Muomala madaniyati va to‘g‘ri muloqot qoidalari - Педагогиka - Рефераты

Muomala madaniyati va to‘g‘ri muloqot qoidalari

Загружено в:

20.09.2019

Скачано:

0

Размер:

25.8544921875 KB

Muomala madaniyati va to‘g‘ri muloqot qoidalari Reja: 1. Muomala madaniyati. 2. Ichki madaniyat. 3. Iliq muomala va uni tashkil etish yo‘llari. 4. Konfliktdagi muloqot madaniyati talablari.

Muomala madaniyati O‘zbeklar mentalitetida muomala madaniyati ko‘pchilik hollarda o‘zaro salom-alik qilish, ahvol so‘rash, oiladagi ahvol bo‘yicha axborotlarga qiziqish ko‘rsatish kabi ko‘rinishlarda namoyon bo‘ladi. Ammo aslida muomala madaniyati – o‘zga insonga bo‘lgan munosabat madaniyati bilan belgilanadi. Faqat salom-alik qilgandagiga emas, balki hayot tartibida, har kunlik hayot tarzida insonga ko‘rsatiladigan hurmatli va e’zozli, samimiy va to‘g‘ri munosabatni anglatadi. Ichki madaniyatga ega bo‘lgan odamgina har turli vaziyatlarda har qanday boshqa insonga nisbatan doimiy to‘g‘ri, samimiy va aniq munosabat ko‘rsata oladi. Muloqot madaniyati insondan boshqa insonga nisbatan har doim bir tekis munosabat ko‘rsatilishini talab etadi. Qarshingizda turgan odam boymi, qambag‘almi, qishloqlikmi, yoki shaharlikmi, mansabdormi, yoki oddiy o‘qituvchimi, bundan qat’iy nazar unga to‘g‘ri munosabat ko‘rsata olish haqiqiy insonparvarlik mezoni bo‘lib kelgan. Ammo muloqot madaniyati insondan o‘z ustida muntazam ish olib borishni talab etadi. Muloqot madaniyati o‘z o‘zidan vujudga kelib qolmaydi. Hayotda ko‘pincha odamlar orasidagi muloqotda ularning rasmiy, xushomadgo‘y, kibr-havoli munosabatlari shohidi bo‘lamiz. Ba’zan inson yuqori martabaga erishsa, u o‘zini boshqalardan ustunligini ko‘rsatish uchun, ko‘pchilik bilan salom-alik ham qilmay qo‘yadi. Asl madaniyatda esa aksincha, insonning qanchalik martabasi ko‘tarilsa, shunchalik oddiy insonlarga o‘zining yaqinligini ko‘rsatish zarur hisoblanadi. Shu bilan birga muloyimlik, xalimlik, ochiqlik, samimiylik, to‘g‘rilik va boshqa bir necha tamoyillar ulug‘lanadi va targ‘ib qilinadi. Yoki, yigit taraf qudalar qiz tarafdagilarga sal yuqoridan turib, buyruq berib gapirishadi. Boyvuchcharoq qarindoshlar o‘zining moddiy tarafdan muhtoj qarindoshlariga nisbatan kerilib, boshqa tarafdan ularning moddiy tarafidan uyalibroq munosabat ko‘rsatishadi. Bunday vaziyatlarning barchasi – noto‘g‘ri holatlar hisoblanadi. Demak, real hayotda, odam yoshligidanoq muloqot madaniyatiga oid ma’lum insoniy qadriyatlarning buzilayotganligi bilan to‘qnash keladi. Oqibatda, bola

