Ҳиндистон цивилизацияси - Tarix - Referatlar

Ҳиндистон цивилизацияси

Yuklangan vaqt:

23.10.2023

Ko'chirishlar soni:

0

Hajmi:

110 KB

Ko'chirib olish

Ҳиндистон цивилизацияси Режа: 1. Мил.авв. III - II минг йилликларда Ҳиндистон. Веда даври. 2. Мил.авв. I минг йиллик ўрталари ва милодий I минг йиллик ўрталарида Ҳиндистон. 3. Ҳиндистоннинг маданий ривожланиши ведалар, индуизм, буддизм, Бхагавад-Гита. 4. Илк ва ривожланган ўрта асрларда Ҳиндистон.

Мил.авв. V - IV минг йилликларда Ҳинд водийсининг ғарбида ясси тоғликларда дастлабки деҳқончилик маданиятлари вужудга кела бошлайди. III минг йилликда эса илк синфий жамият вужудга келиб, тарихда илк Ҳинд цивилизацияси ёки Хараппа (энг катта ёдгорлиги номи билан мил. авв. 2300- 1700 йилларни ўз ичига олади) номи билан киради. Хароппа, Моҳенжо-Даро (ўликлар водийси), Равалпинди, Таксилла, Чатху-Даро ва бошқа йирик шаҳарлар майдони 2,5 кв. кмни эгаллаган бўлиб, 30 минг киши яшаши мумкин бўлган. Кўчалар тўғри тўртбурчак чорраҳалар билан туташган. Йирик шаҳарлар (Моҳенжо-Даро) даа Арк мавжуд бўлиб, унда дон сақланадиган омбор, ҳукмдор қасри (230х170 м) ёпиқ бозор, диний маросимлар учун бассейн топилган. Хараппадан топилган омбор энг йирик бўлиб (61х46 м) минг тоннагача дон сақлаш имконини берган. Ютхолдаги 219х37 метрли дарё билан туташувчи бассейнни олимлар эҳтимол верф (кемаларни сувга тушириш жойи) бўлса керак, деб ҳисобладилар. Шаҳардаги уйлар 2-3 этажли бўлиб, том ва пишиқ ғиштлардан қурилган. Махсус канализациялар ифлос сувларни шаҳардан ташқарига олиб чиқиб кетган. Буғдой, тариқ, арпа, пахта маҳсулотлари экилган. Буйвол, эчки, қўй, чўчқа, товуқ, эшак каби уй ҳайвонлари мавжуд бўлган. Хараппа маданияти бронза даврига оид бўлгани учун асосий ҳунармандчилик буюмлари бронзадан тайёрланган. Ҳинд цивилизацияси, Ўрта Осиё, Эрон, Белужистон билан, сув йўли орқали эса, узоқ Месопотамия билан савдо алоқалари олиб борган. Хараппа ёдгорликлари ёзуви ўзига хос бўлиб, ҳали уни ўқиб чиқишга ҳеч ким мувофиқ бўлмаган. Фақатгина 400 дан ошиқ белгидан иборат бўлиб, ўнгдан чапга қараб ўқилиши, тили қадимий дравид тили бўлган деб тахмин қилинади. Аёл ҳайкалчаларнинг кўпчилиги матриархат мавжудлигини билдирса, уч айри найзали ҳайвонлар қуршовидаги илоҳий олимлар шивага (чорва ҳомийси) қиёслайдилар. Илк Ҳинд цивилизацияси мил. авв. II минг йиллик иккинчи ярмида номаълум сабабларга кўра инқирозга юз тутади. Айрим тарихчилар орийларнинг кириб келиши бу цивилизациянинг барбод бўлишига олиб келган деб ҳисоблайдилар.

