logo
  1. Bosh sahifa
  2. Referatlar
  3. Tibbiyot
  4. Нерв тизимини ирсий дегенератив касалликлари

Нерв тизимини ирсий дегенератив касалликлари

Yuklangan vaqt:

17.11.2022

Ko'chirishlar soni:

0

Hajmi:

44.6650390625 KB
Ko'chirib olish
Нерв тизимини ирсий дегенератив касалликлари Режа: Нерв-мушак касалликлари таснифи  Прогрессивланувчи мушак дистрофиялари (бирламчи миопатиялар)  Дюшен миодистрофияси (пмд нинг псевдогипертрофик шакли).  Миопатиянинг бошқа турлари.  Спинал ва неврал амиотрофиялар (иккиламчи миопатиялар)  Вердниг - гоффманнинг спинал амиотрофияси  Кугельберг - веландернинг спинал амиотрофияси  Шарко - мари - тута нинг неврал амиотрофияси  Миотоник синдром билан кечувчи нерв-мушак касалликлари  Дистрофик миопатия (штейнерт - куршманн касаллиги)  Томсоннинг туғма миотонияси  Пароксизмал миоплегия  Прогрессивланувчи мушак дистрофияларини даволаш  Пароксизмал миоплегияни даволаш.  Миастения  Пирамида тизимини зарарланиши билан кечадиган наслий касалликлар  Штрюмпеллнинг оилавий спастик параплегияси  Экстрапирамида тизимини зарарланиши  Билан кечадиган наслий касалликлар  Паркинсон касаллиги ва паркинсонизм  Гентингтон касаллиги  Гепатоцеребрал дистрофия  Пьер-мари нинг наслий мияча атаксияси  Фридрейх касаллиги Нерв тизимини ирсий дегенератив касалликлари таснифи 1. Бириктирувчи тўқима ирсий касалликлар мукополисахаридозлар, Марфан касаллиги, Черногубов-Элерс-Данлос синдроми, тугалланмаган остеогенез. 2. Модда алмашинувини бузилиши ва асаб тизимини зарарланиши билан кечувчи ирсий касалликлар. Аминокислоталар, липидлар, муколинодозлар, углеводлар алмашинувини бузилиши. 3. Факоматозлар: нейрофиброматоз Реклип- Каузен, туберкулёзли склероз Бурневил, Штурге-Вебер ангиоматози, Гиппел-Ландаунинг цереброретинал ангиоматози, телеангиэктазия. 4. Нерв тизимининг ирсий дегенератив касалликлари: а) мияча ва унинг йўлларини зарарланиши: Пьер-Мари, Фридрейх, оливопонтоцеребелляр атаксия. б) экстрапирамида тизимини зарарланиши: гепатоцеребрал дистрофия, Гентингтон хореяси, Минор тремори, деформациялашган мушак дистонияси, генераллашган тиклар. в) нерв-мушак касалликлари: ПМД, Вердниг-Гоффман, Кугелберг- Веландр, Шарко-Мари амиотрофиялари, Томсон миотонияси, пароксизмал фалаж, миастения. г) пирамида йўлини зарарланиши. Штрюмпелни оилавий спастик параплегияси. Нерв-мушак касалликлари таснифи Нерв-мушак касалликлари (НМК) - наслий касалликларнинг кўп сонли гурухи бўлиб, унинг асосида орқа мияни олдинги шохи, периферик нервлар ва скелет мушакларининг генетик детерминацияланган шикастланиши ётади. НМК таснифи: 1. Прогрессивланувчи мушак дистрофиялари (бирламчи миопатиялар). 2. Спинал ва неврал амиотрофиялар (иккиламчи миопатиялар). 3. Туғма прогрессирланмайдиган - миопатиялар. 4. НМК миотоник синдромлар билан. 5. Пароксизмал миоплегиялар. 6. Миастения. Прогрессивланувчи мушак дистрофиялари (бирламчи миопатиялар) Прогрессивланувчи мушак дистрофиялари (ПМД) ёки бирламчи миопатиялар мушак тўқимасининг дегенератив ўзгаришлари билан характерланади. Патоморфологик ўзгаришлар мушаклар юпқалашиши ҳамда уларнинг ёғ ва бириктирувчи тўқимага алмашиши билан характерланади. Саркоплазмада фокал некроз ўчоқлари аниқланади, мушак толалари ўзаги занжир бўлиб жойлашади, мушак толалари кўндаланг тарғиллигини йўқотади. Патогенези: ханузгача тўлиқ ўрганилмаган. Шунга қарамай миопатиялар асосида мушак хужайралари мембранасининг дефекти ётиши аниқ. Касалликнинг патогенезини тўлиқ ўрганишда молекуляр генетикадан умид катта. Миопатиянинг турли шакллари наслланиш тури, жараён бошланиш вақти, кечишининг тезлиги ва характери ҳамда мушак атрофияси топографияси билан ўзаро фарқланади. Миопатиялар клиник жиҳатдан мушаклар мадорсизлиги ва атрофияси билан ҳарактерланади. ПМД нинг турли шакллари мавжуддир. Дюшен миодистрофияси (ПМД нинг псевдогипертрофик шакли). Барча ПМД лар ичида энг кўп учрайди. (30:100.000). Ушбу шаклга касаллик эрта келиб чиқиши (2 - 5 ёш) ва хавфли кечиши хос бўлиб, асосан ўғил болалар касалланадилар. Дюшен миопатияси рецессив турида Х - хромосомага бириккан ҳолда наслдан наслга ўтади. Патологик ген хромосоманинг қисқа елкасида жойлашади. (Х, ёки 21-хромосома). Ген мутацияси деярли юқори бўлиб, бунга касалликни спорадик холларининг кўплиги ёрқин далилдир. Ген мутацияси (кўпроқ делеция) мушак хужайралари мембранасида дистрофин оқсилининг йўқолишига олиб келади, бу эса сарколемманинг таркибини ўзгартиради. Бу кальцийни кўп миқдорда чиқиб кетиши ва миофибрилларни нобуд бўлишига олиб келади. Касалликнинг биринчи белгиларидан бири болдир мушакларининг зичлашиши ва псевдогипертрофия ҳисобига ҳажмининг аста-секин ошиб бориши ҳисобланади. Жараён юқорига кўтарилувчи ҳарактерга эга. Касаллик авж олган босқичга ўрдак юриш хос, бемор ўзини у ёндан бу ёнга ташлаб юради, бу эса думба мушаклари мадорсизлиги билан боғлиқ. Бунинг натижасида тоснинг таянч бўлмаган оёқ томонга оғиши (Тренделенбург феномени) ва тананинг қарама-қарши томонга компенсатор оғиши юзага келади (Дюшен феномени). Юрганда оғиш йўналиши доимий ўзгаради. Буни Тренделенбург ҳолати орқали текшириш мумкин. Бемордан оёқни чаноқ-сон ва тизза бўғимидан тўғри бурчак остида буккан ҳолатда бир оёқни кўтариш сўралади, оёқ кўтарилган томонда тос пастга тушади (меъёрда эса кўтарилади), бу вазият таянч оёқнинг ўрта думба мушаги қувватсизлигидан келиб чиқади. Дюшен миопатиясида яққол лордоз, қанотсимон кураклар, мушак контрактуралари кузатилади, тизза рефлекси эрта йўқолади. Суяк тизимида бир қатор ўзгаришлар учрайди (панжа, кўкрак қафаси, умуртқа поғонаси деформацияси, диффуз остеопороз) гоҳо интеллект пасайиши ва турли эндокрин бузилишлар кузатилади (адипозогенитал синдром, Иценго- Кушинг синдроми). 14 - 15 ёшга келиб бемор тўлиқ ҳаракатдан қолади, терминал даврда жараён юз, халқум, диафрагма мушакларига тарқалиши мумкин. Беморлар кўпинча 30 ёшларда кардиомиопатия ёки интеркуррент инфекциядан нобуд бўладилар. Дюшен миопатиясининг ўзига хос хусусияти бу - мушак ферменти - креатинфосфакиназа (КФК) миқдорининг ўн ва юз баробар, миоглобин миқдорининг 6 - 8 баробар ошиб кетишидир. Тиббий-генетик маслахат бериш учун гетерозигот ташувчанликни аниқлаш катта аҳамиятга эга. 70% гетерозигот ташувчиларда мушак патологиясининг клиник ва субклиник белгилари: болдир мушакларининг катталашуви ва зичлашуви, жисмоний зўриқишда мушакларнинг тез чарчаши, мушак биоптатлари ва ЭМГ кўрсаткичлари биопотенциалларининг ўзгаришлари кўринади. Беккернинг миодистрофияси (ПМД нинг кеч псевдогипертрофик формаси). Наслдан-наслга рецессив, Х - хромосомага боғланган турда ўтади. Касалликнинг клиникаси Дюшеннинг миодистрофиясига ўхшаш, аммо касаллик кечроқ бошланади (10-15 ёшда), кечиши яхши сифатли, ақлий фаолияти сақланган, юрак ва эндокрин тизими томонидан ўзгаришлар бўлмайди. Шунингдек беморларда ҳолсизлик, чаноқ камари мушакларининг атрофияси, зинадан чиқиш ва тушиш, туришга, юришга қийналади. Дистрофин миқдори мушак тўқималарида камайган. Ландузи-Дежериннинг миодистрофияси (ПМД нинг елкакурак-юз формаси). 