hayotida ikki xil standartlar holati vujudga keladi. Bir tomondan, bola muloyim bo‘lishi lozim. Ikkinchi tarafdan esa, atrofidagi ko‘pchilik odamlar, xatto-ki eng yaqin va xurmatli kishilar ham bu tartib-qoidalarga rioya qilmaydi. Masalan, “so‘kinish” – erkaklar rioya qilmaydigan noto‘g‘ri holat, “qarg‘ash” - ayollar rioya qilmaydigan noto‘g‘ri holat. O‘g‘il bolalar “so‘kinish”ni odatda o‘z otalaridan meros qilib oladilar. Ko‘pchilik “so‘kinish” yomonligi biladi, ammo ishlataveradi. Uning yomon odatligini o‘ylab ham ko‘rmaydi. Uni ishlatganda betarbiya odamlar ichki g‘urur xis qiladi, aslida birovlarni kamsitish, ularni mensimaslik, birovlarga aziyat ulashayotganligini bilmaydi. Ayollar esa ba’zan o‘z farzandlarini “qarg‘ab” turib ularga ish buyuradi, yoki ularni jazolaydi. Aslida ayol kishiga mayinlik, mehribonlik xos bo‘lishi lozimligini ular unutib qo‘yishadi. Agar, haqiqatda ham bolalari bilan biror noxush hodisa yuz bursa, ular kuyinishi aniq. Ammo til hamma narsani ko‘taraveradi deb, og‘izlariga erk berib yuborishadi. Doimiy jerkib, behurmat qilib, faqat o‘zinikini o‘tkazib, bolaning erkini bo‘g‘ib yaxshi hulqli, idrokli, ma’naviyatli, barkamol farzandni tarbiyalab bo‘lmaydi. Demak, muloqot va muomala madaniyatining ham hayotda o‘z o‘rni va ahamiyati mavjud. Shunday qilib, muomala madaniyati nima va konflikt vaziyatlarda mana shu muomala madaniyati talablariga rioya etish ziddiyatni yengishga ko‘mak beradimi, degan savollar dolzarblik kasb eta boshlaydi. Muomala madaniyati bo‘yicha bilimlar ziddiyat ichida tomonlarni bir biriga yaqinlashtirish, ular orasidagi muloqotni yangitdan bir tizimga tushirish, tomonlarning o‘zaro axborot olishlarini yengillashtirish uchun xizmat qiladi. Muomala madaniyati birovni eshitish va birovga o‘z axborotlarini to‘g‘ri yetkazish qaoidalari va tartiblaridan iboratdir. Shu bois, konflikt yechimi tartiblariga muomala madaniyati bo‘yicha ma’lum qoidalar kiritiladi.

Muomalani o‘rganing! Iliq muomala yuzasidan 10 maslahat Odamlar ba’zan bir-birlarini tushunmaydi yoki o‘z o‘y–fikrlarini aniq ifodalay olmaydilar. Ularning bir–birini tushunmasligi esa konfliktga olib kelishi mumkin. Kuyida iliq muomala va qanday qilib hamsuhbatni to‘g‘ri tushunish va unga o‘z o‘ylaringizni aniq anglatish buyicha 10 maslahat keltirilgan. 1. Suhbat uchun qulay, tinch va to‘g‘ri joy tanlash. Muammoni tanaffus paytidagi tor koridorda, darsga ikki minut vaqt qolgan paytda, shovqin orasida, bola yig‘lab turganida, opponentingiz ishga shoshilayotgan vaqtda, u bemor bo‘lganida.... hal etish mushkil. Hamsuhbatingiz va o‘zingiz tinch, hech kim halaqit bermaydigan, ikkalangiz boshqa joyga shoshilmay, bafurja suhbat quradigan joy borligiga amin bo‘ling. Suhbat uchun qulay joy bo‘lsagina, tomonlar orasidagi muloqot uchun sharoit yaratilgan bo‘ladi. 2. Hamsuhbatingizning gaplarini bo‘lmang. Sizning uzluksiz so‘zlashingizni diqqat bilan eshitish mushkul. Shu bois, hamsuhbatingizga ham so‘zlash imkonini bering va uning so‘zlarini bo‘lmay, sabr – qanoat bilan tinglang. Bizning tadqiqotlar shuni ko‘rsatadiki, 30 sekundlik jimlik hali hech kimning joniga tahdid solmagan. 5-10 minutlik jimlik ham hali hech kim o‘limga olib kelmagan. Tinchlaning, 10 minut birovni eshitib, muammoni hal etish, uni har 5 minutda bo‘lib, oxir oqibat hech narsaga ega bo‘lmaslikdan afzaldir. Siz tomoningizdan ko‘rsatilgan sukut bilan eshitish – opponentingizga yo‘naltirilgan “Sening so‘zlaring men uchun muhimdir” degan axborotni o‘zida jamlaydi. Agar siz uning so‘zlarini savollar, jumlalar, kesatiqlar, qochirimlar bilan buzaversangiz – demak, siz o‘z opponentingizda “Sen ham, sening so‘zlaring ham men uchun muhim emas, men o‘zim hamma narsani bilaman, aslida sening so‘zlaring yolg‘on” degan qarashda ekanligingizni namoyon etadi. “Sening so‘zlaring yolg‘on” degan so‘zlarni ishlamasangiz ham bunday harakatlar ana shunday qabul qilinadi. Ammo xissiyotlar, qarashlar, fikrlar, xulosalar odamlar bir tomonga qarasa ham, ya’ni bir narsani muhokama qilsa ham, turlicha bo‘lishi mumkinligi, har bir odamning o‘z xulosalari bo‘lishi mumkinligini biz bilamiz. Demak,

