Til va nutq birliklari - Tilshunoslik - Referatlar

Til va nutq birliklari

Yuklangan vaqt:

20.09.2019

Ko'chirishlar soni:

0

Hajmi:

68 KB

Ko'chirib olish

Til va nutq birliklari Reja: 1. Til birliklari. 2. Nutq birliklari.

Til va nutq o’zaro dialektik bog’liq bo’lib, ijtimoiy – tarixiy, ijtimoiy – psixik hamda ijtimoiy – individual jarayon - hodisalar sifatida jamiyatga tengi yo’q aloqa quroli va aloqa usuli bo’lib xizmat qiladi. Shunday ekan, til va nutq jarayoni qanday amalga oshadi.. fanday birliklar bilan “ish ko’radi”. Umuman, til va nutq birliklariga qanday birliklar kiradiyu ularga xos xususiyatlar nimada.. Ular orasidagi o’zaro munosabat, bog’liqlik qanday kechadi. Hozirda tilshunoslikda, xususan o’zbek tilshunosligida til va nutqning asosiy birliklari sifatida fonema, morfema, leksema, model va tovush, so’z (so’z formasi), so’z birikmasi hamda gap kabilar qayd etiladi. Aniqrog’i, til birliklariga: fonema, morfema, leksema va modellar; nutq birliklariga: tovush, so’z (so’z formasi), so’z birikmasi, gap va boshqalar kiritiladi. Til va nutq o’zaro bog’liq ekan, bundan o’z-o’zidan - mantiqiy ravishda til va nutq birliklarining ham o’zaro bog’liqligi, o’zaro “ajralmas” aloqada ekanligi tushunchasi kelib chiqadi. Boshqacha bo’lishi ham mumkin emas. Negaki, til va nutqning bog’liqligi, jamiyatdagi vazifasi ular birliklarining faoliyati, faolligi sababli yuz beradi. Til va nutqning o’zaro munosabati aslida ular birliklarining o’zaro bog’liqligidan, munosabatidan kelib chiqadi. Til va nutq jamiyatdagi o’z “operatsiyalarini”, ta‘sir qilish quvvatini muayyan birliklari orqali amalga oshiradi. Aslida til birliklari muammosini hal qilish nutq birliklarisiz, nutq birliklari muammosini hal qilish esa til birliklarisiz amalga oshmaydi. Ularning dialektik bog’liqligi, munosabati ham shunda. Boshqacha aytganda, nutq birliklari nutqda til birliklaridan hosil bo’ladi, ya‘ni nutq birliklari asosida til birliklari mavjud bo’ladi. Til birliklari nutq birliklari uchun moddiy asos vazifasini o’taydi. Nutq birliklari (tovush, so’z, so’z birikmasi, gap kabilar) aslida tilning – til birliklarining harakatdagi ko’rinishi, faolligidir. Til va nutq dialektikasi quyidagi birliklar orqali namoyon bo’ladi. I. Fonema. Til birligi bo’lgan fonema fonologik sath ob‘ekti sifatida muayyan jihatlari bilan boshqa til birliklaridan ajralib turadi, nisbiy mustaqillikka ega bo’ladi.

Fonema tilning boshqa birliklariga nisbatan, aytilganidek, eng kichik (minimal) birligi bo’lib, til sistemasida (strukturasida) eng katta (maksimal) vazifa bajaradi. Boshqacha aytganda, fonema hajm taqozosiga ko’ra minimal, ammo vazifasiga, “amaliga”, til strukturasida tutgan mavqeiga ko’ra tengi yo’q maksimal birlik hisoblanadi. Aniqrog’i, fonema moddiy birlik-tovush sifatida tilni ham, uning qator birliklarini, shuningdek, nutq birliklarini ham “yaratadi”, “yasaydi”, ya‘ni u ushbu birliklarning moddiy ashyosi, qurilish materiali hisoblanadiki, fonemalarsiz-tovushlarsiz na til (nutq), na uning birliklari mavjud bo’ladi, muayyan vazifa bajaradi. Demak, til birligi muammosini yoritish mantiqan fonemasiz (tovushsiz) uning xususiyatlarini aniqlamasdan amalga oshmaydi, to’liq, mukammal bo’lmaydi. Bu – aksioma. Shunday ekan, fonemaning o’ziga xosligi nimalarda ko’rinadi. Bular: 1. Fonema (tovush) tilning eng kichik qurilish materiali, moddiy birligi bo’lib, ta‘sir qilish, sezgi uyg’otish quvvatiga ega. 2. Til va nutq birliklari-morfema, leksema, so’z kabilar asosida fonema (tovush) yotadi. Fonema ushbu birliklarning tovush qiyofasini tashkil qiladi. 3. Fonema morfema va so’zlarni tovush jihatidan farqlaydi. qiyoslang: bot – bor-bir-kir; gul – kul-kel-kim va boshqalar. Shunga ko’ra mazkur so’z ma‘nolarida o’zgarish, farqlanish yuz beradi. Boshqacha aytganda, fonema muayyan birliklarning mazmun (ma‘no) jihati bilan bog’lanadi. Demak, fonema til (nutq) birliklarini tashkil qilishiga, ularni tovush jihatidan farqlashiga, mazmun jihatiga ta‘sir qilishiga ko’ra ijtimoiy vazifa bajaradi, ijtimoiy birlik hisoblanadi. 4. Fonema faqat bir tomonlama birlik- ifoda tomoniga ega. U til birligi sifatida muayyan belgi hisoblanmaydi. 5.Fonema so’zlovchilarning xotirasida o’zining tipik farqlovchi belgilari yig’indisi zaminida shakllangan maxsus ideal “akustik nazorat” yoki “tovush obrazi” sifatida saqlanadi. Fonemaning farqlovchi belgilari esa artikulyatsion (nutq a‘zolarining avtomatlashib yoki standartlashib qolgan tipik harakati, holati haqidagi tasavvur) va akustik (fonema aloqador bo’lgan tovush tipiga xos talaffuz