Мил.авв. II минг йиллик охири (Х II аср) да Ҳиндистоннинг шимолий ғарбидан орий (аслзода оқсуяк) қабилаларининг кириб келиши натижасида Ведалар даври деб ном олган (мил. авв. Х II - VI асрлар) давр бошланди. Орийлар кўчманчи қабилалар бўлиб, уларнинг келиб чиқиши ҳақида турли фараз ва қарашлар мавжуд. Улар аста-секин ўтроқ ҳаётга ўтиб борадилар. Орийларнинг диний эътиқодлари Веда (билим) китобларида ўз ифодасини топган. Ригведа, Атхарваведа, Самоведа, Яжурведа деб номланувчи китобларда Ўрта Осиё, Эрон халқларига ҳам Авесто давридаги қарашларга мос келувчи тасаввурлар мавжудлиги сабабли, Ҳинд-Эрон халқлари умумий бир ўзакдан келиб чиққан деган хулосани беради. Воҳаларда орийларнинг ижтимоий-иқтисодий, сиёсий ҳаёти акс эттирилган. Улар Ҳиндистонга кириб келгач, маҳаллий аҳолини душман (Дасья) деб атаб, айнан уларни қулларга айлантирганлар. Ведаларга худога илтижолар қилиниб, худолардан сигирлар сўралган. Веда мифологиясида одатда худолар ва мифик қаҳрамонлар сигир учун урушлар олиб борганлар. Веда тилида уруш (гавишти) сигирларни қидирмоқ маъносини беради. Орийлар маданияти одатда жигарранг сополларга нақш тушириш билан белгиланади. Мил.авв. I минг йилликда Ганг ҳавзасида ҳали синфий жамият вужудга кела бошлайди. Бу ерда буғдой, арпа, нўхат, пахта билан бир қаторда илк бора шакарқамиш экилиб, ундан шакар олина бошланади. Санскрит тилида sugar (ширин қум) маъносини беради. Ҳунармандчиликнинг темирчи, ювилер, кулол, аравасоз ва бошқа соҳаларнинг ривожланишини кузатиш мумкин. Мил.авв. V аср бошларида дастлабки танга пуллар пайдо бўла бошлайди. Ижтимоий ҳаётда ведалар ҳукмдор табақаларни ва қуйи табақаларни ажратганлар. Браҳманлар (руҳоний), кшатрий (жангчи), юқори табақа бўлиб, Вайши (деҳқон, ҳунарманд, савдогар), шудра (қуллар) табақаси қуйи табақаларни ташкил этган. Жангчиларни орийлар ва қабилаларнинг оқсоқоллари ташкил этган бўлса, руҳонийлар браҳманлар табақасини ташкил этади. Оддий уруғ қабила аъзолари вайшийларни ташкил этгани ҳолда, қуллар бўйсундирилган қабилалардар олинган. Веда даврининг охирларида шимолий Ҳиндистонда 20 га яқин давлатлар вужудга келади. Улардан Магадха, Кошашала қабиларда монархия

тартиблари устунлик қилса, Врижи, Малла қабиларда республика тартиблари устунлик қилган. Врижи, Маллада рожалар ҳукмрон бўлсада, халқ йиғинисиз ҳукум чиқара олмас эди. Веда эътиқодига амал қилган руҳонийлар очиқ ҳавода қурбонлик келтирганлар. Мил.авв. I минг йиллик охирларидагина махсус ибодатхоналар пайдо бўлади. Агни-олов, Ваю-шамол, Паржани- совуқ, сом- муқаддас ичимлик худоси, митра-қуёш, индр-жанг худоси ва бошқа кўплаб худоларга эътиқод қилинган. Мил.авв. I минг йиллик ўрталарида шимолий Ҳиндистонда бир неча ўнлаб мастақил давлатчалар пайдо бўлади. Улар ўртасида (Кошала ва Магадха давлатлари) Ганг ҳавзасида етакчилик учун кураш олиб борилган бўлса, Ҳинд дарёси ҳавзаси мил. авв. VI асрда Эронга тобе қилинган эди. Ганг дарёси ҳавзасида V аср бошида Магадха давлати ғалаба қозонади. Нандлар сулоласи ҳукмронлик қилган даврда Магадха ҳукумдорлари Ҳиндистонни бирлаштиришга ҳаракат қилади. Баъзи манбаларда Нандларнинг кшатрийлар сулоласидан бўлмагани, паст табақадан чиққанлиги ҳақида маълумот беради. Мил.авв. IV аср охирида А.Македонский қўшинлари Ҳиндистонга бостириб киради (мил. авв.327-325 йй). Баъзи подшоликлар жангсиз таслим бўлса, баъзилари (масалан Пор) қаттиқ қаршилик кўрсатадилар. А.Македонскийнинг Ганг ҳавзасига юриш қилиши имкони бўлмайди. Баъзи манбаларда нандлар унга қарши 200 минг пиёда, 10 минг отлиқ, 8 минг жанг араваси, 6 минг фил қарши қўйиш учун тўплагани учун ҳужум қилмаган деб маълумот беради. Мил.авв.317 йил Чандрагупта нандлар сулоласини ағдариб, ўрнига маурийлар сулоласига асос солади. Тахминан мил. авв. 305 йил Чандрагупта Салавка I Никатор (ғалаба келтирувчи) ўртасида шартнома тузилиб, 500 жанговар фил эвазига Ҳинд дарёси ҳавзасидан Юнон-Македон горнизонларини олиб кетади. Маурийлар сулоласи Чандрагупта невараси Ашока даврида кучайиб, қарийб бутун Ҳиндистонни бирлаштирди. Ашока (262-231 йй.) мамлакатда ягона идеология буддизмни давлат дини деб эълон қилади. Унинг буддавийликка оид айрим фармонлари қаятошларда ўйиб ёзилган ва “Ашока эдиктлари” деб ном олган. Ашокадан сўнг давлат тушкунликка юз тутади. Мил.авв. 180 йилда ҳарбий бошлиқлардан бири давлат тўнтариш ўтказиб,

