logo
  1. Главная страница
  2. Рефераты
  3. Психология
  4. Xotira

Xotira

Загружено в:

20.09.2019

Скачано:

0

Размер:

61.5 KB
Скачать
Xotira Reja: 1. Xotira haqida tushuncha. 2. Xotira mexanizmlari. 3. Xotira turlari. 4. Xotira jarayonlari. Tayanch iboralar: Xotira haqida tushuncha. Xotira jarayon sifatida. Mnemik amallar: guruhlarga birlashtirish, ma`nosiga asoslanish, eskini yangi bilan bog`lash, klassifikatsiya, analogiya, verballashtirish va h.k. Xotira samaradorligining motivga, qiziqishga, shaxsdagi oldindan shakllangan munosabatga, pedagog faoliyatiga bog`liqligi. O`quv jarayonida xotiraning xususiyatlarini hisobga olish. Xotira turlari, xotira tiplari, xotira jarayonlari va ularning psixologik xarakteristikasi. Xotiradagi individual farqlar. Xotira samaradorligiga idrok qilinayotgan o`quv materialining boshqa mavjud materiallar orasidagi o`rni, hajmi, mantikiyligi, tuzilishi, assosiatsiyalarning mavjudligi, hissiyligi va h.k. ta`siri. Xotirani rivojlantirish. XOTIRA HAQIDA TUSHUNCHA Individning o`z hayotiy tajribasini esida olib qolishi, esda saqlab turishi va keyinchalik esga tushirishi XOTIRA deb ataladi. Xotira sohasida quyidagi asosiy jarayonlar farqlanadi: esda olib qolish, esda saqlash, esga tushirish va unitish. Bu jarayonlar biri-biridan ajralgan holda yuzaga chiqmaydi. Ular bir umumiy bir jarayonning turli tomonlarini tashqil qiladilar. Xotiraning yuzaga chiqishi, rivojlanishi kishining faoliyati bilan bog`liq. Ma`lum materialni esda olib qolish hayot faoliyati davomida individual, ya`ni shaxsiy tajribani to`plash bilan bog`liqdir. To`plangan tajribadan keyingi faoliyatda foydalanish qayta esga tushirishni talab qiladi. Ma`lum materialning faoliyatda qatnashmay qolishi yoki faoliyatidan tushib qolishi uni esdan chiqarib quyishga olib keladi. XOTIRA MEXANIZMLARI Hozirgi kunda xotira mexanizmlari haqida juda ko`plab nazariyalar mavjud. Ularning barchasini bir necha guruhlarga birlashtirish mumkin. Birinchi guruh nazariyalar - psixologik nazariyalar, ikkinchisi - neyrofiziologik nazariyalar. Ularga keyingi yillarda yangi nazariyalar, uchinchi yo`nalish - bioximik yo`nalishdagi nazariyalar qo`shilmoqda. Barcha nazariyalar orasida eng oldin paydo bo`lib rivojlangan nazariyalarga psixologik nazariyalar kiradi. Bu nazariyalar xotira jarayonlarini tarkib toptirishda sub`ektning faolligiga qanday o`rin berilganligiga, sub`ekt faolligining o`ziga qanday qaralganligiga bog`liq ravishda klassifikatsiya qilinadi. Shunday oqimlardan biriga assosiativ nazariya kiradi. Assosiativ nazariyaning asosiy tushunchasi ASSOSIATSIYA tushunchasidir. ASSOSIATSIYA - aloqa bog`lanish degan ma`noni bildiradi va hamma psixik hodisalarni tushuntiruvchi universal mexanizm sifatida qaraladi. Ularning fikricha, agar ma`lum psixik hodisalar inson ongida ayni bir vaqtning o`zida bir-biridan ketma-ket hosil bo`lgan bo`lsa, ular o`rtasida assosiativ aloqa hosil bo`ladi. Agar shu assosiativ aloqaning biron-bir elementi qayta ta`sir qilsa yoki qayta nomoyon bo`lsa, ongimizda assosiativ aloqaning barcha elementlarini qayta tiklashga olib keladi. Shunday qilib, assotsianizm ikkita ta`sirot o`rtasidagi aloqa bog`lanishning zaruriy va etarli asosi - bu ta`sirlarning inson ongida ayni bir vaqtning o`zida nomoyon bo`lishi deb hisoblaydi. Assotsianistlar quyidagi assosiatsiya hosil bo`lishning asosiy sharoitlarni ko`rsatadilar. a) tegishli ob`ektlarning zamon va makon izchilligi; b) ob`ektlarning bir- biriga o`xshashligi, ob`ektlarning bir-biridan farqi, qarama-qarshiligi. Shu sharoitlarga mos ravishda