Poliz ekinlari urug’chiligi - Qishloq va o'rmon xo'jaligi - Referatlar

Poliz ekinlari urug’chiligi

Yuklangan vaqt:

20.09.2019

Ko'chirishlar soni:

0

Hajmi:

55.5 KB

Ko'chirib olish

Poliz ekinlari urug’chiligi Reja: 1. Urug’larning biologik va mexanik ifloslanishi, buning oldini olish choralari. 2. Yetishtirish sharoitlari va agrotexnik tadbirlarining urug’ sifatiga ta’siri. 3. Urug’lik mevalarni yig’ish muddatlari va usullari. 4. Poliz mevalarini yetiltirish, urug’ini ajratish. 5. Olingan urug’larga ishlov berish va saqlash.

1. Urug’chilikning eng muhim vazifasi - navni toza holda saqlab borishdir. Shu sababli, urug’ olish uchun mo’ljallangan urug’larni saqlash, urug’lik ekinlarini joylashtirish, ularni parvarishlab, yetishtirish texnologiyasi navning mexanik va biologik ifloslanishiga yo’l quymaydigan bo’lishi kerak. Biologik ifloslanishning oldini olish uchun har bir urug’chilik xo’jaligida poliz ekinining faqat bitta navini o’stirib borish o’rinlidir. Bitta ekinning ikkita yoki uchta navi o’stirib borilganida quyidagicha fazoviy izolyatsiyaga amal qilish zarur: bitta poliz ekinining urug’likka ekilgan navlari orasida ochiq yerda kamida 1000 m, usti yopiq yerlarda kamida 500 m; xo’raki tarvuz bilan xashaki tarvuz navlari orasida - tegishlicha 2000 va 1000 m. Qovoqning odatdagi sharoitlarda bir-biri bilan chatishmaydigan har xil botanik turlari orasida fazoviy izolyatsiya ochiq yerlarda 50 m, usti yopiq yerlarda 20 m qilib belgilangan. Qovun navlari biologik ifloslanishining oldini olish uchun urug’lik ekinlar orasida yoki yaqin atrofdagi boshqa ekin uchastkalarida dalada o’sib chiqqan begona qovun o’simliklari o’sib borishiga yo’l qo’yib bo’lmaydi. Bunday o’simliklarni gullashidan oldin yo’q qilib tashlash zarur. Urug’lik ekinlarda yetishtirilayotgan navning yuqori darajada toza bo’lishini ta’minlash uchun vegetatsiya davri davomida 3-4 marta nav tozalash ishlarini o’tkazish kerak. Ekinlar 1-2 ta chinbarg chiqargan mahalda o’tkaziladigan birinchi tozalash paytida sust rivojlanayotgan va kasal tekkan o’simliklar olib tashlanadi. Ikkinchi tozalash ishini o’simliklarning gullashi oldidan o’tkaziladi, bunda nimjon va kasal o’simliklar, shuningdek, aralashib qolgan boshqa navdagi o’simliklar olib tashlanadi, aralashib qolgan bunday o’simliklar nav uchun xarakterli bo’lmagan belgilariga: tupining gabitusi, barglari va shonalarining o’lchamlari va shakli hamda boshqa belgilariga qarab ajratib olinadi. Uchinchi tozalash ishi tugunchalar hosil bo’lgan mahalda o’tkazilsa, to’rtinchisi-mevalarni yig’ishtirib olish oldidan o’tkaziladi. Bunda kasal hamda tugunchalari va mevalari nav uchun xarakterli bo’lmagan o’simliklar yulib tashlanadi. Navli ekinlar hosilining urug’likka nechog’lik yaroqliligini dalaning o’zida tekshirib ko’rish, ya’ni dala aprobatsiyasi yo’li bilan baholanadi, bu ish nav