opponentingiz sizdan o‘zgacha qaror va xulosalarga kelgan bo‘lsa, bu – uning yolg‘oni emas, bu uning shaxsiy xulosasidir. Sizning vazifangiz ana shu xulosalarni bilib olib, o‘z xulosalaringiz bilan solishtirish, ular orasidagi umumiylikka tayanishdan iborat bo‘lishi lozim. Sizning ham so‘zlash navbatingiz keladi. Avval eshiting, keyin so‘zlang. Hamsuhbatingizni so‘zlarini bo‘lganda u o‘z fikrlarini jamlay olmaydi, ularda uzilish sodir bo‘ladi, buning oqibatida siz uning asl fikr va qarashlarini betartib qilasiz, xuddi shunday axborotlar sizga betartib keladi, ba’zi muhim bo‘lgan fikrlar hayajon orasida yo‘qolib ham ketadi. Opponentingiz uchun muhim bo‘lgan fikrni jamlab, sizga uzatish - ancha mushkul bo‘lgan vazifa. Siz uning so‘zlarini bo‘lsangiz – mana shu muhim axborotdan mahrum bo‘lib qolishingiz mumkin. Natijada, noto‘g‘ri xulosalarni qilishingiz mumkin. Shu bois, opponentingizning so‘zlarini bo‘lmay, tinch eshitishga odatlaning. 3. Sabr – qanoatli bo‘ling! Ba’zan o‘z fikrini to‘g‘ri ifodalab gap aytish uchun ham vaqt kerak. Nizo ichiga kirganlarga xos bo‘lgan xususiyatlardan biri butun dardini dasturxon qilib, konkret nizoga aloqador bo‘lmagan axborotlarni bir boshdan bafurja bahs jarayoniga tortishdan iborat. Siz – buni bilasiz. Ammo u – buni hali bilmaydi. Chunki u konflikt yechimi borasidagi bilimlarni o‘qimagan. Shu bois, aynan siz sabr va qanoatli bo‘lishingiz talab etiladi. Shu bilan birga, aynan siz, o‘z opponentingizni qanoatli bo‘lishga bahs jarayonida o‘rgatishingiz lozim. Agar mazkur siz muhokama etayotgan savolga aloqador bo‘lmagan axborotlar, kayfiyatlar va xissiyotlar suhbat jarayoniga tortila boshlansa, siz - ovoz, mimika, so‘zlardagi neytrallik va bosiqlik bilan, uni ayblamasdan, opponentingizdan, muhokama etilayotgan masalaga qaytishni iltimos qiling. Ammo u birdaniga o‘z emotsiyalarini muhokama etilayotgan muammoga qarata olmasligi, chetga chiqib ketaverishi aniq. Shu bois, siz bir necha bor, bosiqlik va hurmat bilan, muhokama masalalari doirasida fikr yuritishni talab etasiz. Albatta, nizo ichidagi emotsiyalar nizoning qay darajada chuqurlashib ketganligiga bog‘liq. Shu bilan birga, erkak va ayol psixologik rang-barangligi masalalarini o‘z e’tiboringizga olishga to‘g‘ri keladi. Bizning o‘zbek ayollari, o‘z so‘zlari va