uch turli assosiatsiya ajratilgan: izchillik assosiatsiyasi, o`xshashlik assosiatsiyasi, kontrastlik assosiatsiyasi. Ammo bir xil sharoitda doimo bir xil assosiatsiyalar zanjiri hosil bo`lmaydi. U holda turli kishilar bir xil sharoitda bir xil narsalarni eslab qolgan bo`lar edilar. Haqiqatda esa aloqalar tanlangan suratda hosil bo`ladi. Geshtal’tizm (nemischa "gestalt" - obraz degan ma`noni anglatadi) - psixologik nazariya. Bu nazariyaning asosiy tushunchasi - geshtal’t tushunchasidir. Geshtal’t tushunchasi yaxlit, bir butun tashkilotni (bir butun organizmni) tarkibiy qismlarga bo`lib bo`lmaydigan tuzilishini anglatadi. Bu nazariyaga ko`ra aloqalar (bog`lanishlar) hosil qilishning asosi sifatida materiallarning tashkil qilinganligi e`tirof qilinadi. Materialning ma`lum tashkiliy tartibi esda olib qolishda katta rol’ o`ynaydi. Ammo materialning tuzilishini ochish va baholash, oqibatda uni esda olib qolishda faqatgina sub`ekt faoliyati natijasi asosiy rolni o`ynaydi. Hozirgi zamon psixologiya fanida barcha psixik jarayonlarni, shu jumladan xotira jarayonlarini ham tarkib toptirishga sababchi bo`lgan asosiy faktor shaxs faoliyatidir, deb qarovchi nazariyalar toboro ko`proq e`tirof etilmoqda. Bu nazariyaga asosan materialni esda olib qolish, esda saqlash, esga tushirish jarayonlari sub`ekt faoliyatida ana shu materiallarning qanday o`rinda turishi bilan belgilanadi. XOTIRA TURLARI Xotira inson hayoti va faoliyatining barcha sohalarida qatnashishi tufayli uning nomoyon bo`lish shakllari ham nihoyat darajada har xildir. Xotiraning har xil turlari uch xil mezon asosida turlarga bulinadi (birlashtiriladi). 1. Ko`proq faoliyatda ko`rinadigan psixik aktivlik xarakteriga ko`ra xotiraning harakat, emosional (hissiy), obrazli va SO`Z-mantikiy turlari farqlanadi. 2. Faoliyat maqsadi xarakteriga ko`ra xotira ixtiyoriy va ixtiyorsiz xotira turlariga bulinadi. 3. Materialni qancha esda olib qolish va esda saqlash muddatiga qarab qisqa muddatli, uzoq muddatli, operativ xotira turlariga bo`linadi. HARAKAT, EMOSIONAL (HISSIY), OBRAZLI VA SO`Z-MANTIQIY TURLARI. Inson faoliyat ining har xil turlarida psixik faollikning turlicha ko`rinishlari ustun turishi mumkin. Shunga ko`ra xotiraning ham ma`lum bir turi xizmat qiladi. Bo`lar harakat, emosional (hissiy), obrazli va SO`Z-mantiqiy xotiralardir. HARAKAT XOTIRASI - turli xil harakatlarni va ularning tizimlarini esga olish, esda saqlash va qayta esga tushirishdan iborat. Ba`zi kishilarda xotiraning bu turi boshqalaridan ustun turadi. Ko`pchilik bu xotira turining mavjudligini payqamaydi. Holbuki xotiraning bu turi har xil amaliy mehnat malakalarini tarkib toptirishning asosini tashkil qiladi. Agar harakat xotirasi bo`lmaganda edi, biron harakatni amalga oshirish uchun biz shu harakatning o`zini har gal "boshdan boshlab" o`rganar edik. Shu jumladan yurish ham harakat xotirasi mahsulidir. EMOSIONAL (hissiy) XOTIRA - tuyg`u hissiyotga xos xotiradir. emosional (hissiy) xotira biz boshimizdan kechirgan va xotiramizda saqlab qolgan hissiyotlar yo harakatga undovchi yoki o`tmishda salbiy kechinmalarga ega bo`lgan harakatlardan saqlab qoluvchi signal sifatida nomoyon bo`ladi. O`zga kishiga hamdard bo`lish qobiliyati, kitob qahramoni bilan birga qayg`urish hissiy xotiraga asoslanadi. OBRAZLI XOTIRA - tasavvurlar, tabiat va hayot manzaralari, shuning bilan birga, tovushlar, hidlar, ta`mlar bilan bog`liq xotiradir. Xotiraning bu turi KO`RISh, eShITISh, TUYISH, HID BILISH va TA`M xotiralaridan iborat bo`ladi. Xotiraning bu turlari turli odamlarda turlicha rivojlangan