Bolalar psixologiyasining umumiy masalalari - Maktabgacha va boshlang'ich ta'lim - Referatlar

Bolalar psixologiyasining umumiy masalalari

Yuklangan vaqt:

20.09.2019

Ko'chirishlar soni:

0

Hajmi:

22.9755859375 KB

Ko'chirib olish

Bolalar psixologiyasining umumiy masalalari Reja: 1. Bolalar psixologiyasi fanining predmeti, maqsadi, vazifalari 2. Bolalar psixologiyasi fanining boshqa fanlar bilan aloqasi. 3. Bolalar psixologiyasi fanining metodlari.

Bolalar psixologiyasi fanining predmeti, maqsadi, vazifalari “Psixologiya” ikkita yunoncha so‘zdan “psyche”- jon, ruh va “logos”ta’limot, ilm so‘zlaridan iborat bo‘lib, an’anaviy ma’noda inson ruhiy dunyosiga aloqador barcha hodisalar va jarayonlar uning predmetini tashkil etadi. Boshqacha qilib aytganda, psixologiyaning predmeti har birimizning tashqi olamni va o‘z-o‘zimizni bilishimizning asosida yotgan jarayonlar, hodisalar, holatlar va shakllangan xislatlarni tashkil etadi. Psixologiya bo‘yicha adabiyotlarda uning predmetini qisqacha qilib, psixikadir , deb ta’rif berishadi. Psixika – bu inson ruhiyatining shunday holatiki, u tashqi olamni, ichki ruhiy olamni ham ongli tarzda aks ettirishimizni, ya’ni bilishimiz, anglashimizni ta’minlaydi. Psixikaning jarayonlari quyidagicha: 1. Bilish faoliyati: diqqat, nutq, faoliyat 2. Bilish jarayonlari: sezgi, idrok, xotira, xayol, tafakkur 3. Shaxsning hissiy-irodaviy sohasi: hissiyot, iroda 4. Shaxsning individual-psixologik xususiyatlari: temperament, xarakter, qobiliyat Psixologiya – juda qadimiy va shu bilan birga navqiron fandir. Psixik hodisalarning ilk talqini qadimiy yunon olimi Aristotel (eramizdan avvalgi 384- 322 yillar)ning “Ruh haqida” nomli asarida berilgan. Psixik hodisalar va ularning qonuniyatlariga taalluqli ilmiy tadqiqot ishlari XIX asrning ikkinchi yarmida, ilmiy psixologiya asoslari esa XIX va XX asrlar o‘rtasida yuzaga kelgan. Hozirgi kunda psixologiyaning 300 dan ortiq tarmog‘i fan sifatida rivojlanib kelmoqda. Shulardan yosh davrlari psixologiyasi, bolalar psixologiyasi, maxsus psixologiya, pedagogik psixologiya, tibbiyot psixologiyasi, yuridik psixologiya, sport psixologiyasi, aviatsiya psixologiyasi, ijtimoiy psixologiya, shaxs psixologiyasi, boshqaruv psixologiyasi va boshqalar shular jumlasidandir. Barkamol shaxsni tarbiyalashda, bolani dunyoga kelganidan boshlab to voyaga yetguniga qadar bo‘lgan davrdagi psixologik xususiyatlarini bilish tarbiyachilar, pedagoglar, ota-onalar uchun muhim ahamiyatga ega. Bolaning

