridagi misollarda tokchadagi qaychining zang bosishi bilan kelinning g’am bosishi, toychoqning ot bo’lib kishnashi bilan qizning o’z oilasidan yot bo’lib ketishi qiyoslangandir. Bunday tasvir san’ati parallelizm hisoblanadi. Yor-yor qo’shiqlarining qofiyalanish tarzi ko’pincha ab, ab tarzda va ba’zan ab, vb tarzda bo’ladi. Yor-yorlar matnini o’rganish shuni ko’rsatadiki, bu qo’shiq turlari mehnat va mavsum-marosim qo’shiqlaridan qofiyalanishdagi mukammallik bilan ham ajralib turar ekan. Jumladan, yor-yorlarda “baxt”, “taxt”, “somon”,“omon”, “alvon”, “polvon” kabi chiroyli qofiya misollarini uchratamiz. Bu qo’shiq turlari misralararo olti- yetti bo’g’indan iborat bo’lib, turoq tizimi 4+3, 5+2 tarzida belgilangan, Masalan: Qat-qat ko’rpa ustida, Piyolaman, yor-yor. Yorga salom bergani, Uyalaman, yor-yor.

Kelin salomlar ham marosim qo’shiqlarining tarkibiy qismini tashkil etadi. An’anaviy kelin salomlarning boshlanish qismida Allohga, Muhammad payg’ambarimiz (s. a. v)ga , Chahoryorlarga, avliyo va anbiyolarga murojaat qilish alohida o’rin tugadi. Agar umuman xalq qo’shiqlarini har bir qo’shiqsevar shaxs ijro etaversa, hatto yor-yorlarni ham to’rt-besh odam aytish mumkin bo’lsa, kelin salomlarni bitta qo’shiqchi va ba’zan ikkita qo’shiqchi ijro etishi odat tusiga kirgan. Kelin salom marosimi to’y marosimidan alohida ajralgan holda o’tkaziladi. Odatda, bu rasm orqali kelin salom ijrochisi o’z mahorati bilan yig’inga alohida fayz kiritishi mumkin bo’ladi. Ehtimol, shuning uchun ham kelin salom ijrochilari mazkur qo’shiqlarda yumor detalidan unumli foydalanishga urinadilar. Masalan: Husayni uzumning g’o’rasi, Kuyov bolaning jo’rasi, Kuyov jo’ralariga bir salom. Yoki: Ko’ylaklari yamoqli, Yopgan noni sanoqli, Qaynonasiga bir salom. Albatta, bunday kulgili o’rinlarga jiddiy munosabatda bo’lish to’g’ri emas. Kelin salom marosimini o’tkazish jarayonini ko’z oldimizga keltirsak, bunday qo’shiq namunalari hech qanday asorat qoldirmasligiga ishonamiz. Chunki, aynan shundan keyin quyidagi namuna keltiriladi. Yursa yo’lni to’ldirgan, O'tirsa so’zni bo’ldirgan, Qaynonasiga bir salom. Kelin salomlar boshqa qo’shiqlardan farqli o’laroq uch misradan iborat bo’ladi. Dastlabki ikki misra esa “bir salom” so’zlari bilan yakunlanadi. Masalan: Qora papoq yarashgan, Qizlar izidan qarashgan, Kuyov bolaga bir salom.