0,4:100.000 нисбатда учрайди, аутосом-доминант типда, юқори пенетрантлик билан ўтади. Бу касалликнинг гени 4хромосомада жойлашади. Эркакларга нисбатан аёллар кўпроқ касалланади (3:1). Жисмоний зўриқишлар, жисмоний машқлар билан шуғулланиш касалликнинг оғир кечишига олиб келади. Мушак кучсизлиги ва атрофияси, кўпинча, 20 ёшда (ёки кечроқ) пайдо бўлади, биринчи ўринда юз ва елка камари мушакларининг атрофияси ривожланади, аста-секинлик билан бу бузилишлар қўлнинг проксимал қисмларига ва кейинчалик оёқларга ҳам тарқалиши мумкин. Кўз ва оғизнинг айланма мушаги, катта кўкрак, олдинги тишсимон, трапециясимон ва орқанинг кенг мушакларида қўпол ўзгаришлар билан кечади. Бемор ўзига хос кўринишга эга: “миопат юзи” кўндаланг кулги билан (“Джаконда кулгиси”) юқориги лаб протрузияси (“тапир лаби”) қанотсимон кураклар, елка бўғимларининг ичкарига ротацияси, кўкрак қафасининг (олд ва орқа йўналишида) яссиланиши. Миопатиянинг бошқа турлари. Офтальмоплегик миопатия наслдан-наслга аутосомдоминант типда ўтади. Кўпинча 20-25 ёшда ривожланади. Касалликнинг биринчи белгиси - икки томонлама птоз, кўз олмаси мушакларининг кучсизлиги эса кечроқ пайдо бўлади, ва бу тўлиқ офтальмоплегияга олиб келади. Туғма прогрессивланмайдиган миопатиялар. Туғилган вақтда ёки эрта ёшда пайдо бўлади, яхши сифатли кечади. Бунга марказий ўзак касаллиги, миохондриал ва номалинал миопатиялар киради. Миопатиянинг бу турлари, мушаклардаги метоболик ўзгаришлар билан фарқ қилинади. Клиник манзараси кучсизлик, мушак гипотонияси ва рефлексларнинг пасайиши билан намоён бўлади. Спинал ва неврал амиотрофиялар (иккиламчи миопатиялар) Орқа мия периферик мотонейронларининг ва периферик ҳаракатлантирувчи нервларнинг зарарланиши (баъзида бош мия нервларининг ҳаракатлантирувчи ўзакларининг ҳам) спинал ва неврал амиотрофияга олиб келади. Бунда мушаклар дегенерация ҳисобига иккиламчи зарарланади, бу эса мушак атрофиясига олиб келади. Бу гуруҳ касалликлар ривожланиб борувчи ҳарактерга эга. Мушаклар гистологик текширилганда, бир вақтда атрофияланган, нормал ва гипертрофияланган мушак толалари аниқланади. Атрофияланган толаларнинг ўзаклари тўплам кўринишида намоён бўлади. Вердниг - Гоффманнинг спинал амиотрофияси (ўткир ёмон сифатли спинал амиотрофияси) Аутосом - рецессив йўл билан ўтади ва 25.000 я.т.ч. ичидан биттасида учрайди. Касаллик гени 5-хромосоманинг узун елкасида жойлашган. Бу касалликни туғма, эрта ва кечки шакллари фарқланади. Хомиладорлик вақтида 30% холатларда хомиланинг кучсиз қимирлаши аниқланади. Бу туғма шакл учун ҳарактерли. Эрта ёшдаги шакли 6 ойдан - 1,5 ёшгача намоён бўлади, кечки шакли эса 1,5 ёшдан - 2,5 ёшгача намоён бўлади. Текширилганда бўшашган фалажлар, мушак тонусининг, пай рефлексларининг пасайиши аниқланади. Тилда фибриляция билан кечадиган бульбар синдром ҳамда бўғимлар деформацияси ҳарактерли. Спинал амиотрофия билан касалланган беморлар холати қурбақа ҳолатини эслатади. Оёқлари ёзилган, ташқарига ротацияланган, текис юзада ясси ҳолатда ётади. Пассив ҳаракатларга қаршилик йўқ. Касаллик ёмон сифатли кечади, тез авж олиб боради, кўпчилик холатларда ўлим 1-2 йил ичида содир бўлади. Спинал амиотрофияни “бўш бола” синдромини чақирувчи бошқа касалликлардан фарқлаш лозим. «Бўш бола» синдроми болалар церебрал фалажининг атоник шакли, туғма миотония, неонатал ва туғма миастения, Марфан синдромида кузатилади. Кугельберг - Веландернинг спинал амиотрофияси. Бу касалликнинг бошқа номи - болалик ва ўсмирлик даврининг фасцикуляция билан кечадиган яхши сифатли спинал амиотрофия. Аутосом- рецессив йўл билан ўтади. Касалликнинг биринчи симптомлари эрта болалик даврида, аммо, кўпинча, 8-12 ёшларда пайдо бўлади. Қўл-оёқларнинг проксимал қисми мушакларининг атрофияси, фибрилляр ва фасцикуляр тортишувлар ҳарактерли. Баъзан мушаклар гипертрофияси, жисмоний ва руҳий ривожланишдан орқада қолиш ҳолатлари аниқланилади. Шарко - Мари - Тута нинг неврал амиотрофияси Аутосом - доминант йўл билан ўтади ва кўпинча 20-30 ёшларда, кам ҳолларда мактаб ёшида бошланади ва 1а, 1б турлари мавжуд. Ген 5- хромосоманинг узун елкасида жойлашади. Позицион клонлаштириш ёрдамида касалликни локуси 17р 11.2 (1а тур) хромосомада ва 1 g 22 (1б тур) хромосомада аниқланади. Патоморфологик неврал амиотрофия орқа миянинг олдинги шохи ва ён устуни, ҳамда илдизчалар ва периферик нервларнинг дегенерацияси билан кечади. Клиникаси: қўл-оёқларнинг, айниқса, оёқларнинг дистал қисми мушакларнинг атрофик ўзгаришлари устунлик қилади. Болдирнинг ёзувчи мушаклари, ҳамда товонни юқори тарафга букувчи мушаклари зарарланади, натижада товон осилиб қолади. Бемор юраётганда тиззасини юқорига кўтаради, товонни валгус ҳолати ривожланади (ташқарига ротация қилинган). Пай рефлекслари сусаяди, айниқса ахилл рефлекси. Яққол мушак атрофияси билан ҳаракат функцияларининг сақланганлиги ҳолати тўғри келмаслик ҳарактерли, кўпчилик ҳолларда қўл ва оёқларнинг дистал қисмида сезувчанликни “қўлқоп” ва “пайпоқ” кўринишида бузилиши кузатилади. Оғриқ ва парестезия пайдо бўлиши мумкин, ҳамда чуқур сезувчанликни орқа мия орқа устунини зарарланиши ҳисобига пасайиши аниқланилади. Баъзан товон деформацияси, яъни, оёқ кафти гумбази чуқурлашуви, асосий фалангаларнинг экстензияси ва охирги фалангаларнинг флексияси билан кечади. Касалликнинг кечиши аста-секин ривожланади. Неврал амиотрофияни Фридрейх атаксияси, бирламчи миопатия, инфекцион полинейропатиядан фарқлаш лозим. Миотоник синдром билан кечувчи нерв-мушак касалликлари Миотония - мушаклар қисқарганидан кейин, секин бўшашиш феномени. Қуйидаги миотониялар фарқланади: ҳаракат, перкуссион ва электромиографик. Агар ҳаракат миотонияси бор беморга кафтини мушт қилиш ва уни тезда ёзиш сўралса, кафтини тўғирлаш учун беморга бир оз вақт керак бўлади. Перкуссион миотония болғача билан жадал урилганда мушаклар қискариши билан кечади. Электромиографик миотония нинали электрод ёрдамида аниқланилади. ЭМГда юқори частотали тишчалар пайдо бўлади, аввалига уларнинг тезлиги ошади, кейин камаяди. Миотония феномени мушак толалари мембранасини нотурғунлигини кучайиши билан тушунтирилади. Дистрофик миопатия (Штейнерт - Куршманн касаллиги) Бу мультисистем касаллик бўлиб, аутосом - доминант йўл билан ўтади. Касаллик гени 19-хромосомада 19ov 13.3 соҳасида жойлашади. Дистрофик миотониянинг бошланғич кўринишлари 15-35 ёшда кузатилади, эркак ва аёллар тенг касалланадилар. Касаллик миотоник спазмни аста-секин ривожланиши ва кейинчалик миопатия белгиларни кучайиши билан ҳарактерланади. Кўпчилик ҳолларда птоз (кўзни айланма мушаги кучсизлиги ҳисобига) кузатилади. Чайнов мушакларни озиши лунжларни ва чакка чуқурчаларини кириб қолишига олиб келади. Боши аввалига орқага ташланган, кейинчалик бўйин мушаклар атрофияси