psixik taraqqiyoti haqidagi bilimlarni esa psixologik bilimlarning maxsus sohasi – Bolalar psixologiyasi fani o‘rganadi. Bolalar psixologiyasi – psixologiya fanining alohida tarmog‘i bo‘lib, bolaning tug‘ilganidan to yetuklik davrida psixik taraqqiyotini, turli yosh davrlaridagi bola psixik taraqqiyotining qonuniyatlarini, rivojlanishining turli bosqichlarida bola psixikasiga xos xususiyatlarini o‘rganadi. Bolalar psixologiyasi fanining asosiy e’tibori tug‘ilganidan yetuklik davrigacha inson psixikasi va ongining qanday rivojlanishiga qaratilgan, ya’ni har bir shaxs uzoq bolalik davrini boshdan kechiradiki, bu davrda unda alohida psixik jarayonlar va xususiyatlar yuz beradi. Shuning uchun ham bu davrni fanda alohida ajratib o‘rganiladi va uni ontogenetik taraqqiyot yo‘li deyiladi. Ontogenez – bu organizmning individual rivojlanishidir. Bolalar psixologiyasi bola psixikasining taraqqiyoti hamda shaxsiy xususiyatlarining yuzaga kelishiga ta’sir qiluvchi omillarni ham o‘rganadi. Bugungi kunda bolalar psixologiyasi fanining oldida bir qancha muhim nazariy va amaliy vazifalari turadi, uning nazariy vazifalariga quyidagilar kiradi: 1. Turli yoshdagi bolalarga xos bo‘lgan psixologik xususiyatlarni, ya’ni bolalarning idrokiga, sezgi-tuyg‘ulariga, diqqatiga va xotirasiga, nutqi va tafakkuriga, xayoliga, irodasiga xos xususiyatlarni o‘rganish; 2. Bolaning psixik taraqqiyotiga faol ta’sir qiluvchi omillarni aniqlab berish; 3. Turli yoshdagi bolalarning rivojlanishiga xos bo‘lgan qonuniyatlarni o‘rganish; 4. Bola shaxsi va shaxsiga xos bo‘lgan psixologik xususiyatlarni o‘rganish; 5. Bolani maktab ta’limiga tayyorlash; 6. Maktabda muvaffaqiyatli o‘qish uchun bolaning aqliy jarayonlarini faollashtirish; 7. Ta’lim jarayonida bolaning mustaqil, ijodiy, faol tafakkurini shakllantirish; 8. Ta’lim-tarbiya jarayonida bolaning maxsus qobiliyatlarini shakllantirish; 9. Ta’lim-tarbiya ishlarining psixologik mazmunini ochib berishdan iboratdir. Uning amaliy vazifalariga turli yoshdagi bolalarning psixik taraqqiyoti xususiyatlariga doir bilimlarni tarbiyachilar, o‘qituvchilar, ota-onalar ya’ni

jamoatchilar o‘rtasida keng yoyishdan iborat. Bolalar психологиясининг амалий vazifasi – bola ruhiy taraqqiyotiga, yoshlik xususiyatlari orasidagi farqlar va ularga individual munosabatda bo‘lish yo‘llariga oid, ruhiy taraqqiyot qonunlariga doir psixologik bilimlardan bahramand bo‘lishlarini ta’minlashdan iborat. Bunday vazifalarni amalga oshirish komil insonni shakllantirishda muhim rol o‘ynaydi. Bolalar psixologiyasi fanining boshqa fanlar bilan aloqasi. Bolalar psixologiyasi predmetining muhim tomonlaridan biri - turli yoshdagi bolalarda sezgi, idrok, diqqat, xotira, nutq, tafakkur, hissiyot, xayol va iroda kabi psixik jarayonlarining namoyon bo‘lishi, taraqqiy etishi hamda takomillashuvining qonuniyatlarini o‘rganishdan iboratdir. Bolalar psixologiyasi bola shaxsiy psixologik xususiyatlarini qanday tarkib toptirishni chuqur tahlil qiladi. Bunda bolalar psixologiyasini bolalar shaxsining tarkib topishiga faol ta’sir etuvchi omillar qiziqtiradi. Ma’lumki, bola shaxsi va uning psixologik xususiyatlari qandaydir tasodifiy omillarning tartibsiz ta’sir etishi natijasida emas, balki muayyan aniq omilning qonuniy ta’sir etishida tarkib toptiradi. Ana shu muhim qonuniy tarzda ta’sir qiladigan omillarni ochish va isbotlash bilan bolalar psixologiyasi shug‘ullanadi. Bolalar psixologiyasi o‘zining murakkab predmetini o‘rganishda falsafaga tayanadi. Ma’lumki, tabiat va jamiyatdagi narsa hamda hodisalar taraqqiyotining eng umumiy qonuniyatlarini o‘rganadi, hamda inson ongining ijtimoiy hayotga bog‘liqligini isbotlab beradi. Tabiat va jamiyat taraqqiyotining umumiy qonuniyatlaridan xabardor bo‘lish bolalar psixologiyasiga bolalar psixik taraqqiyotini o‘rganishda va «tabiiy zot» bo‘lib tug‘ilgan bolaning inson ijtimoiy tajribasini egallab, shaxs bo‘lib yetishini o‘rganish to‘g‘ri yo‘l topishga yordam beradi. Bolalar psixologiyasi o‘z predmetini o‘rganishda umumiy psixologiyaning inson psixikasi xaqida qo‘lga kiritilgan yutuqlariga asoslanadi. Masalan, umumiy psixologiyaning psixik jarayonlar, psixologik xolatlar, inson shaxsi va uning faoliyati xaqidagi ta’limotlardan to‘g‘ridan-to‘g‘ri foydalanadi. O‘z navbatida, umumiy psixik holat ham bolalar psixologiyasining yutuqlariga asoslanadi.