bo`lib, ko`pchilikda ko`rish va eshitish etakchi rol o`ynaydi. Ammo ba`zi kasblarda va ba`zi ko`rish va eshitish qobiliyatini yo`qotgan kishilarda yaxshi rivojlangan bo`ladi. Ba`zan EYDETIK deb atalgan ("eydos" - yunoncha so`z bo`lib OBRAZ degan ma`noni anglatadi) xotira turiga ega odamlar ham uchrab turadi. Ularda ko`rgan predmetlar, sharoitlar butunligicha, xuddi rasmga tushirib olingandek butun, barcha tafsilotlari bilan eslab qolinadi. Ular shu vaziyatni xuddi hozir idrok qilayotgandek "ko`ra oladilar". SO`Z-MANTIQIY XOTIRAning mazmunini bizning fikrlarimiz tashkil qiladi. So`zlar bo`lmasa fikrlar ham bo`la olmaydi. Shuning uchun ham fikrlarimizga xos xotira shunchaki mantiqiy xotira deb emas, balki SO`Z-mantiq xotirasi deb ataladi. SO`Z- mantiq xotirada ikkinchi signallar tizimi asosiy rol o`ynaydi. Bu xotira turi insongagina xos xotira turidir. Xotiraning bu turi ijtimoiy tajribani o`rganishda, uni keyingi avlodga uzatishda - bilimlarni o`zlashtirishda, tarbiya jarayonida hal qiluvchi o`ringa ega. IXTIYORSIZ VA IXTIYORIY XOTIRA Faoliyat maqsadiga ko`ra xotiraning ixtiyoriy va ixtiyorsiz turlari farqlanadi. Muayyan maqsadsiz biron bir narsani esda olib qolish va eslash, ixtiyorsiz esda olib qolish, ixtiyorsiz ravishda qayta esga tushirish IXTIYORSIZ XOTIRA deyiladi. Biz o`z oldimizga biron maqsad qo`yib esda olib qolganimizda IXTIYORIY XOTIRA haqida gap boradi. Ixtiyoriy ravishda esda olib qolish va esga tushurish jarayonlarida maxsus mnemik ("mneme" lotincha SO`Z bo`lib xotira degan ma`noni anglatadi) harakatlar tarzida amalga oshiriladi. QISQA MUDDATLI VA UZOQ MUDDATLI XOTIRA. OPERATIV XOTIRA. Ma`lum bir materialni esda olib qolish uchun va uni xotirada mustahkamlash uchun u sub`ekt tomonidan tegishli ravishda ishlab chiqilishi lozim. Bunday ishlab chiqish ma`lum miqdorda vaqt talab qiladi. Bu vaqt izlarni KONSOLIDATSIYALASh (lotincha consolidatio so`zidan olingan bo`lib, mustahkamlash degan ma`noni anglatadi) vaqti deb ataladi. Biz ma`lum daqiqa davomida hozir bevosita idrok qilmayotgan narsalarni go`yo ko`rishda, eshitishda davom etamiz (xuddi ko`z o`ngimizda turganday yoki qulog`imizda eshitilayotganday bo`laveradi). Bu jarayonlar beqaror va o`zgaruvchan bo`lib, qisqa muddatli xotira deb nom olgan. Juda ko`p takrorlashlar, qayta tiklashlar natijasida materialni uzoq muddat davomida esda saqlab qolish xarakterli bo`lgan UZOQ MUDDATLI XOTIRADAN farq qilgan holda, qisqa muddatli xotira bir marta hamda juda qisqa vaqt oralig`ida idrok qilish va shu ondayoq qayta tiklashdan so`ng juda qisqa muddatli esda olib qolish bilan xarakterlanadi. Qisqa muddatli xotira atamasi o`rnida adabiyotlarda, ko`pincha, uning turli sinonimlari - "bir lahzalik", "dastlabki", "zudlik", "qisqa vaqtli" va shu kabi atamalar qo`llaniladi. OPERATIV XOTIRA tushunchasi inson tomonidan bevosita amalga oshirilayotgan aktual harakatlar, operatsiyalar uchun xizmat qiluvchi mnemik jarayonlarni bildiradi. Masalan, arifmetik amalni bajarayotganda biz oraliq natijalarni "yodimizda" saqlab turamiz. Ishlatilgan, ishlangan materiallar esa esdan chiqarib yuborilaveradi. Ish tugatilgach ko`pincha barcha informatsiyalar esdan chiqarib yuboriladi. Shu sababli xotiraning bu turini "ishchi" xotira ham deb yuritiladi. XOTIRA JARAYONLARI Xotira turlaridan tashqari ularning jarayonlari ham farqlanadi. Bo`lar esda olib qolish (mustahkamlash), esga tushirish ( aktuallashtirish, qayta tiklash), esda saqlash va unitish jarayonlaridir. ESDA OLIB QOLISh natijasida yangi materialni oldin o`zlashtirilganlari bilan bog`lash