Tarawlarda qollanılatuǵın is qaǵazları - Информатика и ИТ - Презентации

Tarawlarda qollanılatuǵın is qaǵazları

Загружено в:

24.07.2024

Скачано:

0

Размер:

172.5302734375 KB

Tarawlarda qollanılatuǵın is qaǵazları

J O B A: 1 . Buyrıq (Приказ) 2. Buyrıqtan kóshirme (Выписка из приказа) 3. Kórsetpe (Указание) 4. Biylik (Распоряжение)

Biylik _ hújjetleri Bul túrdegi hújjetler, tiykarınan, shólkem baslıǵınıń buyrıq, kórsetpe, biyligi hám shólkem qararları tiykarında júzege keledi.

Buyrıq Bul huqıqıy hújjet belgili ishki mákeme aldında turǵan tiykarǵı hám kúndelikli wazıypalardı sheshiw maqsetinde qollanıladı. Áhmiyeti jaǵınan buyrıqlar ekige bólinedi: tiykarǵı jumıs iskerligine baylanıslı hám kadrlar jeke quramına tiyisli. Olar izbe-iz tártipte óz aldına nomerlenedi hám bólek saqlanadı.

1. Tiykarǵı jumıs iskerligine baylanıslı buyrıqlar Tiykarǵı jumıs iskerligine baylanıslı buyrıqlar jumıstı shólkemlestiriw, mákeme yamasa onıń bólimleri jumısın tártipke salıwda qollanıladı. Olarda, ádette, joqarı shólkemlerden kelgen kórsetpe hújjetler xızmetkerlerge jetkeriledi, bulardıń orınlanıwı boyınsha anıq is-ilajlar belgilenedi, juwapker shaxslar hám orınlanıw múddeti belgilenedi.

Buyrıq járdeminde baslıqlar mákemeniń islep shıǵarıw, jobalastırıw, esap, qarjılandırıw, kredit ajıratıw, ónimdi satıw iskerligi, sırtqı ekonomikalıq xızmet, shólkem dúzilisin jetilistiriw hám de jumıslardı shólkemlestiriw hám basqa máseleler boyınsha ámeliy is júrgizedi.

Buyrıqtıń tiykarǵı zárúrli bólimleri: 1. Gerb, mákemeniń simvollıq belgisi (blanka bólimleri). 2. Ministrlik hám basqarma atı. 3. Mákemeniń arnawlı nomeri. 4. Hújjet túriniń arnawlı nomeri. 5. Mákeme atı. 6. Teması (mazmunınan kelip shıǵıp ataladı) 7. Sánesi. 8. Sanı (№). 9. Buyrıq shıqqan orın atı. 10. Hújjettiń atı (Buyrıq). 11. Buyrıq teksti (eger qosımshaları bolsa, dizimge alınadı). 12. Baslıq yamasa orınbasar qolı.

Buyrıq joybarı qánigeler tárepinen tayarlanadı, bas yamasa jetekshi qánigeler, huqıq másláhátshisi, bas esapshı menen kelisiledi. Huqıq másláhátshisi buyrıqtı kóriwde tómendegilerge itibar beredi: máseleni buyrıq penen rásmiylestiriw maqsetke qanshelli sáykes keliwi, buyrıq joybarı ámeldegi nızamlarǵa, húkimet qararlarına qanshelli muwapıq keliwi, usı mákemeniń aldın berilgen buyrıqlarına sáykes keliwi.

Buyrıq joybarına tiyisli qollar qoyılıp, ol blankaǵa kóshirilgennen keyin, mákeme baslıǵı oǵan qol qoyadı. Tiykarǵı jumısqa baylanıslı buyrıqlarda, ádette, mazmunınan kelip shıǵıp tema qoyıladı (ayırım qısqa buyrıqlarda qoyılmawı da múmkin). Baslıq qol qoyǵan buyrıq is júrgiziw boyınsha juwapker xızmetker tárepinen tiyisli dápterge dizimge alınadı.

