Unli qandolat mahsulotlari texnologiyasi - Пищевая технология - Рефераты

Unli qandolat mahsulotlari texnologiyasi

Загружено в:

05.05.2023

Скачано:

0

Размер:

83 KB

Unli qandolat mahsulotlari texnologiyasi Reja: 1. Pechenyelar texnologiyasi. 2. Priyaniklar texnologiyasi. 3. Pirojni va tortlar texnologiyasi

Pechenyelar texnologiyasi. Pechenyelar unli qandolat mahsulotlarining eng ko‘p tarqalgan turlaridan biridir. Pechenyelar tayyorlash uchun a’lo, 1-chi, 2-chi navli bug‘doy unlari ishlatiladi. Shuningdek, undan xamir tayyorlashda qand, yog‘, sut mahsulotlari va kimyoviy ko‘pchituvchi modda-karbonat kislotasining natriyli tuzi (N а 2 CO 3 ) qo‘shiladi. Pechenyelar retsepturasiga va tayyorlash usuliga qarab qandli, cho‘ziluvchan xamirdan tayyorlangan va ko‘p miqdorda yog‘, tuxum, sut qo‘shib tayyorlangan (shirmoy) pechenyelarga bo‘linadi. Pechenye tayyorlash. Pechenyelarni tayyorlash quyidagi texnologik jarayonlarni o‘z ichiga oladi: asosiy va qo‘shimcha xom ashyolarni aralashtirish uchun tayyorlash, xamir qorish, yoyish va xamirni yetiltirish, shakl berish, pishirish, sovitish va tayyor mahsulotni qadoqlash va joylashtirish. Xamirni qorish maxsus mashinalar yordamida bajarilsa, dastlab shakar, suv, yog‘, sut va boshqa qo‘shimcha xom ashyolardan emulsiya tayyorlanib, so‘ngra un qo‘shib xamir tayyorlanadi. Qand va yog‘larning miqdori, xamir qorish sharoitlari qandli va cho‘ziluvchan pechenyelar xamirining xossalarining har xil bo‘lishini ta’minlaydi. Qandli pechenyelar uchun xamir tayyorlashda xamirga ko‘p miqdorda shakar va yog‘ qo‘shilib, xamirning namligi ko‘p bo‘ladi hamda xamir qorish nisbatan pastroq haroratda, uzoq bo‘lmagan muddatda olib boriladi. Bu esa un oqsili kleykovinasining kamroq bo‘lishini, xamirning mo‘rtligini ta’minlab, berilgan shakllarning yaxshi saqlanishiga olib keladi. Cho‘ziluvchan pechenyelar uchun xamir qorilganda esa xamir elastik xossalarga ega bo‘lishi uchun un oqsili kleykovinasining to‘la bo‘kishi uchun sharoit yaratish zarur. Buning uchun esa shakar va yog‘ kamroq solinib, xamirning namligi baland bo‘lishi, yuqori haroratda, uzoq muddatda xamir qorilishi ta’minlanadi. Masalan, qandli pechenyelar uchun xamir qorish 19-25 0 С da 10-15 minut davomida olib borilsa,

