O’zbekiston Respublikasi DAF hujjatlarining ilmiy-ma’lumotnoma apparati. Yig’majildlar tavsifi - История - Рефераты

O’zbekiston Respublikasi DAF hujjatlarining ilmiy-ma’lumotnoma apparati. Yig’majildlar tavsifi

Загружено в:

20.09.2019

Скачано:

0

Размер:

66 KB

O’zbekiston Respublikasi DAF hujjatlarining ilmiy- ma’lumotnoma apparati. Yig’majildlar tavsifi Reja: 1. Ilmiy-ma’lumotnoma apparati haqidagi tushuncha 2. Ilmiy-ma’lumotnoma apparati tarkibi 3. Hujjatlarni tavsiflashda differensial yondashuv 4. Yig’majildlarni tavsiflash haqidagi tushuncha 5. Yig’majildlarni tavsiflashdagi axborot unsurlari

Arxivda saqlanayotgan hujjatlar haqida umumiy tasavvur hosil qilish, zarurat tug’ilganda ularni tezda topish va ulardan unumli foydalanish maqsadida ilmiy- ma’lumotnoma apparati (IMA) yaratiladi. Ilmiy-ma’lumotnoma apparati deganda arxivlarda saqlanayotgan hujjatlar to’g’risida axborot beruvchi ma’lumotlar tizimi tushuniladi. Arxiv hujjatlari haqidagi ma’lumotlar arxivshunoslikda axborot-qidiruv tizimi deb ataladi. Arxivlarda tashkil etilgan IMA bu yerda saqlanayotgan hujjatlarning tarkibi, mazmuni va manzili haqida aniq ma’lumotlar berishi zarur. Ayni paytda viloyatlar va butun DAF miqyosida ham arxiv hujjatalrining IMA tuziladi. Davlat arxiv fondi IMA tizimi o’zaro bog’langan hisob hujjatlari, ya’ni arxiv ma’lumotnomalari, avtomatlashtirilgan axborot-qidiruv tizimidan iboratdir. Bular bir xil usul va qoidalar asosida tayyorlanib, yig’majildlar va arxiv fondlari tarkibida, davlat arxivlari va butun DAF doirasida hujjatlarni ehtiyot qilib saqlash va samarali qidirish uchun tuziladi. IMA tarkibi IMA tarkibiga quyidagilar kiradi: 1. yo’lko’rsatkich (putevoditelp) yoki ma’lumotnoma kitobi (spravochnik); 2. qabul qilingan hujjatlar kitobi; 3. fondlar ro’yxati; 4. fondlar varaqasi; 5. ro’yxatlar; 6. kataloglar; 7. ko’rsatkichlar. Shuni ta’kidlab o’tish kerakki, arxivlarda yuritiladigan hisob hujjatlari va IMA tizimi o’rtasida bevosita aloqadorlik mavjud. Hisob hujjatlari ham fondlar tarkibidagi hujjatlar haqida zarur axborotlar beradi. Masalan, fond varaqasi fondning tartib raqami, nomi, bu yerdagi yig’majildlar soni, xronologik chegarasi, tarkibi haqida qisqa ma’lumotlar beradi.