натижасида олдинга эгилиб қолади (“оқ қуш бўйни”). Билак ва перонеал мушакларнинг атрофияси яққол кўринади. Пай рефлекслари пасаяди. Миотоник бузилишлар даражаси миопатик бузилишлар даражасига нисбатан камроқ намоён бўлади. Эркакларда эндокрин ва трофик ўзгаришлар натижасида ёшига боғлиқ бўлмаган ҳолда соч тўкилиши, беморларда репродуктив функция бузилади. Баъзи беморларда митрал клапан пролапси аниқланади. Баъзан гипотиреоз, гипогонадизм, қандли диабет, гиперсомния ва обструктив уйқу апноэси, руҳий бузилишлар кузатилади. КФК миқдори бир оз ошган, лекин нормал бўлиши ҳам мумкин. Нерв толалари бўйича импульсни ўтиш тезлиги камайган. Томсоннинг туғма миотонияси Касаллик аутосом-доминант йўл билан ўтади. Болада бошланғич белгилари - йиғлаганда овози ўзгариб, нафас етишмайдиган ҳолат пайдо бўлади, йиғидан кейин у аста-секин бўшашади. Касаллик яхши кечади, баъзан прогрессивланмайди. Ёш ўтган сари мушак гипертрофияси (атлетик қомат) ривожланади, лекин мушак кучи унинг ташқи кўринишига тўғри келмайди. Беморлар кўпинча мушак тонусини локал ошишига шикоят қиладилар. Ёш ўтган сайин миотоник феномен яққоллиги камаяди. Пароксизмал миоплегия Пароксизмал миоплегия (даврий фалажлик) - кам учрайдиган ирсий касаллик бўлиб, скелет мушакларининг бўш фалаж ҳуружлари билан кечади. Аутосом-доминант йўл билан ўтади. Гиперкалиемик, гипокалиемик ва нормокалиемик шакллари фарқланади. Пароксизмал миоплегиянинг шакли айниқса эркакларда кўп учрайди. Касаллик 10-18 ёшда бошланади. Ҳуружлар кўпинча кечқурун ёки эрталаб пайдо бўлади. Қўл-оёқларнинг, тана бўйин мушакларни яққол кучсизлиги ривожланиб, кейинчалик фалажга олиб келади. Оғир ҳолларда кучсизлик юз мушакларига, нафас мушакларига тарқалиши мумкин. Мушак тонуси кескин пасаяди, пай рефлекслари йўқолади. Гиперемия, терлаш, чанқоқлик кузатилади. Ҳуруж бир соатдан бир ҳафтагача давом этади. Қўзғатувчи омилларга углеводларни, тузларни ортиқча истеъмол қилиш, жисмоний ва эмоционал зўриқишларни киритиш мумкин. Аёлларда ҳуружлар кўпинча ҳайзнинг 1-куни пайдо бўлади. Қон зардобида калий пасайиши аниқланади (3 ммоль/л дан паст). Гиперкалиемик шакли нисбатан кам учрайди ва эрта ёшда бошланади. Хуружлар совуқ ва узоқ вақт ҳаракатсизликдан пайдо бўлади. Типик ҳолатдарда пароксизм юз, қўл ва оёқларда парестезиядан бошланади. Ҳуруж вақтида қон зардобида калий миқдори ошади (5 ммоль/л дан баланд). Нормакалиемик шакли кам учрайди, 10 ёшгача ривожланади. Ҳуружлар бир неча кундан 2-3 ҳафтагача давом этади, совуқ қотиш, алкогол , жисмоний иш билан шуғилланиш касалликни қўзғатиши мумкин. Пароксизмал миоплегияда қалқонсимон без, бирламчи альдостеронизм, Адиссон касаллигининг белгиси бўлиши мумкин, бундан ташқари қусиш ва ич кетишда ҳам учраши мумкин. Ташхисот. Нерв-мушак касаллигини ташҳисида қуйидаги текширув усуллари катта аҳамиятга эга: 1. биохимик 2. электрофизиологик 3. патоморфологик 4. ДНК - ташхислаш. Мушак касаллигига шубҳа бўлган беморларда биохимик текширувлар ўтказилади. Айниқса мушак ферментлари - креатинфокиназа (КФК) аниқланади. Олинган маълумотларни таҳлил қилинганда жисмоний зўриқишда соғлом одамларда КФК ни бир оз ошишини эсдан чиқармаслик керак. Мушак ферментларни активлиги Дюшен миопатиясида (айниқса эрта даврида) юқори, бошқа мушак дистрофияларида КФК бир оз ошади. Нерв- мушак касалликларида миоглобин ва альдолаза миқдори ошади. Бирламчи миопатияларда миоглобин 6-8 мартаба, невроген миопатияларда 4-5 марта ошади. Электрофизиологик усуллар - электромиография (ЭМГ) ва электронейромиография (ЭНМГ), билан бирламчи ва иккиламчи миопатиялар ўртасида қиёсий ташҳис ўтказиш мумкин. Бунда мушак ёки нерв ҳосилалари (орқа мия ёки периферик нерв) бирламчи зарарланганлиги аниқланади. Бирламчи миопатия учун кўп фазали потенциаллар пропорциясини ошиши ҳарактерли. Спинал амиотрофияда (иккиламчи миопатия) аксинча потенциаллар кўп фазалилиги давомийлиги ошади ва улар амплитудасини бир оз ошиши кузатилади. Дистрофик миопатияларда миопатик ўзгаришлар ЭМГ да миотоник тўлқинлар пайдо бўлиши билан кечади. Нерв-мушак касалликларида патоморфологик ўзгаришлар мушаклар биопсияси ёрдамида ўтказилади. Мушак биоптатини ёруғлик микроскопида текшириш бирламчи ва иккиламчи миопатияларни фарқлашга ёрдам беради. Мушак биоптатида дистрофия миқдорини текшириш Дюшен миопатиясини Беккер миодистрофиясидан фарқлашга ёрдам беради. Полимераза реакцияси ёрдамида ДНК-лейкоцитни текшириш 70% беморларда нуқсон борлигини аниқлаб беради. Прогрессивланувчи мушак дистрофияларини даволаш. ПМД ни давосида терапевтик имкониятлар жуда чегараланган. Этиологик ва патогенетик давоси йўқ. Симптоматик давоси контрактурани олдини олишга, мавжуд бўлган мушак кучини сақлаб қолиш ва атрофия ривожланишини олдини олишга қаратилган. Давонинг асосий мақсади беморни кўпроқ мустақил ҳаракат қилишига қаратилган, чунки бемор кўп ётса, контрактура ва нафас бузилишлари тез ривожланади. ПМД ни даволаш усули қуйидагиларни ўз ичига олади: 1. ЛФК актив ва пассив ҳаракатлардан иборат. Гимнастика билан кунига бир неча марта шуғулланиш зарур. Шу билан бирга беморни ортиқча жисмоний зўриқишлардан сақлаш керак. 2. Консерватив (махсус шиналар) ва оператив ҳарактердаги (ахиллотамия, болдир мушагини кесиб ташлаш) ортопедик муоложалар мустақил ҳаракатни сақлашга қаратилган. 3. Медикаментоз даво метоболик таъсир этувчи воситаларни ўз ичига олиб, оқсил ва энергетик нуқсонни йўқотишга қаратилган. Шу мақсадда АТФ, фосфаден, вит Е (100 мг кунига 3 махал) қўлланилади. Кальций антагонистлари қўлланилади: нифедипин (10-20 мг кунига 3 махал), чунки Дюшен касаллигида ҳужайра мембранаси нуқсони борлиги аниқланган, бўлиб бу эса ҳужайра ичида кальций миқдорини ошишига олиб келади. Преднизолон ҳам қўллаш мумкин. Бу эса мушак кучини ошишига олиб келади (0,5 мг/кг 3 ой давомида, 3 ой танаффус). В гуруҳ витаминлар, метионин, глюкоза ва инсулинни Инергородский усули билан юбориш. Миотонияни даволаш. Кўпчилик ҳолларда даво кам натижа беради. Фенитоин (кунига 50 мг ичиш), прокоинамид (50 мг/кг кунига 3-4 маҳал), хинин (510 мг/ кг кунига), дифенин (100-200 мг кунига 2 маҳал), новокаинамид (250-500 мг кунига 3-4 маҳал) кабилар қўлланилади. Оғир ҳолларда глюкокортикоидлар билан кам муддатли курс тавсия этилади. Кальций антагонистлари ҳам қўлланилади. Нифедипин (10-20 мг), дизопирамид (100-200 мг) кунига 3 маҳал. Миотоник эффектни калий тутувчи диуретиклар (верошпирон, триампур), β-адреноблокаторлар кучайтиради. Пароксизмал миоплегияни даволаш. Гипокалиемик шаклида ҳуруж вақтида калий йодид (10-15 г) вена ичига томчилаб юборилади, ҳуруж бўлмаганда беморларга калий хлорид кунига 5 г дан ва калийга бой овқатлар истеъмол қилиши тавсия этилади. Гиперкалиемик шаклида вена ичига 40% глюкоза эритмаси ёки кальций глюконат (20 мг 10% эритмаси) юборилади. Нормокалиемик шаклида қўшимча равишда натрий хлорид 8-10 г юборилади. МИАСТЕНИЯ Этиологияси ва