Диншунослик фаноли - Dinshunoslik asoslari - Referatlar

Диншунослик фаноли

Yuklangan vaqt:

20.09.2019

Ko'chirishlar soni:

0

Hajmi:

69.5 KB

Ko'chirib olish

«Диншунослик» фанининг мақсади предмети тузилиши унинг талабалар дунёқарашини шакллантиришдаги роли Режа: 1. «Диншунослик» фанининг мақсади, предмети, тузилиши 2. «Диншунослик»нинг асосий хусусиятлари ёки унинг бахс мавзуси (предмети).

«Диншунослик» фанининг мақсади, предмети, тузилиши Собиқ СССРда «Илмий атеизм асослари» курси ўқитилиб, асосий эътибор динларни танқид қилиш, диний имон-эътиқодни қоралаб, унинг ўрнига худо ва бошқа илоҳий кучларни инкор қилувчи, яъни худосизликка ўргатувчи атеистик билимлар талабалар онгига, руҳиятига ва дунёқарашига сингдирилар эди. «Илмий атеизм асослари»ни ўз вазифасидан чалғитиб, уни сиёсат учун хизмат қилишига уриниб, дин ва диний эътиқодни жамият ҳаётидан ва талабалар қалбидан бутунлай суриб чиқаришга ҳаракат қилинганда кўпинча виждон эркинлиги қонун-қоидалари қўпол равишда бузиларди. Бу эса айрим хушёрроқ талабаларнинг пинҳоний, баъзан эса очиқдан-очиқ норозилигига сабаб бўлар, аҳолида илмий атеистик тарғиботга нисбатан ишончсизлик пайдо қилар, оқибатда «Илмий атеизмнинг» обрў-эътибори тушиб кетган эди. Турғунлик йилларида миллий камситишга асосланган «ўта байналминаллик» сиёсатига амал қилиниши туфайли диний урф-одатлар, маросимлар, ҳатто миллий расм-русумлар ҳам камситилиб, уларнинг йўлига турли тўсиқлар қўйилиб, уларга амал қилишга имкониятлар йўқ қилинган эди. Умуминсоний қадриятлар камайиб, маънавий қашшоқланиш сари йўл очилган эди. 1991 йилда СССР парчаланиб, сўнгра эса бутунлай тарқаб кетди. Унинг ўрнида мустақил давлатлар вужудга келди. Жумладан, 1991 йил 31 август куни Ўзбекистон Олий кенгашининг навбатдан ташқари 6-сессиясида Ўзбекистон Республикаси мустақил бўлгани тантанали равишда эълон қилинди. Эндиликда ҳар йили 1 сентябрь Мустақиллик куни сифатида байрам қилинмоқда. Ана шу тарихий воқеадан кейин-ги ўтган даврда Ўзбекистон жаҳонга маълум бўлди. Республикамиз 1992 йил 2 март куни Бирлашган Миллатлар Ташкилотига аъзо бўлди, дунёдаги кўпгина давлатлар билан алоқалар ўрнатди.