cho‘ziluvchan pechenyelar uchun esa 27-30 0 С da 30-60 minut davomida olib boriladi. So‘ngra qorilgan xamir juvalar orasidan o‘tkaziladi. Cho‘ziluvchan pechenyelar tayyorlashda xamir qat-qat, cho‘ziluvchan xususiyatiga ega bo‘lishi uchun bir necha bor juvalanadi. Xamir juvalangandan keyin maxsus mashinalarda donalarga bo‘linib, ularga shakl beriladi va rasm solinadi. Cho‘ziluvchan xamirdan pechenye tayyorlashda pechenyening yuzasi ko‘pchib ketmasligi uchun namparlanadi. Pechenyelar uzluksiz ishlaydigan gaz pechkalarida 240-270 0 С da 4-6 minut davomida pishiriladi. Pechenyelar pishirilishi jarayonida xamirda xilma-xil o‘zgarishlar ro‘y beradi. Kraxmalning kleysterizatsiyalanishi, oqsillarning denaturatsiyalanishi, qandning qisman parchalanishi, kraxmalning dekstringa aylanishi, melanoidlarning hosil bo‘lishi, xushbo‘y hid va ta’mning, och-qo‘g‘ir rangning hosil bo‘lishi va hokazolar bunga misol bo‘la oladi. Yuqori temperaturada NaHCO 3 ning parchalanishi natijasida СО 3 va NH 3 singari gazsimon mahsulotlar ajralib chiqadi. Bu esa xamirning ko‘pchishi va pechenyelar ichida g‘ovakliklarning paydo bo‘lishini ta’minlaydi. Pishirilgan pechenyelar sovitiladi, keyin sifati tekshirilib, qog‘ozlarga o‘raladi va joylanadi. Pechenyelar assortimenti. Pechenyelarning assortimenti ularning retsepturasi, ishlatilayotgan uning turi, naviga qarab va xamir tayyorlash usuliga qarab xilma- xildir. Qandli pechenyelar eng ko‘p assortimentda ishlab chiqariladi. A’lo navli bug‘doy undan tayyorlanadigan Apelsinovoye, Otradnoye, Molochnoye, Diye- ticheskoye, Limonnoye, 1-navli undan tayyorlanadigan Sadko, Chaynoye, Shaxmat-noye, Selinnoye, Drujba, Leto, Solnechnoye, 2-navli undan tayyorlanadigan Novost, Kombayner, Severnoye pechenyelari shular jumlasidandir. Cho‘ziluvchan xamirdan tayyorlanadigan pechenyelarda qand va yog‘ miqdori qandli pechenyelarga nisbatan kamroq bo‘lib, ular zichroq strukturaga ega bo‘lib,

kamroq bo‘kadi va uvalanmaydi. Bu pechenyelarning yuzasi silliq, oddiy naqshli, och sariq rangda bo‘ladi. A’lo sortli bug‘doy unidan tayyorlanadigan Avrora, Moskva, Mariya, Shkolnoye, Novoye, Tomatnoye, 1-navli bug‘doy unidan tayyorlanadigan Smes №1, Ukrainskoye pechenyelari kabilar cho‘ziluvchan xamirdan tayyorlangan pechenyelarga kiradi. Shirmoy pechenyelar qandli va cho‘ziluvchan pechenyelardan tarkibida qand, yog‘, tuxum va sut mahsulotlari miqdorining ko‘pligi bilan ajralib turadi. Bu pechenyelar ishlab chiqarish uchun asosan a’lo navli bug‘doy uni ishlatiladi. Shirmoy pechenyelarning o‘lchamlari kichkina, xilma-xil shaklda bo‘lib, yuzasi mag‘iz, yong‘oq, shokolod, mayiz va boshqa mahsulotlar bilan bezatilib ishlab chiqariladi. Kreker (quruq pechenye). Kreker tashqi ko‘rinishi qat-qat strukturasi bo‘yicha cho‘ziluvchan xamirdan tayyorlangan pechenyelarga juda o‘xshash bo‘lsada, ulardan tarkibida qand bo‘lmasligi va xamir tayyorlashda xamirturush ishlatilishi bilan ajralib turadi. Krekerlarni ovqatlanishda non o‘rnida ishlatish ham mumkin. Tayyorlash usuliga va tarkibiga qarab krekerlar xamirturush solingan yoki xamirturush ham kimiyoviy ko‘pchituvchi modda qo‘shilgan (Zdorovye, Molodost, Moskovskiy, Stolovoye) ziravorlar qo‘shilgan, (pishloq, anis, tuz va boshqalar) guruhlariga bo‘linadi. Galetlar. Galetlar tarkibida namlik juda kam bo‘lgan, uzoq saqlana-digan, ekspeditsiyaga chiquvchilar va sayyohlarga mo‘ljallangan quritilgan unli qandolat mahsuloti hisoblanadi. Tarkibiga qarab galetlar oddiy, boyitilgan, parhezbop turlariga bo‘linadi. Oddiy galetlar qand va yog‘ qo‘shmasdan bug‘doy unining 1- chi va 2-chi navlaridan tayyorlanadi. Boyi-tilgan galetlar bug‘doy unining a’lo navidan yog‘ qo‘shib ishlab chiqariladi. Parhezbop galetlar tarkibida shakar va yog‘ ko‘p bo‘lgan turlariga bo‘linadi.