fikrlariga bo‘lgan e’tiborni aslida uncha kutmaydi, shuning uchun biror bir qulay vaziyat vujudga kelsa, bor emotsiyalarini, yig‘i-sig‘i bilan to‘kib soladi. Ular uchun o‘z emotsiyalarini to‘kib solish, siz ularni sukut bilan eshitishingizdan muhimroqdir. O‘zbek ayollarining ko‘pchiligi uchun ularni eshitishning o‘zi juda katta ta’sir etadi. Ularni siz eshitsangiz, ular o‘z dardlaridan forig‘ bo‘lishadi. Chetdan qaraganda, ayollar “ratsional” bo‘lmagan odamlardek tuyuladi. Aslida, bu holat ayollar so‘zlariga bo‘lgan oilalar, jamiyatdagi e’tiborsiz munosabat oqibatidir. Agar mana shunday “ko‘pirib” kelgan emotsiyalarni to‘kib solish, chiqarib tashlash vaziyati vujudga kelsa ham, o‘z opponentingizga uning emotsiyalarining chiqib ketishi uchun imkon yarating. Hayotiy praktikada shunday xolat ko‘pincha yuz beradi-ki, emotsiyalar qattiq stress va ko‘z yoshlari bilan to‘kib solinayotgan vaqtda, siz o‘z qarshingizdagi turgan odamga “tinch, osoyishta” munosabat bildirsangiz, uning o‘zi o‘zini qo‘lga olib, ko‘pincha “ratsional” fikrlash jarayoniga o‘tib oladi. “Ratsional” munosabat jarayoniga o‘tish esa munosabatlarni to‘g‘ri belgilash imkoniyatini, tomonlar manfaatlarini to‘g‘ri baholash imkoniyatini yaratadi. 4. Tana zaboniga quloq soling! Tana zaboni nima ekanligini keyingi boblarda to‘liqroq ko‘rib chiqamiz. Biz suhbat jarayonida faqat so‘zlar bilan axborot ulashmaymiz. Suhbat jarayonida bizning tana harakatlarimiz, mimikamiz, ovozimiz xarakteri (past, tiniq, tinch, osoyshta ovoz, yoki dag‘dag‘a, qo‘pol, tahdidli, agressiv ovoz), bularning barisi muhim ahamiyat kasb etadi va ma’lum bir ma’lumotlarni opponentingiz, yoki o‘zingiz holatingiz va xis-uyg‘ularingiz haqida qarshida turganlarga uzatadi. Shu bois, suhbat jarayonida o‘zingizning va opponentingizning tana zaboniga e’tibor bilan qarab, ularni to‘g‘ri “rasshifrovka” qilish juda muhim. Agar siz nogoh o‘z tana zaboningiz orqali “tahdid” signallarini uzatsangiz, qarshingizdagi odam aynan “tahdid” singallarini qabul qiladi va o‘zi ham sizga qarshi hamlaga o‘tadi. Shu bois, urush va janjal vaziyatida “Sen menga tahdid qildingmi?!” degan savol kelib chiqsa-yu, opponent “Men bunday gap aytganim yo‘q”, desa, demak unda tana zaboni ishlagan bo‘ladi. Tana zabonini

ham tinch, osuda va ratsional muloqotga yo‘naltirish ikki tomon orasida aniq va chegaralangan, faqat zarur bo‘lgan ma’lumotlarning uzatilishi uchun imkon yaratadi. Hamsuhbatingiz aytayotgan so‘zlar sizga befarq emasligini ko‘rsating. U yoqdan bu yoqqa yurmang, barmoqlaringiz bilan stolni chertmang, soatga har zamonda bir qaramang, xonani ko‘zdan kechirmang, uxlab yoki mudrab qolmang, vaqti vaqti bilan “uf”lab ham turmang, ko‘zlaringizni tirnoqlaringizga mixlab ham qo‘ymang, qo‘llaringizni shim cho‘ntagiga solib, undagi narsalarni o‘ynab ham o‘tirmang, sumkangizni ochib, undagi narsalarni ko‘zdan kechirishni keyingi vaqtlarga surib qo‘ying, xullas, suhbatga keldingizmi, suhbatga rozi bo‘ldingizmi, qarshingizdagi insonga e’tiborli bo‘ling hamda o‘zingizni ham nazorat qilib boring. Siz e’tiborli bo‘lsangiz, sizning navbatingiz kelganida, sizga ham e’tiborli bo‘lishadi. 5. Etibor bilan tinglang! Opponentingiz sizni eshitishingizni istaydi. Chunki u so‘zlar orqali o‘z fikri, o‘yi, xissiyotlarini sizga yetkazmoqchi. Qarshingizdagi odam uchun sizning quloq tutib uning so‘zlarini eshitishingiz juda muhim. Siz uni eshitsangiz, u biror bir darajada o‘z hurmati borligiga iqror bo‘la boshlaydi. Cizning e’tibor bilan eshitganingiz uning xissiyotlarini tinchlantiradi. U o‘zining so‘zlash jarayonida “samoanaliz” bilan ham shug‘ullanadi. Bu esa, unga o‘z xissiyotlarini nazorat qilish va anglash uchun ko‘mak beradi. Uning ko‘nglida umid uyg‘onadi. Balki siz gapirmayotgandirsiz, ammo siz e’tibor va diqkat bilan suhbatdoshingizni eshityapsizmi? Boshqalar so‘zlarini eshitish va anglash o‘z suhbat navbatini kutishgina emas, balki undan muhimroqdir. Boshqa odam aytayotgan gaplarga e’tibor bering va uning nuqtai nazarini anglashga urining. Opponentingiz aytayotgan so‘zlar va fikrlar balki sizning fikringiz bilan bir xildadir, ularda o‘ziga xos o‘xshashlik va uyg‘unlik mavjuddir. Uzatilayotgan axborotlarga e’tiborli bo‘lish, ziddiyatlarga nisbatan ogoh bo‘lish alomatidir. Shu bois, birovni eshitish o‘zingni dardingni aytish bilan teng barobarida juda muhim jarayonlardan biridir. Birovni anglash jarayoni uning dardlarini eshitishsiz amalga