Мамлакатимизда жуда кўп корхоналар вужудга келди, мулк давлат тасарруфидан чиқарилиб, хусусийлаштириш амалга оширилмоқда, фуқароларнинг қадр-қиммати ошиб, улар Ватан туйғусини яққолроқ ҳис қила бошладилар, ўзбеклар ва бошқа миллатларнинг тенглиги, миллий ифтихори ўсиб бормоқда. Хусусан, демократик ва инсонпарвар жамият қураётган Ўзбекистонда диний эътиқод эркинлиги амалга оширилди. Жуда кўплаб масжидлар, мадрасалар, диний мактаблар, уюшмалар ва жамоалар вужудга келди, кўплаб диний адабиётлар чоп этилмоқда, диний байрамлар, маросимлар, урф- одатлар тикланиб, амал қилмоқда. Бу маънавий янгиликлар халқимизнинг руҳиятига (психологиясига) ижобий таъсир кўрсатди. «Халқимизда бўлаётган ўзгаришларнинг илдизи, деб ёзади президентимиз И.А.Каримов, халқимизнинг маънавий уйғонишидадир. Она тилимизнинг азалий ҳақ- ҳуқуқлари тиклангани, ҳақиқий ўзбекона урф-одатларимизнинг ҳаётдан ўрин олаётгани ҳам одамлар кайфиятига ижобий таъсир кўрсатмоқда. Ўзбек ўзлигига ишона бошлади. Наврўз тиклангани, ҳайитлар тиклангани савобли ишлар бўлди» (Қаранг: И.Каримов. Ўзбекистон келажаги буюк давлат «Ўзбекистон» 1992 й. 6-7 бетлар). Жамият ҳаётида дин пешволари ҳам актив қатнашмоқдалар. Халқимизнинг кўнглини кўтаришда, унинг қаддини ростлашда кўпчилик дин вакиллари, юзлаб имом- хатиблар давлатимизга яқиндан ёрдам бермоқдалар, улар халқни бирлаштиришни, ўзаро низо ва нифоқлардан йироқ туришни тарғиб этмоқдалар. Мана шундай ижтимоий-сиёсий вазиятда, шарт-шароитларда динга бутунлай янгича муносабат шаклланди. Натижада «Илмий атеизм»ни ўқитиш тугатилди, унинг ўрнига «диншунослик» курси жорий этилиб, мана бир неча йилдан буён бу фан олий ўқув юртларида ўқитилмоқда. Бу ўзгаришдан халқимиз ҳурсанд бўлди, талабалар бу предметни қизиқиб ўрганмоқдалар. «Диншунослик»нинг мақсади талабаларга диннинг фалсафий, назарий, тарихий ва амалий хусусиятларини ўргатишдир.

Модомики, минг йиллардан буён мавжуд бўлган турли динлар, диний дунёқараш, урф-одатлар мавжуд экан, бу жаҳон халқларида динга эҳтиёж мавжудлигини, диннинг одамлар учун фойдаси ҳадсиз эканлигини кўрсатади. «Диншунослик»нинг мақсади дин тўғрисидаги объектив ҳақиқатни тушунтириб, изоҳлаб беришдир. «Диншунослик»нинг мазмуни динларнинг фалсафий, назарий жиҳатларини очиб бериш, динлар тарихини ёритиб бериш, динларнинг ижтимоий функцияларини турли жиҳатда тушунтиришдир. «Диншунослик»ни ўрганар экан, талабалар аҳлоқан ва маънавий жиҳатлардан ўз онгини кенгайтирадилар; улар дунё воқеа ва ҳодисаларига, жамиятдаги мураккаб инсоний муносабатлар моҳиятини янада синчковроқ бўлиб тушунадилар; улар динларнинг жамият ҳаётида тутган ўрнини яққолроқ англаб етадилар; ўзларида иймон-эътиқод эркинлигига онглироқ муносабатни шакллантирадилар, яъни бу фаннинг талабалар дунёқараши учун аҳамияти беқиёс. Маълумки, дин янги мафкурамиз тизимида ўз ўрнига эга бўлиб, «Диншунослик»ни ўқиган талабалар мафкурамиз мазмунини чуқурроқ тушуниб етадилар, мамлакатимизнинг актив ривожлантирувчилари, онгли фуқаролари бўлиб етишадилар. «Муайян дунёқараш, дунёни англаш нуқтаи-назаридан ифода этилган ғоялар, дастурлар, аҳлоқ-одоб маромлари ақлли одам ишончи (имони) га айланса қадрланади, эъзозланади. Имонли одам ўз ихтиёри билан қабул этган ғоялар, тимсолларни муқаддас билиб, ҳаётини уларсиз тасаввур эта олмайди, оч, яланғоч қолишга, барча маҳрумликларга, ҳатто ўлимга ҳам рози бўлади, аммо ўз иймонига хилоф келадиган хатти-ҳаракатларга йўл қўймайди». (Қаранг: И.Каримов. Имон ва инсон. Т., «Фан» 1991 й. 4-бет.). «...миллий тарихимиз ва умумбашарий тараққиёт ривожига унутилмас ҳисса қўшган олиму фузалоларнинг мафкура ва унинг жамият ҳаётидаги аҳамияти ҳақида қолдирган илмий мероси, фалсафий қарашларини ҳар томонлама ўрганиш даркор.