Priyaniklar texnologiyasi. Pryaniklar shirin, ziravor ta’mga ega bo‘lib bug‘doy yoki bug‘doy-javdar unidan qand, kimyoviy ko‘pchituvchi moddalar va har xil ziravorlar qo‘shib tayyorlanadigan qandolat mahsuloti hisoblanadi. Ular pechenyelardan tarkibida ko‘p miqdorda qand (45 foizgacha), suv (12-14 foiz) va har xil ziravorlar borligi bilan farq qiladi. Ba’zi bir pryaniklarga qanddan tashqari asal, kraxmal shinnisi (patoka), yog‘, tuxum, mag‘iz kabi qo‘shimcha xom ashyolarni ham ishlatish mumkin. Pechenyelarga maxsus hid va ta’m berish uchun xamirga ziravorlar - muskat yong‘og‘i, kardomon, arpabodiyon, zira, zanjabil, kashnich, vanilin va boshqalar qo‘shiladi. Pryaniklar tayyorlash. Pryaniklar xamir tayyorlash usullariga qarab oddiy va qaynatilgan pryaniklarga bo‘linadi. Oddiy pryaniklar tayyorlashda xamir bir yo‘la qoriladi. Bu usulda ziravorli sharbatga un va kimyoviy ko‘pchituvchi moddalar qo‘shib qorilib xamir tayyorlanadi. Xamirning namligi 23,5-25,5 % ni tashkil etadi. Qaynatilgan pryaniklar uchun xamir tayyorlash uch bosqichda olib boriladi. Birinchi bosqichda 85-950S haroratga ega bo‘lgan shakar-kraxmal shinnisi yoki shakar-asal sharbatiga un aralashtirib qoriladi. So‘ngra mahsulotning yaxshi va o‘ziga xos ta’mga ega bo‘lishini ta’minlash uchun bir necha kun 10-150S haroratga ega bo‘lgan xonalarda saqlanadi. Keyin esa xamirga kimiyoviy ko‘pchituvchi, ziravorlar va boshqa xom ashyolar qo‘shib, yaxshilab qoriladi. Bu yerda tayyor xamir 20-22 % namlikka ega bo‘lishi kerak. Tayyor xamir yupqa qilib yoyiladi, so‘ngra qo‘lda yoki maxsus mashinalarda ularga shakl beriladi. Pryaniklar maxsus gaz pechkalarida 200-2400S da 6-12 minut davomida pishiriladi. Pishirilgan pryaniklar shakar sharbati yordamida sirlanadi, ba’zi hollarda esa shakar, yong‘oq mag‘zi sepiladi. Bunday ishlov berish pryaniklarning mazasini oshirib, ularga yaxshi chiroy beradi va qurib qolishdan saqlaydi. So‘ngra pryaniklar sovutilib, joylanadi.