Hujjatlarni hisobga oluvchi asosiy ma’lumotnoma – bu yig’majildlar ro’yxatidir. Boshqa arxiv ma’lumotnomalaridan farqli o’laroq, ro’yxat fond doirasida yig’majildlarni hisobga olish, hir bir yig’majildning varaqlar sonini belgilash, yig’majildning tarkibi va mazmuni hususida ma’lumot berish imkoniyatiga egadir. DAF hujjatlariga tuzilgan IMA tizimi o’zaro bog’liqligi, birligi bilan ajralib turadi. Respublikadagi barcha hujjatlar to’g’risidagi eng umumiy ma’lumotnoma arxivlardagi fondlar katalogidir. Viloyat arxiv bo’limlarida ham viloyat hududidagi arxivlarning fondlar katalogi tuziladi. Bu ma’lumotnomalar yordamida tadqiqotchilar qaysi arxivda u yoki bu mavzuga doir oid hujjatlar borligini aniqlab oladilar. Shundan keyin kerakli davlat arxivlariga borib, o’sha arxivning yo’lko’rsatkichi yoki fondlar ro’yxati va varaqasi o’rganiladi. Bu ma’lumotnomalardan tadqiqotchi kerakli hujjatlar arxivning qaysi fondlarida mavjudligini bilib oladi. Arxiv fondlarining yig’majildlari mavjud ro’yxati bilan tanishib chiqish kerakli hujjatlar qaysi yig’majildlarda ekanligini aniqlash imkoniyatini beradi. Kerakli yig’majildlar buyurtma asosida arxiv omborxonasidan olinib, ulardan tadqiqot uchun zarur bo’lgan hujjatlar topiladi va kerakli ma’lumotlar ko’chirib olinadi. Sistematik va mavzuiy kataloglardan foydalanish kerakli hujjatlarni tezkorlik bilan topish va ularni tadqiq etishga yordam beradi. Shunday qilib, IMA tarkibiga kiruvchi ma’lumotnomalarning har birining o’z vazifasi, maqsadi bor va bir birini to’ldirib, O’zR DAF hujjatlari to’g’risida zarur ma’lumotlar beradi. Ilmiy-ma’lumotnoma apparatini yaratish uchun hujjat, yig’majild va fond asosiy axborot manbai bo’lib xizmat qiladi. Birlamchi ma’lumot beruvchi bu manbalarni tahlil etish arxivshunoslikda tavsiflash deb ataladi. Arxiv ishida alohida bir hujjat, yig’majild va arxiv fondi tavsiflanishi mumkin.

Arxiv fondlari o’z ilmiy ahamiyati, ulardagi ma’lumotlarning salmog’i nuqtai nazaridan bir xil emasdir. Shuning uchun ham hujjatlarni tavsiflash differensial yondashuvni talab qiladi. Arxiv fondlari ulardagi ma’lumotlarning salmog’iga qarab 3ta kategoriyaga bo’linadi. Birinchi kategoriyali fondlar jumlasiga jamyat hayotining turli sohalariga doir xilma-xil va boy ma’lumotlar beradigan fondlar kiradi. Odatda bu fondlarning materiallaridan keng ko’lamda va muntazam ravishda foydalaniladi. Shu boisdan birinchi kategoriyali fondlarning ilmiy-ma’lumotnoma apparati batafsil ma’lumotlarni aks ettirishi kerak. Aks xolda hujjatlarni tezda topish va ulardan keng ravishda foydalanish ishi qiyinlashadi. Birinchi kategoriyali fondlar jumlasiga quyidagi fondlar kiradi: Turkiston general-gubernatori va viloyat harbiy gubernatorlari mahkamalari fondlari, Turkiston komiteti fondi, Turkiston ASSR, Buxoro va Xorazm respublikalari hamda O’zbekiston SSR Sovetlari, viloyat Sovetlari fondlari va hokazo. Ikkinchi kategoriyadagi fondlar qatoriga jamiyat hayotining ayrim yo’nalishlari bo’yicha ma’lumot beruvchi fondlar kiradi. Bu kategoriyaga viloyat Sovetlarining boshqarma va bo’limlari, uyezd va rayon Sovetlari, shahar dumalari va kengashlari hamda boshqa muassasalar fondlari kiradi. Uchinchi kategoriyaga qimmatli ma’lumotga uncha boy bo’lmagan fondlar kiradi. Bu kategoriya fondlari materiallaridan kam foydalaniladi. Shuning uchun ularga murakkab ma’lumot apparatini yaratish shart emas. Arxivlar ilmiy faoliyatining yo’nalishlaridan biri hujjatlar va yig’majildlarni tavsiflashdir. Yig’majildlarning tavsifi arxivlarda tuziladigan barcha ma’lumotnomalarning asosi hisoblanadi. Yig’majildlar tavsifi muassasalarda ish yuritish jarayonida yoziladi, ularni muassasa arxivlariga topshirish paytida yakunlanadi. Arxivlarga umuman tavsiflanmagan yoki talab darajasida