sifati: o’ziga xos balandligi, kuchi, tembri, cho’ziq - qisqaligi kabi) belgilar haqidagi tasavvurlar asosida qaror topadi.2 6. Fonema inson nutq a‘zolari yordamida hosil qilinadigan tovush tiplarining andazalari bo’lib, ular psixik – akustik obrazlar “galereyasi”, qatori sifatida bizning xotiramizda saqlanadi. So’zlovchilar ushbu psixik – akustik obrazlar asosida nutq a‘zolarini harakatga keltiradi va natijada fonemalarning nutqiy ko’rinishlarini (tovushlarni) hosil etadi.3 7. Fonema invariant sifatida namoyon bo’ladi, ya‘ni u til birligi sifatida umumiylik hisoblanadi, nutqdan tashqaridagi- nutqqacha bo’lgan – reallashmagan birlik bo’ladi, “nofunktsional” holat. 8. Fonemaning nutqdagi - so’z (so’z formasi), so’z birikmalari tarkibidagi ko’rinishi, qurshov tovushlari ta‘sirida paydo bo’lgan qiyofasi uning variantidir. Demak, bunda fonemaning variantlari ma‘no farqlamaydi. Chunki ular bir fonemaning turli so’z tarkibida namoyon bo’lishi, qo’llanishi hisoblanadi. qiyoslang: uyim, tun, turmush, yugur, urg’u, quruvchi va boshqalar. Ushbu so’zlardagi u bir fonemaning – u fonemasining - invariantning turlicha variantlari, xususiyliklari bo’lib qayd etiladi. Aytilganlardan ma‘lum bo’ldiki, tilning eng kichik qurilish materiali sifatida fonemalarning eng muhim, bosh vazifasi – fonologik xususiyati morfema, leksema, so’z kabi ma‘no ifodalovchi birliklarni hosil qilish – ularning tovush tomonini shakllantirish hamda o’rni bilan tovush jihatini farqlash kabi ijtimoiy vazifalarni bajarishdir. II. Morfema. Til birligi bo’lgan morfema morfologik birlik sifatida o’zining moddiy asosi, qurilish materiali bo’lgan fonemadan-tovushdan farqlanadi. Dialektik falsafaning umumiylik va xususiylik kategoriyasi nuqtai nazaridan morfema ham, fonema ham til birliklari sifatida umumiylikka ega. Ayni vaqtda xususiylik umumiylikning voqelanishi, umumiylikning muayyan vaziyatda aniq namoyon bo’lishi ekan, morfemaning umumiylikdan xususiylikka o’tishi, fonemadan farq qilishi, o’ziga xosligi nimada. degan haqli savol tug’iladi.

Eslatamiz, morfema termini tilshunoslikka Boduen de Kurtene tomonidan kiritilgan bo’lib, so’zning eng kichik ma‘noli qismini ifodalash uchun qo’llangan. Demak, ushbu fikrdan morfemaning muayyan ma‘noga egaligi, ma‘no ifodalash tushunchasi kelib chiqadi. Aynan mana shu nuqtada morfema fonemadan farq qiladi. Shuningdek, morfema ma‘noga ega bo’lishiga ko’ra tilning eng kichik ma‘noli birligi hisoblanadi. Bu o’rinda morfemaning tilning eng kichik ma‘noli birligi ekanligi ma‘no ifodalash mezonidan kelib chiqadi. Demak, fonema til birligi sifatida hajm taqozosiga ko’ra eng kichik birlik hisoblansa, morfema til birligi sifatida ma‘no ifodalash xususiyatiga ko’ra eng kichik birlik sanaladi, ya‘ni morfema ma‘noli birlikning eng so’nggi, oxirgi chegarasi hisoblanadi. Shunga ko’ra u boshqa ma‘noli qismlarga ajralmaydi. qiyoslang: kitoblar: kitob+lar; temirchi: temir+chi; mustaqillik: mustaqil+lik; yurtim: yurt+im kabi so’zlardagi umumiylik xususiyatiga ega bo’lgan –lar, -chi, -lik, -im kabilar. Ma‘lum bo’ldiki, morfemalar, qayd etilganidek, shakl va mazmun, moddiy va ma‘noviy, tashqi va ichki tomonlarning o’zaro bog’liqligidan, bir butunligidan iborat ikki jihatli til birligidir. Morfema til birligi bilan bevosita bog’liq bo’lgan, muayyan vazifa bajaruvchi morf (morfa) va allomorf (allomorfa) tushunchalari – terminlari ham mavjud. Morf (morfa) nutq jarayonida qo’llanayotgan so’zning – so’z shaklining (formasining) tarkibida ishtirok etayotgan morfemaning “qiyofasi”, varianti, ko’rinishidir. Morf bevosita muayyan so’z bilan – so’z shaklida qo’llanishi, voqelanishi bilan, uning tarkibiy qismi ekanligi bilan xarakterlanadi. qiyoslang: tonggi, kechki; tomga, yo’lakka, yotoqqa. Demak, qayd etilgan so’z formalarida qo’llanayotgan – gi, - ki; -ga, - ka, - qa morflarning jami bir morfemani tashkil qiladi, ya‘ni –gi, -ki bitta morfema; -ga, -ka, -qa bitta morfema hisoblanadi. Ayni vaqtda ushbu morfalar biri ikkinchisiga nisbatan allomorf(a) – morfemaning varianti – so’z shakli tarkibidagi ko’rinishi hisoblanadi. Ma‘lum bo’ldiki, allomorf(a) morfemaning varianti bo’lib, alohida morf(a) sifatida o’ziga mos, muvofiq keladigan so’z shakli tarkibidagina ishtirok etadi. Allomorf sifatida kuzatiladigan har bir morf(a)ning qo’llanish imkoniyati chegaralangan