патогенези. Миастения нерв-мушак касалликлари қаторига кириб, патологик мушак кучсизлиги ва чарчаш билан ҳарактерланади, лекин касалликни наслий ҳарактерга эга эканлиги тасдиқланмаган. Миастения этиологияси охиригача аниқланмаган, лекин бу касалликни айрисимон без патологияси билан боғлиқлиги мавжуд. Патогенези. Миастенияни асосий патогенетик механизми бўлиб, нерв- мушак ўтказувчанлигини бузилиши ҳисобланади. Бу холинергик рецепторлар сонининг камайиши, ацетилхолинга нисбатан сезувчанликни етишмовчилиги, ферментлар активлиги нуқсони билан боғлиқ. Бунда аутоиммун бузилишлар асосий ўрин эгаллайди. Кўпчилик миастения билан касалланган беморларда ацетилхолин рецепторлари оқсилига нисбатан циркуляция қилувчи антителолар аниқланилади. Уларни ҳосил бўлишида тимус асосий роль ўйнайди, унда шу рецепторларга нисбатан антителолар ишлаб чиқарадиган лимфоцитлар аниқланади. Миастенияли беморларни текширилганда 60% ҳолларда айирсимон без патологияси аниқланади (гиперплазия ёки ўсма). Кўпинча тимомалар катта ёшли эркакларда аниқланилади. Миастениянинг клиникаси ва таснифи. Касалликнинг асосий кўриниши бўлиб, патологик мушак кучсизлиги ҳисобланади. Унинг ўзига хос хусусияти - такрорий ҳаракатлар қилинганда мушак кучсизлигининг ошишидир. Бунда мушаклар кучи тезда пасаяди, баъзан фалаж даражасига етади. Уйқу ва дам олишдан кейин мушаклар кучи нисбатан давомли сақланади. Касаллик 20-30 ёшда пайдо бўлади, лекин болалик ёки қарилик пайтида бошланиши ҳам мумкин. Касалликка олиб келувчи сабаблар бўлиб инфекция, интоксикация ва эндокрин силжишлар ҳисобланади. Аёллар эркакларга нисбатан кўпроқ касалланадилар, лекин эркаклар ўртасида катта ёшларда кўпроқ учрайди. Миастения кўпчилик ҳолатларда ўткир ости ёки сурункали, кам ҳолларда ўткир кечиши мумкин. Клиник кўриниши ва кечишига қараб прогрессирланувчи, регрессирланувчи ва стационар турларга бўлинади. Миастениялар таснифи. 1. Генераллашган шакли. 2. Локал шакли а) кўз шакли б) бульбар шакли Кўпинча миастениянинг генераллашган шакли учрайди. Кўпчилик ҳолларда биринчи бўлиб, кўзни ҳаракатини бузилиши (диплопия, птоз) пайдо бўлади, клиник белгиларга ассиметриклик ва динамиклик хос бўлиб, кечқурунга келиб зўриққанда аҳволини ёмонлашиши кузатилади. Бошланғич даврида фақат алоҳида кўзни ҳаракатлантирувчи мушаклар зарарланади, кечроқ ташқи офтальмоплегия пайдо бўлиши мумкин. Кейинчалик жараёнга чайнов мушаклари қўшилади. Булбар гуруҳ мушакларининг зарарланиши юмшоқ танглай ва ҳиқилдоқ усти функциясини бузилишига олиб келади. Бунда беморлар ютишни қийинлашишига, суюқликни бурнига тушишига, овозни манқаланишига, қуюқ овқатни қийин чайнашга шикоят қилади. Ютишни бузилиши сабабли аспирацион зотилжам ривожланади. Кучсизлик оёқ-қўл мушакларига тарқалганда кўпроқ қўлларнинг проксимал қисмлари жабрланади. Патологик жараёнга бўйин мушакларини қўшилиши, бошини вертикал ҳолатда ушлашни қийинлаштиради (бошини осилиб туриши). Генераллашган шаклида нафас-мушаклари зарарланади. Пай рефлекслари ўзгармайди ёки тезда сўнади. Баъзан мушак атрофияси кузатилади, лекин улар яққол бўлмайди. Миастенияда беморларни умумий аҳволини эндоген ва экзоген сабаблар таъсирида кескин ёмонлашиши кузатилади. Бу ҳаёт учун ҳавфли ҳолат бўлиб, миастеник криз деб аталади. Ташхиси. Миастенияга шубҳа бўлган беморларни текширилаётганда қуйидагиларга эътибор бериш керак: 1. Кучсизлик ва чарчашга ҳарактерли бўлган шикоятларни аниқлаш. 2. Жисмоний зўриқиш таъсирида кучсизликни кучайиши. 3. Кун давомида симптомларни яқоллигини ўзгариб туриши. 4. Провокацион синамалар (30 секунд давомида нигоҳини фиксация қилиши диплопия ва птозни кучайишига олиб келади, нутқий зўриқиш бульбар гуруҳ мушакларини кучсизлигини аниқлашга ёрдам беради - дизартрия пайдо бўлади. Оғзини очиб ва ёпиб кўрилганда чайнов мушаклар кучсизлиги аниқланилади, бошини фиксацияланган ҳолатида - бўйинни букувчи мушаклар кучсизлиги аниқланилади). 5. Уолкер синамаси - кафтни мушт қилиш ва ёзиш птоз пайдо бўлишига олиб келади. 6. Прозеринли синама - 1,5 - 3 мл 0,05% прозерин эритмаси (беморни вазнини ҳисобга олган ҳолда) т/о юборилади. Ножўя таъсирини йўқотиш учун атропин (0,5 мл) қўлланилади. Типик ҳолларда ҳамма белгилар 20-40 мин ичида йўқолади. Прозерин синамасини салбий натижаси миастения диагнозини инкор этмайди, чунки антихолинэстераз воситаларга кам сезгир бўлган касаллик шакллари учрайди. 7. ЭМГ маълумотлари - электростимуляцияда 1- таъсир потенциали нормал бўлиб, кейингилари прогрессив пасаяди. Давоси. Миастения давоси нерв-мушак ўтказувчанлигини яхшилашга ва аутоиммун жараёнга таъсир этиш йўли билан ацетилхолин рецепторларини деструкциясини тўхтатишга қаратилган. Патогенетик даво сифатида антихолинэстераза воситалари - прозерин ва калимин қўлланилади. Прозерин холинэстераза ферментини инактивациялайди ва синаптик ёриқда ацетилхолин миқдорини оширади, бу эса нерв-мушак ўтказувчанлигини яхшилайди (0,15 та дан тавсия этилади ва 2-3 соат таъсир қилади). Калимин (60 мг кунига 3-4 маҳал) давомли таъсир этиб (4- 5 соат), миастенияни бульбар шаклида яхши натижа беради. Преднизолон эрталаб 10 мг дан (кун ора) тавсия этилади. Кейин дозани ҳар ҳафта 10 мг га оширилади ва кунига 100 мг гача етказилади. Бу даводан 10 ҳафтадан кейин дозани астасекин 20-40 мг гача (кун ора) камайтирилади. Бир ой давомида яхшиланиш 10% беморларда кузатилади. Миастения давосида айрисимон без сохасига рентгенотерапия, плазмаферез қўлланилади, агар тимома аниқланса, тимэктомия тавсия этилади. Тимэктомия ўтказилганда турғун ремиссия ёки яхшиланиш 70% беморларда кузатилади. ПИРАМИДА ТИЗИМИНИ ЗАРАРЛАНИШИ БИЛАН КЕЧАДИГАН НАСЛИЙ КАСАЛЛИКЛАР Штрюмпеллнинг оилавий спастик параплегияси Оилавий спастик параплегия 1886 йил Штрюмпелл томонидан аниқланиб, кейинчалик уни номи билан аталган. Бу касаллик аутосом- доминант ва аутосом-рецессив йўл билан ўтади. Патологик ўзгаришлар бўйин кенглигидан пастда орқа мия ён устунларидаги пирамида йўлларини 2 томонлама дегенерацияси билан кечади. Кам ҳолларда жараён бўйин кенглиги ва бош мия сўғонини қамраб олади. Жуда кам ҳолларда орқа устун ва мияча йўллари зарарланади. Ҳозирда алоҳидалашган наслий спастик параплегия ва “плюс” параплегия яъни қўшимча симптомларни ривожланиши билан асоратланиши ажратилади. Алоҳидалашган наслий спастик параплегия аутосомдоминант йўл билан ўтади. Бу шаклнинг гени 14-хромосоманинг узун елкасида, ҳамда 15 хромосомада жойлашган. Спастик параплегияни Х-хромосома билан боғлиқ шакли ажратилади, бунда ген Ху 28 локусларида жойлашади. Клиникаси: беморларнинг биринчи шикояти бу юрганда оёқларида карахтлик, тортилувчи тутқаноқ ва оёқларнинг тез чарчаши ҳисобланади. Касаллик ривожланган сари типик спастик юриш тури намоён бўлади. Мушаклар тонуси аста-секин ошади, бунда мушаклар спастиклиги парездан устунроқ бўлади. Пай рефлекслари ошади, товон клонуслари, патологик рефлекслар пайдо бўлади, баъзан бўғимлар контрактураси, товон деформацияси (Фридрейх товони типида) яққол бел лордози аниқланади. Чаноқ функцияси бузилмайди. Қўллар жараёнга кеч қўшилади (рефлекслар ошади, патологик рефлекслар). Баъзан қўпол бўлмаган псевдобульбар симптомлар аниқланади. Ақлий ривожланишдан орқада қолмайди. Касалликни 2 тури фарқланади: 1. Биринчи тур параплегия 35 ёшгача ривожланади, яхши кечади, парезлар камдан-кам ҳолларда бўлади, мушаклар тонуси ва рефлекслар ошиши кузатилади. 