Buyrıqtıń tiykarǵı teksti tiykarlawshı (kirisiw) hám biylik bólimlerinen quraladı. Kirisiw bóliminde buyrıqtan maqset, shárt- sharayat, sebepler kórsetiledi, tiykar etip alınıp atırǵan buyrıqqa silteme beriledi (atı, nomeri, sánesi jazıladı). Buyrıqtıń biylik bólimi jańa qatardan, bas háripler menen jazılatuǵın «BUYÍRAMAN» sózinen baslanadı.

Sol sózden soń qos noqat qoyılıp, jańa qatardan biylikler beriledi. Zárúrlikke qarap biylikler bántlerge bólinip, arabsha sanlar menen belgilenedi. Sannan soń noqat qoyılıp, sóz bas háripten baslanadı. Biyliklerde, ádette, kim qanday wazıypanı qaysı múddette orınlawı kórsetiledi.

Háreket buyrıq meyil formasında sáwlelenedi («Ámelge asırılsın», «Támiyinlensin», «Júklensin», «Esapqa alınsın» hám t.b.). Orınlawshılar – mákeme yamasa onıń strukturalıq bólimleri, lawazımlı shaxslar (lawazımları kórsetilgen halda) dizimge alınadı.

Buyrıqta jumıstıń orınlanıw múddeti ulıwma túrde yamasa hárbir biylikte anıq kórsetiliwi múmkin. Buyrıq qol qoyılǵannan soń kúshke kiredi. Buyrıqtıń biylik bólimi aqırında buyrıqtı qadaǵalaw kimge júklengeni de belgilep qoyıladı: «Buyrıq orınlanıwın qadaǵalaw (lawazımı hám familiyası tolıq jazıladı) juwapkershiligine júklensin».

Gerb, mákemeniń simvollıq belgisi Ministrlik atı Mákemeniń arnawlı nomeri Mákeme atı Hújjet formasınıń sáykes nomeri TEMASÍ 0000.00.00 № ____________ ornı Tiykarlawshı (kirisiw) bólimi BUYRÍQ 1. 2. BUYÍRAMAN: 1. 2. 3. Buyrıqtıń orınlanıwın qadaǵalaw______________________ juwapkershiligine júklensin (lawazımı hám familiyası tolıq jazıladı). Direktor: (qolı) F.A.Á.

SHÍMBAY «AYZADA» BIRLESPESINDE BUYÍMLAR HÁM QARJÍLÍQ TEKSERIW ÓTKERIW HAQQÍNDA BUYRÍQ 2020-jıl 25-noyabr №405 Shımbay rayonı Qant ónimleri, chay hám pivo-alkogolsız ishimlik óndirisi kárxanaları awqamınıń 2020-jıl 19-noyabrdegi 03- 09-sanlı buyrıǵın orınlaw boyınsha birlespede tovar-materiallıq qımbat bahalı buyımlar, kárxana múlki, islep shıǵarıwdıń jumsalmaǵan tiykarǵı qarjıları, balanstaǵı esap-sanaq hám basqa bántlerinde turǵan pul qarjıları boyınsha buyımlar hám qarjılıq tekseriw ótkeriw ushın BUYÍRAMAN: I. Buyımlar hám qarjılıq tekseriw ótkeriwde tómendegi múddetler belgilensin: 1. Tayar ónimlerdiń islep shıǵarıwda tamamlanbaǵan ǵárejetleri ushın – 2020-jıl 1-yanvarǵa shekem. 2. Birlespe múlki, tiykarǵı qarjılar ushın – 2019-jıl 5-dekabrge shekem. 3. Mólsherlengen zıyandı qaplaw ushın waqtınshalıq qarız (dotaciya) esap-sanaǵı, salıqlar kvitanciyaları hám byudjetten basqa tólemler boyınsha qarjı organları menen esap-sanaq, pul qarjıları, qımbat bahalı buyımlar hám qatań esabattaǵı hújjetler, joqarı shólkemler menen esap-sanaq jaǵdayı ushın – 2020-jıl 1-yanvarǵa shekem. II. Jobalastırılǵan tekseriwdi ótkeriw ushın tómendegilerden ibarat isshi topar dúzilsin: 1. S.Kamalov – baslıq (kásiplik awqamı komiteti baslıǵı); 2. Ǵ.Shawdırbaev – aǵza (sıpat bólimi baslıǵı); 3. T.Matmuratov – aǵza (bas esapshı); 4. A.Rasbergenov – aǵza (jobalastırıw bólimi baslıǵı) 5. I.Xojaxmetov – aǵza (cex baslıǵı). Buyrıqtı qadaǵalaw direktor orınbasarı K.Nasırov juwapkershiligine júklensin. Direktor: (qolı) B.I.Asanov