tozalash yumushlari o’tkazilganidan keyin mevalar fiziologik jihatdan yetilgan mahalda olib boriladi. 2. Bir ekin ekib olinganidan keyin o’sha joyning o’ziga yana shu ekinni urug’likka ekishga yo’l qo’yilmaydi, chunki bunda o’simliklarning kasallanishi zo’rayib, hosili kamayib ketishidan tashqari nav biologik jihatdan ifloslanishi mumkin, sababi shuki, oldingi yilda qolib ketgan mevalarning urug’lari unib chiqib, ekinga aralashib qolishi mumkin. Poliz ekinlari urug’chiligida dastlabki urug’ materialining sifatiga katta ahamiyat beriladi. Elita ekinlari uchun faqat 1-nav toifasiga mansub urug’lardan, urug’chilik xo’jaliklaridagi navli ekinlar uchun esa, kamida 2-toifaga mansub urug’lardan foydalaniladi. Urug’likka ekilgan poliz ekinlarini parvarish qilishda o’g’itlardan to’g’ri foydalanish alohida ahamiyatga ega. Oziqa sifatida ekiladigan ekinlarga fosforli va kaliyli o’g’itlarning tavsiya etiladigan dozalari urug’chilik xo’jaliklarida oshirilishi kerak. Azot dozasini o’zgartirmasdan fosfor dozasini tavsiya etiladigan miqdorga qaraganda ikki baravar (240 kg/ga gacha yetkazib) va kaliy dozasini bir yarim baravar (100 kg/ga gacha) ko’paytirib, azot, fosfor va kaliy 1: 2: 0,75 nisbatda ishlatilganida urug’larning hosildorligi 30 % ga oshib, ekinboplik va hosil berish sifatlari yaxshilanadi. Urug’likka ekilgan ekinlarga organik o’g’itlarni ishlatish alohida ahamiyatga ega. To’la-to’kis taxt qilib qo’yilgan mineral o’g’itlarga 20 t/ga hisobidan go’ng qo’shish poliz ekinlarining urug’ mahsuldorligini 13-14 % ga oshiradi. Urug’likka ekilgan o’simliklarning oziqlanish maydoni oziqaga ishlatiladigan ekinlarning oziqlanish maydonidan kam bo’lmasligi kerak. Qovun bilan qovoq uchun o’simliklar qator orasidagi masofa 90 sm ni tashkil etishi lozim. O’simliklarning urug’ mahsuldorligini oshirish va urug’larning ekinboplik hamda hosil berish sifatlarini yaxshilash uchun o’simliklar qulay ekologik sharoitlarda parvarish qilib boriladi. 3. Qovoq mevalari, kechpishar qovun va tarvuz mevalari hosilining asosiy qismi yetilgan mahalda, tezpishar tarvuz va ko’pgina nav qovun mevalari esa

yetilgan sayin, bir necha marta uziladi. Mevalarni uzish muddatlari ularning yetilganini ko’rsatadigan tashqi belgilariga qarab aniqlanadi. Urug’lik uchun: tezpishar qovun navlarida birinchi va ikkinchi yig’imda uzilgan mevalar o’rtapishar qovun va ertagi hamda o’rtapishar tarvuz navlarida - ikkinchi va uchinchi yig’imda uzilgan mevalar olinadi. O’zbekistonning quruq va issiq iqlim sharoitlarida poliz ekinlarining urug’lik mevalarini uzish muddatlarini ularning yetilganini tashqi alomatlariga ko’ra, namligiga qarab belgilash kerak. Oziqaga ishlatiladigan poliz ekinlari mevalarini yig’ishtirishda qanday mexanizatsiya vositalari ishlatiladigan bo’lsa, urug’lik mevalarini yig’ishtirib olishda ham o’sha vositalarning o’zi qo’llaniladi. Tezpishar va o’rtapishar qovun va tarvuz mevalari har xil aravachalar, platformalar, o’ziyurar shassilar va bortlari ko’tarilmagan traktor pritseplari, O’zbekiston qishloq xo’jaligini mexanizatsiyalash va elektrlashtirish instituti yaratgan tarvuz uzuvchi mashina yordamida yetilgan sayin peshma-pesh, bir necha marta uzib olinadi. Kechpishar qovun va tarvuz, shuningdek, qovoqning hamma navlarini sug’orish tarmog’i va sug’orish egatlari tekislab chiqilganidan keyin bir yo’la yig’ishtirib olish mumkin. Bu ish ikki bosqichda o’tkaziladi: avval poliz ekinlari mevalarini teruvchi UPV-8 markali moslama yordamida mevalar uzilib, uyum qilib yig’iladi, keyin mevalarni uyumlardan olib, transport vositalariga yoki urug’ ajratuvchi mashinalarga solinadi. 4. Poliz ekinlarining urug’lari o’simliklardan uzib olingan, ammo hali raso yetilmagan mevalarning o’zida obdon yetilib olish xususiyatiga ega. Qovun bilan tarvuzning hatto yigirma kunlik mevalari va qovoqning qirq kunlik mevalari ham 30 kun davomida qo’shimcha ravishda yetiltirib qo’yiladigan bo’lsa, urug’lari 90- 95 % unuvchan bo’lib qoladi. Mevalar nechog’lik yosh bo’lsa, qo’shimcha ravishda shuncha uzoq muddat yetiltirib qo’yishga muhtoj bo’ladi. Qovun bilan tarvuzda yigirma kunlik mevalari 30 kun, o’ttiz kunlik mevalari -20 kun, qirq kunlik mevalari -10 kun davomida qo’shimcha yetiltirib qo’yilganida natijasi hammadan yaxshi bo’lib chiqadi. O’zbekistonning sug’oriladigan dehqonchilik