2. Иккинчи тур параплегия 35-40 ёшдан кейин ривожланади, тез прогрессивланади, оғир ногиронликка олиб келади, яққол спастикликдан ташқари, чуқур сезги ва чаноқ функцияларни бўзилиши билан характерланади. Наслий “плюс” спастик параплегияси кам учрайди. Амиотрофия билан кечадиган варианти аутосом-доминант ёки аутосом-рецессив йўл билан ўтади. Касаллик ҳар хил ёшда пайдо бўлади (1 ёшдан 60 ёшгача). Қўл ва оёқ дистал қисмларнинг амиотрофияси Шарко-Мари-Тутанинг неврал амиотрофиясига ўхшайди. Кўрув ўткирлигини бузилиши билан кечувчи наслий спастик параплегия кўрув нервини атрофияси ёки тўр пардани пигментли дегенерацияси билан характерланади ва аутосом-рецессив йўл билан ўтади. Троуер синдроми аутосом-рецессив йўл билан ўтади. Касаллик болалик даврида мотор ривожланиши ва нутқидан орқада қолишидан бошланади, кейинчалик юриши ўзгаради. Оёқларни спастик парезидан ташқари дизартрия, қўл ва оёқларнинг амиотрофияси, сохта бульбар синдром кузатилади. Кўпинча оёқ-қўлларнинг ва юз мушакларнинг хореатетози, нистагм, кўз олмаларнинг вертикал ҳаракатининг бузилиши билан кечади. Бундан ташқари руҳий ривожланишдан орқада қолиши, терини ихтиоз кўринишида ўзгариши, оёқларда прогрессивланувчи невропатия, мияча атаксияси билан кечувчи наслий спастик параплегиянинг бошқа турлари ҳам учрайди. Штрюмпелл касаллигига шубҳа бўлганда ташхис пастки спастик парапарез, мушак тонусини парездан устунлиги, касалликни прогрессив кечиши, товон деформацияси ва МРТда орқа мияни атрофик ўзгариши асосида қўйилади. Давоси: симптоматик. Мушак тонусини пасайтирувчи препаратлар қўлланилади: мидокалм, баклофен 10-30 мг дозада, сирдолуд - 10-20 мг (кунига з маҳал) дозада. Физиотерапия усулларидан электрофорез Na оксибутират билан оёқларга, парафин, бўшаштирувчи массаж ва ЛФК (контрактураларни профилактикаси учун) қўлланилади. В гуруҳ витаминлари, ноотроплар, амиотрофияларда - витамин Е, АТФ, ретаболил ишлатилади. ЭКСТРАПИРАМИДА ТИЗИМИНИ ЗАРАРЛАНИШИ БИЛАН КЕЧАДИГАН НАСЛИЙ КАСАЛЛИКЛАР Бу гуруҳ касалликлар учун гепатоцеребрал дистрофия, торсион дистония, иккиланган атетоз, титроқ фалажи (Паркинсон касаллиги), генераллашган тик (Де Ла Туретт касаллиги) наслий титраш, Рюльф тутқаноғи ва бошқалар. Паркинсон касаллиги ва паркинсонизм Паркинсон касаллиги - марказий нерв тизимини сурункали прогрессивланувчи дегенератив касаллиги бўлиб, кўпроқ экстрапирамида тизимини зарарланиши билан кечади. Паркинсон касаллиги бирламчи идиопатик паркинсонизмга тегишли. Бу касаллик аутосом-доминант ва аутосом-рецессив йўл билан ўтади. Бирламчи паркинсонизм билан биргаликда иккиламчи паркинсонизм ҳам фарқланади. Бу бошқа касалликларнинг оқибати ҳисобланади. “Паркинсонизм” тушунчаси исталган синдромга тегишли бўлиб, бунда Паркинсон касаллиги учун характерли бўлган неврологик кўринишларни учратиш мумкин. Биринчи марта бу патологияни Джеймс Паркинсон 1817 йил 6 та касалда тушунтириб берган ва бу касалликка “титроқ фалажи” деб ном қўйган. Паркинсон касаллиги кексаларнинг кўп учрайдиган муаммоси ҳисобланади. Касаллик бошланишини ўртача ёши 55-60 ёшга тўғри келади, лекин касаллик 40 ёшдан ҳам бошланади. Паркинсонизм касаллиги жинсига ва ирқига ва яшаш жойига боғлиқ эмас. Этиология ва патологияси. Паркинсон касаллигини келиб чиқиши охиргача ўрганилмаган. Ҳозирда шу нарса аниқландики бу касаллик пайдо бўлишида қуйидаги омилларнинг бирга келиши: наслийлик, қарилик ва баъзи токсин моддаларнинг таъсири аҳамиятга эга. Паркинсонизмнинг ягона сабабидан бири бўлиб ёш катталашган сари мия нейронларнинг сонини камайиши (ҳар 10 йилда одам 8% нейрон йўқотади, лекин касаллик симптомлари 80% йўқотганда келиб чиқади). Лекин хозиргача паркинсон касаллигининг наслий характерга эга эканлиги исботланмаган бўлишига қарамай оилавий касалланиш учрайди. Асосий сабабидан бири бўлиб одамнинг бош миясига токсик моддаларнинг таъсири билан боғлиқ. 1977 й. (гиёҳвандлар) синтетик героин қабул қилаётган ёшларда оғриқ паркинсонизмга учраганлиги билан боғлиқлиги аниқланган. Бундан ташқари паркинсонизмни сабаби бўлиб вирусли инфекция, бош мияни томирли касалликлари, оғир ва қайталанган бош мия жароҳатлари ҳисобланади. Дориларни узоқ вақт қабул қилиниши (масалан нейролептиклар, резерпин, циннаризин) паркинсонизм ривожланишига олиб келади. Паркинсонизм марганец, ис гази билан заҳарланганда ривожланади. Паркинсон касаллигини патологик асоси бўлиб қора субстанцияни дофаминергик нейронларнинг кўп қисмини дегенерацияси ҳисобланади. Бу бошқа нейротрансмиттерларни: ацетилхолинергик, адренергик, серотонинергик, гампергик ва б.қ.дисбалансига олиб келади. Ҳаракат жараёни асоси бўлиб ихтиёрсиз ҳаракатлар ҳисобланади ва буни экстрапирамида тизими амалга оширади, улар ҳаракатларни силлиқлигини ва бошланган ҳаракатни тўхтатишни таъминлайди. Бу жараённи дофамин нейротрансмиттери амалга оширади. Ихтиёрий харакатларни пешона пўстлоғи назорат қилади ва улар импульсларни базал ганглиядан қабул қилади ва ҳаракатларни премотор пўстлоқ ва таламус орқали ихтиёрсиз назорат қилади. Паркинсон касаллигини ва паркинсонизмни бир неча клиник шакллари фарқланади: 1. титроқ 2. титроқ-ригид 3. ригид-брадикинетик. Клиник кўринишлари: Бу касалликни характерли белгилари бўлиб: гипокинезия, мушак ригидлиги, тремор (титроқ) ва постурал бузилишлар ҳисобланади. Гипокинезия (ёки брадикинезия) ҳаракатларни секинлашиши ва камайиши билан кечади. Бу касалликда беморлар учун ҳаракатни бошлаб олиш қийин. Юриши судраб юрувчи, майда қадамли. Координацияси бузилганлиги сабабли билак ва кафт мушакларида микрография кузатилади (ёзуви майда). Гипокинезия натижасида кўзни юмиши ҳам беморни нигоҳи бир нуқтага қаратилган бўлади. Ютиниш бузилгани сабабли гиперсаливация кузатилади. Беморларнинг нутқи монотон, охирида сўниб боради. Ригидлик бунда мушак тонуси ошади, беморларда пассив ҳаракатларни текширилганда оёқ ва қўл мушакларида ҳарактерли қаршилик аниқланади бу “тишли ғилдирак” феномени номи билан маълум. Скелет мушакларнинг мушак ригидлиги беморга характерли “сўраб турувчи” ҳолатни беради, ҳамда юрганда (тананинг букувчи мушакларида ригидлиги ҳисобига) букчайишни беради. Мушаклар ригидлиги мушакларда оғриқ пайдо бўлишига олиб келади ва бу касалликнинг биринчи симптоми бўлиб ҳисобланади. Тремор паркинсонизм касаллиги билан касалланганлар учун асосий компонент ҳисобланмайди. Тремор антогонист мушакларни ритмик қисқариши ҳисобига пайдо бўлади ва тинчликдаги тремор кузатилади. Титраш айниқса кафтларда кўринарли бўлиб “танга санаш” кўринишида бўлади. Фаол ҳаракат қилганда титроқ камаяди ёки йўқолади. Паркинсоник тремордан эссенциал ёки оилавий треморни фарқи шуки, улар камаймайди. Постурал нотурғунлик. Паркисон касаллигининг асосий кўринишларидан бири бўлиб ҳисобланади (ригидлик, гипокинезия ва тремор билан кечади). Постурал рефлекслар туриш ва юришни регуляция қилишда иштирок этиб, ихтиёрсиз ҳисобланади. Паркинсон касаллигида бу рефлекслар бузилади: улар бўлмаслиги ёки кучсизланган бўлиши мумкин. Постурал рефлекс бузилганда беморлар тез-тез йиқилиб туради (пропульсия, латеропульсия, ретропульсия). Бундан ташқари беморларда вегетатив бузилишлар юзнинг ёғлилиги, қабзият (ичакни қисқариш хусусиятини кучсизлиги ҳисобига) ва эмоционал-руҳий бузилишлар кўринишида кузатилади. Паркинсон касаллигида ташхислаш бу касаллик учун типик бўлган қуйидаги мезонларни ўз ичига олади: 1. касалликни бир томонлама бошланиши . 