Bolalar psixologiyasi anatomiya va fiziologiya fanlari tomonidan qo‘lga kiritilgan yutuqlardan ham keng foydalanadi. Bunda bolalar psixologiyasi, xususan bolalar nerv sistemasi va oliy nerv faoliyatining ma’lumotlaridan foydalanadi. Bolalar nerv sistemasining normal taraqqiyoti va normal ishlashi bola psixikasi rivojlanishining muhim shartlaridandir. Shuning uchun psixolog mutaxassislar bola nerv sistemasining taraqqiyoti masalalari bilan bevosita tanish bo‘lishlari lozim. Bolalar psixologiyasi pedagogika fani bilan xam yaqin alokadadir. Pedagogika fani yoshlarga ta’lim-tarbiya berish va ularni har tomonlama barkamol tarzda rivojlantirish haqidagi fandir. Bolalar psixologiyasi ta’lim-tarbiyaning maqsadi, yo‘l-yo‘riqlari va vazifalariga doir fikrlarni pedagogika fanidan oladi, hamda unga yaqindan yordam beradi. Bolaning aqliy taraqqiyoti qonunlaridan xabardor bo‘lish turli yoshdagi bolalar bilan ta’lim-tarbiya ishlarini to‘g‘ri tashkil qilish imkoniyatini beradi. Bolalar psixologiyasi bolalar gigiyenasi, bolalardagi kasalliklarni o‘rganuvchi pediatriya bilan ham bog‘liqdir. Bu fan bolalar psixologiyasi namoyondalariga bolalar psixik taraqqiyotining normal borayotganini chuqurroq bilish va normal taraqqiyotda burilish sabablarini aniqlash imkonini beradi. Bolalar psixologiyasi esa, o‘z navbatida, bolalarning normal psixik taraqqiyotini aniqlab berish bilan birga shifokorlarning bola psixologiyasini yanada yaxshiroq tushunib olishlariga yordam beradi. Bolalar psixologiyasi bola shaxsi va shaxsiy psixologik xususiyatlarning tarkib topishini o‘rganishda (bir qator) bolalar adabiyotidan, xususan, avtobiografik asarlardan keng foydalanadi. Shunday qilib, bolalar psixologiyasi bolalarning murakkab psixik jarayonlari va shaxsiy psixologik xususiyatlarini o‘rganishda bir qator fanlarning qo‘lga kiritgan yutuqlaridan foydalanadi va ularga yordam beradi. Bolalar psixologiyasi fanining metodlari Har bir fanning o‘z predmetiga ko‘ra bir qancha o‘rganish va tekshirish metodlari bo‘ladi. Metod lotincha “methodas” so‘zidan olingan bo‘lib, ma’lum bir