Pryaniklarning assortimenti. Oddiy va qaynatilgan pryaniklarning assortimentini ularni ishlab chiqarish uchun ishlatiladigan unlarning navlari va pryaniklarning tarkibi harakterlaydi. Oddiy pryaniklar bug‘doy unining a’lo, 1-chi va 2-chi navlaridan tayyorlanadi. A’lo navli undan tayyorlanadigan pryaniklarga Myatniye, Limonniye, Vanilniye, Tulskiye, 1-chi navli undan ishlab chiqariladigan pryaniklarga Moskovskiye, Sportivniye, Banan, Osenniye kabi pryaniklar kiradi. Qaynatilgan xamirdan tayyorlanadigan pryaniklar to‘qroq jigar rangli, ularda o‘ziga xos yoqimli hid yaqqol sezilib turadi, oddiy pryaniklarga nisbatan sekinroq qurish va qotish xususiyatiga egadir. Qaynatilgan pryaniklar asosan 1navli undan, ba’zan esa a’lo va 2-chi navli unlardan ham ishlab chiqarilishi mumkin. A’lo navli undan ishlab chiqariladigan Lyubitelskiye, Nevskiye, 1-chi navdan ishlab chiqariladigan Zagorskiye, Saxarniye, Medoviye, Fruktoviye, Russkiye, 2- chi navdan ishlab chiqariladigan Karelskiye, Rumyaniy, Linda pryaniklari shular jumlasidandir. Qaynatilgan xamirdan pryanikka nisbatan nami ko‘proq va shakari kamroq bo‘lgan kovrijka deb ataluvchi unli qandolat mahsuloti ham ishlab chiqariladi. Vafli. Vafli kichik g‘ovakli yaproqchalar, stakanchalar, chig‘anoqlar va boshqa shakllardagi yengil, yuzasi naqshlangan unli qandolat mahsulotidir. Ba’zi vaflilar shokolad bilan sirlangan holda ham chiqarilishi mumkin. Vaflilarni ishlab chiqarish xamir tayyorlash, vafli yaproqchalarini pishirish, nachinka tayyorlash, nachinkani vafli qatlamlariga joylashtirish, kesish, o‘rash va joylash kabi texnologik jarayonlarni o‘z ichiga oladi. Vafli xamiri suyuq bo‘lib (suvning miqdori 63-68 %), bu xamirni uzluksiz ishlaydigan maxsus xamir qoriydigan mashinalarda yog‘, shakar, kimyoviy ko‘pchituvchi moddalar, sut, tuz, essensiyalar va boshqa qo‘shimcha xom ashyolardan tayyorlangan emulsiyaga a’lo navli un qo‘shib ishlov berish yo‘li bilan olinadi. So‘ngra suyuq xamir vafli qoliplariga quyilib 1700S haroratda 1-3 minut davomida pishiriladi. Xamir tarkibidagi suvning tezda bug‘lanishi vafli yaproqchalarining juda g‘ovak bo‘lishiga olib keladi. Sovutilgandan keyin vafli

yaproqchalari orasiga nachinkalar joylanib, ko‘p qavatli vafli varaqalari ma’lum muddatga qo‘yiladi va kesuvchi mashinalarda ma’lum shakl va hajmda kesilib, joylanadi. Vafli assortimenti. Vaflilar nachinkasiz va nachinkali bo‘lishi mumkin. Nachinkasiz vaflilar tarkibida qand, yog‘, tuxum mahsulotlari ko‘p bo‘lgan shirmoyli xamirdan tayyorlanadi. Nachinkali vaflilar keng tarqalgan bo‘lib, ularning assortimenti xilma-xildir. Vaflilarning nachinkasi pomadali, kremli, sutli, mevali, yong‘oqli, yog‘li, pomadali-mevali, shokoladli bo‘lishi mumkin. Krem nachinkali vaflilar essensiyasining turiga qarab Ananasniye, Apelsinoviye, Limonniye, Yagodniye nomlari bilan chiqariladi. Yong‘oq nachinkali vaflilarga Rakushki, Orexoviye vaflilarini kiritish mumkin. Pirojni va tortlar texnologiyasi Pirojniylar va tortlar yuqori to‘yimlikka ega bo‘lgan xilma-xil tarkibli, chiroyli naqshlar bilan bezatilgan unli qandolat mahsulotlari hisoblanadi. Ularni tayyorlash uchun undan tashqari ko‘p miqdorda yog‘, shakar, tuxum mahsulotlari va boshqa xilma-xil qo‘shimcha masalliqlar talab etiladi. Bu mahsulotlar tez buziluvchan bo‘lganligi uchun ishlab chiqarilgan joylarda tezda sotilishi kerak. Tarkibi, tayyorlanish jarayonlari bo‘yicha pirojniy va tortlar bir-biriga o‘xshash bo‘lsada, tortlar katta o‘lchamda bo‘lib, ularga naqsh berish juda murakkabligi bilan ajralib turadi. Pirojniy va tortlar tayyorlash asosan quyidagi uch bosqichni o‘z ichiga oladi: xamir tayyorlanib, tort yarim fabrikatini pishirib olish; naqsh berish uchun yarim fabrikatlar tayyorlash; naqsh berish uchun tayyorlangan yarim fabrikat bilan pirojniy va tortlarni bezash; ularga naqsh berish. Tarkibi va ishlab chiqarish jarayonlariga ko‘ra pishirilgan yarim fabrikatlar biskvitli, qumoqli, qat-qat, qaynatilgan, oqsil bilan ko‘pirtirilgan, qandli va hokazo xillarda bo‘lishi mumkin.