2. титраш фақат тинч холатда бўлиши билан характерланади. 3. симптоматикани доимо симметрик бўлиши. 4. L- DOФA ни яхши таъсир этиши. 5. прогрессивланувчи кечиши. Паркинсон касаллигини симптоматик паркинсонизмдан (дорилар таъсири, инфекциядан кейинги, токсик, метаболик, травмадан кейинги, қон томир касалликлари) ва дегенератив касалликлардан (мультитизимли атрофия, прогрессивланувчи ўзак усти фалажи ва пўстлоқ базал дегенерация) фарқлаш лозим. Даволаш: патогенетик механизмларни ҳисобга олган ҳолда олиб борилади. Бу касалликда дофамин ва ацетилхолин ўртасида баланс бузилади, бунда дофамин миқдори камаяди, АЦХ активлиги ошади. Паркинсонизмни патогенетик даволаш қуйидаги асосий йўналишлар бўйича таъсир этади: 1) АЦХ нейротрансмиттер активлигини сўндириш, бу дофамин билан АЦХ ўртасида балансни тикланишига олиб келади. 2) Дофамин миқдорини нормагача кўтарилиши. Ҳозиргача паркинсонизм давосида антихолинергик препаратлар қўлланилмоқда, уларнинг таъсир механизми АЦХ активлигини блокада қилишдан иборат (циклодол, проциклодол) лекин бу препаратларнинг ножўя таъсири хушнинг бузилиши, кўришнинг иккиланиши, оғизнинг қуриши кўринишида бўлади. Паркинсонизмни патогенетик давосида ягона йўналиш дофамин даражасини тиклашга қаратилган. Шу мақсадда моноаминоксидаза ингибиторлари (МАД-В) тавсия этилади. Шу гуруҳ препаратлардан бири бўлиб селегин ҳисобланади, бу дофаминни парчаланишини олдини олади ва паркинсонизмда монотерапия мақсадида қўлланилади. Ҳозирда ДОФА- тутувчи препаратлар кенг қўлланилмоқда. Леводопа бош мияда дофамин резервини тиклайди ва паркинсонизмда базис даво кўринишида қўлланилади. Леводопа ГЭБ орқали ўтиб, дофаминга айланади. Леводопани декарбоксилаза ингибиторлари (ИДК) билан биргаликда қўлланилади, бу уни мия тўқимасига осон ўтишини таъминлайди. ДОФА- тутувчи препаратларнинг умумий хусусиятларидан неврологик бузилишлар дискинезия ва дистония кўринишида ва руҳий бузилишлар, галлюцинациялар ва хулқий бузилишлар кўринишида бўлади. ИДК бенесеразид кўринишида мадопар таркибига киради, леводопа ва бенсеразидни оптимал нисбати 4:1 ташкил қилади. ИДК сиз леводопа переферик қон оқимида дофаминни ҳосил бўлиши билан парчаланади, бу эса хар ҳил ножўя таъсирларни (кўнгил озиш) келтириб чиқаради. Мадопар қуйидаги дори шаклларида чиқарилади: мадопар - 125, мадопар - 250, диспергирланган мадопар. Кўп клиницистлар мадопарни, кичик дозада (мадопар - 250 1/4 таблетка) тавсия этиладилар ва аста - секин уни оптимал эффектгача кўтаришади. Баъзан яхши терапевтик эффектга эришиш учун, беморга бир нечта хар ҳил дорилар тавсия этиш лозим. Бундан ташқари паркинсонизм давосида юмекс, наком, синемет қўлланилади. Бундан ташқари электротутқаноқ даво, фотодаво (оппоқ ранг), ЛФК қўлланилади. Гентингтон касаллиги Бу касаллик 100.000 аҳоли сонига нисбатан 4-6 тасида учрайди, бу касаллик аутосом-доминант йўл билан ўтади. Бу касалликнинг ягона хусусиятларидан бири бўлиб антиципация феномени ҳисобланади, яъни касалликни оғирлигини ошиб бориши ва уни ёшликда пайдо бўлиши. Патологоанатомияси. Бу касаллик бош мия пўстлоғида диффуз ўзгаришлар билан характерланади. Бу ерда nucleus lentiformis бужмайган бўлади, putamen да ҳужайралар йўқолади. Рангпар шарда иккиламчи қайта ўзгаришлар пайдо бўлади. Мияни нейротрансмиттер тизимини текширилганда базал ганглияларда ацетилхолин, серотонин, ГАМК ва нитропептид (метэнкефалин, В-эндорфин, Р субстанцияси, ангиотензин) миқдорини камайиши аниқланади. Тахмин қилинишича Гентингтон касаллиги глутаматергик кортикостреар йўлни шикастланиши билан таъсир қилади. Бу ўз навбатида corpus striatum нейронларини кучли стимуляциясига ва кўп сонли перекис радикалларини зарарланиши билан кечади. Хореик гиперкинезларини келиб чиқишда наслий сабаблардан пўстлоқ ости ўзакларнинг дофаминергик активлигини функционал устунлиги ва қора модданинг дофаминергик нейронларга ГАМК тормозланувчи таъсирини камайишига катта аҳамият берилади. Касалликни кечки даврида corpus striatum ни дофамин рецепторларини оғир зарарланиши натижасида базал ганглияларда дофаминергик жараёнларнинг етишмовчилигининг клиникасида паркинсонизм симптоматикаси устун бўлади. Клиник жихатдан Гентингтон касаллигини қуйидаги шакллари фарқланади: гиперкинетик, акинетико-ригидлик ва руҳий шакллари. Касалликни гиперкинетик шакли 30-40 ёшдан кейин ривожланади, аста- секин бошланади, унинг асосий кўриниши мушакларнинг хореик ихтиёрсиз ҳаракати ва астасекин ақлий фаолиятини пасайишини ҳисобланади. Хореик ҳаракатлар ҳаяжонланганда кучаяди ва мушак тонуси пасайиш фонида кузатилади ва уйқуда йўқолади. Юрганда беморлар сакраб, ўйнаб, танасини қимирлатиб юради, лекин мувозанатни сақлаб туради. Юзини бужмайтириш, гапирганда ортиқча овозлар чиқариш, тилини чиқарганда ушлаб туролмаслик характерли бўлади. Вақт ўтган сари гиперкинезлар ошиб боради, беморлар харакат қилиш хусусиятини йўқотади. Бундан ташқари Гентингтон касаллигида руҳий бузилишлар устунлик қилади. Руҳий бузилишлар аста-секин ошиб боради (апатия, хотирани сусайиши, ўзига нисбатан танқидни пасайиши), касаллик прогрессивланган сари деменция ривожланади. Баъзан эшитув, кўрув галлюцинациялар, ҳамда қўзғалиш ҳолати ривожланади. 5-10 % ҳолларда касалликнинг акинетико-ригидлик тури кузатилади. Бунда белгилар 10-20 ёшда бошланади ва тез прогрессирланади (Вестфал варианти). Клиник жихатдан мушаклар ригидлиги, контрактура, ақлий ривожланишининг бузилиши билан характерланади. Хореик гиперкинез бўлмаслиги мумкин. Кўпинча эпилептик хуружлар, миоклониялар, атетоз, дистониялар, атаксиялар, пирамида симптомлари ва кўз ҳаракатини бузилишлари учрайди. Беморлар орттирилган касалликдан вафот этиши мумкин, баъзан суиқасд ҳоллари учраши мумкин. Бош мия КТ сида ҳар хил даражадаги ташқи ва ички гидроцефалия аниқланади. МРТ да мия ён қоринчаларнинг кенгайиши, думли ўзакнинг бошчаси атрофияси кўринади. Позитрон - эмиссион томографияда мияни пўстлоқ ости ҳосилаларида глюкоза метоболизмини камайиши аниқланади. ЭЭГ да α- ритмни депрессияси ва умуман бўлмаслиги мумкин. Гентингтон касаллигининг гени 4 - хромосоманинг калта елкасида жойлашганлиги 1983 йилда аниқланган. 