bo’lib, u faqat o’zi uchun qulay bo’lgan sharoitda yuzaga chiqadi, tanlab qo’shiladi. Morfning – allomorfning biri o’rnida ikkinchisi ishlatilmaydi. qiyoslang: tonggi-tongki, kechki - kechgi. Bunga fonetik vaziyat, fonetik shakl va semantika yo’l qo’ymaydi. Demak, allomorflar qo’llanadigan so’z formalari qanday qabul qilingan bo’lsa, shunday shaklda namoyon bo’ladi. Xullas: 1. Morfema fonema bilan til birligi sifatida umumiylikka ega. 2. Morfema tilning muayyan ma‘noli birligi sifatida fonemadan farq qiladi, o’ziga xoslikka, xususiylikka ega bo’ladi. 3. Morfemalar ifoda va mazmun tomonlarining birligidan tashkil topadi. 4. Morfema so’z kabi nutqiy – sintaktik mustaqillikka ega emas. U nutqda leksema, so’z (so’z formasi) tarkibida funktsional qism sifatida qo’llanadi. 5. Morfema so’z formasi tarkibida morf va allomorf kabi ko’rinishlarda – variantlarda ham namoyon bo’ladi. III. Leksema. Til birligi bo’lgan leksema fonema va morfema kabi til birliklaridan- umumiylikdan til va nutq dialektikasida o’ziga xos voqelanishi, muayyan belgi- xususiyatlari bilan ajralib turadi. Uning o’ziga xosligi shundaki, u ham til birligi, ham nutq birligi bo’la olishi, shunga ko’ra murakkabligi bilan xarakterlanadi. Ushbu lisoniy hodisa til birligi sifatida leksema-umumiy bo’lsa, ammo nutq birligi sifatida esa u so’zdir, xususiydir. (Bu haqda “So’z” bo’limiga qarang). Leksemaning til birligi sifatidagi o’ziga xosligi nimada. Leksema til birligi sifatida o’zaro uzviy bog’liq ikki tomonning yaxlitligidan, bir butunligidan iboratdir. “Bu butunlikning bir tomonini leksemaning fonematik – akustik strukturasi (nomema), ikkinchi tomonini esa ideal birlik – ma‘lum tushuncha zaminida shakllangan ma‘no (vazifa) - semema tashkil etadi”. Demak, leksema ham morfema kabi ikki tomonning: tovush va ma‘noning, ifoda va mazmunning o’zaro bog’liqligidan, bir butunligidan tashkil topadi. Til birligi bo’lgan leksemaning tashqi-ifoda tomoniga uning shakli, tovush jihati – nomema kirsa, leksemaning semema, ma‘no – mazmun tomoniga denotatlar –

narsa, hodisa, harakat, holat, belgi – keng ma‘nodagi muayyan predmetlar kiradi. Demak, leksema ularni-keng ma‘nodagi muayyan predmetlarni nomlaydi, ataydi. Boshqacha aytganda, “Ob‘ektiv olamda (daraxt) deb nomlanuvchi qattiq tanali o’simlik turlari (denotatlar) mavjud. Bu denotatlar bizning ongimizda daraxt tushunchasini shakllantirgan. ¤z navbatida (daraxt) tushunchasi esa (daraxt) leksemasining ma‘nosiga asos bo’lgan, bu ma‘noning o’z navbatida (d), (a), (r), (a), (x), (t) fonemalar tizmasi (kompleksi) bilan tarixiy – ijtimoiy bog’lanishi til birligini yuzaga keltirgan. Albatta, (daraxt) tushunchasi (daraxt) leksemasining ma‘nosi bilan aynan teng emas, lekin u bilan aloqada, munosabatdadir”. Til birligi bo’lgan leksemaning mazmun tomoni semema ham leksemaning tashkil etuvchi tomoni (tovush substantsiyasi) kabi tarkibiy qismlardan iborat. Masalan, (aka) va (uka), (opa) va (singil) leksemalarining ma‘no komponentlarini- semalarini olib ko’raylik: (aka) - qon-qarindosh, bevosita, bir avlod, erkak, katta. (uka) - qon-qarindosh, bevosita, bir avlod, erkak, kichik. (opa) - qon-qarindosh, bevosita, bir avlod, ayol, katta. (singil) - qon-qarindosh, bevosita, bir avlod, ayol, kichik. Ko’rinib turibdiki, bu leksemalar ma‘nosida o’zaro o’xshash, farqlanuvchi va takrorlanuvchi qismlarni – semalarni ko’rish mumkin. Bu semalar o’zaro birikib, yangi butunlikni, sememani – leksemaning ichki tomonini hosil qilgan. Leksemaning eng muhim, yetakchi xususiyati uning jamiyat a‘zolari uchun tayyorligi, naqdligi, umumiy va yaxlitligidir. qiyoslang: vatan, zamon, ish, dunyo, rasm, kitob, oq, kuch, shamol, o’n, yuz, ol, ko’k kabi minglab tayyor birliklar voqelikdagi muayyan narsa, belgi, miqdor, harakat, holat, xususiyatlarni nomlab, atab, ifodalab keladi. Demak, leksemalar nutq faoliyatida o’zlariga grammatik qo’shimachalarni, umumlashma ma‘noli turlicha affiksal morfemalarni birlashtirib, so’z formasi shaklida nutq birligiga aylanadi, nutq birligi hisoblanadi. qiyoslang: Bog’imda gullar o’sdi gapida bog’, gul, o’s leksemalari muayyan affiksal morfemalarni olib, turlicha vazifalarni bajarib kelmoqda.