oshmasligini esingizda tuting. Uning so‘zlarini bo‘lmay, sabr va qanoat bilan eshitishga harakat qiling. 6. Ma’ruza o‘qimang! Siz bilan suhbatlashganda odamlar o‘z fikr va o‘ylarini sizning ongingiz va qalbingizga yetkazib berish uchun gapiradilar. Agar bu odamlarga sizning maslahatingiz zarur bo‘lsa, ular “Maslahat bering”, deydilar. Agar ularga sizning tanqidingiz yoki tasdiqingiz kerak bo‘lsa, ular o‘zlari sizdan so‘raydilar. Hamsuhbatingiz gaplari uni tarbiyalash uchun bahona bo‘la olmaydi. Umuman biror marta o‘zga odamlarning “Meni tanqid qiling” deb so‘raganlarini eshitganmisiz! Xatto kichkina bolalarni ham “tanqid” qilsangiz, ular sizdan o‘kinib qoladi. Ammo agar siz ularga iliqlik bilan biror narsani o‘rgatsangiz, ular sizdan minnatdor bo‘lib qoladi. Suhbat - birovni tanqid qilish emas. Suhbat shuningdek, birovni “o‘qitib”, “adabini berib qo‘yish” ham emas. Ma’ruza o‘qish qarshingizda turgan odamni sizdan behad darajada uzoqlashtiradi hamda samimiyatni yo‘qotadi. Ma’ruza o‘qish jarayoni xuddi sizning undan ustun ekanligingizni ko‘rsatish, undan aqlliroq ekanligingizni namoyish qilish uchun qilinayotganligini ko‘rsatadi. Maqsad esa boshqa – tomonlar o‘rtasidagi teng va hurmatli munosabatni, bir-birini anglash jarayonini tashkil qilishdan iboratdir. Shunday ekan, ma’ruza o‘qishga berilib ketish, tomonlarni bir biridan ayirishga xizmat qiladi. Agar siz o‘z suhbatdoshingizni o‘zingizdan uzoqlashtirishni maqsad qilib olgan bo‘lsangiz, siz to‘g‘ri usulni tanlagan bo‘lasiz. “Ma’ruza o‘qish”, “tanqid” usulida opponentingiz sizdan uzoq vaqt uzoq yuradi. Ammo siz suhbatga tomonlar orasidagi umumiy yo‘nalishni topib, opponentingiz bilan munosabatlarni yangi tartibda saqlab qolish, ularni tiklash uchun kelgan bo‘lgansiz, umuman “tanqid” va “ma’ruza o‘qish” usullarini qo‘llamaganingiz ma’qul. 7. Ochiq va aniq savollardan foydalaning! Konflikt vaziyatida tomonlar muloqoti imkon darajasida har ikki tomonga tegishli bo‘lgan axborotlarni yig‘ish va tahlil qilish asosiga qurilmog‘i lozim. Aslida konflikt emotsiyalar to‘qnashuvidan axborotlar almashuviga o‘tilishi asosida yechiladi. Shu bois, suhbat, ya’ni muloqot jarayonida ochiq va aniq savollar beribgina siz boshqa inson