1993 й касалликнинг 1Т - 15 гени идентификация қилинди, ва 5-соҳада ностабил кетма-кетликдаги тринуклеотид такрорланишлар яъни цитозин- аденин гуанин (САG) тутади. Нормада бу триплетларнинг сони 25-30 дан ошмайди, мутант хромосомаларда уларнинг сони 37 дан ошади. Қанчалик САG- такрорланишлар кўп учраса, шунчалик касаллик тез ривожланади ва тез прогрессивланади. Касалликнинг ёмон сифатли ювенил тури (акинетико - регидлик) САG- такрорланишларни кўп сонли нусҳалари мавжудлиги билан характерланади. Мутант аллеллар генетик ностабил бўлиб, кейинги авлодларда САG-такрорланишларни даражасини ошишига олиб келади. Касаллик ота авлоди томонидан ўтганда ностабиллик юқори бўлади. Юқоридагиларни барчаси антиципация ва ота авлоди томонидан ўтиш эффектини тушунтиради. Гентингтон хореясида мутация табиатини аниқланиши, касалликни бевосита ДНК -ташхис усулларини ишлаб чиқиш учун имконият яратади, бу усул САG-такрорланишларни экспансия даражасини аниқлашга асосланган. Гентингтон хореясини эффектив давоси йўқ. Нейролептик гуруҳдаги антидофаминергик препаратлар (галоперидол, стелазин, этапфазин, тиаприд ва бқ.) қўлланилмоқда. Галоперидол 1,5 -3 мг сут дозада қўлланилади. Акинетико- ригидлик шаклида дофаминергик система активлигини оширувчи препаратлар (L-дофа, наком, синемет, мадопар) қўлланилади. Бундан ташқари носпецефик метоболик таъсир этувчи препаратлар В гуруҳ витаминлар, ноотроплар, церебролизин ҳам қўлланилади. Ҳозирда тиббий - генетик маслаҳатҳоналардан ўтиш ва Гентингтон хорея генини ташувчиларни аниқлаш биринчи даражали аҳамиятга эга. Гепатоцеребрал дистрофия Гепатоцеребрал дистрофия (Вильсон-Коновалов касаллиги) наслий касаллик бўлиб, экстрапирамида тизимини зарарланиши билан кечади, аутосом йўл билан ўтади. Учраш тезлиги 100.000 аҳолига 2-3 та ни ташкил қилади. Гетерозигот ташувчанлик тезлиги -1: 100. Гепатоцеребрал дистрофия моноген касаллик бўлиб, патологик ген 13-хромосоманинг (13 q 14.3) узун елкасида жойлашади. 1993 й касаллик гени клонлаштирилган. Шу геннинг ҳар хил мутациялари (20 дан ортиқ) аниқланди. Гепатоцеребрал дистрофия юқори фенотипик полиморфизм билан боғлиқ бўлиб, бу геннинг ҳилма ҳил экспрессияланиши ва ҳар хил алелли гомозиготаларни шаклланиши билан боғлиқ. Бу касалликнинг патогенези асосида жигардан мисни сафро билан чиқишини бузилиши ва мисни церулоплазминга айланиш тезлигини пасайиши ётади. Церулоплазминни синтезини бузилиши иккиламчи аҳамиятга эга. Касалликни пайдо бўлишида бирламчи биохимиявий нуқсон бўлиб, мис транспортини оширувчи Р-типдаги АТФ ҳисобланади. Шу сабабли мис гепатоцитларда деполанади ва гепатитни чақириб, кейинчалик циррозга олиб келади. Кейинчалик мис қонга ўтиб, гемолитик камқонликка олиб келади (мисни эритроцит мембраналарига токсик таъсири). Бундан ташқари мис бошқа аъзоларда биринчи навбатда мия ва шох пардада ушланади. Бу эса пўстлоқ ости ўзакларида патологик ўзгаришларга ва Кайзер-Флейшер ҳалқасини пайдо бўлишига олиб келади. Гепатоцеребрал дистрофияда патоморфологик жиҳатдан жигар циррозидан ташқари, қизилўнгач веналарнинг кенгайиши аниқланади, бу эса тромбоцитопения ва ички қон кетишга олиб келади. Ҳамма беморларда қон ивиш тизими бузилади (прокоагулянтлар синтези), капиллярлар ўтказувчанлиги ошади, бу эса милкларни, бурунни қонашига, танада қон қуйилишларга олиб келади. Жигарнинг дезинтоксикация қилиш вазифасининг бузилиши эстроген ва бошқа гормонларнинг метоболизмини бузилишига олиб келади, шунинг учун баъзан гормонал бузилишлар (дисменория, спонтон абортлар, ўғил болаларда гинекомастия, жинсий ривожланишдан орқада қолиши) кузатилади. Буйракларни зарарланиши, каналчалар реабсорбциясини бузилиши, гиперкальциемия, гипофосфатемия, гиперфосфатурия, остеопорозлар ривожланишига олиб келади ва бунинг натижасида суяклар синиши, тишларнинг бузилиши, артрозлар келиб чиқади. Бош мия таркибида биринчидан ясмиқсимон ўзак, думли ва тишсимон ўзак, мияча ва бош мия яримшарларининг пўстлоғи зарарланади. Бундан ташқари ангиотоксик таъсири натижасида миянинг майда қон томирлари ва капиллярларини атонияси ривожланиб, майда қон қуйилишлар ва периваскуляр шишга олиб келади. Н.В.Коновалов касалликнинг қуйидаги шаклларини ажратади: 1. Қорин шакли - 5-7 ёшда бошланиб, жигарни турлича зарарланиши билан характерланади, баъзан ўткир кечади. 2. Аритмо-гиперкинетик (эрта) шакли - 7-15 ёшда бошланади ва аритмик гиперкинезлар билан характерланади, кўпинча торсион-дистоник характердаги. Гиперкинезлар нафақат тана ва қўл-оёқларни, балки ютиш ва артикуляцияга жавобгар бўлган мушакларга ҳам тарқалади ва дизартрия, дисфагияга олиб келади. Ақлий фаолиятини пасайиши, руҳий бузилишлар кузатилади. Давосиз беморлар 2-3 йилдан кейин вафот этадилар. 3. Титроқ-ригидлик шакли - 15-25 ёшда бошланади ва яхши сифатли кечади. Бир вақтда ригидлик ва титроқ ривожланади, кўпинча дисфагия ва дизартрия кузатилади. Клиникада титроқ ёки ригидлик устунлик қилади. Висцерал ва руҳий бузилишлар яққоллиги ўзгарувчан. 4. Титроқ шакли - 20-25 ёшда бошланади, кам ҳолларда (4050 ёшда), яхши кечади. Касалликнинг асосий симптоми - йирик ҳаракатли титроқ, булар ҳаракат қилганда ошиб боради. Ақлий фаолияти узоқ вақт сақланади, висцерал бузилишлар унчалик аҳамиятли эмас. 5. Экстрапирамида-пўстлоқ шакли - мустақил шакл бўлмасдан, вақт ўтган сайин бошқа шакл билан бирга ривожланиши мумкин. Илгари мавжуд бўлган ўзгаришларга фалажлар ва эпилептик тутқаноқлар қўшилади ва руҳий бузилишлар тез прогрессирланиш билан кечади. Ташхис. Асосий ташхис тести бўлиб, Кайзер-Флейшер ҳалқасини аниқлаш ҳисобланади, бу визуал ёки ёриқсимон чироқ ёрдамида аниқланади. Гепатоцеребрал дистрофия учун патологик бўлиб, қон зардобида цируллоплазмин миқдорини 1,3 ммол/л дан пасайиши ҳисобланади. Қон зардобида эркин мис миқдори ошади. Сийдик билан мисни экскрецияси ошади (80 мг/сут юқори ёки 1,25 ммол/сут юқори). Жигар биоптатларида касалликнинг эрта даврида юқори миқдорда мис аниқланади. Ҳозирда аниқ ташхисот критерияси бўлиб тиббий-генетик тест ҳисобланади. КТ ва МРТ да бош мия ярим шарларида, миячада, пўстлоқ ости структураларида атрофик ўзгаришлар ва қоринчалар кенгайиши аниқланади. Даволаш: 1. Бу касалликнинг патогенетик давосини амалга оширувчи асосий препарат бўлиб, Д-пенилламин - тиолли синама ҳисобланади, у оғир металлар хусусан мис билан комплекслар ҳосил қилади. Д-пенилламин (кукренил, артамин, металлкоптоза) 0,25 гр дан ҳар куни (1-2 хафта давомида) ичилади, кейинчалик дозани аста-секин ошириш 1 таблеткага (0,25) хафтасига терапевтик дозага етгунча (1-1,5 г/сут). Купренил билан даволанаётган беморда 3-6 ойида неврологик нуқсонни кучайиши кузатилади. Бу мис балансини силжиши ва сийдик билан тез экскрецияланиши билан боғлиқ. 