2. Kadrlardıń jeke quramına tiyisli buyrıq yamasa jeke buyrıqlar Jeke buyrıqlar xızmetker jumısqa qabıllanǵanda yamasa jumıstan bosatılǵanda, basqa bólimge ótkerilgende, sol xızmetker sıylıqlanǵanda, miynet demalısına shıqqanda beriledi. Bólim baslıqları usınısı, jeke arzalar tiykarında tayarlanadı.

Kadrlardıń jeke quramına tiyisli buyrıqlar arnawlı blankalarda, bolmasa ápiwayı buyrıq qaǵazına jazıladı. Onday jaǵdayda buyrıq basına «Kadrlar jeke quramına tiyisli» dep jazıp qoyıw kerek.

Buyrıq temaları: «Jumısqa qabıl etiw haqqında buyrıq», «Basqa jumısqa ótkeriw haqqında buyrıq», «Jumıstan bosatıw haqqında buyrıq», «Miynet demalısın beriw haqqında buyrıq», «Xoshametlew haqqında buyrıq» hám t.b.

Bunday buyrıqlarda kirisiw bólimi bolmawı múmkin. Biylik bóliminde, ádette, bántler boladı. Buyrıq bólimindegi «QABÍL ETILSIN», «TAYÍNLANSÍN», «ÓTKERILSIN», «SÍYLÍQLANSÍN», «BOSATÍLSÍN» sıyaqlı feyiller bas háripler menen jazıladı.

Familiya da bas háripler menen, atı hám ákesiniń atı tekstte ápiwayı háripler menen jazıladı (máselen, Saǵındıq Xalmuratovich KEWLIMJAEV).

Nókis qalası «Salamat» kishi kárxanası KADRLAR JEKE QURAMÍNA TIYISLI BUYRÍQ 2020-jıl 25-aprel №28 Nókis qalası Kárxananıń bas qánigesi Artıqbay Erejepovich AYTBAEV 2020-jıl 1-may sánesinen Tashkent mámleketlik agrar universitetine 2 aylıq qánigeligin arttırıw kursına xızmet saparına JIBERILSIN. Tiykar: Nókis qalası hákimligi awıl xojalıǵı basqarmasınıń 2020-jıl 22-apreldegi 112-sanlı biyligi. Direktor: (qolı) S.Baymuratov

Nókis beton ónimlerin islep shıǵarıw birlespesi KADRLAR JEKE QURAMÍNA TIYISLI Miynet demalısın beriw haqqında BUYRÍQ 2020-jıl 20-may №108 Nókis qalası Bas injener Bayrambay Kóbeysinovich ǴAYBULLAEVqa 2020-jıl 25-maydan 24 jumıs kúninen ibarat gezektegi miynet demalısı BERILSIN. Tiykar: Tastıyıqlanǵan miynet demalısı kestesi hám B.K.Ǵaybullaevtıń arzası. Bas direktor: (qolı) T.K.Tolıbaev Qoyılǵan qollar: Bólim baslıǵı: Bas esapshı:

Buyrıqtan kóshirme Ámeliyatta tiykarǵı jumısqa tiyisli buyrıqlardan kóshirme tayarlawǵa zárúrlik tuwıladı. Hújjetten kóshirme – túp nusqa hújjettiń belgili bir bólegi. Buyrıqtan kóshirme buyrıqtıń biylik bóliminen aldıńǵı barlıq bólimlerin óz ishine qamtıydı. Buyrıqtıń biylik bóliminen tek anıq jaǵday ushın zárúr bolǵan maǵlıwmat alınadı.

Buyrıqtan kóshirme, ádette, blankaǵa jazılıp, tastıyıqlap beriledi: «Kóshimesi durıs» sóz dizbegi menen xatker (yamasa buyrıqtan kóshirme beriwshi shaxs) qol qoyadı.