fanning predmetini tekshirish, o‘rganish va tushuntirib berish usullarining yoki vositalarining yig‘indisidir. Bolalar psixologiyasi umumiy psixologiyaning maxsus sohasi bo‘lgani tufayli, u o‘z predmetini o‘rganishda umumiy psixologiyaning deyarli hamma metodlaridan foydalanadi. Lekin umumiy psixologiyaning metodlaridan bolalarning asosiy faoliyatlariga moslashtirib qo‘llaniladi. Umumiy psixologiyaning metodlari - kuzatish, eksperiment, suhbat, faoliyat mahsulotlarini o‘rganish kundalik va biografik materiallarni o‘rganish, sotsiometrik metod, test va shu kabi metodlardir. Bolalarning butun aqliy, ya’ni psixik taraqqiyotlari ularning turlituman faoliyatlarida sodir bo‘ladi. Ana shuning uchun bolalar psixologiyasi yuqoridagi metodlarni bolalarning asosiy faoliyatlariga moslashtirib qo‘llaydi. Kuzatish metodi Bolalar psixologiyasida subyektiv kuzatish metodidan deyarli foydalanilmaydi. Bolalar psixologiyasining asosiy metodlaridan biri - obyektiv, ya’ni bolalarni tashqaridan kuzatib o‘rganish metodidir. Tarbiyachi yoki tekshiruvchi psixolog bolalarning turli xil faoliyatlarini tabiiy sharoitda tizimli tarzida kuzatadi. Bunda bolalarning xulq-atvorlari, xatti-harakatlariga doir xarakterli vaziyatlarni qayd qilib boradi. Har qanday kuzatishning aniq maqsadi bo‘lishi kerak. Boshqacharoq qilib aytganda, tarbiyachi bolalarning xulq-atvori yoki xatti-harakatlariga doir nimalarni kuzatmoqchi ekanini oldindan aniqlab olishi kerak. Masalan, bolalar diqqatining barqarorligini yoki tafakkur jarayonlari bilan bog‘liq bo‘lgan analiz qila olish qobiliyatlarini kuzatishni oldindan boshlab olishi mumkin. Shuni esdan chiqarmaslik kerakki, kuzatish tabiiy sharoitda olib borilar ekan, bolalar o‘zlarining kuzatilayotganliklarini mutlaqo bilmasliklari kerak. Kuzatishni bolalar o‘rgangan tarbiyachining o‘zi kuzatgani ma’qul. Tarbiyachidan bolalar hadiksiramaydilar, o‘z xattiharakatlarini tabiiy sharoitda bemalol namoyon qila oladilar. Agar kuzatishni bolalar ko‘zi oldida begona odam o‘tkazsa, bolalarning xattiharakatidagi tabiiylik buziladi. Ularning xulq-atvorlari va xattiharakatlarini begona kishi kuzatishiga to‘g‘ri kelsa, u vaqtda yashirin kuzatish

metodlaridan foydalanishi lozim bo‘ladi. Bunda kuzatuvchi bolalarga ko‘rinmaydigan joydan turib kuzatadi. Bolalar psixologiyasida kuzatish metodidan foydalanilganda, bolalarning turli o‘yin faoliyatlari, didaktik mashg‘ulotlari va qurish-yasash hamda ijodiy mashg‘ulotlarida xilma-xil psixik jarayonlarining namoyon bo‘lishi va qancha davom etishi kabi jarayonlarni qayd qilish mumkin. Bundan turli yoshdagi bolalarni bir-biriga taqqoslab, ulardagi psixik jarayonlarning taraqqiyoti o‘rganiladi. Kuzatish metodi - uzluksiz va bu faoliyatni tanlab vaqti- vaqti bilan o‘rganilganda ularning barcha fe’l-atvorlari va xatti-harakatlari kundalik faoliyatlari davomida umumiy holda o‘rganiladi. Uzluksiz kuzatish bir necha kun yoki bir necha oy davomida davom etgandan so‘ng to‘plangan ma’lumotlar tahlil qilinib, bolaga psixologik xarakteristika berish mumkin bo‘ladi. Vaqti-vaqti bilan tanlab kuzatilganda bolaning barcha xulq-atvori va xarakterlari emas, balki faqat ma’lum harakatlari, ya’ni diqqati yoki xotirasi, yo bo‘lmasa, uning nutqi bilan bog‘liq bo‘lgan tomonlari o‘rganiladi. Bolalar psixologiyasida kuzatish metodining alohida turi - bolalar taraqqiyotini tizimli tarzda kundaliklar tuzib o‘rganishdan iborat. Bolalar psixik taraqqiyotini o‘rganishda qo‘llaniladigan kuzatish metodi tashqaridan qaraganda juda osondek tuyulsa-da, odamdan juda ko‘p vaqt va bilim talab qilingan murakkab metoddir. Bolalar psixologiyasida keng qo‘llanadigan ikkinchi metod - eksperiment metodidir. Eksperiment metodi - kuzatish metodiga nisbatan faol metod hisoblanadi. Agar kuzatish metodida u yoki bu psixik jarayonni qayd qilish uchun psixolog shu psixik jarayonning qachon va qanday sharoitda paydo bo‘lishini poylab yursa, eksperiment metodi esa mutlaqo buning aksidir. Eksperiment metodida u yoki bu psixik jarayon yuzaga keladigan sharoitni tekshiruvchi psixologning, ya’ni ekperimentatorning o‘zi tashkil qiladi. Bunda eksperimentator o‘rganayotgan psixik jarayonlarni bolalarda bir necha marta yuzaga keltirib o‘rganadi. Biz umumiy psixologiyadan bilamizki, eksperiment metodi 2 xil bo‘ladi: laboratoriya eksperimenti va tabiiy eksperiment. Bolalar psixologiyasida eksperimentning har ikkala turidan keng foydalaniladi. Birok, bu metodlardan