шунглар сулоласига асос солади. Шунглар Юнон-Бақтрия давлати билан узоқ кураш олиб боришга тўғри келади. Мауриялар давлати билар бир қаторда Ҳиндистон ярим оролининг жанубида Керара, Чола, Пандья каби давлатлари ҳам мавжуд бўлиб, улар ҳатто Маурия давлатига ҳам қаршилик кўрсата олганлар. Мил.авв. I минг йиллик ўрталарида Ҳиндистонда кўплаб диний фалсафий оқимлар вужудга келган. Жамият ҳаётига Веда ва Брахманизм таълимоти етарлича жавоб олмас эди. Сайёр устозлар (шраман) турли оқмиларни ҳимоя қиладилар. Уларнинг айримлари фаталист (аживики), иккинчиси материалист (чарваки), учинчиси аскетизм орқали холос бўлиш (жайнлар) каби оқимлари тарғиб қилганлар. Айрим диний йўналишлардаги шраманлар ўз жамоаларини ҳам тузадилар. Бундай оқимлар сирасига кирган буддизм кейинчалик давлат дини даражасига кўтарилади, буддизмнинг пайдо бўлишига Сиддхартха Гаутама (мил. авв. 566-486 йй.) шак қабиласидан, кшатрий оиласига мансуб тарихий шахс номи билан боғлиқ у 29 ёшида тарки дунё қилиб 7 йилдан сўнг ҳақиқатни топади. 40 йил ўз таълимотини ёяди ва будда (нурга чўмган, ҳақиқатга эришган) номини олади. Будда таълимотида ҳаёт азоб уқубатдан иборат эканлиги, азоб уқубатлар сабаби хоҳиш истаклар эканлиги, руҳни азоб уқубатлардан қутқариш йўли мавжудлиги ва будда кўрсатган йўлдан бориш тўғри йўл эканлиги айтилади. Будда жамоаларига (сангха) қуллар, қарздорлар, ҳарбийлар қабул қилинмаган. Инсон руҳи ўлмайди, унинг жисми ўлади руҳ эса қайта туғилишга ва азоб уқубатга гирифтор деб таълим беради. Нирвана (олий ҳилқат, нур) га эришган руҳгина қайта туғилиш азобидан қутилади. Бунинг учун бадхитсатва (нурга чулғанган) устозларга қулоқ солиш зарур деб таълим беради. Будда таълимоти Ашока даврида давлат дини даражасига кўтарилади. Юнон- Бақтрия, кейинроқ кушонлар даврида эса Ўрта Осиё ҳудудларига тарқалади. Милодий I асрда Ўрта Осиё, Афғонистон ва Ҳиндистоннинг катта қисмини ўз ичига олган кушонлар давлати ташкил топади. I - II асрларда Кушон тангалари Варанаси, Орисгача бўлган ҳудудларда тарқалади. I асрдаёқ Кушон тангаларида Ҳинд худоларининг тасвири туширила бошланган бўлса, Кушон подшолари ҳиндча унвонлар ҳам ола