tavsiflanmagan yig’majildlar topshirilgan taqdirda ularni tavsiflash ishi muassasa yoki davlat arxiv-larida amalga oshiriladi. Yig’majildlarni tavsiflashdan asosiy maqsad har bir yig’majildning tarkibi vamazmunini aniq aks ettirish va shu asosda hujjatlarni tezda topish hamda ulardan foydalanishni ta’minlashdan iboratdir. Hujjatlarni ilmiy asosda tavsiflash ularning tarkibi va mazmunini obyektiv tarzda yoritishni taqozo etadi. Yig’majildlarni tavsiflashda differensial yondashuv talab qilinadi. Fondlarning qaysi kategoriyaga mansubligini e’tiborga olgan holda ma’lumot unsurlari turli yo’llar bilan bayon etilishi zarur. Yig’majildlarni tavsiflashda axborot unsurlari Yig’majildlarni tavsiflashda ularga xos bo’lgan quyidagi asosiy belgilar aniqlanadi va muqovasiga yozib qo’yiladi: Tashkilot va uning tarkibiy qismi nomi; Yig’majildning nomenklatura bo’yicha indeks raqami; Sarlavha; Boshlanish va tugash sanasi; Varaqlar miqdori; Saqlash muddati; Arxiv shifri. Alohida muhim ahamiyatga ega bo’lgan hujjatlarni tavsiflash paytida qisqa annotasiya yozish, shuningdek bu hujjatlarning asl nusxa yoki ko’chirma nusxa ekanligi, ularni to’laligi darajasi va yaratish usuli qayd etiladi. Tashkilot (muassasa) va uning tarkibiy qismi nomi. Muassasaning nomi yig’majildni qaysi fondga mansubligini bildiradi. Muassasaning nomi to’liq shaklda hamda qavsning ichida rasmiy tarzda qisqartirilgan holda yozilishi kerak. Masalan, O’zbekiston SSR Markaziy Statistika boshqarmasi (O’zSSR MSB). Agar tashkilot (muassasa) ning nomi o’zgargan bo’lsa, muqovada uning barcha nomlari

qayd etilishi shart (yig’majildlardagi hujjatlarda o’z aksini topgan davr davomida). Muassasaning nomidan so’ng uni tarkibiy qismining nomi yoziladi. Bunday ma’lumotlarning aks ettirilishi arxiv fondi miqyosida yig’majildlarni turkumlash ishini osonlashtiradi. Yig’majild indeksi. Yig’majildlarning indeksi ularning nomenklatura bo’yicha tartib raqamini ko’rsatadi. Yig’majildlar indeksi ish yuritishda hujjatlarni tashkil etish tizimini aks ettiradi. Davlat arxivlarida yig’majildlarni tavsiflash chog’ida hujjatlarga ish yuritish chog’ida qo’yilgan indekslar saqlanib qoladi. Indekslar hujjatlarni tizimga solishni osonlashtiradi, fond materiallarining saqlanish darajasi va ularning to’laligini ko’rsatadi, hujjatlarni tezda topish imkoniyatini beradi. Yig’majild sarlavhasi. Tavsiflash ishida yig’majildga sarlavha qo’yish (yoki sarlavhani aniqlashtirish) muhimdir. Sarlavhada yig’majildlar va kiritilgan hujjatlarning tarkibi va qisqacha mazmuni o’z aksini topishi zarur. Davlat arxivlarida yig’majildlarni tavsiflash jarayonida ularning sarlavhalari aniqlashtiriladi. Agar sarlavhaning ayrim unsurlari noaniq yoki to’liq bayon qilinmagan bo’lsa, sarlavha boshqatdan tuziladi. Sarlavha tuzishda quyidagi elementlarni aks ettirish lozim bo’ladi: hujjatlar to’rining nomi, muallif, kimga yuborilganligi, qaysi masalaga bag’ishlanganligi, hudud, xronologik sanalar, hujjatlarning tashqi belgilari. Masalan: 1. Farg’ona viloyati ishchi, soldat va dehqon deputatlari Sovetining protokollari. 1917 yil mart – 1918 yil iyulp. Asl nusxalar. 2. Farg’ona viloyatida kolxozlarni tashkil etishga oid materiallar. 1930 yil. Asl nusxalar. 3. Farg’ona neftni qayta ishlash zavodi ma’muriyatining bosh-qa tashkilotlar bilan yozishmasi. 1959-1960 yillar. Ko’chirma nusxalar.