sharoitlarida urug’lik mevalarni barvaqt yig’ishtirib olib, keyin qo’shimcha ravishda yetiltirib olish maydonlarini oraliq ekinlar uchun ertaroq bo’shatish va tuproqni sifatli qilib tayyorlab olishga imkon beradi. Yalpi urug’chilikda qovun bilan tarvuzning urug’lik mevalarini 40-50 kun bo’lgan mahalda uzib olib, 10 kun davomida qo’shimcha ravishda yetiltirib qo’yish, qovoqni esa, mevalari 70-80 kunlik bo’lganida uzib, keyin 10-20 kun qo’shimcha yetiltirish hammadan ma’qul. Qo’shimcha yetiltirib olish uchun mevalar usti pana joyga yoki poxol solingan maxsus maydonchalarga bir qavat qi- lib terib qo’yiladi. Qovun urug’lari mevalardan qo’l bilan ajratib olinadi. Mevalarni kesib, qoq ikkiga bo’linadi yoki yon tomonidan uchburchak teshik ochiladi. Urug’larni meva ichidan platsentalari bilan birga metall qoshiqlar bilan ajratib olinadi. Kichikroq partiyadagi tarvuz urug’lari qo’lda ajratiladi, bunda mevalarni qoq ikki pallaga bo’lib, pallalari bochka ustiga o’rnatilgan qovurg’ali g’o’la ustidan yurgiziladi. Po’stidan ajratilgan tarvuz eti urug’lari bilan birga ko’zlarining diametri 3-4 mm keladigan g’alvirdan o’tkaziladi. Katta partiyadagi tarvuz urug’lari poliz ekinlari mevalarini to’g’raydigan IBK-5A markali moslama yoki SOM-2A markali urug’ ajratuvchi mashina yordamida ajratib olinadi. Bu mashinalar mevalarni to’g’rab, to’g’ralgan massasini turp, meva suvi va urug’larga ajratadi. Qovun va tarvuz urug’lari mevalardan ajratib olinganidan keyin katta yoki yoki kichikroq bochkalarda o’z suvi bilan bijg’itib qo’yiladi. Bijg’itish 20 0 S haroratda - 4 kun, 30 0 S haroratda - 2 kun davom etadi. Bijg’ish bo’lganidan keyin urug’lar qo’lda yoki MOS-300 markali mashinada yuvib olinadi. Kichikroq partiyadagi qovoq urug’lari mevalardan qulda ajratib olinsa (mevalar qoq ikkiga bo’linib, urug’lari qoshiq bilan urug’ kamerasidan chiqarib olinadi), katta partiyalardagi qovoq mevalarining urug’lari IBK-5A markali mashina yordamida ajratib olinadi. Ajratib olingan qovoq urug’lari tezgina yuvilib, quritiladi. 5. O’zbekistonda poliz ekinlarining urug’larini oftobga yoyib qo’yib, havoda quritish ko’proq rasm bo’lgan. Bunda urug’lar rangli metall to’r tutilgan yoki ustiga siyrak qop matasi, brezent tortilgan g’alvirlarga 10-15 sm qalinlikda yoyib