bolalar psixologiyasida foydalanishning o‘ziga xos tomoni shundaki, maktabgacha tarbiya yoshidagi bolalar laboratoriya shaoitida o‘tkaziladigan eksperimentlar bilan tabiiy sharoitda o‘tkaziladigan eksperimentning unchalik farqiga bormaydilar. Har ikkala holda ham tajribalar vazifa tarzida emas, balki o‘yin tarzida o‘tkazilsa natija yaxshi chiqadi. Masalan: kichik va o‘rta guruh yoshidagi bolalarga biri ikkinchisidan bir oz uzunroq bo‘lgan tayoqcha ko‘rsatilib, ulardan qaysi biri uzunroq ekanligini so‘ralsa, bolalar hech e’tibor bermay, tasodifan bittasini ko‘rsataveradilar. Agar bunday farqlash ularning o‘yinlariga aylantirilsa, bolalar darhol e’tibor bilan qaraydilar. Chunonchi, uzunroq tayoqchani harakat qilib, o‘yinga tushadigan ayiqcha yoki kuchukchaning mexanizmiga tirab qo‘yilsa, qisqarok tayoqchani uzunrok tayoqchaning oldiga tashlab, bolalarga uzunroq tayoqchani topsangiz ayiqcha o‘yinga tushadi, deyilsa diqqat-e’tibor bilan qarab uzun tayoqchani topadilar. Eksperiment metodidan guruhlarda o‘tkaziladigan mashg‘ulot paytida keng foydalanish mumkin. Masalan, turli yoshdagi bog‘cha bolalari bilan o‘tkaziladigan didaktik mashg‘ulotlarda tabiiy eksperiment metodini qo‘llash mumkin. Bunda bolalarga har-xil hayvonlar (ot, sigir, qo‘y, echki, tuya kabi), parrandalar (kaptar, xo‘roz, tovuq, qarg‘a, zag‘izg‘on, ukki, kurka), mevalar (gilos, olcha, olxo‘ri, olma, nok, bexi) kabi, sabzavotlar (piyoz, sholg‘om, sabzi, kartoshka, karam, qovoq, sarimsoq, piyoz kabi) tasvirlangan rasmli kartochkalarni aralash holda berib, ularni guruhlarga ajratishlarida ularni umumlashtirish xususiyatlarini o‘rganish mumkin. Odatda, guruh sharoitida o‘tkaziladigan bunday eksperimentni tabiiy eksperiment deb yuritiladi. Laboratoriya va tabiiy eksperimentlardan tashqari bolalar psixologiyasida tarkib toptiruvchi eksperiment ham keng qo‘llaniladi. Tarkib toptiruvchi eksperimentni mohiyati shundan iboratki, bunda bolalarga u yoki bu psixologik xususiyat tarkib toptiriladi va mustahkamlanadi. Masalan, bog‘cha yoshidagi bolalar ayni bir vaqtning o‘zida butunni va uning qismlarini to‘la idrok qilolmaydilar. Ular o‘z diqqatlarini bir butun narsaning o‘ziga yoki uning bo‘laklariga qarata oladilar. Ular bir butun narsaning ayrim qismlardan tarkib topganligini tasavvur qila olmaydilar. Tarkib toptiruvchi eksperiment orqali bolalar bir butun narsani uning qismlari bilan bir