sizdan nimani so‘rayotganligini, uning qanday talablari mavjudligi, uning xissiyotlari va xulosalari nimalarga asoslanganligini to‘g‘ri tushuna olasiz. Ammo, ochiq va aniq savollar – nima?! Ochiq va aniq savollar bu - «ha» yoki «yo‘q» so‘zlari javob sifatida ishlatilmaydigan, keng javob bo‘la oladigan, sizning savolingizga opponentingiz har tomonlama to‘liq javob bera oladigan savollardir. Nima uchun ochiq va aniq savollar ishlatilishi lozim?! Chunki siz o‘z opponentingiz borasida keng ma’lumotlarni uning o‘zidan olishingiz lozim. Agar u sizning barcha savollaringizga faqat “ha” yoki “yo‘q” deb javob beraversa, siz opponentingiz haqida juda kam va noaniq ma’lumotlar to‘play olasiz xolos. “Ha” va “yo‘q” javoblari sizga opponentingiz kayfiyati, munosabati, xulosalari, xissiyotlarini to‘la va asosli namoyon qila olmaydi. Shu bilan birga “ha” va “yo‘q” ko‘proq siz shakllantirgan xulosalarga bo‘lgan ijobiy yoki salbiy munosabatni anglatadi. Bunday javoblar – sizning munosabatingizga bo‘lgan noaniq javob bo‘la oladi xolos. YA’ni, opponentingiz xulosalari va xissiyotlari ikkinchi planga o‘tib qoladi. Opponentingiz fikrlarini aniq tasavvur etmaslik esa konflikt yechimi jarayonida noto‘g‘ri xulosalar qilinishiga olib kelishi mumkin. Shu bilan birga, siz ochiq va aniq savollar berish orqali uni qiynayotgan fikr- o‘ylarning tashqariga chiqishiga yordamlashasiz. Opponentingizga shunday savollar berish orkali uning muammolari siz uchun befarq emasligini, siz uning shaxsi va so‘ziga etibor berayotganligingizni ko‘rsatasiz. U – tinchlanadi. U - o‘zining yakka emasligini anglaydi. Unda ishonch hosil bo‘ladi. Ochiq va aniq savollar orqali u o‘z dardlarini gapira boshlaydi. Sizning eshitishingiz esa undagi ishonchni qayta tiklaydi. O‘rtada –ochiq va aniq muloqot o‘rnatilishi uchun asos yaratiladi. To‘g‘ri tashkil qilingan muloqot esa tomonlarni bir biriga yaqinlashtiradi, konflikt va muammoni - bir tomon, ularga qarshi qaratilgan tomonlarni, ya’ni siz va opponentingizni - bir tomon qilinishiga ko‘mak beradi. Ochiq va aniq savollarga kuyidagi misollarni keltirish mumkin: Ochiq va aniq bo‘lmagan savollar: - Sen charchadingmi?! - Sen borasanmi?

- Bolalar yaxshimi?! Ochiq va aniq savollar: - Bo‘lib o‘tgan voqea senga qanday ta’sir o‘tkazdi? Nimalarni o‘ylading, nimalar seni qiynadi?! - Nima uchun sen “sinfdoshlar uchrashuviga” borishga qaror qilding? Sinfdoshlar uchrashuviga borib, nimalarni ko‘rmoqchi va bilmoqchi eding?! - Men ketgandan so‘ng, bolalar nima qildi? Sen ularga mening yo‘qligimni qanday tushuntirding? Ular nima deyishdi? Hafa bo‘lishdimi? Sen o‘zing qanday kayfiyatda bo‘lding? Sen nimalarni o‘ylading?! Bolalar uchun qanday javob tayyorlading?! O‘zing bo‘lib o‘tgan voqea haqida nimalarni o‘ylaysan? Ochiq va aniq yo‘naltirilgan savollarga faqat “ha” yoki “yo‘q” deb javob berib bo‘lmaydi. Albatta, biror holat, yoki vaziyat, yoki xissiyotni to‘la bo‘lmasa ham, kengroq tarzda so‘zlab berishga inson majbur bo‘ladi. Ana shunday vaziyatda siz o‘z opponenetingiz so‘zlarini samimiy e’tibor bilan tinglasangiz, o‘rtada samimiy muloqot uchun sharoit yaratiladi. Shu bilan birga, agar konflikt eng yaqin odamlar o‘rtasida yuz bergan bo‘lsa, oilaviy tashvishlar, farzandlar borasidagi umumiy qarashlar tomonlarni samimiy muloqotga undovchi omillar hisoblanadi. Esingizda bo‘lsin, samimiyat samimiyat yaratadi, yaxshilik yaxshilikni keltirib chiqaradi, kechirimli bo‘lsangiz, sizni ham kechirishadi, iliq munosabat bildirsangiz sizning iliq munosabatgiz ham bejavob qoldirilmaydi. Agar konfliktdan so‘ng tomonlar umuman ajralib ketsa ham, tomonlar o‘zaro hurmat, biri birini xo‘rlamaganlik, biri birini yerga urmaganlik, bir birini nafsoniyatiga tegmaganlik asosida ajraladi. Bu esa – tomonlarni o‘z insoniy nufuzi va qadriyatlarini saqlab qolinishiga imkon yaratadi. 8. Hech narsa taklif qilmang! Nima uchun aynan mana shunday talab qo‘yiladi? Chunki, emotsiyalar va ehtiroslar ichida odam ba’zan so‘zlashga berilib ketib, aslida o‘zida mavjud bo‘lmagan, yoki soniyalik, bir zumlik bo‘lgan xis- tuylarni ifodalab yuboradi. Ana shunday xis-tuyg‘ularni asl xis-tuyg‘ulardan ajrata olish darkor. Siz mavhum va aslida bo‘lmagan mana shunday “aldamchi” xis-