Biskvitli yarim fabrikat ko‘pirtirilgan biskvitli xamirdan tayyorlanadi. Biskvit tayyorlash uchun tuxum melanjiga shakar, un, kraxmal qo‘shib quvlanadi, hosil bo‘lgan smetanaga o‘xshash xamir qoliplarga quyilib pishiriladi va sovitiladi. So‘ngra sovitilgan, namligi 20-24 % bo‘lgan yarim fabrikat kesilib, unga xushbo‘y shakar sharbati beriladi va bezatiladi. Qumoq-qumoq yarim fabrikat yuqori miqdordagi yog‘, tuxum, shakar va kimyoviy ko‘pchituvchi modda solingan plastik xamirdan tayyorlanadi. Xamir yupqa qilib yoyiladi va tegishli metall qoliplarga solinib shakl beriladi va pishiriladi. Xamir tarkibida yog‘, shakar, tuxum ko‘p bo‘lganligi sababli yarim fabrikat yumshoq bo‘ladi va sal ta’sir natijasida ham uvalanib ketishi mumkin. Rangi sariq, och qo‘ng‘ir tusda bo‘ladi. Qat-qat yarim fabrikat yuqori elastiklikka ega bo‘lgan xamirdan tayyorlanadi. Unni qorish paytida tuxum mahsulotlari, ozuqaviy kislotalar qo‘shiladi. Bu kislotalar un kleykovinasining bo‘kishini va elastikligini oshirishga olib keladi. So‘ngra xamir yupqa qilib yoyiladi va xamir orasiga 15 % un qo‘shilib, sovutilgan sariyog‘ surtiladi. Yog‘ qatlami xamirning uchlari bilan yopiladi va ko‘p marta buklanib, sovitiladi va yoyiladi. Bu jarayon bir necha marta takrorlanib qatlam- qatlam hosil qilinadi. Keyin xamirning yuziga tuxum sarig‘i surilib, qoliplarga solinib 215-2500S da pishiriladi. Pishirilgan yarim fabrikat sovutilib, bezak beriladi. Qaynatilgan yarim fabrikat kuchli kleykovinali unni suv, yog‘, tuzdan iborat qaynab turgan aralashmaga qorilib-qaynatilib va ko‘p miqdordagi melanj bilan yaxshilab aralashtirib tayyorlangan xamirdan olinadi. Bu xamirga mashinalarda va qo‘lda shakl beriladi va pishiriladi. Xamir pishishi vaqtida halqa, nay shaklidagi yarim fabrikatning ichi bo‘sh bo‘lib pishadi. Ana shu bo‘shliqqa yarim fabrikat sovigandan keyin krem tiqiladi. Oqsilli-ko‘pirtirilgan yarim fabrikat un qo‘shmasdan tayyorlanadi. Sovutilgan tuxum oqiga asta-sekin shakar qo‘shib kuvlanadi.Aralashma kuvlanganda orasiga havo kirib g‘ovak bo‘lib qoladi. Bu xamirga tezda yog‘ surilib, listlarga qo‘yiladi va 110-1350S da pishiriladi.