бошлайдилар. III асрда Гужарат, Ражахстон, Панжоб кушонлар таркибидан ажралиб чиқади. III асрда Кушонларнинг Сосонийлар билан курашлари Ҳиндистонга мустақиллик учун имконият беради. Магадха давлати Ҳиндистонни бирлаштириш маркази бўлиб қолади. Чандрагупта (320-335 йй.), Самудрагупта (335-380 йй.), Чандрагупта II (380-415 йй.) даврида шимолий ва марказий Ҳиндистон, шимолда Непал, шимолий-шарқда Ассам, Гужорат бўйсундирилади. IV - V асрлар “Гупталарнинг олтин даври” деб тарихга киради. V аср ўрталарида Скодагупта даврида Ўрта Осиёдан келган Хунн-эфталит қабилаларининг ҳужуми кучаяди. 467 йил Скодагупта вафот этгач, Гупта давлати Хунн-эфталитларга қарам бўлиб ўлпон тўлашга мажбур бўлади. Ҳиндистонда қулдорчилик жамияти шу билан барҳам топади. I - V асрларда Ҳиндистонда хўжаликнинг барча соҳалари тараққий этади. Айниқса, металлургия, ювилер маҳсулотлар ишлаб чиқиш, тўқимачилик, кема қуриш тараққий этади. Авваллари Таксилла, Пурушапура, Қобул, Ўрта Осиё ва Парфия, Хитой билан қуруқликдан савдо олиб борилган бўлса, эндиликда денгиз орқали Яқин Шарқ мамлакатлари ҳатто, Хитой билан савдо олиб борилган. ИИИ асрдан бошлаб қул меҳнати ўрнига ерларни ижарага бериш кенг тарқалади. Бу эса меҳнат унумдорлигининг ошишига сабаб бўлади. Жамоа ер эгалиги ҳам аста- секин феодаллаша боради, оқсоқоллар ерларни тақсимлаш ва жамоани бошқаришни ўз қўлларига киритиб оладилар. Милодимиз бошларида каста тартиблари қатъийлаша боради улар орасида қатъий таъқиқлар ва каставий иерархия авж олади. Ҳинд донишмандлари фалсафа фани ривожига катта ҳисса қўшдилар. Веда даврининг охирида вужудга келган упанишада таълимоти инсон руҳининг дунё руҳига қўшилиб кетишига асосланади. Дуалистик таълимотлардан ташқари қадимги Ҳиндистонда материалистик таълимотлар ҳам мавжуд бўлиб, улар чарвок ва локаята таълимотлари эди. Чорвака фалсафасида реал материялар ҳаво, олов, сув ва ер оламни ташкил этади дейилса, локаята таълимоти руҳнинг кўчиб юриши, карма қонунларини рад этади. Аниқ фанлар соҳасида ҳам Ҳиндлар катта ютуқларни қўлга киритганлар. Ҳиндлар дунёда биринчи бўлиб

ўнлик саноқ системасидан фойдаланганлар. Ҳинд математиклари куб, квадрат, икки номаълумли тенгламалар, синусоида каби мураккаб масалаларни еча олганлар. Пи нинг 3,14 эканлигини ўша вақтлардаёқ аниқлаганлар. Астроном Арьябхата ( V аср) ер шар шаклида эканлиги, унинг ўз ўқи ва қуёш атрофидан айланишини илмий асослай олган. Ҳинд медицинаси (аюрведа - узоқ шарқ ҳақида билим) Ҳиндистон ҳудудидан ташқарида ҳам машҳур бўлган. Табиблар дори- дармонлар билан даволаб қолмай айрим ўша давр учун мураккаб жарроҳликларни ҳам қилганлар. Архитектура соҳасида йирик ибодатхоналар қурилмаган Чандрагупта ва Ашоканинг юнон муаррихлари томонидан ҳашаматли деб таърифлаган саройлари ёғочдан бўлиб сақланиб қолинмаган. Маурийлар даврида келиб илк будда ибодатхоналари қурила бошланади. Кейинчалик Ҳиндуизм ибодатхоналари ясси томли бўлса, Гупталар даврида қурилган ибодатхоналар йирик ва ҳашамат касб эта бошлайди. Бундай ёдгорликларга Санчида, Бхархута, Паттадокал шаҳарларидаги ибодатхоналарни киритиш мумкин. Ҳайкалтарошлик соҳасида ҳам улкан ютуқларга эришилган бўлиб, милодий I асрларда Матхур ва Гандхар мактаблари машҳур эди. Матхурда ҳайкалтарошлик соф Ҳинд мотивларига асосланган бўлса, Гандхар йўналишида Ҳинд, Ўрта Осиё, Элинистик маданият анъаналари таъсири сезилиб турган. Ҳинд рассомчилиги будда ибодатхоналари, Ажанта ибодатхонасидаги деворий тавсирларда сақланиб қолган бўлиб, асосан икки йўналиш сюжет ва декоратир йўналишга бўлинади. Ғор ичида қурилган Ажанта ибодатхона комплексига жами 27 та ибодатхоналар кириб, у қариб минг йил давомида қурилгани, ғор ичидаги шаҳар бўлганлиги, ҳинд динининг ўзгариб бориш жараёнини таҳлил этиш имконини бериши қабилар билан машҳурдир. Ҳозирга қадар Веда даври ёзувлари топилмаган. Коҳинлар ведаларни авлоддан-авлодга оғзаки етказиб келганлар. Брахманлар ведаларни тўғри ўқишлари учун фонетик, этимологик, граматик қоидаларни билишлари зарур эди. Мил.авв. V - IV асрларда Ҳинд олими Панини санскрит тилининг граматикасини тузиб чиқади. Ҳозиргача Ҳинд ёзувининг энг қадимгилари мил. авв. III асрдаги