Мен бу ўринда Абу Наср Фаробий, Беруний, Ибн Сино, Имом Ал- Бухорий, Аҳмад Яссавий, Алишер Навоий, Бахоуддин Нақшбанд, Нажмиддин Кубро каби улуғ аждодларимизнинг ўша мавзуга дахлдор асарларини назарда тутяпман». (Қаранг: Баркамол авлод орзуси. «Шарқ» нашриёти матбаа концерни бош таҳририяти. Тошкент-1999, 36-бет). Уларнинг шарафига маҳобатли ҳайкаллар қўйилди, саройлар, мадрасалар мактаблар қайта тикланди, уларнинг таваллуд йиллари юбилейлари ўтказилди, асарлари нашр этилди ва ҳ.к. Хулоса қилинганда, «Диншунослик» курсининг мақсад ва мазмуни бу фаннинг ижтимоий-сиёсий ва дунёқарашлик ҳарактерида эканлигини, ҳар бир динга ишонган одамнинг иймон-эътиқоди мазмунини яққол кўрсатиб беришдир. «Диншунослик»нинг асосий хусусиятлари ёки унинг бахс мавзуси (предмети). «Диншунослик» фанининг, бизнингча қуйидаги асосий хусусият ва йўналишлари борки, уларни бир бутун, яхлит ҳолда олиб қаралгандагина бу фаннинг бахс мавзусини тўғри ва тўла баён қилиб, мазкур фаннинг моҳиятини, мазмунини мақсадларини яққол сезиб, тушуниб олиш мумкин бўлади. «Диншунослик»нинг хусусиятлари қуйидагилардан иборат: 1. «Диншунослик» фани динларнинг моҳиятини ва дин тушунчасини таърифлаб, уни изоҳлаб, тушунтириб беради. Диний онг, ижтимоий онг шаклларидан бири сифатида олиб қаралиб, уни тарихий ҳодиса деб ҳисоблайди; бу билан барча динлар инсоният тарихи билан боғланганлиги, одамларнинг динга бўлган эҳтиёжи туфайли келиб чиққач, улар аста-секин бир тизим қиёфасига кириб давом этаётганлиги таъкидлаб ўтилади. Динларнинг келиб чиқиш, ривожланиш ва эволюцияси ўзининг туб сабабларига, яъни илдизларига эгаки, «Диншунослик» шу хусусиятни ҳам назарда тутади ва уларни кўрсатиб беради.

Бу билан ҳозирги замонда мавжуд бўлиб турган турли динлар қадим замонларда вужудга келган бўлсалар ҳам, нима учун улар ҳамон мавжуд бўлиб турибди деган саволга аниқ жавоб беради. «Диншунослик» динларнинг қандай таркибий элементлари борлигини ҳам кўрсатиб беради. Ҳар қандай миллий ва жаҳон динларида диний тасаввурлар, диний ҳаракатлар, диний психология ва диний ташкилотлардан иборат тўртта узвий боғланган элементлар мавжуд бўлиб, улар яхлит ҳолда диний ибодатларни бажарадилар, уларда диний ҳис-туйғулар мавжуд; диний уюшмаларга эса диний ташкилотлар раҳбарлик қиладилар деб ҳисоблайди ва уни тушунтириб беради. «Диншунослик» фани ҳар қандай дин жамиятда : а) хом хаёлий, яъни компенсаторлик; б) тартибга солувчилик; в) ин-теграллаштирувчилик- бирлаштирувчилик ва г) коммуникатор-лик, яъни алоқадорлик каби функцияларни бажаришини ту-шунтириб беради. Бу функциялар ҳақида кейинги мавзуда батафсил бахс юритилади, ҳозирча уларни эслатиб ўтилади, холос. 2. «Диншунослик» фани барча динларнинг келиб чиқиш тарихини баён қилиб беради. Маълумки, ҳеч бир ҳодиса ёки воқеа сабабсиз рўй бермаганидек, динлар ҳам ер юзида одамлар томонидан вужудга келтирилган энг қадимги, ибтидоий жамиятда шаклланган ижтимоий онг шаклидир. Динлар тарихи ғоят мураккаб ва узоқ тарихий жараёнлардан иборат бўлиб, ҳозирги даврда мавжуд бўлиб турган динларнинг барчаси ўзининг келиб чиқиш, ривожланиш ва ўзгариб бориш тарихига эгаки, «Диншунослик»да ана шулар тўғрисида ҳам бахс юритилади. «Диншунослик» динлар тарихини ёритаётганда уларнинг бир-бирига ўзаро таъсир қилганлигини, бир-бири билан алоқадорлигини таъкидлайди. Шунингдек, динлар тарихини ўрганиш учун археология, этнография, тарих фанларининг берган маълумотлари, бадиий адабиёт, санъат асарларининг аҳамиятини, нодир моддий-маданий намуналарининг муҳим тарихий ашёвий далиллар эканлигини, айниқса, диний ёзувлар, муқаддас китоблар, машҳур