paytda idrok qilishga undaydilar. Buning uchun bolalarga bir butun narsaning bo‘laklarini yenglarida birlashtirib, butun narsani obrazlarini yarata olish mashqini qildiradi. Bunday eksperiment o‘tkazishda turli geometrik figuralar va ularning bo‘laklaridan foydalanish mumkin (doira, kvadrat, kub, romb va b). Tarkib toptiruvchi eksperiment metodini pedagogik eksperiment metodidan farqlash kerak. Tarkib toptiruvchi eksperiment orqali turli yoshdagi bolalarni u yoki bu narsalarni to‘g‘ri idrok qila olishga o‘rgatilsa, pedagogik eksperiment orqali esa biror ta’lim-tarbiya metodining samaradorligi aniqlanadi. Masalan, biror tadqiqotchi bolalar son-sanoqni o‘rgatishning qandaydir metodini ishlab chiqqan bo‘lsa, uni pedagogik eksperiment orqali sinab ko‘rish mumkin. Buning uchun oldindan bog‘cha ma’muriyati bilan kelishib bitta eksperimental va bitta nazorat guruhni belgilab oladi. Shundan so‘ng tadqiqotchi eksperimental guruhda yangi metod bilan elementar (sodda) matematik tasavvurlarni o‘stirish mashg‘ulotlarini o‘tkazadi. Nazorat guruhda esa bu mashg‘ulotlar odatdagi eskicha metod bilan davom ettirilaveradi. Birikki oydan so‘ng har ikkala guruhdagi bolalarning o‘zlashtirishlari taqqoslab ko‘riladi. Agarda eksperimental guruh bolalarning yangicha metod bilan o‘zlashtirishlari nazorat guruhdagi bolalarning o‘zlashtirishlaridan ancha samarali bo‘lib chiqsa, bu metod boshqa hamma bolalarga tarqatiladi. Bordi-yu natija nazorat guruhdagi bolalarning o‘zlashtirishlaridan yomon, ya’ni past chiqsa, yangicha metod (usul) bilan mashg‘ulot o‘tkazish darhol to‘xtatiladi. Kuzatish va eksperiment asosiy metodlar hisoblanadi, lekin bulardan tashqari bir qator yordamchi metodlar ham mavjud. Masalan: faoliyat mahsulini o‘rganish metodi, sotsiometrik va test metodlari. Faoliyat mahsulotlarini o‘rganish metodi haqida gap borar ekan, shuni aytish kerakki, bolalar ham xuddi katta odamlar singari doim ma’lum faoliyat bilan mashg‘ul bo‘ladilar. Katta odamlar boshqa odamlar uchun kerak bo‘ladigan ijtimoiy foydali narsalar ishlab chiqarish faoliyati bilan band bo‘lsalar, bolalar o‘z faoliyatlarida deyarli ijtimoiy foydali mehnat bilan shug‘ullanmaydilar. Bog‘cha yoshidan bolalarning faoliyatlari - o‘yin, rasm chizish, plastilin yoki loydan biror narsa yasash, applikatsiya, qurish-yasash va shu kabilardan iborat bo‘lishi mumkin.

Bolalar odatda, katta kishilarning topshiriq va takliflari bilan ma’lum faoliyatga kirishadilar. Ayrim xollardagina bolalarning o‘zlari mustaqil ravishda u yoki bu faoliyatni bajaradilar. Har ikki holatda ham bolalar faoliyati ma’lum natijaga ega bo‘ladi. Ko‘pincha bolalar faoliyatining mahsuloti ular chizgan rasmlarga, loy yoki plastilindan yasalgan narsaga qarab o‘rganiladi. Ko‘pincha bolalarning chizgan rasmlarida ular idrokining xususiyatlari va ongida yuzaga kelayotgan turli tasavvurlar hamda atroflaridagi narsa va hodisalarga bo‘lgan munosabatlarida o‘z ifodasini topadi. Ana shu jihatdan bolalarning chizgan rasmlaridan faoliyat mahsulotini o‘rganish sifatida foydalanish maqsadga muvofiqdir. Turli yoshdagi bolalarning ishlagan rasmlarini analiz qilish orqali ularning ayni paytdagi ehtiyojlarini, mayl-istaklari, qiziqishlari, qobiliyati va layoqatlarini o‘rganish mumkin. Shu sababli, bu metoddan ham bolalar psixologiyasida keng foydalaniladi. So‘rash – suhbat metodidan bolalar psixologiyasida ancha cheklangan holda foydalaniladi. Bu metodni bog‘cha yoshidagi bolalarga nisbatan deyarli qo‘llab bo‘lmaydi, chunki bu yoshdagi bolalarda turmush tajribasi juda kam, tafakkurlari hali yaxshi rivojlanmagan bo‘ladi. Shu sababli kichik yoshdagi bolalar kattalarning bergan savollariga o‘ylamay-netmay javob qaytaraveradilar. So‘rash metodidan foydalanilganda odatda juda sodda ishlangan ayiqchalar, uzoq va yaqin qilib ishlangan uylar va daraxtlar va h.k. Bolalardan qaysi ayiq katta, qaysi ayiqcha kichik yoki qaysi uy uzoq, qaysi uy yaqin deb so‘raladi. Besh-olti yoshli bolalarga nisbatan suhbat metodini qo‘llash mumkin. Bunda bolalar bilan o‘tkaziladigan suhbatning mavzusi va suhbat paytida bolalarga beriladigan savollar oldindan yaxshilab o‘ylab olinadi. Tayyorgarsizlik to‘satdan o‘tkazilgan suhbatdan yaxshi natija chiqmaydi. Suhbat metodi orqali bog‘cha yoshidagi katta bolalarning bilimlarini, narsa va hodisalar xaqidagi tasavvurlarni aniqlash va tevarak-atrofdagi odamlar hamda turli narsalarga bo‘lgan munosabatlarini o‘rganish mumkin. Bolalar psixologiyasida so‘nggi yillarda qo‘llana boshlagan metodlardan biri test metodidir. Test so‘zi - inglizcha so‘z bo‘lib, u o‘lchash degan ma’noni