Prof. Sh.Rahmatullaev ta‘kidlaganidek “leksema-asosiy, birlamchi til birligi bo’lib, til qurilishining lug’at boyligiga mansub, shunga ko’ra lug’at birligi, leksik birlik deb ham yuritiladi”2. Leksema umumiyligi aslida til umumiyligidan kelib chiqadi. Chunki til nutqqa nisbatan umumiy bo’lib, uning birliklari ham o’z-o’zidan, mantiqan umumiylik sifatida voqelashadi. 1. Leksema til birligi sifatida tayyorligi, yaxlitligi va jamiyat a‘zolari uchun umumiyligi, ular xotirasida mavjudligi bilan o’ziga xosdir. 2. Leksema ifoda va mazmun tomonlarning bog’liqligidan, bir butunlikdan tashkil topib, muayyan predmetlarni atash, nomlash vazifasini bajaradi. 3. Leksema fikr almashish jarayonida so’z birikmasi va gap kabi nutq birliklari uchun material vazifasini o’taydi. 4. Leksema nutq faoliyatida so’z (so’z formasi) sifatida voqelashib, nutq birligi bo’lish imkoniga ega bo’ladi. U til sistemasining leksik birligi, lug’at boyligi hisoblanadi. 5. Leksemaning til birligi sifatidagi umumiyligi til umumiyligidan kelib chiqadi. Chunki til va nutq dialektikasida til umumiy, nutq esa xususiy hisoblanadi. IV. Model. Til birligi bo’lgan modellar muayyan qolip, lisoniy (lingvistik) formula, tayyor qurilma, andaza sifatida tilga xosligi bilan ajralib turadi. Ushbu modellar - qoliplar asosida leksemalar birikadi, leksemalar va morfemalar birikadi, so’z formalari, so’z birikmalari, gap kabi nutq birliklari hosil bo’ladi. Anig’i, “til birligi hisoblanadigan modellarga, asosan, so’z yasalishi, so’z birikmasi va gap qurilishiga oid bo’lgan mavhum qoliplar, sxemalar kiradi”. Demak, til birligi bo’lgan modellar turlicha bo’lib, ular asosida yuzaga kelgan til (nutq) birliklarining mazmun jihati ham turlicha bo’ladi. Masalan, so’z birikmalari modellari leksik-semantik bosqichdagi nominatsiyadan sintaktik- kommunikativ bosqichdagi nominatsiyani vujudga keltiradi. ¤z navbatida gap modeli esa birlamchi sintaktik-kommunikativ nominatsiyani, ya‘ni ma‘lum voqea yoki vaziyatning murakkab atamasini hosil qiladi. Masalan, [[ot]+ [sifat]] gap

modeli ma‘lum sub‘ekt yoki predmetning biror vaziyat bilan bog’liq situativ belgiga egalik holati haqidagi fikrni anglatishga xizmat qiladi. qiyoslang: Gul qizil, Osmon tiniq, Cho’l katta kabi. Demak, modellar - qoliplar til birliklarining o’zaro birikish yo’li, usulidir. Xullas, til sistemasi fonema, morfema, leksema va model kabi tilning sistem xarakterdagi ichki turlicha yaruslariga (sathlariga) oid bo’lgan ruhiy – psixik birlik sifatida xotirada yashovchi o’zaro dialektik bog’langan til birliklaridan tashkil topadi. Til imkoniyat, nutq esa voqelik-ushbu imkoniyatning namoyon bo’lishi ekan, til imkoniyati til birliklari orqali mavjud ekan, demak, imkoniyat sifatida mavjud bo’lgan til birliklari nutqda – nutq birligi sifatida voqelashadi, namoyon bo’ladi. Negaki, voqelik imkoniyatning voqelanishi, moddiy “qiyofasi”dir. Shunga ko’ra nutq birliklari bo’lgan tovush, so’z (so’z formasi), so’z birikmasi va gap kabi hodisalarning o’ziga xosligi, muhim jihatlari nimada. degan savolning tug’ilishi tabiiydir. Nutq birliklari I. Tovush. Tilning eng kichik (minimal) birligi fonema ekan, demak, nutqning eng kichik (minimal) birligi tovush hisoblanadi. Negaki, tovush fonemaning nutqdagi aniq namoyon bo’lishi, muayyan ko’rinishi, harakatidir. Fonema fonologik birlik sifatida fonetik birlik bo’lgan tovush bilan uzviy aloqada – munosabatda bo’ladi. Bu mutlaqo tabiiy va mantiqiydir. Nutq birligi bo’lgan tovushlar xususiylik sifatida tilning ashyosi, moddiy materiali bo’lib, fizik, akustik, fiziologik hamda lingvistik (lisoniy) kabi qator belgilarga egaligi bilan o’ziga xosdir. Anig’i, tovushning talaffuzi, ta‘sir qilishi, sezgi uyg’otishi, balandligi, kuchi, tembri, cho’ziqligi, aniqligi kabi qator xususiyatlari borki, bular fonetikaning fizik – akustik, anatomik – fiziologik, pertseptiv va lingvistik – funktsional aspektlari deb qaraladi. Tovushning til sistemasidagi eng muhim xususiyati uning til (nutq) birliklarining: morfema, leksema, so’z (so’z formasi) kabilarning moddiy