NÓKIS «TAǴAM» BIRLESPESINDE BUYÍMLAR HÁM QARJÍLÍQ TEKSERIW ÓTKERIW HAQQÍNDA BUYRÍQTAN KÓSHIRME 2020-jıl 25-noyabr №405 Nókis qalası I. Qant ónimleri, chay hám basqa ishimlik óndirisi kárxanaları birlespesiniń 2020-jıl 19-noyabrdegi 03-09-sanlı buyrıǵın orınlaw boyınsha birlespede tovar-materiallıq qımbat bahalı buyımlar, kárxana múlki, islep shıǵarıwdıń jumsalmaǵan tiykarǵı qarjıları, balanstaǵı esap-sanaq hám basqa bántlerinde turǵan pul qarjıları boyınsha buyımlar hám qarjılıq tekseriw ótkeriw ushın BUYÍRAMAN: II. Jobalastırılǵan tekseriwdi ótkeriw ushın tómendegilerden ibarat isshi topar dúzilsin: 1. T.Qarlıbaev – baslıq (kásiplik awqamı komiteti baslıǵı); Direktor: (qolı) B.S.Tolıbaev Tiykarına durıs Xatker-jeke Referent: (qolı) S.Shamuratova 0000.00.00

NÓKIS «TAǴAM» BIRLESPESI 2019-JÍL JUWMAǴÍ BOYÍNSHA BIRLESPE JUMÍSSHÍLARÍN XOSHAMETLEW HAQQÍNDA BUYRÍQTAN KÓSHIRME 2020-jıl 4-yanvar №22 Nókis qalası 2019-jılda birlespe jumısshıları jıllıq jobaların barlıq kórsetkishleri boyınsha orınladı. 100 million somnan zıyat payda alındı. Murabba bóliminen tısqarı (baslıǵı D.A.Tawmuratova) barlıq bólimler óz jobaların orınladı. Jıl juwmaǵı boyınsha, ásirese, R.Aytbaev, S.Asqarbaeva, M.Shımbergenov, K.Sadıqov sıyaqlı jumısshılar miynette ayrıqsha órnek kórsetti. «Qant ónimleri, chay óndirisi kárxanaları birlespeleri» mámleketlik akcionerlik koncerniniń 2019.03.01. tegi 100-sanlı buyrıǵı menen «Taǵam» birlespesiniń jumısshıların jıl juwmaǵı boyınsha xoshametlewge ruqsat berildi. Birlespe miynet jámááti keńesi hám kásiplik awqamı komitetiniń qospa májilisi (2019.01.02, 3-bayanlama) qararına tiykar, BUYÍRAMAN: 8. Óz wazıypasına nemquraydı qaraǵanlıǵı ushın «Taǵam» birlespesiniń jumısshıların jıl juwmaǵı boyınsha xoshametlew qaǵıydasınıń 32-bántine muwapıq bólim baslıǵı D.A.Tawmuratovanı jıl juwmaǵı boyınsha xoshametlew 100% qadaǵan etilsin. Direktor: (qolı) B.R.Bekmurzaev Tiykarına durıs: (qolı) K.T.Sabırova

Kórsetpe (Указание) Mákemelerde xabar-metodikalıq túrdegi máseleler, sonday-aq, buyrıqlar, kórsetpeler hám basqa hújjetlerdiń orınlanıwı menen baylanıslı shólkemlestiriw máseleleri boyınsha shıǵarılatuǵın huqıqıy hújjet. Kórsetpelerge birinshi basshı , sonday-aq, tiyisli bolsa, bas injener, olardıń orınbasarları qol qoyıw huqıqına iye. Kórsetpe mákemeniń arnawlı is qaǵazına basıladı. Ol da buyrıq sıyaqlı, ádette, tema menen jazıladı, kirisiw hám biylik bólimlerinen dúziledi.