Marsiyalar. Ma’lumki, hayot faqat bayramlardan, xursandchilikdan, sayillardan, to’y-tomoshalardan iborat emas. Inson hayotida ko’ngilsiz voqealar ham ro’y berib turadi. Ular qatoridan eng musibatli o’rin tutgani o’limdir. Mahmud Koshg’ariyning “Devon-u lug’otit turk” asarida Afrosiyob- Alp Er Tunganing xotirasiga bag’ishlangan marsiyalarning borligini aytib o’tgan edik. Insonning o’limiga bag’ishlangan she’riy asarlar “marsiya” deb ataladi. Ular ham lirik asarlar hisoblanadi, chunki bu qo’shiqlarda vafot etgan odamning xotirasini ifodalab ichki his- tuyg’ularni bayon etish yetakchi o’rinni egallaydi. Marsiyalarning asosiy vazifasi hayotida ko’z yumgan shaxsning butun fazilatlarini esga olib, ro’y bergan musibatga munosabat bildirishdir. Shuning uchun ota, ona, aka, uka, bola kabi qarindosh- urug’lik munosabatlari marsiyalarda alohida tilga olinadi. Hayotdan ko’z yumgan shaxs marsiya aytuvchi tomonidan “suyangan tog’”, “ishongan bog’”, “osmondagi yulduz”, “hayotdagi yorug’ kunduz” kabi go’zal so’zlar bilan bezatiladi. Marsiya matnlarida o’kinch, hasrat ifodasi alohida o’rin tutadi. Ayniqsa, farzandning ota-onasiga ko’ngildagidek xizmat qila olmagani haqidagi o’kinch, aka va ukani turmush taqozosi bilan qadriga yetmagani haqidagi hasrat bayoni marsiyaning mazmunini tashkil etadi. Masalan: Aytmay desam bo’lmaydi, Dog’ingiz o’ti qo’ymaydi, Ishongan bog’im, voy otam, Suyangan tog’im, voy otam. Yoki: Hovlimdagi giyoh bo’ling, voy onam, Har kuni sizni iskayin, voy onam, Yana qaytib bino bo’ling, voy onam, Doim sizni eslayin, voy onam. Matndan aniq sezilib turibdiki, marsiya aytuvchi shaxs butun ijodiy mahorati imkoniyatidan mukammal foydalangan holda qalbidagi dard, hasratga har bir

tinglovchini befarq qoldirmaslikka harakat qiladi. Yurtimizning ayrim hududlarida maxsus marsiya aytuvchi ayollarning borligi fikrimizga dalil bo’la oladi. Shunday qilib, mavsum-marosim qo’shiqlari haqida quyidagi xulosalarga kelish mumkin: Mavsum va marosim qo’shiqlari o’zbek xalq og’zaki poetik ijodining eng qadimiy namunalaridir. Xalq maishiy hayotidagi har bir bayram, har bir marosim, ma’lum davrdagi mavsumlar alohida-alohida, aniq mavzuni ifodolovchi mazmunga ega. Mavsum-marosim qo’shiqlari ba’zan ommaviy tarzda ijro etishga mo’ljallangan bo’lishi bilan birga maxsus tayyorgarlik ko’rgan ijrochilar ijodini ham inkor etmaydi. Xalqimizning o’tmish madaniy merosga, qadriyatlarga bo’lgan munosabat mavsum-marosim qo’shiqlarida alohida ko’zga tashlanadi. Mavsum-marosim qo’shiqlari badiiy mukammallik jihatidan so’z san’ati namunalari talabiga to’liq javob beradigan she’rlardan iboratdir. Lirik qo’shiqlar Avvalo shuni ta’kidlash lozimki, xalq qo’shiqlarining hamma turi qaysi mavzuni yoritishidan qat’i nazar, lirik asarlar namunasi hisoblanadi. Folklorshunoslikda lirik qo’shiqlar namunasi tilga olinar ekan, sevgi-muhabbat mavzusidagi qo’shiqlarni nazarda tutish odat tusiga kirgan. Bu o’rinda sevgi- muhabbat qo’shiqlarida his-tuyg’u, ichki kechinmalar, muhabbat hissiga ega bo’lishdan mamnunlik kayfiyati yetakchi o’rinni tutishi muhimdir. Har bir inson balog’at yoshiga yetganida muhabbat tuyg’usining paydo bo’lishidan qoniqish hosil bo’lmog’i lozim. Shuning uchun qizni sevish yoki sevilishi, ishq savdosiga yo’liqish tashvishlari insonni shoirlikka undaydi. Binobarin, ishq-muhabbat mavzusidagi xalq qo’shiqlarini ana shu tashvish, lazzat dengizida suzgan insonlar, ya’ni yigit va qizlar yaratgan, deyishimizga to’la asosimiz bor. Bo’lmasa, xalq orasida “suygan qo’shiqchi, kuygan baxshi” kabi hikmatli so’zlarni yashab kelishiga asos topilmasdi. Lirik qo’shiqlar matnini o’rganishga bu qo’shiqlarni