tuyg‘ularga tayanib, noto‘g‘ri xulosalar qilib, biror bir takliflarni kiritsangiz, noto‘g‘ri xulosalar qilgan bo‘lasiz. Masalaning yana bir boshqa muhim tomoni mavjud. Ziddiyat jarayonida sizning takliflaringiz, ular - aqlli, jozibali, ikki tomon uchun qulay bo‘lgan takliflar bo‘lganiga qaramay, emotsiyalar girdobida rad etilishi mumkin. Shu bois, avval emotsional holatni samimiylik va ishonch asosida shakllantirish, undan so‘nggina vaqti soati yetib kelganida, ma’lum takliflarni bosim o‘tkazmasdan taklif etish mumkin bo‘ladi. Shu bilan birga, sizga aytilayotgan so‘zlarning ma’nosi aslida boshqa mazmunda bo‘lishi mumkinligini doimo yodingizda tuting. Sizga uzatilayotgan va ma’lum qilinayotgan axborotni siz to‘g‘ri anglayotganligingizni nazorat qilib boring. Buning uchun opponentingiz so‘zlarini o‘zingiz anglaganingiz tarzida qayta takrorlab, undan qayta so‘rab turing: «Sizni to‘g‘ri tushundimmi?», “Siz shunaqa demoqchimisiz?”, “Sizni to‘g‘ri tushungan bo‘lsam, siz shuni.... nazarda tutyapsiz. To‘g‘ri-mi?!” Bu usullar boshqa odamni to‘g‘ri, adekvat anglashga yordam beradi. O‘zga odamning fikrlarini adekvat, ya’ni ularga jamlangan ma’lumotlarni aynan opponentingizga o‘xshab anglanishigina ziddiyatga bo‘lgan tomonlar munosabatlarini bir biriga yaqinlashtiradi, fikrlar uzviyligiga olib keladi. 9. O‘zingizni nazorat qiling! Ziddiyat jarayoni ko‘pincha tomonlar qalbida va fikrida mavjud bo‘lgan barcha negativ holat va qarashlarni yuzaga olib chiqadi. Shu bois, har ikkala tomon ham qarama-qarshi tomonni hamma nuqsonlarda ayblash, o‘zini esa himoya qilish bosqichidan o‘tadi. Qarama-qarshilik kuchaygan paytda har doim ham boshqalar bizga aytayotgan ba’zi “achchiq”, “adolatli”, shu bilan birga, boshqa bir “bo‘hton”, “yolg‘on”, “amalda bo‘lmagan” so‘zlar bizlarga yoqavermaydi. Ko‘pchilik bunday holatdan “tutoqib” ketadi. Ammo agar siz “yarashish”, “kelishish” pozitsiyasida turgan bo‘lsangiz, tabiiy ravishda ba’zi kompromisslarga borishga to‘g‘ri keladi. Shu bois, har ikkala tomon ham o‘z emotsiyalari qatorida o‘zi ishlatayotgan so‘zlari, amallari, fikrlarini, tana zabonini nazoratda ushlashi talab etiladi. O‘zingizni nazorat qila olsangizgina, o‘zga insonni nazorat qilish uchun vaziyat yaratiladi. Boshqa odam o‘z so‘zini tugatmagunchacha, uning so‘zini bo‘lmay eshiting. Agar bu odamdan jahlingiz