уламоларнинг асарларини, ҳадисларни; турли диний руҳдаги расм- русумларни ҳам кўрсатиб ўтилади. Шу тариқа динлар тарихи тўғрисида яхлит ва бир бутун тасаввурлар яратилади. Булар «Диншунос-лик»нинг иккинчи муҳим хусусиятини ташкил этадики, кейинги мавзуларда бу хусусият тўғрисида атрофлича маълумотлар баён этилади. 3. «Диншунослик» фанида динларнинг энг муҳим назарий-фалсафий тизимидан иборат бўлган диний таълимотлар хусусида бахс юритилади. Динларнинг бу хусусияти диний мафкура ва дунёқарашнинг моҳиятини асослаб беради. Айниқса, миллий ва жаҳон динлари мавзуларида бу хусусият тўғрисида кенг маълумотлар берилади. «Диншунослик» диний таълимотлар илоҳий кучлар ҳисобланувчи худолар, фаришталар, пайғамбарлар, авлиё- анбиёлар, мўъжизакор яратилиш ҳодисалари, ҳикматли панд-насиҳатлар, гуноҳ ва савоб, жаннат ва дўзаҳ кабиларга қаратилганлигини алоҳида таъкидлайди. Бу масалада турли диний афсона ва ривоятларнинг ҳам ўрни борлиги кўрсатиб ўтилади. 4. «Диншунослик» фани динларнинг амалий томони-диний маросимлар, урф-одатлар, расм-русумлар ва турли одат-удумлар хусусида ҳам бахс юритади. Чунки булар ҳам динларнинг энг муҳим хусусияти ҳисобланади. Маълумки, диннинг маросимчиликдан иборат амалий томони диндорлар ҳаётида ғоят актив рол ўйнайди. Диний маросимлар диндорлар руҳиятига кучли таъсир қилади, уларнинг кундалик ҳаётида муайян тартиб ўрнатади, ҳаёт кечириш тарзини белгилайди. «Диншунослик» диний урф-одатларнинг келиб чиқиш тарихига эътибор беради, бу диний расм-русумларнинг жамоатчилик фикрини шакллантириш учун хизмат қилишини ҳам таъкидлаб ўтаркан, бу одатлар нисбатан барқарор, муқим турадиган муҳофазакор куч сифатида амал қилади, деб ҳисоблайди. Шу билан бирга диний маросимлар ўз мазмуни, бажарадиган вазифаларига кўра шод-ҳуррамлик ёки қайғу- аламли ҳолатларни ифода этишига алоҳида эътиборни қаратади.