faqat muhabbat tuyg’usini yurak qon tomirlaridan his qilgan shaxslar yaratish mumkin, degan xulosaga olib keladi. Bir misolga murojaat qilaylik: Yurakkinamning taftiga tandir qiziydi, Ko’zginamning yoshiga o’rdak suziydi. Yuqoridagi misralarni xirgoyi qilib aytgan shaxs yigit yoki qiz bo’lishidan qat’i nazar, shubhasiz muhabbat deb atalmish sirli gashtli olam go’shasida sayr qilgan bo’lishi ajab emas. Muhabbat qo’shiqlari odatda bir shaxs tomonidan kuy jo’rligida ijro etiladi. Ammo mashhur qo’shiqlar gap-gashtaklarda, turli munosabat bilan kichik doirada o’tkaziladigan yig’inlarda jamoa bo’lib ijro etilishi mumkin. Ma’lumki, lirik qo’shiqlar xalq og’zaki ijodining mustaqil janri sifatida bir qator o’ziga xos xususiyatlarga egadir: 1.Lirik qo’shiqlar deb atalmish xalq poetik she’riyatiga mansub asarlarida inson ruhiy olami, uning ishqiy kechinmalari aks etadi. 2.Agar boshqa mavzudagi qo’shiqlar, ba’zan uch (kelin salomlar), olti va sakkiz misralardan iborat bo’lsa, ishqiy mazmundagi lirik qo’shiqlar to’rt misradan tashkil topadi. 3.Biz nazarda tutayotgan lirik qo’shiqlar asosan to’rt misrada tugal fikr anglatish imkoniyatiga egadir: Dayraning ul yuzidan, sel keladi, Sel bilan ikki o’rdak teng keladi. O'rdakka-o’rdak munosib, g’ozga g’oz Yigitga qayliq munosib, qizga noz. Ammo lirik qo’shiqlar qatorida bir necha bandlardan iborat bo’lgan asar namunalari ham o’rin olgandir. “Galdir”, “Sumbula”, “Omon yor” kabi qo’shiqlar shular jumlasidan hisoblanadi. 4.Agar “bo’zchi” qo’shig’ini faqat to’quvchi kosiblar, “churiya”ni echki sog’uvchi ayollar mehnat faoliyati davomida ijro etishsa, lirik qo’shiqlar kasb, payt, o’rin tanlamaydi: ularni istalgan vaqtida istagan shaxs xohishiga baland ovoz bilan yoki

xirgoyi qilib aytaveradi. Ma’lum bo’ladiki, lirik qo’shiqlarning ommalashuvi boshqa mavzudagi she’riyat asarlaridan ko’ra kengroq imkoniyatga egadir. Xalq orasidagi “Laylini Majnun ko’zi bilan ko’r”, degan hikmatli gap bor. Haqiqatan ham, muhabbat dardiga yo’liqqan kimsa tasavvurida o’zining sevgilisidan go’zalroq, aqlliroq, donoroq odami dunyoda yo’qdek ko’rinadi. Shuning uchun ham xalq lirik qo’shiqlarida sevgilisi- qizning “qaldirg’och qanoti”dek qoshlari, yangi tandirdan uzilgan “shirmoy” dek yuzlari, “Arslonbob asali”ning mazasini beruvchi lablari oshiq yigit tomonidan ehtiros bilan kuylanadi. Ayni paytda, yosh qizlarning nigohi yigitning “Beqasam to’ni”ga, “maysadek kiprigi”ga, “marvariddek tishi” ga tushadi va go’zal qo’shiq namunasi yaratiladi. Masalan: Qoshingni qaro deydilar Qora qosh ukam, yor-yor, Ko’rsat qoshingni bir ko’rayin, Jonim ukamey, yor-yor. Yoki: Beqasam to’nlar kiyib, Muncha meni kuydirasiz, Gohi-gohida bir qarab, Voy, beajab o’ldirasiz. Qadim zamonlardan ma’lumki, bir-birini sevgan oshiq-ma’shuqlar hamisha ham turmush qurish baxtiga sazovor bo’lavermaydilar. Shuning uchun lirik qo’shiqlarda o’ta yuqori emotsional kayfiyat bilan bir qatorda dard, hasrat, alam ohanglari ham o’rin olgandir: Oq ilon, oppoq ilon, Oydinda yotganing qani?! Sen meni yomon deding, Yaxshini topganing qani?!