Pishirilgan yarim fabrikatlarga bezak berish uchun va yoqimli ta’m berish maqsadida har xil yarim fabrikatlar ham tayyorlanishi zarur. Bezak berish uchun ishlatiladigan bunday yarim fabrikatlar asosan kremlardir. Kremlar asosan sariyog‘li, qaymoqli, tuxum oqidan tayyorlangan, qaynatilgan va pishloqlardan tayyorlangan bo‘ladi. Sariyog‘li krem sariyog‘ni qand upasi bilan aralashtirib kuvlanadi, kuvlash oxirida vanil kukuni, konyak yoki kuchli desert vinolari solinib pishitilgan yarim fabrikatdir. Sariyog‘li kremlar ham o‘z vaqtida tuxum, sut, meva sharbatlari ishlatilishiga qarab har xil bo‘ladi. Kremlarning hammasi ham tez buziluvchan mahsulot bo‘lganligi sababli tayyorlangandan boshlab 5 soat ichida ishlatilishi zarur. Qaymoqli kremlar 35 foiz yog‘lilikka ega bo‘lgan toza, yangi qaymoq-lardan olinadi. Bunday kremlarni tayyorlash uchun qaymoq 20S gacha sovuti-lib, past haroratda qand pudrasi bilan 20-25 minut davomida kuvlanadi. Qaynatilgan krem olish uchun un 105-1100S da qovurilib, so‘ngra 5 minut davomida 950S haroratga ega bo‘lgan shakar-sutli qiyomda qaynatiladi. Bu kremlarda namlik yuqori, sut va tuxum borligi uchun mikroorganizmlar tezda rivojlanib achib qolishi mumkin. Shu sababli qaynatilgan kremlarni tezda ishlatish zarur. Tuxum oqidan qilingan kremlar sovitilgan tuxum oqiga shakar sharbati qo‘shib, 80-900S da pishirilgan ko‘piksimon massadir. Pishloqli kremlar eritilgan pishloqlarni sariyog‘ va sut yordamida kuvlash yo‘li bilan olinadi. Shuningdek, bezak beruvchi yarim fabrikatlar o‘rnida shakar sharbati, yong‘oq, sukatlar, shokolad, mevalar, pirojniy va tort uvoqlari ham ishlatilishi mumkin. Pirojniy va tortlarning assortimenti. Pishirilgan va bezak berish uchun ishlatiladigan yarim fabrikatlarning turiga qarab pirojniy va tortlar ham xilma- xildir. Ularning assortimenti quyidagi jadval ma’lumotlarida keltirildi.

1-jadval Pirojniy va tortlarning assortimenti Пиширилган ярим фабрикатнинг тури Ассортименти пирожнийлар Тортлар Бисквитли Полоска, Риголетто, Бисквитное, Желейное Сказка, Осень, Кофейний, Москвичка, Березка, Трюфель Қат-қат Кремли слойка, Спортивний, Яблочний, Муфточка, Наполеон Қат-қат кремли Қумоқ-қумоқ Кольцо желейное, Грибок, Краковское, Корзиночка Песочно-фруктовий, Абрикотин, Ленинградский, Московский Қайнатилган Эклер, Орешек, Заварное кольцо, Заварная трубочка - Оқсилликўпиртирилган Грибок, Ланда, Белковосбивное День и ночь, Полет, Киевский, Птичье молоко Бодомли Миндальное, Варшавское, Ореховое Идеал, Большой театр, Миндально-Фруктовый Pirojniy va tortlarning sifatiga talablar. Pirojniy va tortlarning shakli va bezagi xilma-xil bo‘lishi, biroq mahsulotning ish turiga mos bo‘lishi, ezilgan, darz ketgan, qing‘ir-qiyshiq joylari bo‘lmasligi kerak. Yon sirtlari bezak berish uchun ishlatiladigan yarim fabrikatlar bilan to‘la qoplangan bo‘lishi zarur. Kesilgan joyida aralashmagan va pishmagan xamir bo‘laklari bo‘lmasligi va qatlamlari bir tekisda joylanishi kerak. Mahsulotlarning yuzasidagi naqshlar chiroyli, aniq bo‘lishi, bezak yarim fabrikatlarga bir tekisda surilgan bo‘lishi kerak. Agar yarim fabrikatlarning yuzasiga shokolad, pomada, marmelad surilgan bo‘lsa, mahsulot yuzasi yaltiroq bo‘lishi, oqarib qolgan dog‘lari bo‘lmasligi kerak.