Annotasiya tuzish. Yig’majildlarga kiritilgan ayrim muhim hujjatlarning mazmunini annotasiya yozish yo’li bilan aniqlanadi. annotasiya yig’majildning muqovasiga sarlavhadan keyin yoziladi. Misol: 1. 254-gvardiya polkinig jangovor harakatlari jurnali. 1943 yil, 15- yanvarp – 16-iyulp. Annotasiya: To’ychi Eryigitovning 1943 yil 23 fevralda ko’rsatgan jasoratining qisqacha tavsifi (annotasiya so’zi yozilmaydi). Hujjatlarning asl nusxa ekanligini, ularning to’laligi darajasi va yaratish usuli hamda yig’majildlarning tashqi hususiyatlarini tavsiflash. Hujjatlarning asl nusxasi hamda ularning ko’chirma nusxalari o’zining ishonarliligi va yuridik kuchi nuqtai nazaridan bir xil emasdir. Shu boisdan 1- va 2-kategoriyali fondlarni tavsiflashda bu narsani e’tibordan chetda qoldirmaslik kerak. Agar yig’majildlar tarkibiga kirgan barcha hujjatlar asl nusxa bo’lsa, bu hol sarlavhadan keyin qayd etiladi. Masalan: 1. O’zbekiston SSR Ministrlar Soveti yig’ililarining protokollari. 1949 yil. Asl nusxalar. Yig’majildda ayrim hujjatlarning asl nusxalari, boshqa hujjatlarning ko’chirma nusxalari birgalikda saqlanishi mumkin. Bunday holda tavsiflash jarayonida bu narsa qayd etilishi kerak. Agar hujjatlar qisman saqlangan bo’lsa, tavsiflash chog’ida bu narsa aks ettiriladi: «parchalar», «alohida varaqlar», «hujjatning oxirgi qismi saqlanmagan» va hokazo. Nodir va alohida qimmatli hujjatlarning yaratilish usuli ham qayd etiladi (dastxat, chektografik varaqa va hokazo). Ko’p hollarda bu ularning mazmunini aniqlash uchun zarur bo’lishi mumkin. Hujjatlarning tashqi belgilari ham sarlavhadan so’ng (agar annotasiya yozilsa, undan keyin) qayd etiladi. Tashqi belgilarga muqovaning nimadan tayyorlanganligi, bezaklar, hujjatning nimaga