to’kiladi va vaqti-vaqti bilan aralashtirib turiladi. Qovun va qovoq urug’lari namligi-13 % ga, tarvuz urug’lari esa 14 % ga kelguncha quritiladi. Bularni 7-8 % gacha uzil-kesil quritish ishlari issiq havo berib turadigan quritgichlarda o’tkaziladi. Qovun va boshqa poliz ekinlarining urug’lari o’z unuvchanligini 6-7 yil va bundan ko’ra uzoqroq vaqt mobaynida saqlab tura oladi. Biroq, yuqori ekin-boplik sifatlarini qovun urug’lari 18 oy saqlaydi, lekin bir yil saqlab qo’yilgan urug’lar hammadan ko’p hosil beradi va bunda mevalarning sifati ham yuqori bo’lib chiqadi. Urug’larning saqlanish muddati uzaygan sayin tarkibidagi oqsil kamayib, nam yutish sur’atlari susayadi, bo’rtish davri cho’ziladi, urug’larning ekinboplik sifatlari yomonlashadi. Urug’lar 5-6 yil saqlab quyiladigan bo’lsa, to’la qimmatli hosil bera olmaydi. Urug’larning nechog’lik uzoq saqlana olishi ularning namligi va qanday sharoitlarda turganiga bog’liq. Saqlashga qo’yilgan qovun va boshqa poliz ekinlarining urug’larida namlik 7% va bundan ko’ra kamroq, ombor havosining nisbiy namligi 30-40 % va harorati 0 dan -2 0 S gacha bo’lishi kerak. Haroratning yuqori bo’lishi urug’larga yuqori havo namligidan ko’ra kamroq salbiy ta’sir o’tkazadi, chunki havo namligi yuqori bo’lganida urug’larning namligi ham ortib boradi. Chunonchi, havo nisbiy namligi 40% dan 80 % ga qadar ortganida urug’larning namligi 6,2-7,3 % dan 12,4-15,2 % gacha ortadi. Bu esa nafas olish va gidrofil jarayonlarning kuchayishiga olib keladi, natijada urug’larning hayotchanligi pasayadi. Shuning uchun urug’larni polietilen sirilgan qopchalarda va havo kirmaydigan germetik idishlarda saqlash yaxshi natijalar beradi. Og’zi mahkam yopiladigan shisha idishlarda poliz ekinlarining urug’lari unuvchanligini 18-20 yil davomida yuqori darajada saqlab turadi.

Adabiyotlar : 1. X . Ch . Bo ’ riev , O . A . Ashurmetov « Poliz ekinlari biologiyasi va yetishtirish texnologiyasi », T .: « Mehnat » 2000. 2. V.F.Belik «Baxchevodstvo» M.: «Kolos» 1982. 3. X.Ch.Buriev «Spravochnaya kniga baxchevoda» M.: «Kolos» 1984. 4. X.Ch.Buriev «Biologiya razvitiya i semennaya produktivnost tikvenn ы x kultur», T.: «Mehnat» 1992. 5. X.Ch.Bo’riev, V.I.Zuev, A.A.Umarov «Polizchilikdan amaliy mashg’ulotlar» T.: «Mehnat» 1997. 6. H.Ch.Bo’riev «Sabzavot ekinlari seleksiyasi va urug’chiligi», T.: «Mehnat» 1999. 7. Q.Qo’chqorov va boshq. «O’zbekistonda sabzavot, poliz ekinlari urug’chiligi», T.: «O’zbekiston» 1985. 8. «O’zbekiston xududida ekishga tavsiya etilgan qishloq xo’jalik ekinlari» Davlat reestri. T.: 2000. 9. M.N.Kulakova «Vozdelivanie kabachkov, patissonov i tikv v Uzbekistane», T.: «Fan» 1981. 10. Sabzavotchilik, polizchilik va kartoshkachilik spravochnigi. T.: «Mehnat» 1987. 11. Vaqtli nashrlardan: «O’zbekiston qishloq xo’jaligi», «Kartofel i ovo sh i» jurnallari, «Ovo sh i i baxchev i e kultur i » referativ jurnali.

O'xshashlar

Poliz ekinlari kasalliklari va ularga qarshi kurash choralari

Ipak qurti seleksiyasi va urug’chiligi

Lalmikor polizchilik xususiyatlari

Poliz mevalarini yig’ish, tashish va saqlash

Kirish. Poliz ekinlarining ahamiyati va tarqalishi. Polizchilik turlari va makonlari