chiqayotgan bo‘lsa, «men – tasdiqlar” tizimini qo‘llang. Bu usul sizning his tuyg‘ularingizni birovga yetkazishga imkon beradi. Jahlga jahl bilan javob qaytarish konfliktni kuchurlashtirib yuborishini doimo esda tuting. Agressiyaga qarshi agressiya bilan javob qaytarmang. O‘zingizni nazorat qiling, bu esa opponentingiz fikrlari va amallarini nazorat qilish, uni to‘g‘ri xulosalarga yo‘naltirish, opponentingizga ta’sir o‘tkazish uchun imkon yaratadi. Keyinroq, ya’ni siz jahldan tushganda, suhbatni davom ettirishni so‘rang. 10. Birovning nafsoniyatiga tegmang ! Har inson o‘zicha bir olam hisoblanadi. Har bir inson, uning ilmi, bilimi, madaniyati, shaxsiyati va ijtimoiy mavqeidan qat’iy nazar o‘ziga ma’lum bir ijobiy daraja bilan munosabat bildirishga bolalikdan o‘rgangan bo‘ladi. Shu bois, insonning o‘ziga nisbatan qadrli va e’zozli munosabatda bo‘lishi tabiiy hol hisoblanadi. Masalan, konkret inson, xotin va yoki kelin sifatida sizning talablaringizni aniq bir vaziyatda qoniqtirmayotgan bo‘lishi mumkin, ammo aynan mana shu inson qiz, farzand, ona, mutaxassis sifatida o‘z oilasi va jamoasining juda katta hurmatiga loyiq bo‘lishi ham mumkin. Yoki aynan mana shu konkret inson, ota va er sifatida o‘z xotinida ba’zi e’tirozlarni uyg‘otishi mumkin, ammo mana shu erkak o‘z ish joyida, o‘z oilasi va yaqinlari o‘rtasida juda katta hurmat bilan tilga olinishi mumkin. YA’ni, siz “yomon” deb o‘ylayotgan yaqin odamingiz, u er, xotin, aka, uka, qarindosh, hamkasaba, ota- ona, boshliq sifatida sizning talablaringizga javob bera olmagani, hech zamonda mazkur insonni batamom “yomon otliq” qilib qo‘yish uchun asos bo‘la olmaydi. Inson xarakteri turli vaziyatlarda o‘zini turlicha namoyon qiladi. Balki “ayb” o‘zingizdadir, talablaringiz haddan ziyod ortiqdir, ularni bajarib bo‘lmas, balki “gap” opponentingizda emas, balki o‘zingizning xarakteringizda yashiringandir. Balki “janjallarni” o‘zingiz keltirib chiqarayotgandirsiz. Bu haqida samimiy o‘ylab ko‘rish, vaziyatga xolis baho berish lozim. Har holda, sizning opponentingiz sizga qanchalik yaqin yoki uzoq bo‘lishiga qaramay, insonning nafsoniyatiga tegadigan piching, qochirim, kesatik, dag‘al, qo‘pol so‘zlarni ishlatib bo‘lmaydi. Insonning nafsoniyatiga tegadigan gaplarni ziddiyatda mutlaqo ishlatib bo‘lmaydi. Nafsoniyatga tegadigan so‘zlarni ishlatish hali biror bir ziddiyatni yechimga olib

kelmaganligini esingizda tuting. Har bir insonning shaxsiyatiga tegadigan gaplar muomala va suhbatni qiyinlashtiradi, orani buzadi, tomonlarni bir biridan ayiradi, dillarni og‘ritadi, alamlarni vujudga keltiradi. Ammo, agar siz yuqorida ko‘rib chiqilgan «Adolatparvarlik mezon»lariga amal qilsangiz iliq va samimiy suhbat uchun imkon yaratiladi.

Shunday qilib, konfliktdagi muloqot madaniyatining kuyidagi talablari mavjud: 1. Suhbat uchun qulay, tinch va to‘g‘ri joy tanlang 2. Hamsuhbatingizning gaplarini bo‘lmang 3. Sabr – qanoatli bo‘ling 4. Tana zaboniga quloq soling 5. Etibor bilan tinglang 6. Ma’ruza o‘qimang 7. Ochiq va aniq savollardan foydalaning 8. Hech narsa taklif qilmang 9. O‘zingizni nazorat qiling 10. Birovning nafsoniyatiga tegmang

Adabiyotlar : 1. Karimova S . Kompozitsion mukammallik yo ` lida // O ` zbek tili va adabiyoti .- 1991.-№6.- B .54-58 2. K . Turdiyeva . Asar syujeti va kompozitsiyasi haqida // Til va adabiyot ta ` limi 2001-№3. B. 23-27. 3. Qurbonov T. Portret yaratish uslubi haqida//O`zbek tili va adabiyoti.-1996.- №5.-B.47 4. Zarubejnaya estetika i teoriya literaturi XIX-XX vv.-M.,1987 5. Jirmunskiy V. Teoriya stixa.-L.,1975 6. Uspenskiy B. Poetika kompozitsii.-M.,1970

Похожие

Pedagogik mahorat va muomala madaniyati

O’qituvchi va o’quvchi o’rtasidagi muomala madaniyati

O'qituvchi faoliyatida muloqot madaniyati va psixologiyasi

O’qituvchi faoliyatida muloqot madaniyati va psixologiyasi

O’qituvchi faoliyatida muloqot madaniyati. O’qituvchi va o’quvchining muloqoti