qiyofasini, ifoda tomonini, shaklini qurishdir, shakllantirishdir. Demak, tovush til sistemasining eng asosiy, eng dastlabki qurilish materiali, moddiy asosidir. Boshqacha aytganda, masalan, so’zning moddiy tomoni uning tovush qobig’ini tashkil qiladi. Tovush qobig’i esa muayyan narsa, predmet, xususiyat bilan bog’lanib, ijtimoiy ahamiyatga ega bo’ladi. Tovush o’zi yaratgan, “qurgan” so’zni tovush jihatdan farqlash, demak, ma‘no jihatdan farqlash, fonetik-semantik differentsiatsiya qilish uchun xizmat qilsa, u fonema – til birligining ko’rinishi, voqelanishi sifatida baholanadi. Har bir tovush til birligi – fonema bo’lish qobiliyatiga ega. qiyoslang: bor- bol; bor-bir; bor-tor va boshqalar. Shuningdek, har bir fonema nutq birligi – tovush bo’lish imkoniyatiga ega. qiyoslang: u – tun, tush, tut, tuz, tur; o-ol, ot, osh, oy, ona, ota va boshqalar. Demak, fonemaning tovushga, tovushning fonemaga o’tishi mantiqiy – zaruriy jarayon bo’lib, til va nutq dialektikasining fonema va tovush orqali voqelanishidir. Fonema va tovush nisbiy butunlik, nisbiy yaxlitlik sifatida til va nutqda, aytilganidek, ijtimoiy vazifa bajaradi. Fikrimizcha, tarixiy – etimologik jihatdan tovush birlamchi. Chunki u talaffuz qilinish va eshitilish jarayoni bilan bog’liq, ya‘ni dastlab nutq - nutq tovushlari paydo bo’lgan, nutq yuzaga kelgan. Tovushning fonema sifatida baholanishi esa ikkilamchi bo’lib, jamiyat taraqqiyotining – til (nutq) taraqqiyotining muayyan davrida, keyingi bosqichlarida yuzaga kelgan, “yaratilgan”. Xullas, tovush nutq birligi sifatida nutqiy faoliyatni, nutqiy jarayonni ta‘minlovchi moddiy birlikdir. 1. Tovush – nutq birligi, fonemaning nutqdagi voqelanishi, harakati, uning moddiy asosi.

2. Tovush - xususiylik sifatida fizik, akustik, fiziologik va lisoniy (lingvistik) belgilarga ega. 3. Tovush – til (nutq) birliklarining (morfema, leksema, so’zlarning) moddiy qobig’i, ifoda tomoni sifatida muayyan predmet bilan bog’lanadi. 4. Tovush fonemaning voqelanishi sifatida muayyan birliklarni fonetik- semantik jihatdan farqlaydi, ijtimoiy vazifa bajaradi, ijtimoiy ahamiyatga ega bo’ladi. 5. Har bir tovush fonema bo’lish qobiliyatiga ega. Tovush fonemaga, fonema tovushga o’tib turadi. 6. Tovush tarixiy – etimologik – kelib chiqishi, paydo bo’lishi jihatidan birlamchi, fonema-ikkilamchi. II. So’z Nutq birligi bo’lgan so’z (so’z formasi) nutq faoliyati bilan bevosita bog’lanadi, nutq jarayonida voqelanadi. Shunga ko’ra u nutq birligi, nutq “boyligi” hisoblanadi. Aslida so’z (so’z formasi) nutq birligi bo’lgan tovushdan – tovush kompleksidan iborat ijtimoiy belgidir. So’z (so’z formasi) real birlik, xususiylik, aniqlik sifatida mavjud bo’ladi. Boshqacha aytganda, “Leksema – til birligi tayyor va turlicha imkoniyatlar majmuasi bo’lsa, so’z uning voqelanishi, ro’yobga chiqishi, aniq shakl, mazmun va vazifa kashf etgan moddiy ko’rinishidir. Har bir leksema nutqda muayyan so’z sifatida namoyon bo’ladi”. Demak, leksema va so’z umumiylik va xususiylik dialektikasi bilan bog’langan bo’lib, so’z xususiylik sifatida umumiylikning – leksemaning amaldagi ko’rinishi, harakati, muayyan vazifa bajarishidir. SHunday qilib, til birliklari bo’lgan leksemalarning “... nutqda voqelashgan aniq shakl, mazmun va vazifaga ega ko’rinishiga so’z deyiladi”. Xulosa shuki, leksema va so’z munosabati aslida til va nutq bog’liqligining, o’zaro aloqadorligining muayyan birliklardagi aniq ko’rinishi, tasdig’idir. Nutq birligi bo’lgan so’z, aytilganidek, tovushdan tashkil topgan ijtimoiy – individual belgi bo’lib, shunga ko’ra u moddiyligi bilan – dastavval tovush tomoni (pertseptiv vazifasi) bilan ajralib turadi.