Lirik qo’shiqlarda faqat go’zal yorning tashqi qiyofasi o’z aksini topadi desak, to’g’ri bo’lmaydi. Chunki shunday qo’shiqlar borki, ularda sevikli yorning chaqqonligi, mehnatsevarligi, odobliligi ham o’z ifodasini topadi: Gulijon o’zi chaqqon, Qoqi gulini taqqan. Bir kulishi bor uchun, Oyijoniga yoqqan. Bir qator xalq lirik qo’shiqlari yigit va qizlarning aytishuvlaridan ham iborat bo’lishi mumkin. Bu qo’shiqlarda iloji boricha yigitlar bir taraf, qizlar bir taraf bo’lib , so’z o’yinida bir-birlaridan g’olib kelishga urinadilar. Aslini olganda, bunday aytishuv qo’shiqlari yigit-qizlarga hayot go’zalligi haqida, bu go’zallikdan bahramand bo’lish haqida ma’lumot beruvchi lirik parchalarni eslatadi: Ko’zingni shahlo deydilar, Shahlo ko’z ukam, yor-yor. Ko’rsat ko’zingni men bir ko’ray, Jonim ukam ey, yor-yor. Ko’zimni ko’rib nima qilasiz. Siz akajonim, yor-yor? Tog’da ohu ko’zlarini, Ko’rmabmidingiz, yor-yor? Yuzingni qizil deydilar, Qizil yuz ukam ey, yor-yor. Ko’rsat yuzingni men bir ko’ray, Jonim ukam, ey, yor-yor. Yuzimni ko’rib nima qilasiz, Siz akajonim, yor-yor? Bog’lardagi qizil gulni, Ko’rmabmidingiz, yor-yor?

Shunday qilib, lirik qo’shiqlar asrlar davomida yosh yigit-qizlar o’rtasidagi bir-birlariga bo’lgan ehtirosli munosabatlarning badiiy ifodasi sifatida yashab keldi va yashamoqda. Allalarni ham lirik qo’shiqlar tarkibining go’zal namunalari sifatida baholash mumkin. To’g’ri, folklorshunoslik ilmida allalarni bolalar folklori sifatida tahlil qilish an’anasi bor. Ammo ayni choqda, bu asarlarni lirik qo’shiqlar namunasi sifatida baholash ham xato bo’lmaydi. Chunki alla qo’shiqlarning matnini o’rganish, ularni bevosita so’z san’ati namunasi sifatida lirik qo’shiqlar qatorida baholash ma’qulligini ko’rsatmoqda. Ma’lumki, alla yosh go’dak bolalarga uxlash paytida ona yoki buvi tomonidan aytiladi. Beshikda bo’lgan chaqaloqqa allaning matnidan ko’ra kuy ohangi ko’proq ta’sir ko’rsatadi. Qo’shiq matnini bola tushunmaydi. Ammo alla qo’shiqlarida farzand ko’rgan oilaning quvonchi, baxti, shu bilan birga, dardi, alami va orzulari aks etadi. Qo’shiqlarda, avvalo, farzandli bo’lishning naqadar insonga quvonch bag’ishlashi e’tiborimizni o’ziga jalb qiladi. Allada shukrona keltirish, taqdir bergan omaddan qoniqish alohida o’rinda turadi. “Alla” so’zining Ollohdan kelib chiqqanligi haqidagi fikrlar ham yuqoridagi mulohazada o’z tasdig’ini topadi, deb o’ylaymiz.

Похожие

Xalq dostonlar

O’zbek xalq paremikasi

O'zbek xalq maqollari

Xalq eposida zamonaviylik

Xalq badiiy ijodiyoti