Ашока эдиктлари бўлиб ҳисобланади. Бундан қадимги ёзма ёдгорликлар сақланиб қолмаган. Шундан сўнг брахми, кхарошти ва бошқа ёзув турлари шаклланиб борди. Мил.авв. I минг йиллик ўрталаридан Ҳиндистонда бадиий адабиёт ҳам ривожланиб шокунтала, Рамаяна, Маҳобҳорат, шакунтала, Калила ва Димна каби ўнлаб асарлар яратилди. Милодий I асрда давлатни бошқариш санъати (Артхашастра) яратилди. Ману қонунлари, жатакилар ва айниқса, Панчататра Ҳиндистондан бошқа ҳудудларга ҳам кенг тарқалади. Ўрта асрлардаёқ Панчататра, Калила ва Димна ўнлаб тилларга таржима қилинади. Қадимги Ҳинд адибларидан Калидаса, Ашвагхошалар энг машҳурлари эди. Будда дини ҳақида юқорида эслатиб ўтилган эди. Лекин бу дин бутун Ҳиндистонни қамраб ола билмади. Ҳатто, давлат дини деб эълон қилингандан сўнг ҳам, фақатгина йирик шаҳарлар ва уларнинг атроф ҳудудларига тарқалди холос. Веда дини билан аста-секин қўшилиб бориб, Ведалар (брахманизм) худоларини тан олган буддизм, руҳнинг кўчиб юриши ҳақидаги тасаввурини сақлаб қолди. Агни, индр, сом худолари ўз аҳамиятини йўқотиб, ўрнига брахма, вишну, шива худоларининг аҳамияти ортди. Шунингдек, маҳаллий архаик эътиқодлар ҳайвонларга эътиқод, аёлларга эътиқод (кали, дурга, парвати, махаведи маъбудалари) сақлаб қолиниб, ягона ҳиндуизм дини шаклланди. Кейинги даврларда маҳабҳорат достонининг бир бўлаги бўлган ва аслида Аржун ва Кришна суҳбати бўлган Бҳагавад Гита ҳам диний фалсафий оқим бўлиб шаклланди. Унга кўра, Аржун Курукшетр жангида бобоси Бхишамга ўқ отишдан бош тортади. Кришна эса (Вишнунинг ерга тушган қиёфаси) унга ўз сирини очиб, Бҳишам ўлсада, руҳи ўлмаслиги, балки азобдан қутилиши, дунё ҳақидаги сирларни очади. Мана шу суҳбат алоҳида диний тасаввур бўлиб шаклланган. Ҳозирги кунда дунёнинг кўпгина давлатларида Кришнани англаш жамиятлари тузилган. Улар Бҳагавадгитани ўз муқаддас китоби деб билди. VI асрда тарқоқ ҳинд князликлари ичида ғарбий Бенгалияда Гауда, Жамна дарёси ҳавзасида Тханесар князлари марказлашиш учун кураш олиб бордилар. Гауданинг ҳукмдори Шишонша будда руҳонийларини таъқиб остига олгани билан машҳур 606 йили Магадха давлатини босиб олиб, Канауж билан кураш