Kirisiw bóliminde, mınanday «maqsette», mınanday «buyrıqtı orınlaw ushın» sıyaqlı dástúriy sóz dizbekleri qollanıladı hám «JÚKLEYMEN», «USÍNÍS ETEMEN» sózleri menen biylik bólimi baslanadı. Belgili xızmetkerge onıń xızmet lawazımı wazıypalarına kirmeytuǵın jumıslar júklense, «USÍNÍS ETEMEN» sózi qollanıladı. Kórsetpeniń biylik bólimi buyrıqtıń biylik bólimine uqsas boladı.

«Shiyrin» kárxanası MURABBA CEXÍNDA JAŃA ÚSKENELERDEN PAYDALANÍWDÍ JAQSÍLAW HAQQÍNDA KÓRSETPE 2020.18.01 №117 Nókis qalası «Shiyrin» kárxanasın qayta úskenelew haqqında 2019-jıldıń 15-iyuldaǵı 107-sanlı buyrıqqa tiykarlanıp, kárxananıń 3 cexında Germaniyadan alınǵan jańa úskeneler ornatıldı. 2 cexta: shokolad hám pechene cexlarında mashinalardan ónimli paydalanılmaqta, biraq murabba cexında «T –108 KS» mashinalarınan paydalanıw texnologiyası jumısshılar tárepinen jaqsı ózlestirilmegen, nátiyjede kóp ónimler zaya bolmaqta. Usı múnásibet penen cex baslıǵı D.A.SAPARBAEVAǵa tómendegilerdi JÚKLEYMEN: 1. Cexta jańa mashinalar texnologiyası boyınsha úsh aylıq oqıw shólkemlestirilsin. 2. May ayında eki xızmetkerdi Berlinge xızmet saparına jiberiw ushın anıq usınıslar berilsin. Direktor : (qolı) B.I.Sadıqov

«Sayaxat» firması 2020-jıldaǵı miynet demalısları kestesi haqqında KÓRSETPE 2020-jıl 3-yanvar №28 Nókis qalası 2020-jıl ushın xızmetkerler miynet demalısları kestesin dúziw haqqında USÍNÍS ETEMEN: 1. Bólim baslıqları 2020-jılda xızmetkerlerdiń demalısqa shıǵıw dizimin múddeti kórsetilgen halda dúzip, kadrlar bólimine tapsırsın. Dizimdi tapsırıw múddeti: 2020.10.01. 2. Kadrlar bólimi firma xızmetkerleriniń 2020-jıl de alıslarınıń qospa kestesin dúzip, firma direktorı tastıyıqlawına usınıs etilsin. Juwapker: Kadrlar bólimi baslıǵı S.Ibadullaev Kesteni usınıs etiw múddeti: 2020.15.01. Firma direktor orınbasarı: (qolı) N.A.Omarov Razılıq belgisi

Biylik (Farmoyish) Mákeme administraciyası (direktor, direktor orınbasarları, bas injener, onıń orınbasarları), bólim baslıqları tárepinen ámeliy máseleler boyınsha qabıl etiletuǵın hújjet.

Ádette, biyliklerdiń háreket etiw múddeti sheklengen bolıp , bólimlerdiń tar sheńberine, ayırım juwapker adamlar hám puqaralarǵa tiyisli boladı. Biylik teksti, buyrıq sıyaqlı zárúrli bólimlerden dúziledi, tek onıń tiykarǵı bóliminde «BUYÍRAMAN» sóziniń ornına «USÍNÍS ETEMEN», «RUQSAT BEREMEN» sıyaqlı dizbekler qollanıladı.

Nókis «Shiyrin» firması «SHIYRIN» BIRLESPESINDE NABAT CEXÍ JUMÍSÍN QAYTA SHÓLKEMLESTIRIW HAQQÍNDA BIYLIK 2020-jıl 25-noyabr №406 Nókis qalası 2019-jıl juwmaǵı boyınsha nabatqa mútájlik ósken. Bul ónimdi jáne de kóbirek islep shıǵarıw ushın anıq jumıslardı ámelge asırıw, Qıtaydan jańa úskeneler alıp keliw zárúr. Sol múnásibet penen tómendegilerdi USÍNÍS ETEMEN: Birlespege payda bermeytuǵın járdemshi cexlardı saplastırıw maqsetinde birlespede turaqlı xızmet kórsetiwshi isshi toparǵa bul boyınsha anıq usınıslardı usı jıldıń 22-dekabrine shekem islep shıǵıw tapsırılsın; juwapker – isshi topar baslıǵı K.Ziywatdinov. Direktor: (qolı) B.I.Aymurzaev