So’zning nutq faoliyatidagi asosiy vazifasi atama-nominativ vazifa bo’lib, u ob‘ektiv borliqdagi turlicha muayyan narsa-predmetlar, voqea-hodisalar, harakat- holatlar, belgi-xususiyatlar bilan bog’lanadi, ularni ifoda etadi, anglatadi, ular haqida muayyan ma‘no, tushuncha beradi. Ayni vaqtda so’z jamiyat a‘zolari xotirasida muo`rlanib, ular tomonidan bir xilda qabul qilinadi, bir xilda tushuniladi. Shunga ko’ra u gapda, matnda qayd etilib, kuzatishda beriladi. Ma‘lum bo’ldiki, so’z tovush tomoniga (pertseptiv vazifasi), atamalik xususiyatiga (nominativ vazifasi) hamda ma‘no, tushuncha ifodalashiga (signifikativ vazifasi) ko’ra nutq birligi sifatida mukammalligi, fonema (tovush) va morfema kabi til birliklarini o’z tarkibiga olishi, kommunikativ jarayonda yetakchilik qilishi bilan ajralib turadi, muhim sanaladi. SHuningdek, so’z tovush va ma‘noga ega bo’lishidan, o’z tarkibiga fonema va morfema kabi alohida til birliklarini olishidan tashqari u gapning vazifasi bo’lgan fikr ifodalashni ham bajaradi. So’z gap bo’lib kela oladi. So’zga xos bu xususiyat, ayniqsa, fe‘llarda kuzatiladi. qiyoslang: keldi – u keldi, mudradim – men mudradim, borsang – sen borsang, yozdik – biz yozdik va boshqalar. Demak, nutq birligi bo’lgan so’zda nutqning boshqa birligi bo’lgan gapni ham ko’rish mumkin. So’z har qanday so’z birikmasi, gap va matn kabi sintaktik butunliklarning asosi, birlamchi materiali sanaladi. Fikr almashish jarayoni aslida so’zlardan, ularning semantik-sintaktik bog’lanishidan – valentlik munosabatiga kirishuvidan sodir bo’ladi. Shunga ko’ra so’z o’zining asosiy nominativ vazifasini nutq jarayonida bajaradi. Shu jarayonda u ma‘no aniqligiga, pozitsion mustaqillikka ega bo’ladi, muayyan sintaktik vazifada namoyon bo`ladi. Demak, so’z semantik-morfologik jihatdan shakllanganligi bilan, sintaktik birlik bo’lish imkoniga egaligi bilan o’ziga xosdir. 1. So’z nutq jarayonida voqelashishiga ko’ra nutq birligi hisoblanadi. 2. So’z leksemaning-til birligining nutqda muayyan shakl va mazmunda namoyon bo’lishidir, amaldagi harakati, nutqiy ko’rinishidir.

3. So’z va leksema o’zaro umumiylik va xususiylik dialektikasi bilan bog’langan bo’lib, so’z xususiylik sifatida voqelashadi. So’z xususiyligi nutq xususiyligining mantiqiy davomidir. 4. So’z va leksema munosabati asosida til va nutq munosabati, bog’liqligi yotadi. 5. So’z peretseptiv, nominativ va signifikativ vazifalariga ko’ra ajralib turadi. 6. So’z nutqda gapning vazifasi bo’lgan fikr ifodalashni ham bajaradi. So’z gap bo’lib kela oladi. 7. So’z o’zaro bog’liq bo’lgan fonetik, grammatik va semantik jihatlarning jamidir. III. So’z birikmasi Nutq birligi bo’lgan so’z birikmasi nutqiy hosila sifatida til va nutq birliklarining – leksema va so’zlarning nutq faoliyatida erkin birikuvidan, mantiqiy – ma‘noviy munosabatga kirishuvidan yuzaga keladi. Aniqrog’i, so’z birikmasining o’ziga xosligi, yaratilishiga ko’ra eng muhim jihati shundaki, u nutq jarayonida “etishtiriladi”, hosil bo’ladi, aktual birlikka aylanadi. So’z birikmasi mustaqil ma‘noli so’zlarning (leksemalarning) o’zaro bog’lanishidan yuzaga kelib, gap bilan so’z orasidagi oraliq nutqiy birlik – nutq mahsuli sifatida baholanadi. U gap uchun qurilish materiali bo’lib xizmat qiladi. Ayni vaqtda so’z birikmasi so’zga nisbatan ham shaklan – miqdoran, ham mazmunan- sifat jihatdan boyligi, kengligi, mukammalligi va aniqligi bilan ustun turadi. Ma‘lum bo’ldiki, so’z birikmasining yaratilishida so’zlar xizmat qiladi, gaplarning yaratilishida esa so’z birikmalari xizmat qiladi. So’z birikmasi muayyan mazmun jihatiga ega bo’lib, ushbu mazmun jihati birikma tarkibidagi so’zlarning ma‘nolariga asoslanadi. Shunga ko’ra so’z birikmasi semantikasi so’z semantikasiga ko’ra aniqroq, chuqurroq, murakkabroq va to’laroq bo’ladi. Negaki, u bir nechta so’z ma‘nosining o’zaro “qorishuvidan”, ichki munosabatidan, zanjirli bog’lanishidan yuzaga keladi.

So’z birikmasi ham, aslida so’z kabi, atash vazifasini – nominativ vazifani bajaradi. Anig’i, so’z birikmasidagi atash vazifasi bir nechta so’zlarning (leksemalarning) o’zaro erkin sintaktik aloqaga, munosabatga kirishuviga ko’ra amalga oshadi. “Erkin sintaktik aloqa deganda esa so’zlarning muvaqqat, faqat nutq ehtiyoji va zaruriy atash vazifasini bajarish uchun tobe - hokim munosabatlariga kirishishi tushuniladi”. qiyoslang: hayot – yoshlar hayoti; davlat – buyuk davlat; hikoya - hikoyani o’qimoq; sovuq - qorning sovug’i; gapirmoq - tez gapirmoq; olmoq - qo’l bilan olmoq; kirmoq - uyga kirmoq; imtihon – imtihondan o’tmoq va boshqalar. So’z birikmasi ham, aytilganidek, ifoda va mazmun, moddiy va ma‘noviy jihatlarga egaligiga ko’ra morfema, leksema va so’z kabi til (nutq) birliklari bilan umumiylikni hosil qiladi. So’z birikmasining o’ziga xosligi yana shundaki, u sintaktik birlik sifatida so’zdan farq іilsa, boshqa sintaktik birlik bo’lgan gap bilan umumiylikka ega bo’ladi. Ammo bu umumiylik asosida muayyan xususiyliklar, farqli jihatlar yotadi, ya‘ni so’z birikmasi fikr ifodalamaydi. Shunga ko’ra u gapga xos fikriy tugallik intonatsiyasiga ega emas. So’z birikmasini tashkil qilgan a‘zolar, aytilganidek, tobe-hokim munosabatida bo’lib, hokim so’z qaysi so’z turkumiga tegishli bo’lsa, u shu turkum nomi bilan ataladi. Demak, so’z birikmasining nomlanishida morfologik belgi-hokim tegishli bo’lgan turkum asos hisoblanadi. qiyoslang: 1.Otli-birikmalar: baland bino, hashamatli saroy, sport zali, turon kurashi. 2. Fe‘lli birikmalar: chiroqni yoqmoq, soatni taqmoq, qo’l bilan olmoq, tez o’qimoq. 3. Sifatli birikmalar: otdan baland, uydan kichik, temirdan qattiq, loydan yumshoq. 4. Ravishli birikmalar: peshindan keyin, o’qdan tez, bolalardan ko’p. 5. Sonli birikmalar: o’quvchilarning biri, o’ndan to’qqizi, uchdan ikki. 6. Olmoshli birikmalar: tadbirkorlarning barchasi, daraxtlarning hammasi, Hyinchilarning uchovi. 7. Modal so’zli birikmalar: uyda bor, qo’limda yo’q.