Pirojniy va tortlarning ta’mi va hidi o‘ziga xos, yoqimli, begona ta’m va hidlarsiz bo‘lishi kerak. Yoqimsiz, begona, achigan yog‘larga xos ta’mga va hidga ega bo‘lgan mahsulotlar sotishga ruxsat etilmaydi. Pirojniy va tortlarda namlik, yog‘ va qand moddalarining miqdori standartlarda yarim fabrikatlar uchun belgilanadi va tasdiqlangan retsepturaga mos kelishi kerak. Kekslar tarkibida ko‘p miqdorda yog‘, melanj, qand bo‘lgan shirmoyli xamirdan tayyorlanadi. Kekslar retsepturasining asosiy farqi shundaki, bu mahsulotlarni ishlab chiqarishda xamirga uzum, sukatlar, bodomlar qo‘shiladi. Kekslar uchun xamir kimyoviy ko‘pchituvchi moddalar yordamida kuvlash yo‘li bilan tayyorlanadi. Xamir maxsus qoliplarga solib pishiriladi. Kekslar yuzasi qand upasi, sharbatlar, sukatlar yordamida bezaladi. Ruletlar. Ruletlar biskvitli xamirdan tayyorlanadi. Dastlab xamir yoyiladi, so‘ngra pishiriladi. Pishirilgan xamir ustiga mevali, kremli va boshqa nachinkalar surilib, rulet shaklida o‘raladi. Ruletlar donalab va tarozida tortib sotilishi mumkin.

Adabiyotlar: 1. O’zlem Tokuso’g’lu. Barry G.Swanson. «Inproving Food Quality with Novel Food Processing Technogies». Edited by.Taylor end Francis Group. 2015. p. 485. 2. Food and raw materials. Kemeraovo institute of food science and texnology. 2015, p. 145. 3. Vasiyev M.G‘., Dadayev Q.O. va boshqalar. Oziq-ovqat texnologiyasi asoslari. –T.: “Voris-Nashriyot”, 2012. - 400 b. 4. 4.Yo’ldoshev N., Kadirxodjayeva N. Ishlab chiqarish tehnologiyalari. Darslik. 2014yil.- 350 bet. 5. Adizov R.T., G‘afforov A.X. Xusenov S.Y. Donni tozalash va maydalash texnologiyasi. –T.:” TURON-IQBOL” nashriyoti, 2006. -184 b. 6. Amonova Z.M. Sut va sut mahsulotlari texnologiyasi. –T.: Cho‘lpon, 2004. 132 b. 7. Boboyev S.D., Adizov R.T., Ergasheva X.B. Omixta yem ishlab chiqarish.-T.: O‘zbekiston, 2003. -280 b.

Похожие

Karamel mahsulotlari texnologiyasi

Makaron mahsulotlari texnologiyasi

Achitilgan sut mahsulotlari texnologiyasi

Kolbasa va kolbasa mahsulotlari ishlab chiqarish texnologiyasi

Sanoatda ishlatiladigan xom-ashyolar va materiallar