Диний маросимчилик диний тасаввурлар ва диний руҳият билан чамбарчас боғланган бўлиб, уларнинг яхлит тизими динларнинг нисбатан оммавийлашган осонроқ томонидир, деб алоҳида таъкидлаб ўтилади. 5. «Диншунослик» фани барча динларда муҳим тарбия-ловчи мазмун диний аҳлоқ-одобларда мужассам бўлганлигини кўрсатиб беради. Диндорлар диний аҳлоқ руҳида тарбия олиб, хушмуомала, очиқ-ойдин фикрли, одамийликнинг кўпгина фазилатларига эга бўлиб етишадилар. Инсоф ва адолат, ҳалол-ҳаромни ажратиш, ўзаро ҳурмат, катталарга иззат-ҳурмат, ногирон, муҳтожларга мурувват кўрсатиш, илмли, маърифатли киши бўлиш, яхшилик қилиш, ота-оналарни беҳад ҳурмат қилиш, оила ва жамоат орасида ўз бурчини адо этиш каби умуминсоний, дунёвий қадриятлар динда юқори даражадаги аҳлоқий талаблар, деб қаралади. Муайян маънода дин аҳлоқ тўғрисидаги тушунча сифатида ҳам тушунилган. «Диншунослик» фани миллатнинг шаклланиши ва ривожланишида диний аҳлоқнинг ўрни ва роли борлигини тан олиб, диний аҳлоқдан шахс тарбиясида самарали фойдаланиш зарурлигига эътиборни қаратади. Аммо диний аҳлоқ сиёсат ва мафкуравий жиҳатлардан қаралганда синфий-табақавий аҳамият касб этадики, «Диншунослик»да бу маънода диний аҳлоқда умуминсоний қадриятлар даражасида турадиган аҳлоқ-одоб нормаларининг устунлиги таъкидлаб ўтилади, ана шу хусусият ҳам бу фан эътиборида туради. 6. «Диншунослик» диннинг муҳим хусусиятларидан бири бўлган диний хуқуққа алоҳида эътибор беради. Маълумки, қулдорлик жамиятидан бошлаб давлатлар келиб чиққан бўлиб, бу сиёсий куч хусусий мулкчиликка асосланган ўз иқтисодий базисига хизмат қиладиган хуқуқ ва қонунларини жорий қилган эди. Ўша даврлардан бошлаб диний ҳуқуқ ҳам пайдо бўлиб, бу ҳуқуқлар диний ёзувларда, ҳадисларда, анъаналарда, таъқиқланган ва рухсат этилган кўрсатмаларда, диний ҳужжатларда, турли диний жамоа, уюшма, мазҳаблар фаолиятида аста-секин шаклланиб борган.

Масалан, Ислом тарихида шариат қонун ва хуқуқлари худди шу тариқа, VII-XII асрлар давомида шаклланиб, сўнгра ҳуқуқ нормаларига айланган эди. Диний ҳуқуқлар устидан диний ташкилотлар назорат ўрнатган бўлиб, бу ҳуқуқлар мулкка муносабатни, диний жамоа, ижтимоий табақа, гуруҳ ва имтиёзли шахслар манфаатини белгилаб берган. Диний ҳуқуқларда аҳлоқ- одоб қоидалари, уларга амал қилиш тартиблар ҳам белгилаб қўйилган. Диний ҳуқуқларда маросимларга амал қилиш қоидалари ҳам кўрсатилган. Диний ҳуқуқларда маросимларнинг жамиятдаги мавқеига қараб уларнинг ҳуқуқлари гоҳо жуда кенг ва кучли бўлган, гоҳо эса уларнинг ҳуқуқлари чекланиб қоларди. Умуман, «Диншунослик»да диннинг мана шу хусусиятига ҳам алоҳида масала сифатида қаралади. 7. «Диншунослик» фани динларнинг тархий типлари, турли шакллари, йўналишлари, мазҳаблари, уларнинг ўзига хос хусусиятлари, бир-бири билан боғланган томонлари пайдо бўлиш сабаблари, диндорлар ҳаётидаги ва жамиятдаги ўрни, фаолият кўрсатиш масалаларини ҳам алоҳида қараб чиқади, шулар тўғрисида ҳам бахс юритади. Шу муносабат билан «Диншунослик» фанида аввало диннинг ижтимоий-фалсафий моҳияти кўрсатилиб ўтилади, сўнгра ибтидоий тузумда пайдо бўлган энг қадимги динлар ҳисобланувчи тотемизм, фетишизм, анимизм, сеҳргарлик (магия, шаман) динларини, улардан кейинги уруғ-қабилалар дини бўлган политеизм, яъни кўп худолик динларини, сўнгра миллий давлат динларини, монотеистик, яъни якка худолик динларини кейин эса жаҳон динлари бўлган буддийлик, христианлик ва ислом дини атрофлича баён этилади. Бу динларнинг ҳар бири ўз тарихий шарт-шароитлари, ўз давридаги талаб ва эҳтиёжлари билан боғлиқ ҳолда пайдо бўлса-да, аввалгилари кейин келиб чиққанларига кучли таъсир кўрсатган эди. Масалан, энг қадимги, нисбатан соддагина анимизм дини ҳам жаҳон динларига таъсир қилган. Бу ҳақда кейинги мавзуларда кўриб ўтамиз. Бу жиддий масала ҳам «Диншунослик»да муҳим ўрин олган.