bildiradi. Test metodi orqali bolalarning umumiy aqliy taraqqiyot darajalari va ayrim psixik jarayonlarning (tafakkur, xayol, xotira kabi) qanchalik rivojlanganlik darajasi aniqlab, taqqoslanadi. Test metodi yordamida bolalarning o‘z yoshlariga nisbatan normal taraqqiy etganliklari yoki orqada qolganliklarini ham aniqlash mumkin. Masalan, test metodidan bolalarga topshiriladigan vazifalari bir necha variantda bo‘lib, ular kuchlari yetgan variandagi vazifalarni bajaradilar. Har bir bajariladigan vazifaga ball sistemasida baho qo‘yib boriladi. Vazifalardan qanchasi bajarilganligi va to‘plagan baliga qarab, bolalarning o‘rtacha taraqqiyoti belgilab beriladi. Qo‘llaniladigan testlar orasida bolalarning umumiy aqliy darajasiga qaratilgan va intellektual testlar deb ataladigan testlar ma’lum bo‘lmagan vazifalardan tuzilgan bo‘lib, bolalardan butun aqliy imkoniyatlarni ishga solishga to‘g‘ri keladi. Bolalarning aqliy taraqqiyot darajalarini ilmiy ravishda aniqlash oson ish emas. Intellektual testlarda bolalarga beriladigan vazifalar ularning umumiy aqliy taraqqiyotlarini ifodalovchi eng muhim xususiyatlarini ro‘yobga chiqaradigan qilib tuzilishi kerak. Agarda intellektual testlarda beriladigan vazifalar bolalarning yosh xususiyatlari va aniq taraqqiyot darajalariga to‘g‘ri kelmasa, bolalarning aqliy taraqqiyotlari haqida mutlaqo yangicha xulosaga kelish mumkin. Bog‘cha yoshidagi bolalarga nisbatan qanday intellektual testlardan foydalanish mumkin? Bunday testlar xilma-xil bo‘lishi mumkin. Agar test vazifalari bolalarning o‘yin faoliyatlari bilan bog‘liq bo‘lsa, bolalar bunday vazifalarni bajonidil bajaradilar. Masalan, biror butun narsaning mayda bo‘laklarga ajratib tashlagan qismlarini birlashtirib, mayda bo‘laklardan murakkab va chiroyli applikatsiyalar yasay olish, turli labirintli rasmlardan epchillik bilan turli vazifalarni topa bilishi kabi testlardan foydalanish mumkin. Bunday intellektual testlar turli yoshdagi bog‘cha bolalarining zehnini, tafakkurini aniqlash imkonini beradi. Shunday qilib, test metodidan bolalar psixologiyasida ma’lum darajada foydalanish mumkin. Nihoyat, bolalar psixologiyasida so‘ngi yillarda qo‘llana boshlagan metodlardan yana biri s o s i o m ye t r i ya metodidir. Sotsiometrik metod yordamida shaxslarning jamoadagi munosabatlari masalasi o‘rganiladi. Bolalar psixologiyasida esa sotsiometrik metodi yordami