бошлайди. Канауж бу вақтда Тханесар давлати билан иттифоқ бўлиб, Харша Вархан (606-647 йй.) даврида кучайиб, бутун шимолий Ҳиндистонни бўйсундиради. Харша Хитой билан дипломатик алоқалар олиб боради. Лекин 647 йил у вафот этгач, Ван Сюоньцэ бошчилигидаги элчиларни янги ҳукмдор қириб ташлайди. Ван Сюоньцэ Тибетга қочиб бориб, Тибет, Непал ва хитойликлардан иборат қўшин олиб келтиради. Ҳукмдорни асир олиб Хитойга юборади. Харша давлати тарқалиб кетади. 712 йилда араблар Ҳинд дарёсининг ғарбий соҳилларини босиб оладилар. Лекин уларнинг шарққа ҳужумини ражпутлар тўхтатиб қўядилар. Ражпутлар Санскритча ража - подшо, путана - ўғли, аслзодалар авлоди деб ҳисобланадиган. Улар хунн-эфталитларнинг авлодлари деб тахмин қилинади. VIII асрда ражпутана, Мальва, Гужоратда қудратли ражпутлар давлати вужудга келади. Протихар сулоласидан бўлган Нагобхата Жамна ва Ганг ҳавзаларини ҳам босиб олади. Ражпутларнинг асосий рақиблари Бенгалияда ташкил топган Палхор давлати бўлиб қолади. VII аср ўрталарида Гопал асос солганлар бу давлат ҳудудига подшо Дхармапал (770- 810йй) даврида ҳозирги Деҳли атрофидан Ассамгача бўлган ерлар кирган. Палхор ва Ражпутлар ўртасида тинимсиз урушлар бўлиб турган. 1001 йилдан бошлаб, 30 йилдан ортиқроқ Маҳмуд Ғазнавий Ҳиндистонга 17 марта юриш қилади. Канауж, Катхиавар, Гандхар, Анхилвар, Сомнатх каби ҳудудларни вайрон қилиб бойликларни талайди. Натижада Пратихорларнинг Ражпут давлати парчаланиб кетади. Ражпуд ёзувчиси Чанд Бордон (Х II аср) ўзининг “Притхивиража-расо” поэмасида шимолий Ҳиндистондаги 36 Ражпут князини санаб ўтади. Полхор давлати эса, 1025 йил Деканга қилган юришда Чола давлатидан мағлуб бўлиб, парчаланиб кетади. Декан ясси тоғлигида VIII асрда бир неча ўнлаб давлатчалар мавжуд эди. III асрда пайдо бўлган Паллавлар давлати VII асрда Канжпурни пойтахт қилиб катта сиёсий қудратга эришади. Араб денгизи томон ўз ҳудудини кенгайтиришга уриниш натижасида Чалукь давлати билан тўқнашувга олиб келади. Чалукь ҳукмдори Пуллокешин II Телуж халқини бўйсундириб, уни бошқаришни укасига беради. Шу тариқа Венж ёки шарқий Чалукь давлати пайдо бўлади. VII аср

ўрталарида раштракут сулоласи Чалукь сулоласини тахтдан ағдаради. Лекин 973 йил Чалукь сулоласидан бўлган Тайлап яна ўз сулоласини тиклайди. VIII асрда Паллавлар ҳам Пандилар давлати билан курашда ҳолдан тояди. Вазиятдан Чола давлати фойдаланиб, қарийб бутун Деканни бирлаштиради. Айниқса Ражендр (1014-1044 йй.) даврида Венги давлати Бенгалия ҳам тор-мор келтиради. Шимолий Ҳиндистоннинг Х I асрдаги йирик давлатларидан бири ражпутларнинг Гахадавал давлати эди. Чанделла давлати ҳозирги Бунделиханда ҳукмронлик қилган. Х II асрда шимолий Ҳиндистонда гегемонлик учун кураш олиб борардилар. Х II аср 80 йилларида Притхви- ража, Чаухан Чанделл давлатига зарба бериб, Канауж князи Жаячанде Гахадавал билан кураш бошлайди. Кучсизланган князликлар шимолий ғарбдан Ғурларбошчилигидаги Шаҳобиддин Муҳаммад Ғурий бошчилигида бостириб кириб, Панжоб, Ганг- Жамна ҳавзасини талайдилар (1175 й.). Притхви-ража мағлубиятга учрайди. Шаҳобиддин Ғазнага қайтиб кетишдан олдин Ҳиндистонга Қутбиддин Ойбекни ҳоким қилиб кетади. Қутбиддин Ойбек 1193 йил Деҳлини босиб олиб, ўз давлати пойтахтига айлантиради. 90 йилларда Бихар ва Бенгалия босиб олинади. Шаҳобиддин вафотидан кейин Қутбиддин Ойбек (1206 й.) мустақил Деҳли султонлигини тузади. 1222 йили Панжобда мўғуллар ҳужуми бўлиб, улар Хоразмшоҳ Жалолиддинни таъқиб этиб бу ҳудудларни вайрон қиладилар. 1241 йилда эса, мўғуллар ҳужуми яна такрорланади. Деҳли султонлигида иқто тартиблари кенг тарқалади. Шамсиддин Элтутмиш (1211-1236 йй.) даврида биргина Деҳли атрофи 2 минг иқтидорга бўлиб берилади. Заминдорлар ер солиғини олдиндан тўлаб қишлоқ деҳқонларидан бир неча баробар қилиб қайтариб олар эдилар. Деҳқонларни шафқатсиз эзилиши қўзғолонлар келиб чиқиши ва деҳқонларнинг ўрмонларга қочиб кетиши билан характерланади. Айниқса, Деҳли атрофидаги меваттийлар ҳаракати хавфли тус олади. Деҳли атрофидаги ўрмонларни йўқотиш учун қилинган ҳаракат натижа бермагач, меваттийлар бошлиқларига иқто бериб, ҳаракатини сусайтиришга эришилади. Деҳли султонлигида шаҳарлар ҳам равнақ топади. Деҳли ҳақида Х IV аср муаррихларидан бири: “шаҳар тош ва ғиштлардан