2. Руҳ препаратлари (руҳ сульфат ва ацетат) 50 мг кунига 3 маҳал (овқатдан 30 мин олдин) тавсия этилади. Ичакнинг оқсили (металлотионин) билан боғланиб, у мисни сафро билан экскрецияланиши ва ахлат билан чиқиб кетишига олиб келади. 3. Бундан ташқари триентин (400-800 мг кунига 3 маҳал) ёки тетратиомолибда қўлланилади. Мис миқдори кам бўлган парҳез тавсия этилади (1,5 г/сут паст). Қуйидаги маҳсулотларда жигар, қўзиқорин, шоколад, ёнғоқ, нўхатда мис кўп миқдорда мавжуд. Систематик равишда В гуруҳ витаминлари, антиоксидантлар (Е витамин, эссенциал, аскорбин кислотаси) билан даволаш ўтказилади. Баъзан жигар трансплантация қилинади. Пьер-Мари нинг наслий мияча атаксияси 1893 йил Пьер Мари оилавий атаксиялар гуруҳини 2 касалликка бўлиш лозимлигини таклиф этди. Бу Фридрейх касаллиги ва жинсий шакли, буни наслий мияча атаксияси деб номлади. Фридрейх касаллигидан фарқ қилиб, бу касаллик кеч бошланади (30-40 ёш), суяк деформацияларнинг бўлмаслиги ва церебрал симптомларни (дисфагия, ақлий заифлик) ва хусусан кўз симптомлари (птоз, узоқлаштирувчи нерв фалажи, конвергенцияни қийинлашиши, Аргайлл- Робертсон симптоми, кўрув нерви атрофияси) билан кечади. Пьер Мари атаксияси аутосом-доминант йўл билан ўтади. Патологик ген 6р 23 соҳасида жойлашади. Охирги йиллар наслий атаксиялар патогенезида нейромедиатор аминокислоталар тизимидаги бузилишларга катта аҳамият берилмоқда. Наслий атаксияларнинг турли шаклида бош ва орқа миянинг турли соҳаларида глутамат, аспартат, ГАМК камайиши ва бошқа аминокислоталарни дисбаланси аниқланган. Бу ўзгаришлар бирламчи метаболик нуқсон бўлиб ҳисобланмайди ва марказий нерв тизими нейронларини дегенерациясига олиб келувчи биохимик бузилишларини мураккаб комплексининг занжири ҳисобланади. Пьер Мари атаксияси аста-секин юришни бузилишидан бошланади. Баъзан нутқ атаксияси, оёқларни спастик фалажи, пай рефлексларни ошиши аниқланади. Кўпинча депрессия ривожланади, хотира сустлашади. Ҳозирда Пьер-Мари касаллиги ягона нозологик бирлик деб ҳисобланади. Клиник кечишини хусусиятларига қараб унинг ҳар хил вариантлари фарқланади, улардан кўпчилиги наслий оливопонтоцеребелляр атаксиялар гуруҳига киритилган. Оливопонтоцеребелляр атаксиядан фарқ қилиб Пьер Мари атаксияда экстрапирамида бузилишлари, гиперкинетик ёки оливостатик синдромлар, оёқ-қўлларда қўпол фалажлар кузатилмайди. Пьер Мари касаллигида патологоанатомик мияча гипоплазияси, Пуркинье ҳужайраларининг бўлмаслиги билан, кўприк атрофияси билан характерли. Дегенератив ўзгаришлар пирамида ва орқа мия - мияча йўлларда кузатилади. КТ ва МРТ да мияча ҳажмини кичрайиши, эгатларни яққоллиги кўриниши мумкин. Мутант генларнинг бирламчи оқсил маҳсулотларини бўлмаслиги сабабли эффектив давоси ўз ичига қуйидагиларни олади: В гуруҳ витаминлар, церебролизин, ноотроплар, эссенциал, Е витамин, АТФ, рибоксин, аденил. Доимий равишда даволовчи машқлар олиб борилади. Комплекс даво курслари касалликни прогрессивланишини секинлаштиради ва катта психологик аҳамиятга эга. Фридрейх касаллиги 1862 йил Фридрейх бу касалликни аниқлади ва кейинчалик уни номи билан аталди. Бу касаллик орқа миянинг орқа ва ён устуни (мияча ва пирамида йўллари), миячанинг Пуркинье ҳужайралари ва тишсимон ўзакни ҳамда орқа илдизларини дегенерацияси билан кечади. Касалликни учраши 100 000 аҳоли сонига 2-7 тани ташкил қилади. Бу касаллик аутосом рецессив йўл билан ўтади ва гетерозигот ташувчанлик частотаси 1% ни ташкил этади. Касаллик 10-20 ёшларда бошланади ва жинсий ривожланиш даврида юқори тезликда пайдо бўлади. Касаллик орқа мия бел қисмининг орқа устунини зарарланишидан бошланади ва жараён пастдан юқорига қараб тарқалади, жараён узунчоқ мияга ўтмайди. Баъзан кўрув ва эшитув нервининг зарарланиши учрайди. Клиникаси : аралаш атаксия, мушак тонусини пирамида типи бўйича ошиши ва чуқур пай рефлексларнинг пасайиши, нистагмдан иборат. Бундан ташқари скелет томонидан (кифосклиоз, Фридрейх товони) ва юрак мушаги томонидан ўзгаришлар билан кечади. Беморни юриши атактик (сенсор- мияча), орқа устун ва мияча зарарланиши ҳисобига. Координация текширилганда дизметрия, адиадохокинез, ёзувни ўзгариши, қоронғида юра олмаслик аниқланади. Ақлий фаолияти кўпинча сақланган, лекин Фридрейх касаллигини дебиллик бидан бирга учраши аниқланган. Мияча ва сенситив атаксияси аста-секин ошиб боради, оёқларда кучсизлик ва мушак атрофияси пайдо бўлади, кейинчалик бу симптоматика қўлларда ҳам тарқалади. Кўрув нервини атрофияси ривожланиши мумкин. 90 % беморларда юракни зарарланиши (кардиомиопатия), эндокрин бузилишлар (диабет, инфантилизм, тухумдон дисфункцияси) аниқланади. Касаллик аста-секин прогрессивлашади, ремиссия бермайди. Касалликнинг биохимик сабаблари аниқланмаган. КТ кам ахборот беради. МРТ да орқа мия атрофиясини кўриш мумкин. Касалликнинг вариабеллигини битта ген бир неча мутациялар борлиги билан ва улар ҳар хил клиник кўринишга эга эканлиги билан тушунтириш мумин. Нуқсон 9-хромасомада 9 р 13-р21 локусида эканлиги аниқланади. Ген маълум бўлмаса ҳам касалликни билвосита ДНК - ташхиси, пренатал ташхиси ва мутант генни гетерозигот ташувчанлик ташхисини амалга ошириш мумкин. Даволаш: симптоматик. Статокинетик механизмда иштирок этувчи системаларни машқ қилдириш, оёқларни массаж қилиш, ортопедик усуллар катта аҳамиятга эга. Дори моддалардан В гуруҳ витамини, Е витамини, церебролизин, АТФ, кокарбоксилаза, юрак препаратлари (кўрсатма бўйича), антихолинэстераз препаратлар қўлланилади. Адабиётлар: 1. Герасимова М.М. «Нервные болезни». Дарслик. - Тверь. Триада. 2003й. 2. Жан Айкарди «Заболевания нервной системы у детей» в 2-х томах. Дарслик. – Москва. Бином. Лаборатория знаний 2013 й. 3. Маджидова Ё.Н. «Хусусий неврология».Дарслик. -Тошкент. Sharq. 2012 й. 4. Бадалян Л.О. «Детская неврология». Дарслик. - Москва. Медицина. 2001 й. 5. Маджидова Ё.Н. «Соматоневрология». Ўқув қўлланма. - Тошкент. Навруз. 2018 й. 6. Маджидова Ё.Н., Трошин В.Д., Погодина Т.Г., Хрулев А.Е. «Неотложная неврология». Дарслик. - Тошкент. Навруз. 2018 й. 7. Маджидова Ё.Н., Содиқова Г.К., Нурмухамедова М.А «Катталар ва болалар неврологик статусини қадамма-қадам текшириш бўйича амалий кўникмалар». Ўқув қўлланма. - Тошкент. ТАМАДДУН. 2017 й. 8. Маджидова Ё.Н., Усманова Д.Д. «Тунельные синдромы». Монография. - Тошкент. Baktria press. 2017 й. 9. Маджидова Ё.Н., Нурмухамедова М.А., Хайдарова Д.К., Прохорова А.Н. «Умеренные когнитивные нарушения у больных с дисциркуляторной энцефалопатией». Ўқув қўлланма. - Ташкент. ТАМАДДУН. 2015 й. 10. Маджидова Ё.Н., Нурмухамедова М.А., Азимова Н.М., Ким О.В., Хамидова Н.А. «Частная неврология». Ўқув қўлланма. - Тошкент. Узбекистон миллий энциклопедияси. 2014 й.

O'xshashlar

Нерв системасининг касалликлари
Нерв тизимининг инфекцион касалликлари
Периферик нерв тизимининг касалликлари
Бош мия ярим шарларининг олий фаолияти нерв тизимининг касалликлари
Марказий нерв системаси