Qaysı hújjet járdeminde baslıqlar shólkemniń islep shıǵarıw, jobalastırıw, esap, qarjılandırıw, kredit ajıratıw, ónimdi satıw iskerligi, sırtqı ekonomikalıq xızmet, shólkem dúzilisin jetilistiriw hám de jumıslardı shólkemlestiriw hám basqa máseleler boyınsha ámeliy is júrgizedi? A) Shártnama B) Buyrıq C) Kórsetpe D) Bayanlama

Qaysı hújjette «qabıl etilsin», «tayınlansın», «ótkerilsin», «sıylıqlansın», «bosatılsın» sıyaqlı feyiller qollanıladı hám olar qalay jazıladı? A) Nızamda, kishi háripler menen jazıladı. B) Buyrıqta, bas háripler menen jazıladı. C) Buyrıqta, kishi háripler menen jazıladı. D) Ustavta, bas háripler menen jazıladı.

Buyrıq belgili ishki mákeme aldında turǵan tiykarǵı hám kúndelikli wazıypalardı sheshiw maqsetinde qollanıladı. Olar áhmiyeti jaǵınan qanday túrlerge bólinedi? A) Lawazımlı shaxslar hám de isshi xızmetkerlerge baylanıslı buyrıqlar B) Tiykarǵı jumıs iskerligine baylanıslı hám kadrlar jeke quramına tiyisli buyrıqlar C) Kadrlar jeke quramına hám de lawazımlı shaxslarǵa baylanıslı buyrıqlar D) Jay hám qospa buyrıqlar

Tómendegi berilgen tekst buyrıqtıń qaysı túrine kiredi? Kárxananıń bas qánigesi Artıqbay Erejepovich AYTBAEV 2020-jıl 1-may sánesinen Tashkent mámleketlik agrar universitetine 2 aylıq qánigeligin arttırıw kursına xızmet saparına JIBERILSIN. A) Tiykarǵı jumıs iskerligine baylanıslı buyrıq B) Kadrlardıń jeke quramına tiyisli buyrıq C) Qánigeligin jetilistiriw haqqında buyrıq D) Buyrıqtıń heshbir túrine kirmeydi

Tómendegi juwaplardıń qaysı birinde biylik hújjetiniń jazılıw mazmunı kórsetilgen? A) Mákeme basshılıǵı tárepinen ámeliy máseleler boyınsha qabıl etiletuǵın hújjet. B) Mákemelerde xabar túrindegi metodikalıq máseleler boyınsha shıǵarılatuǵın huqıqıy hújjet. C) Mákeme aldında turǵan tiykarǵı hám kúndelikli wazıypalardı sheshiw maqsetinde qollanıladı. D) Belgili mákemege yamasa lawazımlı shaxs atına ótinish mazmunında jazılatuǵın rásmiy hújjet.

Kadrlardıń jeke quramına tiyisli buyrıqlar arnawlı blankalarda, bolmasa ápiwayı buyrıq qaǵazına jazıladı. Eger buyrıq ápiwayı qaǵazǵa jazılǵan jaǵdayda buyrıqtıń basına ne dep jazılıw kerek? A) Jumıs iskerligine tiyisli B) Kadrlardıń jeke quramına tiyisli C) Kúndelikli wazıypalardı sheshiwge tiyisli D) Isshi xızmetkerlerge tiyisli

Qaysı hújjettiń kirisiw bóliminde mınanday «maqsette», mınanday «buyrıqtı orınlaw ushın» sıyaqlı dástúriy sóz dizbekleri qollanıladı? A) Shártnama B) Buyrıq C) Kórsetpe D) Biylik

Dıqqatlarıńız ushın raxmet!

Похожие

Biznes mobil qosımshaları

Ólshem ólshew texnikası hám programmalıq interfeysi

Internet in my life

Computer

Internet in Uzbekistan