қурилган... Шаҳар атрофини 12 минг қадамли боғлар ўраб олган. Шаҳарда 70 та Дор уш-шифо мавжуд. 2 минг масжид ва ибодатхоналар бор. Шаҳар 5 метрли девор билан ўралган бўлиб, 28 дарвозаси бор”-деб хабар беради. Бундан ташқари Камбей, Калькута ва бошқа шаҳарлар ҳам ўз даврининг йирик иқтисодий марказлари эди. Иқто тартибларининг кенг тарқалиши марказий ҳокимиятни кучсизлантирди, натижада, 236-1246 йилларда сарой тўнтаришлари натижасида 4 та ҳукмдор алмашинишига олиб келади. Болбан (1266-1286 йй.) даврида эса, Ражпутларни сарой ва қўшин хизматига олиш кучайиб боради. Янги Султон Алоуддин 1296 йилда сепаратик гуруҳларга қарши курашади ва мўғуллар ҳужумига чек қўйиб, 1308 йили Деканга қўшин тортади. Унинг қўшини Кавери дарёси ҳудудигача истило қилиб боради. Муҳаммад Туғлуқ даврида (1325-1351 йй.) хазина бўшаб қолиши натижасида пул ислоҳоти ўтказилади. Мис тангаларни кумуш танга қийматида ишлатишни талаб қилади. Мамлакатнинг иқтисодий-ижтимоий аҳволи янада ёмонлашиб бориши билан шоҳ бу ислоҳотни бекор қилади. Ферузшоҳ (1351- 1388 йй.) даврида армияга қилинадиган харажатлар қисқартирилиб, Жамна ва Сатлеж оралиғидаги ерларга каналлар орқали сувга чиқарилиб ўзлаштирилади. 1398 йилда Амир Темур юришларидан сўнг, Деҳли султонлиги кучсизланиб парчаланиб кетади. Х I асрда жанубий Ҳиндистоннинг энг қудратли давлати бу Вижаянагар давлати эди. Николо Конти маълумотича подшо Деварай II (1421-1448 йй.) даврида Вижаянагар жанубий Ҳиндистонда гегемон давлат эди. Николо Контидан 40 йиллар чамаси кейин Ҳиндистонга келган Афанасий Никитин ҳам бу фикрни тасдиқлайди. Лекин Х VI аср бошларидан Бахман давлати кучайиб, Вижаянагарга таҳдид сола бошлайди. Бу даврда Ҳинд князликларининг бир- бири билан курашда Португаллар ўз манфаатлари йўлида ёрдам бера бошлайдилар. 1547 йил португаллар Вижаянагарга Бахман давлатига қарши ёрдам беришлари учун Ҳиндистонга от ва қурол келтиришни монополия қилиб оладилар. 1565 йил Аҳмаднагар, Бижапур, Бидар, Голконда князликлари Вижаянагарга қарши курашиб, уни вайрон қиладилар. Вижаянагор кичик князликларга (Майсур, Мадура, Иккери, Танжур) бўлиниб кетади. Бўлиниб кетган Ҳиндистонга 1526 йил