8. «Диншунослик» фани яна бир муҳим масала бўлган диний манбалар, муқаддас ёзувлар, ҳужжатлар: Таврот, Библия, Авесто, Трипитака, Ведалар, Қуръон, ҳадислар каби дин учун жуда муҳим тарихий ёдгорликлар хусусида ҳам бахс қилади. Чунки, «Диншунослик» агар бу масалани четлаб ўтса, ўз вазифасини тўла бажармаган ҳисобланади. Талабалар эса ана шу манбаларни мустақил ўрганишлари, бу фанни ўзлаштириш ва ўз билим доираларини чуқурлаштириш, кенгайтириш учун ғоят муҳим аҳамиятга эга эканлигини ёдда тутишлари лозим. Диний манбалар асрлар давомида яратилган бўлиб, уларда диний масалалар ҳужжат ва далил асосида системага тушириб юқори услубий маҳорат билан вужудга келтирилган. Бунга Қуръон ва пайғамбар Муҳаммаднинг мўътабар ҳикматлари бўлган «Хадис»ларини мисол сифатида кўрсатиб ўтиш мумкин. «Диншунослик» фани диний, тарихий манбаларга таянган ҳолда ўз назарий ва амалий томонларини баён этсагина, у ишонарли ва эътиборли бўлиши мумкин. Шуни ҳисобга олган ҳолда бу фан ўқитилади, ўқитилмоғи керак. Шундай қилиб, «Диншунослик» фанининг юқоридаги ўзаро узвий боғланган 8 та хусусиятларини, яъни унинг бахс мавзусини (предметини) кўрсатиб ўтилди. Булардан маълум бўладики, мазкур фан жиддий ва муҳим фандир. Энди «Диншунослик»ни ўқитишда илмий-услубий талаблар хусусида ҳам айрим мулоҳазаларга тўхталмоқ жоиздир. Аввало, мазкур фаннинг ўқитилишида, унинг мавзуларини баён этишда диалектиканинг объективлик, ворислик, умумий алоқадорлик, сабабийлик ҳамда тараққиёт тамойилларига қатъий амал қилган холда, объектив ҳақиқат мезонига асосан, холисона иш тутмоқ, илмий-ғоявийликни сақлаган холда, шу фаннинг тарбиявий савиясини оширган ҳолатда ўқитиш ҳозирги давр талабларига мос бўлади, деб ўйлаймиз.

Мантиқий хулосаларга, баён қилиш изчиллигига, давр, тарихий, географик ва миллий этник жиҳатларни ҳам ҳисобга олган ҳолда дастурдаги материалларни баён қила билиш ҳам муҳим услубий талабларга мос тушади ва аксинча, унга амал қилмаслик «Диншунослик»нинг ўзига хослигини ҳисобга олмаслик бўлур эди. Чунки «Диншунослик» фани динлар тўғрисида бахс юритар экан бу билан бевосита диндорлар иймон-эътиқоди, нозик ҳис- туйғулари, миллий ва диний ғурури билан ҳисоблашишга тўғри келадики, бундай ҳолатда ғоят ҳушёр бўлиш лозим.

Фойдаланилган адабиётлар: 1. Абдуқаҳҳор Иброҳимов, Хайриддин Султонов. Ватан туйғуси. Нарзулла Жўраев . Тошкент. «Ўзбекистон» - 1996 й. 2. Қуръони Карим. Алоуддин Мансур таржимаси ва изоҳлари. Тошкент, «Чўлпон» нашриёти. 3. Муқаддас китоб. Инжил. Туркия муқаддас китоб жамияти. 1995 й. 4. Музаффар Хайруллаев. Даврон Шораҳмедов. Маданият ва мерос. Т., 1973 йил. 5. Ҳамиджон Ҳомидов. Зардўшт яратган дин ва маданият. Ёш куч. 7-8 сонлари. Т. , 1992 йил. 6. Искандар Жадид. Биз қандай ибодат қиламиз? Германия.

O'xshashlar

Диншунослик фанига кириш

Диншунослик асослари фанининг предмети, мақсад ва вазифалари

Диний экстремизм ва терроризм ҳамда уларнинг жамият барқарорлигига таҳдиди

Диннинг келиб чиқиши ибтидоий жамиятдаги динлар

Word formation Problems for discussion