So’z birikmalari hokim komponentiga ko’ra o’zaro farqlanishidan-muayyan nomga ega bo’lishidan tashqari tuzilishiga ko’ra ham – tarkibida nechta mustaqil so’z (leksema) qatnashishiga ko’ra ham tavsiflanadi: so’z birikmasi tuzilishiga ko’ra sodda – ikki mustaqil so’zdan va murakkab – uch va undan ortiq mustaqil so’zdan tarkib topadi. Demak, so’z birikmalarini sodda va murakkab birikmalarga bo’lishda nutq birligi tarkibidagi mustaqil so’zlarning miqdori asos bo’lib xizmat qiladi. qiyoslang: mustaqillik ramzi, istiqlol g’oyasi, Prezidentimiz tabrigi, tunning yarmi, tog’dan baland, ruhiyatiga tegishli, fiziologik jarayon; kunduzgi bo’lim talabalari, imtihon sessiyasi yakunlari, oraliq nazorat savollari, minglab tomoshabin sig’adigan bino, hikoyani tezlik bilan qiziqarli yozmoq, Vatanimiz chegaralarini mardonavor qo’riqlayotgan yoshlar; mustaqillik yillari hashamatli qurilgan sport zali va boshqalar. Shunday qilib, nutq birligi bo’lgan so’z birikmasi nutqiy faoliyat mahsuli sifatida aslida-mohiyatan tarkibidagi so’zlardan, ularning ma‘no mezoni asosida o’zaro birikuvidan-valentlik munosabatiga kirishuvidan yuzaga keladi. Bunda so’zlarning o’zaro birikib, so’z birikmasini (yoki gapni) hosil qilishi asosida so’zlarning valentlik imkoniyati-so’z valentligi yotadi. So’z birikmasi tarkibidagi muayyan so’z - hokim so’z o’z ma‘nosini to’la ochish, xususiylashtirish uchun muayyan boshqa bir so’zni – tobe so’zni talab etadi, ushbu so’z bilan birikadi – valentlik aloqasiga, munosabatiga kirishadi. Demak, valentlik so’zning xususiyati bo’lib, so’zning o’z ma‘nosi asosida boshqa so’zlar bilan sintaktik munosabatga kirishuvini amalga oshirishdir. Boshqacha aytganda, valentlik nazariyasida muayyan so’zning bir yoki bir nechta so’zni o’ziga biriktirish-so’z birikmasini hosil qilish xususiyatlari umumlashtiriladi. SHunday qilib, so’zlarning birikib, so’z birikmasini hosil qilishi, dastavval, birikma tarkibidagi so’zlarning ma‘no imkoniyatiga ko’ra amalga oshadi. So’zlar orasidagi semantik munosabat esa bevosita sintaktik munosabatni yuzaga keltiradi. Shunga ko’ra birikma konstruktsiyasi tuziladi. So’z birikmasi ham fonetik, leksik-grammatik va semantik jihatlarning birligidan tashkil topadi.

1. So’z birikmasi nutq mahsuli, nutq birligidir. 2. So’z birikmasi birdan ortiq mustaqil ma‘noli so’zlarning o’zaro birikuvidan tashkil topib, nisbatan aniq ma‘no ifodalaydi, nutqda nominativ vazifa bajaradi. 3. So’z birikmasi komponentlari o’zaro tobe-hokim munosabatida bo’ladi. 4. So’z birikmasi hokim komponentining qaysi so’z turkumiga tegishligiga ko’ra turlicha nomlanadi (o’sha turkum nomi bilan ataladi). 5. So’z birikmalari tuzilishiga ko’ra sodda va murakkab birikmalarga bo’linadi. 6. So’z birikmasi asosida so’z valentligi-so’zning valentlik imkoniyati yotadi. IV. Gap. Gap ifoda va mazmun jihatlarga ega nominativ (alohida olinganda) va kommunikativ (matn ichida berilganda) birlik sifatida morfema, leksema, so’z va so’z birikmasi kabi til hamda nutq birliklari bilan umumiylikni hosil qiladi. Ammo gap nutq jarayoni sifatida qayd etilgan lisoniy birliklardan farqli jamiyatda kommunikativ vazifa bajaradi, kommunikatsiya akti birligi hisoblanadi. Til aloqa quroli bo’lish vazifasini gap orqali amalga oshiradi. Chunki gap fikr ifodalash vositasi sifatida faqat o’ziga xosligi bilan, semantik-grammatik, prosodemik shakllanganligi bilan boshqa lisoniy birliklardan ajralib turadi. Anig’i gap fikr ifodalash – axborot (xabar) berish va axborot (xabar) olish birligidir. Yuqorida qayd etilgan boshqa barcha birliklar gap uchun qurilish materiali bo’lib xizmat qiladi. Gap mazmun jihatida ob‘ektiv borliq aniq holda emas, balki umumlashtirilgan holda ifodalanadi. Shuningdek, gap mazmunida ob‘ektiv borliqdan tashqari kishining mazkur borliqqa bo’lgan munosabati – modallik-kommunikativ modallik ham mavjud bo’ladi. Modallik esa predikativlikning muayyan ko’rinishi, tarkibiy qismi sifatida voqelashadi. Boshqacha aytganda, gapning grammatik asosini predikativlik – muayyan narsa-predmetning muayyan belgi-xususiyatini tasdiqlash yoki inkor qilish tashkil qiladi.