Бобур бостириб кириб, ягона марказлашган давлатга асос солади. Унинг ўғли Ҳумоюн 1542 йил Шершоҳдан енгилиб, Эронга қочишга мажбур бўлади. 1545- 1555 йллар давомида Ҳумоюн Ҳиндистонни эгаллаш учун кураш олиб боради. 1556 йил тахтга ўтирган Акбаршоҳ даврида Бобурийлар давлати қариб бутун Ҳиндистон ҳудудини эгаллайди. Акбарнинг ўғли Жаҳонгир (1605-1627 йй.) ва набираси Шоҳжаҳон (1627-1658 йй) даврида ҳам истилочилик юришлари давом эттирилди. Шоҳжаҳон 1632-1635 йиллар давомида Португалларга қарши кураш олиб боради. Ганг дарёси қуйи ҳавзасидаги Хуглу портини Португаллардан тортиб олади. Шу даврда инглизларнинг Ост-Индия компаниясининг Ҳиндистонга кириб келиши бошланади. Бобурийлар давлати Х VI -Х VII асрларда маданий жиҳатдан энг юқори даражага кўтарилди. Турли туман шоирлар, ёзувчиларга Бобурийлар ҳомийлик қилдилар. Шоҳжаҳон қурдирган Тожмаҳал дунёнинг архитектура мўъжизаларидан бири бўлиб ҳисобланади. Акбарнинг диний бағрикенглик сиёсати натижасида мусулмон, ҳинд, бхакти, христиан, ских диний оқимлари биргаликда ривожланиб борди. Форс, турк, афғон, санскрит тиллари қўшилиб урду тили шаклланди. Х VIII асрдан бошлаб Бобурийлар давлати инқирозга юз тута бошлади.

Хулоса Жаҳон цивилизациялари ва уларнинг тарихига бағишланган кичкинагина усулий ишланмани яратишимиз бу борадаги тугалланган иш деб бўлмайди. Бу борадаги дебоча ишлардан холос деб ҳисоблаймиз. Шунинг учун ундаги айрим камчиликлар учун муҳтарам ўқувчидан узр сўраймиз. Кўриб чиқилган мавзулар инсоният цивилизациясининг энг қадимги даврларидан янги замон давригача бўлиб, ҳозирги замон цивилизацион жараёнлари хусусида тўхталиб ўтирмадик. Биз бу мавзуни алоҳида ўрганиш зарур ва албатта уни ўрганишда кўпгина воқейликларга танқидий баҳо бериш зарур деб ҳисоблаймиз. Бу борада ғарбдан турли - туман оқим ва “маданият” ларнинг кириб келиши ва уларнинг салбий жиҳатларига алоҳида урғу берилишини истаймиз. Жаҳон цивилизациялари тарихи, уларнинг вужудга келиши, ривожланиши ва инқирози масалаларини бизнинг фикримизча, муҳим ижтимоий - сиёсий аҳамиятга эга бўлган муамо деб қараш ва уни кенг миқиёсда, дунёнинг барча мамлакатлари ва халқлари ҳаётига дахлдор масала сифатида ўрганиш, таҳлил қилиш ва баҳолаш мақсадга мувофиқдир. Ушбу ишланма ана шундай саволларнинг айримларига жавоб беради деб ҳисоблаймиз.

Адабиётлар : 1. Каримов И.А. Тарихий хотирасиз келажак йўқ. Т., 1998. 2. 2017-2021 йилларда Ўзбекистон Республикасини ривожлантиришнинг бешта устивор йўналишлари бўйича ҳаракатлар стратегияси. 2017 йил 7-Февраль. ПФ 4947-сонли фармон. //Халқ сўзи, 28-сон, 2017 йил, 8 февраль. 3. Мирзиёев Ш.М. Таныидий таҳлил, қатъий тартиб-интизом ва шахсий жавобгарлик-ҳар бир раҳбар фаолиятининг кундалик қоидаси бўлиши керак. - Т.: Ўзбекистон, 2017. - 104 б. 4. Эшов Б. Цивилизация тизимида илк шаҳарлар. Тошкент, 2005. 5. Островский А.В. История цивилизаций. Санкт-Петербург. 2000 6. Яковец Ю.В. История цивилизаций. М., 1997. 7. “Древние цивилизации”. Под общей редакцией Бангарда-Левина Г. М. М., 1989. 8. “Древнеиндийская философия. Начальный период” М., 1963. 9. “Мифология древнего мира”. М., 1977. 10. Крамер С. “История начинается в Шумере”. М., 1991. 11. Ғуломов Х.Ғ., Татибоев А.С. “Ўрта Осиё ва жахон тарихи”. Т., 1993.

O'xshashlar

Ислом цивилизацияси

Рим цивилизацияси

Хитой цивилизацияси

Япон цивилизацияси

Қадимги Юнонистон цивилизацияси