orqali mustahkamlanadi. esda olib qolish individ tajribasini yangi bilimlar bilan boyitishning zaruriy shartidir. esda olib qolish tanlovchanlik xarakteriga ega. eslab qolish quyidagilarga bog`liq: - inson faoliyatida aktiv qo`llagan, harakat qilgan narsalarni yaxshi eslab qoladi. - materialni eslab qolish shaxsning motivlari, maqsadlari va faoliyat usullari bilan belgilanadi. Esda olib qolish ham qisqa muddatli va uzoq muddatli, ixtiyoriy va ixtiyorsiz esda olib qolish tarzida bo`ladi. Shulardan ixtiyorsiz va ixtiyoriy esda olib qolishga to`xtalib o`tamiz. Ixtiyorsiz esda olib qolishda material go`yoki "o`z-o`zidan" esda saqlanib qoladi. Bu nimaga bog`liq? O`tkazilgan tadqiqotlarning natijalari shuni ko`rsatadiki, ixtiyorsiz esda olib qolish quyidagi omillarga bog`liq: - material faoliyatning asosiy maqsadining mazmuniga kirsa yaxshi esda qoladi. Agar material faoliyatni amalga oshirishning sharoitlariga, usullariga kirsa yaxshi esda saqlab qolinmaydi. - faol ravishda aqliy ishni yuzaga keltirgan material ixtiyorsiz ravishda yaxshi esda qoladi; - muhim hayotiy ahamiyatga ega bo`lgan, bizda qiziqish va hissiyot tug`dirgan material. Ixtiyoriy esda olib qolish maxsus mnemik harakatlar mahsulidir. Bunda nimani va qanday qilib eslab qolishni aniqlash katta ahamiyatga ega. Bundan tashqari quyidagi omillarni ko`rsatish mumkin: - esda olib qolishning motivi; - esda olib qolishning ratsional (oqilona) usullaridan foydalanish; - tushunish, mantiqiy anglab esda olib qolish; - o`rganilayotgan materialning rejasini tuzish; - taqqoslash; - tizimlashtirish va klassifikatsiya qilish; - obrazli bog`lanishlarga keng suyanish; - qayta esga tushirish; - qismlarga bo`lib va yaxlit takrorlash kabilar. QAYTA eSGA TUShIRISh - ilgari esga olib kolingan materialni aktuallashtirish. Qayta esga tushirishning TANISh, QAYTA eSGA TUShIRISh VA XOTIRLASh kabi turlari farqlanadi. TANISh - qandaydir ob`ektni qayta idrok qilish sharoitida uni qayta esga tushirish. QAYTA eSGA TUShIRISh tanishdan shunisi bilan farq qiladiki, u qayta esga tushirilayotgan ob`ektni qayta idrok kilmay turib amalga oshiriladi. XOTIRLASh - o`tmishdagi obrazlarimizni zamon va makonda lokallashtirilgan holda qayta esga tushirishdan iborat. UNITISh - esda olib qolingan materialni vaqtinchalik yoki butunlay qayta tiklay olmaslik. Unitish turlari: butunlay unitish, qisman unitish, vaqtinchalik unitish. Xotiraning ustunlik qiluvchi tiplariga ko`ra individual farqlar mavjud. Ko’rgazmali obrazli, SO`Z-abstrakt va oraliq tipdagi xotira tiplari farqlanadi. adabiyotlar ro`yxati 1. Bruner D. S. Psixologiya poznaniya. - M., 1977 2. Gamezo M. V., Domashenko I. A. Atlas po psixologii. - M.,1986 3. Gippenreyter Yu. B. Vvedenie v obshuyu psixologiyu. Kurs leksiy. - M., 1996 4. Granovskaya R. M. Elementi prakticheskoy psixologii. SPb, 1997 5. Karimova V. M. Auditoriyada bahs-munozarali darslarni tashkil etishning psixologik texnikasi. - T., 2000 6. Karimova V. M. Psixologiya. - T., 2002 7. Karimova V. M., Akramova F. Psixologiya. Ma’ruzalar matni - T., 2000 8. Nemov R. S. Psixologiya M. 1990 9. Nemov R. S. Psixologiya. - Kn.1. Obshie osnovi psixologii. - M., 1994 10. Nemov R. S. Psixologiya. - V 2-x kn. Kn.1. - M., 1998 11. Nemov R. S. Psixologiya. V 3-x kn. - Kn.1. - M., 1998 12. Psixologiya. Uchebnik. - Pod red. A. Krilova - M., 1998 13. Umumiy psixologiya. A. V. Petrovskiy ta ћ riri ostida. T.1992. 14. www.ziyonet.uz

Похожие

Xotira
Idrok. Xotira
Diqqat va xotira
Tafakkur, xayol va xotira
Psixik jaryonlar. Diqqat, sеzgi, idrok, xotira, tafakkur, xayol