Xullas, gap predikativlik ifodasiga ega bo’lib, bu uning grammatik belgisi sifatida zamon, shaxs, modallik, mayl kabi grammatik sistemalarni-kategoriyalarni o’z ichiga oladi. Ayni vaqtda gapning predikativlikka ega bo’lishining o’zi bu birlikning o’ziga xos fonetik shakllanishini ham taqozo qiladi: predikativlik mavjud bo’lgan joyda, albatta, intonatsion shakllanish ham bo’ladi. Chunki intonatsiya gapning tashqi shaklidir. U gapning boshlanish va tugash chegaralarini ko’rsatadi, jumladan, delimitativ (chegaralash, ajratish) funktsiyani bajaradi. Kishilarning o’zaro aloqa qilishlari gap orqali amalga oshirilgani uchun intonatsiya ham predikativlik kabi kommunikativ vazifani bajaruvchi vosita bo’lib, u gapning uchinchi muhim belgisidir. SHunday qilib, gap ob‘ektiv borliqni kishining unga munosabati orqali ifodalaydigan leksik-grammatik va intonatsion butunlikdan iborat bo’lgan alohida nutqiy formadir, nutq faoliyatidir. qiyoslang: o`zbekiston – kelajagi buyuk davlat. Ushbu gapda tasdiq, munosabat, intonatsion tugallik mavjud. Demak, gapni gap qiluvchi muhim jihatlar predikativlik va intonatsiyadir. Gap nutq birligi-sintaktik birlik sifatida ifoda maqsadiga va tuzilishiga ko’ra muayyan turlarga ajraladi. Gap mazmun tomoni orqali darak (Vatan go’zal va tabiiy moddalarga boy), so’roq (Terrorizmni qoralamagan xalq bormi dunyoda.), buyruq (Bugungi ishni ertasiga qoldirma) kabi xabarlar voqelashadi. Ushbu jarayonlar gap mantiqiy tomonining asosini tashkil qiladi. Gaplar tuzilishga ko’ra sodda (Men keldim) va qo’shma (Tun chekindi, kun boshlandi) gaplarga bo’linadi. 1. Gap ifoda va mazmun jihatlariga ega nutq birligidir. 2. Gap kommunikativ jarayon – fikr ifodalash birligi bo’lib, semantik, grammatik va prosodemik shakllangandir. 3. Gapning grammatik asosini predikativlik tashkil qiladi. 4. Gap intonatsion shakllanganligi bilan ham o’ziga xosdir. 5. Gap ifoda maqsadiga va tuzilishiga ko’ra muayyan turlarga ajraladi.

6. Til birligi sifatida gap іurilish modellari (іoliplar) nutіda nominativ birliklar va grammatik vositalar bilan t o’ ldiriladi. Umumiy xulosa shuki, til va nutq birliklari tilni-kommunikativ jarayonni harakatlantiruvchi, moddiy asos bilan ta‘minlovchi, ijtimoiy-amaliy vazifa bajarishi uchun xizmat qiluvchi kuchdir. Tayanch tushunchalar: Til va nutk birliqlari. Tovush va fonema, ularning o’zaro munosabati. Fonema haqidagi fikrlar. So’z va u haqdagi fikrlar. Leksema, morfema, morf, allomorf, ularning mohiyati, vazifasi, xususiyatlari. So’z birikmasi va gap, ularning vazifasi, o’ziga xos xususiyatlari.

Adabiyotlar: 1. Usmonov S. Umumiy tilshunoslik. T., 1972 2. Baskakov N.A, Sodiqov A.S, Abduazizov A.A. Umumiy tilshunoslik. - T., 1979. 3.Solntsev V.M. Yazk kak sistemno-strukturnoe obrazovanie. - M., 1971. 4. Stepanov Yu.S. Osnov obshego yazkoznaniya. - M., 1975. 5. Ne‘matov H. Bozorov O. Til va nutq. - T., 1993. 6. Ne‘matov H, Rasulov R. o`zbek tili sistem leksikologiyasi asoslari. - T., 1995. 7. Rasulov R. Leksiko-semanticheskie grupp glagolov sostoyaniya i ix valentnost. - T., 1991. 8. Rasulov R. o`zbek tili fe‘llarining ma‘no tuzilishi. - T., 2005. 9. SH. Rahmatullayev. Hozirgi adabiy o‘zbek tili. - T., 2006. 10. Abuzalova M.£. o`zbek tilida sodda gapning eng kichik іurilish іolipi va uning nutіda voіelanishi. Nomzodlik dissertatsiyasining avtoreferati. – T., 1994. 11. Rasulov R. Umumiy tilshunoslik.2-qism.-T., 2006.

O'xshashlar

Til va nutq

Til va nutq

Til va nutq

Til va nutq munosabati

Adabiy til va nutq madaniyati