bilan har bir guruhda bolalarning o‘z tengqurlari o‘rtasida yuzaga kelayotgan o‘zaro munosabatlari va ularning guruhda tutgan mavqelari o‘rganiladi, bunda bolalarning guruhdagi o‘zaro munosabatlarini quyidagi uslublarda o‘rganish mumkin. Guruhdagi bolalarning har birini yechinish xonasiga chaqirib, unga 4-5 chiroyli qilib ishlangan o‘yinchoq ko‘rsatiladi (masalan mashina, toycha, ayiqcha, quyoncha, to‘pponcha kabi). Ana shu o‘ynchoqlardan bitta o‘zingga yoqqanini tanlab ol va uni guruhdagi eng yaxshi ko‘rgan o‘rtog‘ingni shkafiga solib qo‘y, deyiladi. Bola bir oz o‘ylanib turgach, yaxshi ko‘rgan bolalardan birining shkafiga o‘yinchoqni qo‘yib qo‘yadi. Guruhdagi hamma bolalar bu vazifani bajarib bo‘lgach, eng ko‘p sovg‘a kimning shkafiga qo‘yilganligi aniqlanadi. Ana shu ma’lumotlar asosida bolalarning guruhdagi o‘zaro munosabatlariga doir sotsiometriya tuziladi. Shkafiga eng ko‘p sovg‘a qo‘yilgan bola guruhning eng sevimli va shkafiga bironta ham sovg‘a qo‘yilmagan bola guruhning inkor qilgan, ya’ni yoqtirmagan odami bo‘lib chiqadi. Shunday qilib, sotsiometrik metodni bog‘cha yoshidagi bolalarga nisbatan ham qo‘llash mumkin. Har bir tarbiyachi o‘z guruhidagi bolalarning jismoniy, aqliy, axloqiy rivojlanish xususiyatlarini, bolalar psixik taraqqiyotining umumiy qonuniyatlarini kuzatib aniqlashi zarur. Shu bilan birgalikda tarbiyachida - bolalarga nisbatan individual munosabatda bo‘lishning to‘g‘ri yo‘l-yo‘riqlarini belgilash maqsadida har bir bolaning individual psixologik xususiyatlarini aniqlashga intilishi lozim. Tarbiyachi ayni bir vaqtning o‘zida guruhdagi bolalarning xatti-harakatlari va fe’l-atvorlarini o‘rgana olmaydi. Shuning uchun ular diqqat -e’tiborlarini bir necha kun davomida u yoki bu bolaga qaratib, uni har tomonlama chuqurroq o‘rganishga harakat qilishi lozim. Shu narsani esdan chiqarmaslik kerakki, tarbiyachining bolalarni o‘rganishining qat’iy va aniq maqsadi bo‘lishi kerak. Bolalarning barcha xususiyatlarini birdaniga o‘rganib bo‘lmaydi. Bolalarning ehtiyojlari qiziqishlari, mayl va istaklari, qobiliyatlari, diqqatlari, nutq xamda tafakkurlarining xususiyatlarini birin-ketin shoshmasdan o‘rganish lozim. Tarbiyachi kundalik ish sharoitida bolalarni o‘rganar ekan, u kuzatish, eksperiment, yordamchi kabi metodlardan foydalanishi mumkin.

Foydalanilgan adabiyotlar: 1. Nishonova Z.T., Alimova G.K. Bolalar psixologiyasi va psixodiagnostiasi T.: TDPU 2017 – 264 b. 2. G‘oziyev E. Ontogenez psixologiyasi Nazariy- eksperimental tahlil T.: Noshir 2010. – 356 b. 3. Do‘stmuhamedova Sh.A., Nishonova Z.T.va boshqalar Yosh davrlari va pedagogik psixologiya T.: Fan va texnologiyalar 2013 – 343 b. 4. Shapovalenko I.V. Vozrastnaya psixologiya (Psixologiya razvitiya i vozrastnaya psixologiya): uchebnik dlya studentov vuzov. – M.: Gardariki, 2007. –349 s.

O'xshashlar

Logopedik o‘yin kursining umumiy masalalari bola shaxsini rivojlanishida o‘yinning ahamiyati

Nutqi to‘liq rivojlanmagan bolalar

Maktabgacha yoshdagi bolalar shaxsining shakllanishi

Nutqida kamchiligi bo‘lgan bolalar diqqatining xususiyatlari

Nutqida kamchiligi bo‘lgan bolalar tafakkurining xususiyatlari