bitilganligi (pergament, mato, qog’oz), qaysi tilda yozilganligi, orginal muhr va miniatyuralar kiradi. Yig’majildlar sanasi. Yig’majildlarning muqovasida sarlavha yoki annotasiyadan so’ng uning yaratilish sanasi yoki yig’majild tarkibiga kirgan hujjatlarning boshlanishi va tugashi sanalari ko’rsatiladi. Sanalar arab raqamlari, oy nomlari esa so’z bilan yoziladi. Aniq sanalarni bilishning imkoni bo’lmasa, kvadrat qavs ichida taxminiy sana krsatiladi (Masalan, «1927 yildan keyin»). Agarda sanalarni umuman aniqlashning imkoni bo’lmasa, yig’majildlarning muqovasida «sanasiz» deb yozib qo’yiladi. Varaqalar miqdori va saqlanish muddati. Sanadan so’ng yig’majildning muqovasida yangi satrdan varaqalar miqdori yoziladi («115 varaqda»). Varaqlar miqdorini ko’rsatish hujjatning saqlanishi va nazorat qilinishi uchun zarur. Varaqlar miqdorining pastida yig’majildlarning saqlanish muddati qayd etiladi. Vaqtinchalik saqlanayotgan hujjatlar uchun necha yil saqlanishi ko’rsatiladi («20 yil saqlansin», «75 yil saqlansin» va hokazo), doimiy saqlanishi zarur bo’lgan yig’majildlar uchun «doimiy saqlansin» deb yozib qo’yiladi. Yig’majildning muqovasida arxiv shifri ko’rsatiladi. Arxiv shifri arxivning qisqartirilgan nomidan («O’zR MDA», FVDA» va hokazo) hamda fondning raqami, ro’yxat raqami va yig’majildning ro’yxat bo’yicha raqamidan iboratdir. Masalan, FVDA, 23-f., 2-r., 245-y. Arxiv shifri odatda muqovada tipografiya yo’li bilan tayyorlangan maxsus shtamp ichiga qo’yiladi. Yig’majildlardagi hujjatlardan ilmiy maqsadlarda yoki matbuot sahifalarida foydalanilganda, arxiv ma’lumotnomasi yoki hujjatning ko’chirma nusxasi berilganda arxiv shifri hamda varaq raqami ko’rsatiladi. Ichki ro’yxat (mundarija). Ichki ro’yxat (mundarija) qimmatli yig’majildlar uchun tuziladi. Unda yig’majildga kiritilgan barcha hujjatlar ko’rsatib o’tiladi. Ichki ro’yxatda hujjatlarning indeksi, mazmuni, sanasi, kimga jo’natilganligi yoki muallifi, varaqlar raqami qayd etiladi.

Foydalanilgan adabiyotlar 1. Alimov I., Ergashev F., Bo’tayev A. Arxivshunoslik: O’quv qo’llanma. Toshkent, 1997. 2. Теория и практика архивного дела в УзССР. Под ред. Ф. И. Долгих и И. К. Руделсон. Москва, 1980. 3. Архивы // Историческая энциклопедия. Т. 1. Москва, 1961, 4. Arxivlar // O’zbekiston Milliy Ensiklopediyasi. 1-jild. Toshkent, 2000. 5. Xolmatova M. Arxivlar hamkorligi // Xalq so’zi. 2003. 19 iyun. 6. Alimov I va B. Arxivshunoslik. Toshkent, 1997. 7. Asqarov A. O’zbekiston tarixi. Toshkent, 1994. 8. Is’hoqov M. Unutilgan podsholikdan xatlar. Toshkent, 1992. 9. Oronyuk B., Aliyev B. Arxivlar – hujjatlar qal’asidir // Sharq yulduzi. 10. Набиев Р. Из истории Кокандского хаства. Тошкент, 1973. 11. Троицкая А. Л. Каталог архива кокандских ханов. Москва, 1968 . 12. Иванов П. П. Архив хивинских ханов //Записи ИВ АН СССР. Т- 7. Москва, 1939 . 13. Мухсинова К. Опит работа по упорядочению фонда «Куш беги эмира Бухарского» // научно-методический бюллетень Ар x ивного управления МВД Уз ССР. 1955. №3,

Похожие

Arxiv ro’yxatlari va arxiv kataloglari

Arxiv hujjatlari sharhi va hujjatlaridan foydalanishning maqsad va shaklari

Muzey fondlarini xisobga olish, ilmiy ma`lumotnoma apparati

O’zbekiston Respublikasi Milliy arxiv fondi

Arxiv muassasalari ishini tashkil etish